মূল পৃষ্ঠা / কৃষি / শস্য উৎপাদন / কীট-পতংগ আৰু ৰোগৰ আক্ৰমণ / থলুৱা প্ৰযুক্তি জ্ঞানেৰে পতংগ নিয়ন্ত্ৰণ
অংশিদাৰী
Views
  • স্থিতি: সম্পাদনাৰ বাবে মুকলি

থলুৱা প্ৰযুক্তি জ্ঞানেৰে পতংগ নিয়ন্ত্ৰণ

থলুৱা প্ৰযুক্তি জ্ঞানেৰে পতংগ নিয়ন্ত্ৰণৰ বিষয়ে লিখা হৈছে ।

 

মানৱ সভ্যতাৰ ইতিহাসত কৃষি পদ্ধতি উদ্ভাৱনৰ এক সুকীয়া স্থান আছে । আমাৰ মাংসভোজী চিকাৰী পূৰ্বপুৰুষে বীজৰ পৰা শস্য সৃষ্টি হোৱা পৰিঘটনাতো লক্ষ্য কৰি, তেওঁলোক কৃষিক্ষেত্ৰখনলৈ আকৰ্ষিত হৈ পৰিছিল । সেই সময়ৰ মানুহৰ মগজুৰ বিকাশৰ অনুপাতে কৰ্ষণ পদ্ধতিৰ এনে আৱিষ্কাৰ , চকাৰ যুগান্তকাৰী আৱিষ্কাৰতকৈ কোনোগুনে কম নাছিল । সময় আগবঢ়াৰ লগে লগে কৃষি পদ্ধতিৰো যথেষ্ট বিকাশ হ’ল । কৃষিক্ষেত্ৰত ন ন প্ৰযুক্তি সংযোগ হ’ল । সেই প্ৰযুক্তি কৌশলবোৰৰো সময়ে সময়ে বিৱৰ্তন হ’ল । তথাপি কেঁকোৰা নাঙলৰ গুৰুত্ব অদ্যাপি বিদ্যমান । ইয়াৰ পৰাই ভালকৈ ধাৰণা কৰিব পাৰি যে কৃষিক্ষেত্ৰত আমাৰ থলুৱা প্ৰযুক্তিৰ গুৰুত্ব এতিয়াও প্ৰাসংগিক হৈয়েই আছে ।

অসমৰ সাৰুৱা ভূমিভাগ গুটিশস্য, শাক-পাচলি আৰু ফলমূল উৎপাদনৰ বাবে উপযোগী । যথেষ্ট সম্ভাৱনাপূৰ্ণ এই কৃষি বা উদ্যান শস্যখণ্ডৰ পৰা কম আয়াসতে অধিক উপাৰ্জন পাব পৰা যায় । একোজন কৃষকৰ মাহিলি আয়ৰ এক বুজন অংশ ফলমূল, শাক-পাচলিৰে ভৰি থকা বাৰীখনৰ পৰাই আহে । এজন সহজ-সৰল অসমীয়া কৃষকে এডৰা কৃষিভূমিৰ পৰা সৰ্বাধিক পৰিমাণৰ ফচল উৎপাদনৰ নিমিত্তে যিবোৰ সমস্যাৰ সন্মুখীন হয় তাৰ ভিতৰত কীট-পতংগৰ আক্ৰমণ অন্যতম । বছৰ বছৰ ধৰি কৃষিৰ লগত জড়িত হৈ থাকোতে, কৃষকসকলে নিজস্ব অভিজ্ঞতাৰে এনে অপকাৰী কীট-পতংগৰ বিৰুদ্ধে কিছুমান কিছুমান ৰণ-কৌশল উদ্ভাৱন কৰিবলৈ সক্ষম হৈছে । এই কৌশলসমূহক থলুৱা প্ৰযুক্তি জ্ঞান বুলি কোৱা হয় । কীট-পতংগ নিয়ন্ত্ৰণৰ নামত এজন পেটে-ভাতে খাই থকা কৃষকৰ বাবে দামী কীটনাশক দৰব প্ৰয়োগ কৰাটো সাধ্যৰ বাহিৰত । তদুপৰি বিষাক্ত কীটনাশকে পৰিৱেশ প্ৰদূষিত কৰাৰ লগতে মানুহ তথা মানুহৰ উপকাৰী জীৱৰ বাবেও বিপজ্জনক । সেয়েহে ৰাসায়নিক দ্ৰব্যবোৰৰ বিকল্পৰুপে কৃষক সমাজৰ অভিজ্ঞতালব্ধ থলুৱা প্ৰযুক্তিজ্ঞানৰ গুৰুত্ব বৰ্তমানে বাঢ়িব ধৰিছে, যিবোৰ পাৰিপাৰ্শ্বিকতাৰ ফালৰ পৰা সম্পূৰ্ণ বিপদমুক্ত তথা কীট-পতংগ নিয়ন্ত্ৰণৰ ক্ষেত্ৰত সুফলদায়ক । কৃষিৰ লগত জড়িত এই থলুৱা প্ৰযুক্তি জ্ঞানৰ কিছুমান বিজ্ঞানসন্মত যুক্তি আছে । বৰ্তমান কৃষিৰ গৱেষণা আৰু সম্প্ৰসাৰণৰ ক্ষেত্ৰত থলুৱা প্ৰযুক্তি জ্ঞানৰ ওপৰত যথেষ্ট গুৰুত্ব আৰোপ কৰা হৈছে ।

