মূল পৃষ্ঠা / শিক্ষা / শিশুসকলৰ ক্ষেত্ৰ / ‘মিছাইল মেন’ ড° এ পি জে আব্দুল কালাম
অংশিদাৰী
Views
  • স্থিতি: সম্পাদনাৰ বাবে মুকলি

‘মিছাইল মেন’ ড° এ পি জে আব্দুল কালাম

‘মিছাইল মেন’ ড° এ পি জে আব্দুল কালাম

জীৱনজোৰা ত্যাগেৰে ভাৰতলৈ সুনাম কঢ়িয়াই অনা ভাৰতৰ দ্বাদশগৰাকী ৰাষ্ট্ৰপতি ড° এ পি জে আব্দুল কালামে ২০০২ চনৰ ২৫ জুলাইত ভাৰতৰ ৰাষ্ট্ৰপতি হিচাপে শপত গ্ৰহণ কৰিছিল| এজন মিছাইল মানৱ ভাৰতীয় গণতন্ত্ৰৰ সৰ্ব্বোচ্চ আসনত অধিষ্ঠিত হোৱাত ভাৰতৰ কেইবাকোটি জনতাই আনন্দত আপ্লুত হৈছিল| ১৯৩১ চনৰ ১৫ অক্টোবৰত মাদ্ৰাজ(চেন্নাই) ৰ ৰামেশ্বৰমত জন্মগ্ৰহণ কৰা এ পি জে আব্দুল কালামৰ পিতৃৰ নাম জয়নাল আবেদীন আৰু মাতৃৰ নাম আচিয়াম্মা| তেওঁলোকৰ ঘৰখনত পাঁচজন ল’ৰা-ছোৱালী আছিল| কালাম আছিল নুমলীয়া| সেয়ে তেওঁ সকলোৰে আলাসৰ লাডু| তেওঁলোকৰ ঘৰুৱা আৰ্থিক অৱস্থা বহুত ভাল নাছিল| গতিকে তেওঁলোকে বহু কষ্ট কৰি শিক্ষা গ্ৰহণ কৰিব লাগিছিল| কালামৰ মাক আছিল স্কুলীয়া শিক্ষাৰে শিক্ষিত মৰ্যাদা সম্পন্ন এটা পৰিয়ালৰ ছোৱালী| তেওঁ বহল অন্তৰৰ অতিথি পৰায়ণা আদৰ্শ মহিলা আছিল| কালামৰ মাক-দেউতাকক সমাজে আদৰ্শ দম্পতী হিচাপে জ্ঞান কৰিছিল| কালামৰ দেউতাক আছিল ৫ ৱক্ত নামাজী আৰু জৰা-ফুকা পানীৰে বেমাৰী ভাল কৰিব পৰা গুণো আছিল| ১৯৩৯ চনৰ দ্বিতীয় বিশ্বযুদ্ধৰ সময়ত কালামৰ বয়স আছিল মাত্ৰ আঠ বছৰ| সেই সময়ত তেওঁ তেঁতেলীৰ গুটি বেছি দিনে এক অনাকৈ উপাৰ্জন কৰিছিল আৰু জালালুদ্দিনে কোৱা বিশ্বযুদ্ধৰ কাহিনীবোৰে মনত দকৈ প্ৰভাৱ পেলাইছিল| আহমেদ জালালুদ্দিন আছিল তেওঁতকৈ ১৫ বছৰে ডাঙৰ শৈশৱৰ বন্ধু আৰু শৈশৱ গঢ়াত আটাইতকৈ বেছি অৰিহণা যোগোৱা ব্যক্তি| উপযুক্ত বয়স হোৱাত কালামক ৰামেশ্বৰমৰ প্ৰাথমিক বিদ্যালয়ত নাম লগাই দিছিল| প্ৰাথমিক শিক্ষা শেষ কৰি হাইস্কুলীয়া শিক্ষা গ্ৰহণৰ কাৰণে ৰামনাথপুৰমলৈ যায়| তাত শ্বাৰ্টজ হাইস্কুলত নাম লগায়| হাইস্কুলত পঢ়ি থকা সময়ছোৱাত ইয়াদুৰাই চোলেমান নামৰ এজন শিক্ষকে কালামৰ মেধা শক্তিৰ পৰিচয় পাই কৈছিল-‘জীৱনত কৃতকাৰ্য লাভ কৰিবলৈ প্ৰবল