মূল পৃষ্ঠা / কৃষি / ৰেচম শিল্প / মুগা খোলা সিজোৱা আৰু মুগা সূতা কটা পদ্ধতি
অংশিদাৰী
Views
  • স্থিতি: সম্পাদনাৰ বাবে মুকলি

মুগা খোলা সিজোৱা আৰু মুগা সূতা কটা পদ্ধতি

মুগা খোলা সিজোৱা আৰু মুগা সূতা কটা পদ্ধতি

মুগাশিল্প অসমৰ এটি ডাঙৰ গৌৰৱ ৷ গোটেই পৃথিৱীৰ ভিতৰত কেৱল ভাৰতৰ উত্তৰ পূৰ্বাঞ্চল বিশেষকৈ অসমত এই সোণালী ৰঙৰ মুগা সূতা উৎপন্ন হয় ৷ সকলো ৰেচমৰ ভিতৰতে ই মূল্যৱান ৷ দেশৰ অৰ্থনৈতিক উন্নতিত এই শিল্পৰ প্ৰসাৰণে যথেষ্ট অৰিহণা যোগাব পাৰে যদিহে ইয়াৰ সকলো দিশ বৈজ্ঞানিক ভিত্তিত আগবঢ়াই নিব পৰা যায় ৷

মুগাশিল্পৰ প্ৰায় সকলোবোৰ দিশৰ কাম-কাজ পুৰণা নিয়মতে চলাই থকা হৈছে ৷ বৈজ্ঞানিক ভিত্তিত কিছু কাম কৰা হৈছে যদিও সীমিত ৷ ইয়াত প্ৰধানকৈ মুগা খোলা সিজোৱা আৰু সূতা কটাৰ বিষয়ে আলোচনা কৰা হ’ব ৷

মুগা খোলা খাৰ পানীত সিজাই তাৰ পৰা আঁহ উলিয়াই পাক দি সূতা প্ৰস্তুত কৰা হয় ৷ এই খোলা সিজাওঁতে বিশেষ সাৱধানতা অৱলম্বন নকৰিলে সূতাৰ গুণ সমূহ অটুত নাথাকে ৷ খাৰ বেছি হ’লে বা কম হ’লে, পানী হিচাবতকৈ কম বা বেচি হ’লে, সিজোৱা সময় বঢ়া-টুতা হ’লে, সূতা কাটোতে আৰম্ভণিৰ পৰা শেষলৈকে সমান সমান খোলা ব্যৱহাৰ নকৰিলে, সমান জোখত পাক নিদিলে ইত্যাদি বিশেষ কিছুমান কাৰণত সূতাৰ গুণ নষ্ট হয় আৰু কেতিয়াবা সূতা পেলনিও যাব পাৰে ৷

উপযুক্ত মাধ্যমত, নিৰ্দ্দিষ্ট সময়ৰ ভিতৰত সূতা কাটিলে সূতাৰ জোৰ তথা স্হিতিস্হাপকতা, উজ্জ্বল সোণালী ৰঙ, আৱশ্যক পৰিমাণৰ মিহি আদি গুণ সমূহ ভালে থাকে ৷ বজাৰত উজ্জ্বল সোণোৱালী ৰঙৰ চাহিদা বেচি ৷

বতাহ চলাচল কৰা, ধোঁৱা বিহীন পৰিবেশ সূতা সিজোৱা আৰু কটা সকলৰ বাবে বৰ আৱশ্যক ৷ ধোঁৱাৰে পৰিপূৰ্ণ আৰু লেতেৰা পৰিবেশত কাম কৰাটো স্বাস্হ্যৰ পক্ষে বৰ ক্ষতিকাৰক ৷

তলত এটি উপযুক্ত মুগা খোলা সিজোৱা পদ্ধতি দিয়া হ’ল ৷

(১) মুগা খোলা = ৪০০ (এবাৰত লব লাগে)

(২) খাৰ = চ’ডা ১৬ গ্ৰাম নাইবা কলখাৰ ১০০ গ্ৰাম নাইবা ধানখেৰ ৭০০ গ্ৰাম ৷

(৩) পুখুৰীৰ পানী = ৮ লিটাৰ ৷

(৪) এবিধ পিচলকাৰী ৰাসায়নিক পদাৰ্থ = ৮ মি.লি. (প্ৰায় চাহ চামুচেৰে দুচামোচ) ‘টিপল’ ৷

(৫) ষ্টেইনলেচ ষ্টীলৰ ঢাকোন থকা চচপেন = ২০ লিটাৰ পানী ধৰা ৷

(৬) উষ্ণতা জোখা যন্ত্ৰ = থাৰ্মমিটাৰ এডাল ৷

(৭) কাঠৰ চামোচ = এখন ৷

(৮) ‘ভাউৰী’ বা মুগা সূতা কটা যিকোনো মেচিন = এটা ৷

উপৰোক্ত বস্তুখিনি মুগা সূতা কাটিবৰ বাবে প্ৰয়োজন হয় ৷ খোলা সিজাওঁতে ল’ব লগা সাৱধানতা তলত উল্লেখ কৰা হ’ল –

(১)খোলা সিজাবৰ বাবে সমানকৈ তাপ পাব পৰা ধোঁৱা নোলোৱা চৌকা ব্যৱহাৰ কৰিব লাগে ৷

(২)এবাৰত ৪০০ খোলা সিজালে যি পৰিমাণৰ অন্য বস্তু লাগিব সেইয়া ওপৰত উল্লেখ কৰা হ’ল ৷

