মূল পৃষ্ঠা / কৃষি / শস্য উৎপাদন / কীট-পতংগ আৰু ৰোগৰ আক্ৰমণ / জানুৱাৰী মাহৰ কীট-পত্ংগৰ ব্যৱস্থাপনা
অংশিদাৰী
Views
  • স্থিতি: সম্পাদনাৰ বাবে মুকলি

জানুৱাৰী মাহৰ কীট-পত্ংগৰ ব্যৱস্থাপনা

জানুৱাৰী মাহৰ কীট-পত্ংগৰ ব্যৱস্থাপনা লিখা হৈছে

 

জানুৱাৰী মাহৰ কৃষি বিষয়ক পৰামৰ্শৰ বাবে আমি অসম কৃষি বিশ্ববিদ্যালয়ৰ বিশেষজ্ঞ ড° দিলীপ কুমাৰ শইকীয়া,ড° বিজন চন্দ্ৰ দত্ত,ড° ছাহিদুৰ ৰহমান,ড° বাদল ভট্টাচাৰ্য আৰু সুধাংশু ভাগৱতীৰ কাষ চাপিছিলোঁ।তেওঁলোকে আগবঢ়োৱা দিহা-পৰামৰ্শসমুহ তলত উল্লেখ কৰা হ’ল-

*কৃষকসকলে ধান ভঁৰালত ভৰাবলৈ আৰম্ভ কৰিছে।ধান সংৰক্ষণ কৰাৰ আগেয়ে ভালদৰে দুই-তিনি দিনমান ৰ’দত শুকুৱাব লাগে।ভঁৰালঘৰ ভালদৰে পৰিষ্কাৰ কৰি ভঁৰালৰ বেৰ আৰু তলিখনত মালাথিয়ন ৫০ ই চি ঔষধৰ এক চাহচামুচ প্ৰতি লিটাৰ পানীত মিশ্ৰণ কৰি স্প্ৰে কৰিব লাগে।তেনে কৰিলে কিছুদিনলৈ ভঁৰালত অন্যান্য কীট-পত্ংগৰ লগতে এন্দুৰৰ প্ৰৱেশ ৰোধ কৰিব পৰা যায়।ধান বস্তাত ৰাখিবলৈ হ’লে,খালী বস্তাবোৰ উল্লিখিত ঔষধৰ মিশ্ৰণত বুৰাই ছাঁত শুকুৱাই লৈহে বস্তাত ভৰাই সংৰক্ষণ কৰিব লাগে।

*সৰিয়হ শস্যৰ উৎপাদন বৃদ্ধিৰ বাবে কৃষক আৰু মৌ-পালকসকলে ভাৰতীয় সঁচৰ মৌ-বাহ প্ৰতি হেক্টৰত পাঁচটাকৈ নতুবা পশ্চিমীয়া সঁচৰ মৌ-বাহ দুটাকৈ পথাৰত স্থাপন কৰা উচিত।সৰিয়হত দেখা দিব পৰা মোৱা পোক আৰু সৰিয়হৰ ক’লা পলুৰ পৰা ৰক্ষা পাবলৈ অক্সিডিমেটন মিথাইল ২৫ ই চি দৰবৰ এক চাহচামুচ পাঁচ লিটাৰ পানীত মিহলাই প্ৰয়োগ কৰিব লাগে।নিমজাতীয় ঔষধ ব্যৱহাৰ কৰিও কৃষকসকল উপকৃত হ’ব পাৰে।সৰিয়হত শুঁৰপোকৰ আক্ৰমণ পৰিলক্ষিত হ’ব পাৰে।ইয়াৰ নিয়ন্ত্ৰণৰ ক্ষেত্ৰত কৃষকসকলে সমবায় ভিত্তিত আগবঢ়া প্ৰয়োজন।পথাৰৰ চৌপাশে পাউডাৰজাতীয় কীটনাশক (মালাথিয়ন ৫ শতাংশ,কুইনলফচ ১.৫ শতাংশ,ক্ল’ৰপাইৰিফচ ১ শতাংশ)৩-৪ কিলোগ্ৰাম প্ৰতিবিঘা মাটিৰ আলিবোৰত প্ৰয়োগ কৰি সুফল পাব পাৰে।

