পৰজীৱীয়ে সৃষ্টি কৰা পশুপালকসকলৰ আন এটা ডাঙৰ সমস্যা হ’ল চুটখৰ । ইংৰাজীত ইয়াক Hump Sore বুলি কোৱা হয় । এবিধ পেলুৰ দ্বাৰা এই ৰোগ হয় । গাইগৰু বা হালোৱা গৰুৰ কান্ধত থকা চুট খৰে বহু সমস্যাৰ সৃষ্টি কৰে আৰু তাক গো-পালকসকলে নিশ্চয় জানে । এই চুটখৰ নিৰাময় কৰাৰ ঔষধ বৰ্তমানলৈকে বজাৰত ওলোৱা নাই যদিও কিছু ঔষধ প্ৰতিষ্ঠানে এই ৰোগৰ নিৰাময়ৰ বাবে ইনজেকশ্যন উলিয়াইছে । অৱশ্যে সম্পূৰ্ণ ৰোগ নিৰাময়ৰ বাবে আমাৰ গো-পালকসকলে ঘৰতে এবিধ মলম তৈয়াৰ কৰি ল’ব পাৰে ।
চিকিৎসা আৰু প্ৰতিকাৰ :- আজিকালি বজাৰত এনে পৰজীৱীসমূহ ধ্বংস কৰাৰ বহুতো কাৰ্যকৰী ঔষধ ওলাইছে। পশুপালকসকলে চিকিৎসকৰ পৰামৰ্শ অনুযায়ী এনে ঔষধ প্ৰয়োগ কৰি এনে পৰজীৱীসমূহ নিৰাময় কৰিব পাৰে । BUTOX, NFOCI DOL, CLINER, BOVITRAZ, VITRAZ, RIDD, TAKTIC FLUMITAS ইত্যাদি বহুতো কাৰ্যকৰী ঔষধ বজাৰত কিনিবলৈ পোৱা যায় । কিন্তু ছালৰ পৰজীৱীৰ বাবে ব্যৱহৃত যিকোনো ঔষধেই শৰীৰৰ বাবে অপকাৰী । গতিকে যিকোনো ঔষধ প্ৰয়োগ কৰাৰ আগতে চিকিৎসকৰ পৰামৰ্শ গ্ৰহণ কৰাটো অতি প্ৰয়োজন । উল্লেখযোগ্য যে এনেবোৰ পৰজীৱী যিহেতু লেতেৰা পৰিৱেশতহে বংশ বিস্তাৰ হয় । গতিকে গোহালি ঘৰ সহায় চাফ-চিকুণ কৰি ৰাখিব লাগে । মাজে সময়ে পোহনীয়া জীৱ-জন্তুখিনি ব্ৰাছ, ফণি আদি ব্যৱহাৰ কৰি গা ধুৱাব লাগে । পায়খানা, প্ৰস্ৰাৱৰ ওপৰত যাতে গৰু, ম’হে লেটি ল’ব নোৱাৰে তাৰ প্ৰতি লক্ষ্য ৰাখিব লাগে । মাজে সময়ে গোহালি ঘৰ, মজিয়া বীজাণুনাশক দ্ৰৱণেৰে পৰিষ্কাৰ কৰাৰ উপৰি স্বীকৃত শোধন কাৰক দ্ৰব্য ব্যৱহাৰ কৰিব লাগে ।
প্ৰ’টজৱাজনিত ৰোগ :- প্ৰ’টজৱা হ’ল এবিধ এককোষ প্ৰাণী । এইবিধ প্ৰাণী জন্তুটোৰ ৰক্ত কণিকাত বসবাস কৰি তেজৰ কণিকাবোৰ ভক্ষণ কৰি অশেষ ক্ষতি সাধন কৰে । গৰু, ম’হক আক্ৰান্ত কৰা এই প্ৰট’জৱা জনিত ৰোগৰ ভিতৰত বেবেচিয়’ছিছ, বা চিকৰাজ্বৰ, থেইলেৰিঅ’ছিছ আদিয়েই প্ৰধান । বেবেচিয়’ছিছ নামৰ প্ৰট’জৱা জনিত এই ৰোগ বেবেচিয়া নামৰ এবিধ প্ৰট’জৱাৰ পৰা হয় । এবিধ চিকৰাৰ দ্বাৰা এই ৰোগ এটা জন্তুৰ পৰা অন্য এটা জন্তুলৈ সংক্ৰমিত হয় । এই ৰোগৰ প্ৰধান লক্ষণ হ’ল আৰম্ভণিতে আক্ৰান্ত জন্তুটোৰ অতিপাত জ্বৰ উঠে। প্ৰস্ৰাৱ কফি ৰঙৰ বা ফিকা চাহৰ দৰে হয় । খাবলৈ ইচ্ছা প্ৰকাশ নকৰে, শৌচ ঢিলা আৰু ৰঙচুৱা হয় । যিহেতু এই ৰোগৰ বীজাণুৱে তেজৰ ৰক্ত কণিকাসমূহ ধ্বংস কৰে । ফলত আক্ৰান্ত জন্তুটো ৰক্তহীনতাত ভোগে আৰু কেতিয়াবা জণ্ডিচৰ লক্ষণো দেখা দিয়ে । ক্ৰমান্বয়ে জন্তুটো দুৰ্বল হৈ পৰে । গৰ্ভৱতী গাইগৰুৱে বিনচ কৰা দেখা যায় । সময়ত চিকিৎসাৰ ব্যৱস্থা নকৰিলে আক্ৰান্ত জন্তুটো মৃত্যুমুখত পৰে । গতিকে পালকসকলে ৰোগৰ লক্ষণসমূহ দেখা দিয়াৰ লগে লগে চিকিৎসকৰ পৰামৰ্শ গ্ৰহণ কৰি চিকিৎসাৰ ব্যৱস্থা কৰাটো বাঞ্চনীয় । আজিকালি এই ৰোগৰ বহুতো কাৰ্যকৰী ঔষধ বজাৰত পোৱা যায় । সঠিক সময়ত আৰু সঠিকভাৱে প্ৰয়োগ কৰিলে এই ৰোগ সম্পূৰ্ণ নিৰাময় হয় ।
লেখিকা- ডা: উপাসনা বৰুৱা,
লেখক – ডা: চন্দ্ৰকুমাৰ সিংহ
উৎস – দৈনিক জনমভূমি
শেহতীয়া উন্নীতকৰণ: : 3/12/2020