ইচ্ছাশক্তি, আত্মবিশ্বাস আৰু উচ্চাকাংক্ষা থাকিব লাগিব’| ১৯৫৪ চনত তেওঁ ছেইণ্ট যোচেফ কলেজৰ পৰা পদাৰ্থবিজ্ঞানসহ সুখ্যাতিৰে বিজ্ঞানৰ স্নাতক ডিগ্ৰী লাভ কৰে| তাৰ পিছত ইঞ্জিনীয়াৰিং পঢ়িবলৈ অৰ্থৰ অভাৱ আছিল যদিও তেওঁৰ অদম্য হেঁপাহ দেখি ভনীয়েকে হাত আৰু কাণৰ গহণা বন্ধকত থৈ টকা গোটাই পঢ়াৰ বাবে পথ প্ৰশস্ত কৰি দিয়ে| লগতে মনপুতি পঢ়াৰ বাবে ছাত্ৰবৃত্তিও লাভ কৰিছিল| ১৯৫৮ চনত তেওঁ এৰ’নটিকেল ইঞ্জিনীয়াৰিঙৰ পাঠ্যক্ৰম শেষ কৰিছিল| তাৰ পিছত ১৯৬২ চনত বাংগালুৰুত বৈমানিক উন্নয়ন প্ৰতিষ্ঠন (এ ডি ই) ত কাম কৰিছিল| ইয়াৰ কিছুদিন পিছত কালামে ড° বিক্ৰম সাৰাভাইৰ নেতৃত্বত ৰকেট ইঞ্জিনীয়াৰ হিচাপে যোগদান কৰে| তেওঁ আমেৰিকাৰ নাছালৈ ৰকেট বিষয়ৰ অধ্যয়নৰ কাৰণেও গৈছিল| আমেৰিকাত ছমাহ থকাৰ পিছত স্বদেশলৈ ঘুৰি আহি থুম্বাৰ ষ্টেচনত যোগদান কৰিলে| এই ষ্টেচনৰ পৰা ১৯৬৭ চনৰ ২০ নৱেম্বৰত ৰোহিণী ৭৫ উৎক্ষেপণৰ পিছত কালামৰ নেতৃত্বত ‘মেনকা’ নামৰ আন এটা ৰকেট উৎক্ষেপণ কৰা হয়| ইয়াৰ পিছত কালামে আন কেইবাজনো বিজ্ঞানীৰ সহযোগত চল্লিশ কিলোগ্ৰাম ওজনৰ উপগ্ৰহ প্ৰক্ষেপণৰ যান (SLV) নিৰ্মাণৰ সিদ্ধান্ত লয়| নেৰানেপেৰা চেষ্টাৰ অন্তত: ১৯৭৯ চনৰ ১০ আগষ্টৰ পুৱা ৭ বাজি ৫৮ ছে:ত SLV-৩ ৰ পৰীক্ষা মুলক উৰণ সমাপ্ত হয়| কিন্তু উৰণৰ ৩১৭ ছেকেণ্ডৰ পাছত দুৰ্ঘটনাত পতিত হোৱাত তেওঁলোক হতাশাত ভুগিছিল যদিও নতুন উদ্যমেৰে কাম কৰি ১৯৮০ চনৰ ১৮ জুলাইৰ পুৱা ৮.০৩ মিনিটত শ্ৰীহৰিকোট ৰকেট কেন্দ্ৰৰ পৰা ৰোহিণী উপগ্ৰহটোক এছএলভি-৩-এ সঠিক ভাৱে পৃথিৱীৰ নিম্ন কক্ষপথলৈ নিক্ষেপ কৰিছিল| এইদৰে প্ৰথম ভাৰতীয় কৃত্ৰিম উপগ্ৰহ ‘ৰোহিণী’ পৃথিৱীৰ চাৰিওফালে ঘুৰিব ধৰিলে| এছএলভি-৩ ৰ কামৰ মাজতে কালামে তেওঁৰ ভনীজোঁৱায়েক জালালুদ্দিন, দেউতাক আৰু মাকক হেৰুৱাব লগা হয়| সেয়ে তেওঁ দুখেৰে প্ৰকাশ কৰিছে যে যিসকল ব্যক্তিৰ অনুপ্ৰেৰণাত বিজ্ঞানী হিচাপে সফলতা অৰ্জন কৰিছিল সেই ব্যক্তিসকল দেউতাক, মাক, ভনীজোঁৱায়েক আৰু ড° সাৰাভাই কোনোৱেই তেওঁৰ সফলতা চাবলৈ জীৱিত নাছিল| কালাম প্ৰকৃত অৰ্থত এজন ‘মিছাইল