*আলু খেতিত ভুৰপোক আৰু ৰঙা পৰুৱাৰ আক্ৰমণৰ অনুকুল সময়।কণী ফুটি নকৈ ওলোৱা ভুৰপোকৰ পলুৱে আলু পুলিৰ গা-গছ আক্ৰমণ কৰে।আলু খেতি কৰিবলৈ লোৱা মাটিডৰাৰ ওচৰত নিশাৰ ভাগত জুই ধৰাৰ ব্যৱস্থা কৰিলে ভুৰপোকৰ পখিলা জুইৰ পোহৰলৈ আকৰ্ষিত হোৱাৰ ফলত লেলিহান শিখাত জাহ গৈ পৰৱৰ্তী বংশ বিস্তাৰণ বাধাপ্ৰাপ্ত হয়।তদুপৰি,চহাই থোৱা মাটিত লোৰ খান্দি কুইনলফছ ২৫ ই চি নতুবা ক্ল’ৰপাইৰিফছ ২০ ই চি দৰবৰ চাৰি চাহচামুচ ১০ লিটাৰ পানীত মিহলাই প্ৰয়োগ কৰিব লাগে।ইফালে,ৰঙা পৰুৱাৰ উপদ্ৰৱৰপৰা হাত সাৰিবলৈ বালিচহীয়া মাটি অথবা আগেয়ে ৰঙা পৰুৱাৰ আক্ৰমণ দেখা দিয়া অঞ্চল নিৰ্বাচন কৰা অনুচিত।বিঘাই প্ৰতি ৫ কিলোগ্ৰাম মালাথিয়ন পাউডাৰ ৰোপণৰ পুৰ্বে লোৰবোৰত প্ৰয়োগ কৰি ল’ব লাগে।লোৰবোৰত এক চাহচামুচ ক্ল’ৰপাইৰিফছ ২০ ই চি দুই লিটাৰ পানীত মিহলাই (বা ক্ল’ৰপাইৰিফছ ৩০০ গ্ৰাম হেক্টৰ)ত প্ৰয়োগ কৰি বীজ ৰোপণ কৰিলে ৰঙা পৰুৱাৰ উপদ্ৰৱৰপৰা হাত সাৰিব পাৰি।এইক্ষেত্ৰত কৃত্ৰিম ৰাসায়নিকৰ পৰিৱৰ্তে বিঘাই প্ৰতি ২০ কিলোগ্ৰাম খলিহৈ প্ৰয়োগ কৰিলেও সুফল পোৱা যায়।

*বিলাহী খেতিৰ মাজে মাজে ওখ জাতৰ নাৰ্জীফুলৰ পুলি ৩০ দিনৰ পুৰ্বে ৰোপণ কৰিব লাগে।নাৰ্জীফুলে ফল বিন্ধোৱা পোকক আকৰ্ষণ কৰাৰ ফলত মুল শস্যক পত্ংগৰ আক্ৰমণৰপৰা ৰক্ষা কৰিব পাৰে।ডিম্ব পৰজীৱী ‘ট্ৰাইক’গ্ৰামা প্ৰিটিঅ’চাম’ বিঘাই প্ৰতি ২০,০০০ কৈ ১০ দিনৰ অন্তৰালত ৩-৪ বাৰ প্ৰয়োগ কৰিলে ফল বিন্ধোৱা পোকৰ আক্ৰমণ বহুত পৰিমাণে হ্ৰাস পায়।আঠাযুক্ত হালধীয়া আকৰ্ষক কাৰ্ড (Yellow Sticky Trap বা YST)ব্যৱহাৰ কৰিও বিলাহী গছৰ পাতৰ ওকনি আৰু বগামাখিক নিয়ন্ত্ৰণ কৰিব পাৰি।‘হেলিলিউৰ’(ফল বিন্ধোৱা পোক)আৰু ‘স্প’ড’ লিউৰ’(পাতখোৱা পলু)যুক্ত ফেৰমন ফান্দ ব্যৱহাৰ কৰিও বিলাহীৰ পত্ংগ নিয়ন্ত্ৰণ কৰিব পাৰি।নিমজাতীয় কীটনাশক ঔষধ প্ৰয়োগ কৰিও কীট-পত্ংগৰপৰা বিলাহীৰ খেতিডৰা ৰক্ষা কৰিব পাৰি।

*কবিজাতীয় পাচলি,বিশেষকৈ বন্ধাকবি আৰু ফুলকবি আদিত পখিলাজাতীয় পোকৰ পলুৱে আক্ৰমণ কৰাৰ সম্ভাৱনা থাকে।তাৰ পৰা হাত সাৰিবলৈ ‘ট্ৰাইক’গ্ৰামা পিৰিড’বিঘাই প্ৰতি ২০,০০০ কৈ ১০ দিনৰ অন্তৰালত ৩-৪ বাৰ প্ৰয়োগ কৰিব লাগে।নিমজাতীয় দৰবৰ প্ৰয়োগে এই পোকক বিকৰ্ষণ কৰে।কবি খেতিৰ কাষে কাষে থলুৱা সৰিয়হ ৰোপণ কৰিলে মোৱাপোক আৰু কিছুমান পখিলাজাতীয় পোক সৰিয়হলৈ ঢাপলি মেলাত মুল শস্য কৰি ৰক্ষা পৰে।

*এবিধ চাঁহিৰ আক্ৰমণৰ ফলত লিচুগছৰ পাতত মামৰ সদৃশ লক্ষণে দেখা দিয়ে।ইয়াৰ পৰা পৰিত্ৰাণ পাবলৈ বেছিকৈ আক্ৰান্ত ঠাল-ঠেঙুলিবিলাক আঁতৰাই পেলাব লাগে।তদুপৰি চাঁহিনাশক প্ৰপাৰজাইট ৫৭ ই চি দৰবৰ এক চাহচামুচ প্ৰতি পাঁচ লিটাৰ পানীত মিহলাই ১৫ দিনৰ অন্তৰালত দুবাৰ প্ৰয়োগ কৰিব লাগে।

লেখক:ড° আটাউৰ ৰহমান,ৰুদ্ৰ নাৰায়ণ বৰকাকতি (দৈনিক অসম)

2.96551724138
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top