শীতকালীন পাচলিত ব্যৱহৃত কেইটিমান থলুৱা প্ৰযুক্তি জ্ঞান পদ্ধতি -

আলু খেতিৰ বাবে মাটিডৰা চহ কৰাৰ সময়ত সৰিয়হৰ খলিহৈ মাটিৰ লগত মিহলোৱা উচিত । পুলি অৱস্থাত খেতিডৰাত সামান্য মাত্ৰাত নিমখ প্ৰয়োগ কৰাৰ লগতে খেতিডৰাৰ মাজে মাজে সামান্য দূৰত্বৰ অন্তৰালত ভীমকলৰ সৰু টুকুৰা সামান্যকৈ পুতি থ’ব লাগে ।

উদ্দেশ্য :-

ৰঙা পৰুৱাকে ধৰি মাটিত থকা অন্যান্য পতংগক ধ্বংস কৰাত বিশেষভাৱে সহায়ক হয় ।

মূল কথা:-

খলিহৈ আৰু নিমখে প্ৰত্যক্ষভাৱে ধ্বংস কৰাৰ লগতে ৰঙা পৰুৱাবোৰ কলৰ প্ৰতি আকৰ্ষিত হয় আৰু তেতিয়া অতি সহজেই ইহঁতক নাশ কৰিব পাৰি ।

পদ্ধতি :-

ধানৰ পতান আৰু তুঁহৰ ছাইক আলু গছৰ গুড়িত প্ৰয়োগ কৰা ।

উদ্দেশ্য :-

ৰঙা পৰুৱাৰ পৰা আলু খেতিক বচাব পাৰি ।

মূল কথা :-

ছায়ে খেতিডৰাক পতংগৰ বিৰুদ্ধে প্ৰতিৰোধক্ষম কৰি তোলে ।

পদ্ধতি :-

খেতি আৰম্ভ কৰাৰ আগতেই পানীমেটেকা, পুনি, বৰপুনি আৰু সৰুপুনি আদি পুখুৰীৰ পৰা সংগ্ৰহ কৰি আলু খেতিৰ পথাৰত জমা কৰি আহিন মাহত জ্বলাই দিব লাগে ।

উদ্দেশ্য :-

মাটিত থকা পতংগ ধ্বংস কৰাত ভূমিকা লয় ।

মূল কথা :-

পানীমেটেকা আৰু সৰুপুনিত পটাছিয়াম যথেষ্ট পৰিমাণে থাকে । ইয়াৰ ফলত উদ্ভিদৰ প্ৰতিৰোধ ক্ষমতা বৃদ্ধিত সহায় কৰে ।

পদ্ধতি :-

ধঁপাতৰ পাত খুন্দি পানীত তিয়াই, সেই ৰস শাক-পাচলিৰ পাতবোৰত ছটিয়াই দিয়া হয় ।

উদ্দেশ্য :-

মোৱা পোকৰ আক্ৰমণ প্ৰতিৰোধ কৰে ।

মন্তব্য :-

ধঁপাতত থকা নিক’টিন নামৰ বিষাক্ত পদাৰ্থবিধে কীট-পতংগ নিয়ন্ত্ৰণ কৰিব পাৰে ।

পদ্ধতি :-

বেঙেনা গছত ফুট ছাই ছটিয়াই দিয়া ।

উদ্দেশ্য:-

বেঙেনাৰ ফল আৰু কাণ্ড ফুটা কৰা পোকৰ আক্ৰমণ ৰোধ কৰে ।

মন্তব্য :-

ছায়ে খেতিডৰাক পতংগৰ বিৰুদ্ধে প্ৰতিৰোধক্ষম কৰি তোলে ।

লেখক :- ৰুদ্ৰ নাৰায়ণ বৰকাকতি

উৎস :- অসমীয়া খবৰ

2.85714285714
তৰাসমূহৰ ওপৰত ক্লীক কৰি মান প্ৰদান কৰক।
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top