(৩)তিনিবিধ খাৰৰ ভিতৰত এবাৰত যিকোনো এবিধ খাৰ ব্যৱহাৰ কৰিব লাগে ৷ খোলা সমূহৰ ওজন খুব বেচি হ’লে বা পুৰণা খোলা হ’লে খাৰৰ পৰিমাণ সামাণ্য বেচি ল’ব লগা হ’ব পাৰে ৷

(৪)‘দমকল’ বা ‘টেপৰ’ পানী পৰাপক্ষত ব্যৱহাৰ কৰিব নালাগে ৷ তেনে পানীত দ্ৰৱীভূত হৈ থকা খনিজাত লৱণে সূতাৰ গুণ আৰু ৰঙ দুয়োটাই নষ্ট কৰে ৷

(৫)খাৰ পানীৰ লগত ‘টিপল’ নামৰ ৰাসায়নিক পদাৰ্থবিধ ব্যৱহাৰ কৰিলে সূতাৰ পৰা আঠা সহজে এৰাই যোৱাত সহায় কৰে; তাৰোপৰি সূতা কাটোতে পিচল গুণ দিয়ে ৷ জবা ফুলৰ পাত, ডেমডেৰুকা, ঔটেঙা বীজ আদি ব্যৱহাৰ কৰিলেও সূতাৰ পিচল গুণ আহে ৷ টিপলে সূতাৰ পৰা যিহেতু সহজে আঠা এৰাই অহাত সহায় কৰে গতিকে সিজোৱা সময় কম লাগে ৷

(৬)খোলা সিজাওঁতে খাৰ পানীৰ উষ্ণতা ১০০o চেন্টিগ্ৰেডৰ ওপৰত গ’লে খোলা সমূহ ফাটি যায় ৷ সেইবাবে উষ্ণতা ১০০o চেন্টিগ্ৰেডৰ তলত ৰাখিবলৈ যত্ন কৰা ভাল ৷

(৭)খোলা সিজাওঁতে ষ্টেইনলেচ ষ্টীলৰ চচপেন ব্যৱহাৰ কৰা ভাল ৷ ইয়াৰ লগত ৰাসায়নিক বস্তুৰ বিক্ৰিয়া নঘটে ৷

খোলা সিজোৱা আৰু কটা

(১)খোলা সিজোৱা আগদিনাই ৰাতি উপযুক্ত পৰিমাণৰ খাৰপানীত টিপল সহ খোলাখিনি চচপেনটোত তিয়াই থ’ব ৷ এনে কৰিলে কম সময়ত খোলা খিনি সিজিব৷ কলখাৰ বা ধানখেৰ ব্যৱহাৰ কৰিব লগা হ’লে কাপোৰত বান্ধি উপযুক্ত পৰিমাণৰ পানীত তিয়াই থ’লে খাৰপানী প্ৰস্তুত হয় ৷ চ’ডা ব্যৱহাৰ কৰিলে পানীত ভালদৰে গুলি ল’ব লাগে ৷

(২)পিচদিনা পুৱা চচপেনটোৰ তলত ২০-৩০ মিনিট জুই দিব লাগে ৷ চচপেনৰ ঢাকোনখন প্ৰথমতে দি থ’ব লাগে ৷ খাৰপানীত উতল অহাৰ পাচত ৫/৬ মিনিটৰ মূৰে মূৰে কাঠৰ হেঁতাৰে খোলাখিনি লৰাই তল ওপৰ কৰি দিব লাগে যাতে সকলো খোলা একেসময়তে ভালদৰে সিজে ৷

(৩)খোলা সিজাৰ পাচত জুইৰ পৰা চচপেনটো নমাই খাৰপানী সহ খোলাখিনি বহল মুখৰ চৰিয়াত ল’ব লাগে ৷ খোলা ভালদৰে সিজিলে তাৰ ওপৰৰ পাতল আৱৰণখন গুচাই দিলে সূতাৰ আঁত পোৱা যায় ৷ এতিয়া চৰিয়াটোত পুনৰ ১ লিটাৰ মান কুহুমীয়া পানী আগৰ খাৰপানীৰ লগত মিলাই দিলে সূতা কাটোতে খোলাখিনি সেই পানীত উপঙি থাকিব ৷ এনে কৰিলে সূতা সহজে খোলাৰ পৰা ওলাই পৰে ৷ ৮/৯ টা খোলাৰ আঁহ একেলগে গোটাই হাতৰ ঠাৰিত পাক দি ‘ভাউৰী’ বা অন্য মেচিনৰ সহায়ত সূতা কাটিব লাগে ৷ মন কৰিব লাগে যাতে ৮/৯ টা খোলাৰ আঁহ অনবৰত সূতাত আহি থাকে ৷ এটা খোলা শেষ হ’লে বা ছিগিলে তৎক্ষণাত আন এটা খোলাৰ আঁহ লগ লগাই দিব লাগে ৷ এনেকৰিলে সমান জোখৰ সূতা পোৱা যায় ৷

(৪)উল্লিখিত পদ্ধতিটোত উজ্জ্বল সোনোৱালী ৰঙৰ, সকলো গুণ অটুত হৈ থকা মিহি মুগা সূতা পাব পাৰি৷ এই বিজ্ঞান সন্মত পদ্ধতিটোত খৰচ যথেষ্ট কম হয় আৰু পেলনি নোযোৱাকৈ বহু সূতা পাব পাৰি৷

উৎস: অসম কৃষি বিশ্ববিদ্যালয়।

3.02040816327
তৰাসমূহৰ ওপৰত ক্লীক কৰি মান প্ৰদান কৰক।
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top