ছাত্ৰ-ছাত্ৰীৰ শিক্ষাৰ দায়িত্ব আনুষ্ঠানিক আৰু প্ৰত্যক্ষভাৱে গ্ৰহণ কৰা শিক্ষা-কৰ্তৃপক্ষৰ ভিতৰত স্কুল হৈছে অন্যতম। সেয়েহে ইয়াক আনুষ্ঠানিক শিক্ষা ব্যৱস্থা বুলি জনা যায়। ছাত্ৰই শিক্ষাগ্ৰহণ কৰিবলৈ স্কুললৈ যোৱাৰ কথাষাৰ সৰ্বসাধাৰণ লোকে পুৰণি কালৰে পৰা অনুভৱ কৰি আহিছে।
এটা সময় আছিল যেতিয়া স্কুলৰ বৈষয়িক অৱস্থা শিক্ষাদানৰ বাবে বিশেষ প্ৰয়োজন বুলি বিবেচনা কৰা হোৱা নাছিল। মুক্ত আকাশৰ তলত, গছ-গছনিৰ মাজত, গাঁৱৰ মুখিয়াল লোকৰ ঘৰৰ বাৰান্দাত, মন্দিৰ, মচজিদ, গীৰ্জা আদিৰ প্ৰংগণত অথবা গুৰুৰ ঘৰত অতি নিঃকিন অৱস্থাত ছাত্ৰক শিক্ষা দিয়া হৈছিল।