অংশিদাৰী
Views
  • স্থিতি: সম্পাদনাৰ বাবে মুকলি

আলুৰ সংৰক্ষণ

ইয়াত আলুৰ সংৰক্ষণৰ ক্ষেত্ৰত কৃষকে মন কৰিব লগা কেতবোৰ দিশৰ কথা উল্লেখ কৰিছে।

আলুৰ সংৰক্ষণৰ ক্ষেত্ৰত কৃষকে মন কৰিব লগা কেতবোৰ দিশ

আলু এনে এবিধ পাচলি যাক টেঙা আৰু খাৰ দুয়ো ধৰণৰ ব্যঞ্জনৰ লগতেই খাব পাৰি৷ আলুক মুল্য সংযোজন কৰি চিপচ, আইচক্ৰীম আদিৰ ৰূপটো পৰিবেশন কৰা হয়৷ খ্ৰীষ্টপূৰ্ব ৮০০০-৫০০০ বৰ্ষৰ সময়ছোৱাত, পেৰু আৰু বলিভিয়াৰ কৃষকে পথাৰত উৎপাদন কৰিবলৈ আৰম্ভ কৰা আলুক পৰৱৰ্তী সময়ত সমগ্ৰ বিশ্বই আদৰি লয়৷ ষোড়শ শতিকাৰ মাজচোৱাত স্পেইনৰ পৰা ইউৰোপলৈ আমদানি হোৱা আলুক ইউৰোপে উপনিৱেশেৰে খোপনি পোতা অঞ্চল সমুহলৈ বিয়পাই দিয়ে৷ শ্বেতসাৰ যুক্ত আলু হ’ল,- ধান, ঘেহু আৰু মাকৈৰ পাছতে বিশ্বৰ সৰ্বাধিক উৎপাদিত শস্য৷ এক সমীক্ষামতে, বৰ্তমান চীনদেশত সৰ্বাধিক আলু উৎপাদিত হয় ; লগতে, ভাৰত আৰু চীনে মিলি বিশ্বৰ এক তৃতীয়াংশ আলু প্ৰতিবছৰে পথাৰৰ পৰা চপাই৷ আধুনিক কৃষি ইতিহাসৰ পাত মোকলালে পোৱা যায় যে,- প্ৰথমাৱস্থাত অনাদৃত আলু আয়াৰলেণ্ডবাসীৰ বাবে এসময়ত মুখ্য খাদ্যৰূপে বিবেচিত হৈ পৰে, কিন্তু দুৰ্ভাগ্যবশতঃ ১৮৪৫ চনত আলুখেতিক পাতপোৰা ৰোগে আক্ৰমন কৰাত, আয়াৰলেণ্ডত দুৰ্ভীক্ষৰ সুচনা হৈছিল৷ অলপ গাখীৰ বা মাখনৰ সৈতে অকল আলু ভক্ষণ কৰিলেই মানৱ দেহৰ বাবে প্ৰয়োজনীয় পুষ্টি পাব পাৰি৷ সেয়েহে আলুৰ গুৰুত্বলৈ লক্ষ্য ৰাখি, ৰাষ্ট্ৰ সংঘই ২০০৮ বৰ্ষক আন্তৰ্জাতিক আলু দিৱসৰূপে পালন কৰিছিল৷ আলু গছৰ পাত কাণ্ড আদিত “গ্লাইক’এলকেলইড” নামৰ এক বিষাক্ত ৰাসায়নিক পদাৰ্থ থাকে, অৱশ্যে সূৰ্যৰ পোহৰ পোনপটিয়াকৈ পৰিলেহে আলুৰ মানব খাদ্যাংশত এই ৰসায়ন সৃষ্টি হয়৷

এইবাৰ আলু খেতিৰ কৃষকৰ পৰা আলু সংৰক্ষণৰ বিষয়ক অনেক টেলিফ’ন আমালৈ আহিছিল, সেইবাবে কৃষকৰ সুবিধাৰ্থে অসম কৃষি বিশ্ব বিদ্যালয়ে আগবঢ়োৱা কেইটামান নিয়ম আমি এই আলোচনাত লিপিবদ্ধ কৰিলোঁ৷