মানৱ’| তেওঁ পাঁচটা মিছাইল নিৰ্মাণৰ প্ৰকল্প হাতত লয়| সেইকেইটা হ’ল-পৃথ্বী, ত্ৰিশূল, আকাশ, নাগ আৰু অগ্নি| ১৯৮৫ চনৰ ১৬ ছেপ্তেম্বৰৰ দিনা ত্ৰিশূল সফলতাৰে উৎক্ষেপণ কৰে| ১৯৮৮ চনৰ ২৫ ফেব্ৰুৱাৰীত দিনৰ ১১ বাজি ২৩ মিনিটত পৃথ্বী উৎক্ষেপণ কৰে| ১৯৮৯ চনৰ ২ মে’ৰ পুৱা ৭ বাজি ১১ মিনিটত ‘অগ্নি’ ক্ষেপণাস্ত্ৰ সফলতাৰে উৎক্ষেপণ কৰে| ১৯৯০ চনৰ ১০ ফেব্ৰুৱাৰীত ‘নাগ’ আৰু ১৯৯১ চনৰ স্বাধীনতা দিৱসৰ দিনা ‘আকাশ’ ক্ষেপণাস্ত্ৰ উৎক্ষেপণ কৰে| প্ৰবল আত্মবিশ্বাস, কঠোৰ পৰিশ্ৰমৰ গুণেৰে কালাম আছিল এজন অতি মানৱ| তেওঁ ১৯৮১ চনৰ গণতন্ত্ৰ দিৱসৰ দিনা ‘পদ্মভূষণ’ সন্মান লাভ কৰে| ১৯৮২ চনত মাদ্ৰাজৰ আন্না বিশ্ববিদ্যালয়ে বিশ্ববিদ্যালয়ৰ সৰ্ব্বোচ্চ সন্মান ‘ডক্টৰ অব্‌ ছায়েন্স’ৰে সন্মানিত কৰে| ১৯৯০ চনৰ গণতন্ত্ৰ দিৱসত ‘পদ্মবিভূষণ’ৰে সন্মানিত কৰে| ১৯৯০ চনত যাদৱপুৰ বিশ্ববিদ্যালয়ে ‘ডক্টৰ অব্‌ ছায়েন্স’ উপাধি প্ৰদান কৰে| ১৯৯১ চনত মুম্বাই আইআইটিয়ে ‘ডক্টৰ অব্‌ ছায়েন্স’ উপাধি প্ৰদান কৰে| ১৯৯৭ চনৰ গণতন্ত্ৰ দিৱসত ভাৰতৰ সৰ্ব্বোচ্চ সন্মান ‘ভাৰত ৰত্ন’ উপাধিৰে বিভূষিত কৰে তেওঁক| তেওঁ ৰচনা কৰা গ্ৰন্থসমূহ হ’ল-উইংছ অব্‌ ফায়াৰ( এন অটোবায়’গ্ৰাফী,১৯৯৯), ইণ্ডিয়া ২০২০(১৯৯৮), এ নিউ নজেল ছ’চাইটী (২০০০), ইগ্‌নাইটেড মাইণ্ডছ(২০০২)| এ পি জে আব্দুল কালামে জীৱনৰ ঘাত-প্ৰতিঘাত সমুহক গুৰুত্ব নিদি, বৈবাহিক বান্ধোনৰ পৰা নিজক মুক্ত ৰাখি চিৰকুমাৰ হৈ দেশমাতৃৰ প্ৰগতিৰ হকে আত্মাহুতি দিয়া এনে এজন মহান ব্যক্তি প্ৰতিজন ভাৰতীয়ৰ কাৰণে চিৰস্মৰণীয়|

ছাকীল আহমেদ

2.95833333333
চাহিদা বেগম Jan 02, 2019 04:34 PM

বৰ ভাল লাগিল!

চাহিদা বেগম Jan 02, 2019 04:30 PM

বৰ ভাল লাগিল পঢ়ি!বহু নজনা কথা শিকিলোঁ!

মিথু বৰা Sep 06, 2018 01:30 PM

যথেষ্ট ভাল লাগিল।

ৰিকিৰঞ্জন গগৈ॥(লাওকোঠ)লখিমপুৰল May 23, 2018 08:31 PM

লিখা খিনি পঢ়ি বৰ ভাল লাগিল

মফিজ উদ্দিন Sep 24, 2017 05:28 PM

লিখনি খিনি বৰ সুন্দৰ লাগিছে

আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top