(১)আলুৰ বীজৰূপে অকল মাত্ৰ পুৰঠ আলু গছৰ পৰা আলু সংগ্ৰহ কৰা উচিত৷

(২)বীজৰ বাবে ৫ৰ পৰা ১৫ গ্ৰাম ওজনৰ আলুক ঘৰৰ ভিতৰত সুন্দৰকৈ সংৰক্ষণ কৰিব পাৰি৷

(৩) খেতি চপোওৱাৰ পাছত আলুখিনিক ১০-১৫দিনলৈ শীতল জেগাত ৰাখি চাফা কৰি ৩ % বৰিক এচিডেৰে (মানে প্ৰতি কিলোগ্ৰাম আলুক ৩০ গ্ৰাম বৰিক এচিড) ৩০ মিনিট আৰু পাছত ০.২৫ % মেংকজেৱ দৰবেৰে (মানে প্ৰতি কিলোগ্ৰাম আলুক ২.৫ গ্ৰাম মেংকজেৱ) ২০ মিনিটৰ বাবে পৰিশোধণ কৰিব লাগে৷ এনে কৰাৰ পাছতহে বীজখিনিক চাঙত তুলি ৰাখিব লাগে৷

(৪) প্ৰতি কিলোগ্ৰাম আলুক ১.২৫ গ্ৰাম মালাথিয়ন ৫% পাউডাৰেৰে সানি ৰাখিলে হালুৱা পোক বা “পটেট’ টিউবাৰ মথ” নামৰ পোকৰ পৰা পৰিত্ৰান পাব পাৰি ৷ অৱশ্যে, মালাথিয়ন ব্যৱহাৰ কৰিলেও মাজে মাজে নিৰীক্ষণ কৰিব লাগে, কীটনাশকৰ গুণাগুণ নষ্ট হলে পোকে আক্ৰমণ কৰিব পাৰে৷

(৫) চাঙত ৰখা আলুৰ ক্ষেত্ৰত, শুকান নিম পাত বা ইউকেলিপ্টাচৰ পাতৰ এটা ৪ ছেঃমিঃ ডাঠ তৰপৰ ওপৰত আলু ৰাখি তাৰ ওপৰত আকৌ শুকান নিম পাতৰ বা ইউকেলিপ্টাচৰ পাতৰ এটা তৰপ এটা দিব লাগে, এনেকৈ তৰপে তৰপে আলু ৰাখি সংৰক্ষণ কৰিব পাৰি৷

(৬) প্ৰতিষেধক ব্যৱস্থা লোৱাৰ ওপৰিও, মাজে মাজে নিৰীক্ষণ কৰি পোক লগা দেখিলে তেনে আলু পৃথক কৰা উচিত ৷ সামৰ্থ্য অনুসৰি “পটেট’ টিউবাৰ মথ” নামৰ পোকৰ আক্ৰমন সঘনাই পৰিলক্ষিত হোৱা অঞ্চলত, আঠুঁৱাৰ ব্যৱস্থা কৰি পখিলাই ডিম্ব প্ৰসৱ কৰাৰ পৰা আলু ৰক্ষা কৰিব পাৰি৷

(৭) আগষ্ট মাহত কিছুমান গঁজালি ভাঙি দিলে আলুগুটি সোপোকা পৰাৰ পৰা ৰক্ষা কৰিব পাৰি৷

আধুনিক প্ৰযুক্তিবিদ সকলে, পাত পোৰা ৰোগৰ প্ৰতিৰোধী “ফৰচোনা” নামৰ জেনেটিকেলি মডিফাইড বা আনুবংশীয়ভাবে পৰিৱৰ্তিত সঁচ প্ৰস্তুত কৰিছে৷ ইয়াৰোপৰি, মনচেন্ট’ কোম্পানীয়ে “নিউ লিফ” নামৰ আলুৰ সঁচ উদ্ভাৱন কৰিছে, যি “কলৰাড’ পটেট’ বিটল” নামৰ পোকৰ আক্ৰমনৰ পৰা আলুক ৰক্ষা কৰে৷ সৌভাগ্যবশতঃ এই পোক এতিয়াও ভাৰতত সোমাব পৰা নাই৷

লিখকৰ পৰিচয়

ৰুদ্র নাৰায়ণ বৰকাকতি

পতংগতত্ব বিশেষজ্ঞ

কৃষি বিজ্ঞান কেন্দ্র, গোলাঘাট

2.94
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top