অংশিদাৰী
Views
  • স্থিতি: সম্পাদনাৰ বাবে মুকলি

গৰমত শৰীৰৰ যতন :

গৰমত শৰীৰৰ যতনৰ বিষয়ে লিখা হৈছে ।

 

এতিয়া গৰমৰ বতৰ। এই সময়ত বিশেষকৈ মহিলাসকলৰ সৌন্দৰ্যৰ ক্ষেত্ৰত অনেক অসুবিধা আহি পৰে। ছানগ্লাছ, টুপি, ছাতি, ছানস্ক্ৰীণ আদিৰ দ্বাৰা ৰক্ষণাবেক্ষণ লোৱাৰ পাছতো সূৰ্যৰ প্ৰখৰতাৰ পৰা আমি ৰেহাই নাপাওঁ। গৰম মানেই ছাল পোৰা, হাত, পিঠি পুৰি ক’লা চামনি পৰে। সুন্দৰ মৃসণ উজ্জ্বল আৰু দাগবিহীন ছাল এখনৰ কামনা সকলোৱে কৰে। কিন্তু জহকালি এনে এখন ছালৰ কামনা কৰা বেছ চেলেঞ্জিং। দুপৰীয়া ৰ’দত ওলোৱা মানেই শ্যামবৰণ হোৱা যেন বাধ্যতামূলক হৈ পৰে। তদুপৰি পিপাৰমেন্টেচন, সৰু সৰু বলি ৰেখা আদি বয়সৰ লক্ষণসমূহ বেছিভাগেই দেখা দিয়া সূৰ্যৰ আল্ট্ৰাভায়’লেট ৰশ্মিৰ প্ৰভাৱৰ দ্বাৰা। কাৰণ এই ৰশ্মি ছালৰ ভিতৰলৈকে সোমাই যায়, ফলত কোলাজেনৰ ক্ষতি কৰে আৰু ওপৰোক্ত সমস্যাসমূহ বাঢ়ি যায়। এইবোৰ সমস্যাৰ পৰা সকাহ পাবলৈ আমি কিছু ঘৰুৱা উপায়ৰ ওচৰ চাপিবলগীয়া হয়। যেনে- অকণমান এল’ভেৰা জেল, পকা অমিতা, টেঙা দৈৰ সৈতে হালধি বটি প্ৰভাৱিত ঠাইসমূহত সানিলে যাদুৰ দৰে এই সমস্যাসমূহ দূৰ হৈ আহে। তদুপৰি আমাক প্ৰয়োজন হয় ক’লা চামনি(টেন ৰিমুভিং) পৰা ঠাইসমূহৰ যতন লোৱা। কিন্তু কেনেকৈ?

এল’ভেৰা -

প্ৰাচীন কালৰ পৰাই এল’ভেৰা ৰূপচৰ্চাৰ অন্যতম উপকৰণ হিচাপে ব্যৱহৃত হৈ আহিছে। কিয়নো ই অনেক গুণেৰে ভৰপূৰ। এল’ভেৰা ৰস উলিয়াই লওক বা বজাৰত পোৱা এল’ভেৰা ৰস ব্যৱহাৰ কৰিব পাৰে। মুখমণ্ডল পৰিষ্কাৰকৈ ধুই ৰসখিনি লগাই বিশ মিনিটমান সময় ৰাখি তাৰ পাছত ধুই পেলাব। এল’ভেৰা জেলে ছালখনক শীতলতা প্ৰদান কৰে। ছালৰ ওপৰত এটা আৱৰণৰ সৃষ্টি কৰাৰ ফলত সূৰ্যৰ তাপৰ পৰা ছলখনক সুৰক্ষা প্ৰদান কৰে। আকৌ ছালখনক মুলায়েম কৰি সেমেকা কৰি তোলে। ক্ষতিগ্ৰস্ত ছালক পুনৰ মেৰামতি কৰাত এল’ভেৰা সিদ্ধহস্ত।

পকা অমিতা -

ৰ’দে পোৰাৰ আৱৰণ পাতল কৰি ছালখনক উজ্জ্বলতা প্ৰদান কৰি তোলাত পকা অমিতাৰ বিকল্প নাই। পকা অমিতাত পোৱা যায় ভিটামিন চি, কেৰোটিন, ফাইবাৰ, মেগনেছিয়াম, পটাছিয়াম যি যিকোনো ছালৰ বাবে উপযোগী। ছালৰ মৃত কোষবোৰ দূৰ কৰাত সহায় কৰে, ফলত ছাল হৈ পৰে উজ্জ্বল আৰু মসৃণ। অমিতাৰ পাল্ম হাতেৰে মুখমণ্ডল আৰু ডিঙিত ভালকৈ লগাই ২৫ মিনিটমান ৰাখি পৰিষ্কাৰ পানীৰে ধোৱক। ক’লা চামনি তথা দাগ দূৰ কৰিব। পিঠি, হাত আদিকো লগাব পাৰে। পকা অমিতাই স্কীন টোন আৰু লাইট কৰে।

কফি -

কেৱল উজ্জ্বলতাই নহয়, ৰ’দে পোৰা ছালৰ সমস্যাবোৰ দূৰ কৰিবলৈ কফিয়ে অনেক সহায় কৰে। তিনি-চাৰি চামুচ কফি পাউডাৰ, দুই টেবুল চামুচ ভিনেগাৰ, দুই চাহ চামুচ চি চল্ট একেলগে মিহলাই ঘন পেষ্ট তৈয়াৰ কৰি লওক। ডিঙি আৰু হাত আদিতো সানিব। স্ক্ৰাবৰ হিচাপে এই মিশ্ৰণে খুব সুন্দৰ কাম কৰে। মিশ্ৰণটো লগোৱাৰ পাছত লাহে লাহে ঘূৰণীয়া আকাৰত হাতেৰে ঘঁহিব। পাঁচ মিনিট অপেক্ষাৰ পাছত ধুই পেলাব। দেখিব ক’লা দাগ বহুখিনি পাতল হৈ পৰিছে। আকৌ দুই টেবুল চামুচ কফি, দুই টেবুল চামুচ ক’ক’ পাউডাৰ তিনি টেবুল চামুচ দৈ, এক চাহ চামুচ মৌ আৰু দুচামুচ নেমুৰ ৰস একেলগে মিহলাই ফেচমাস্ক তৈয়াৰ কৰি লওক। চকু আৰু ওঁঠৰ চাৰিওকাষ বাদ দি লগাওক। শুকালে ধুব। সপ্তাহত তিনি দিন এই ফেচ মাক্স ব্যৱহাৰ কৰক। কফিত আছে এন্টি অক্সিডেন্ট, এন্টি এজিং প্ৰ’পাৰ্টী যি ছালক পুনৰ সংস্থাপণ কৰাত সহায় কৰে। বয়সত পৰা দাগ, প্ৰ-মেচিঅ’ৰ সমস্যা অনেক দূৰ কৰে। এই স্ক্ৰাবে ছালৰ ওপৰভাগত জমা হৈ থকা কোষবোৰ আঁতৰ কৰি ছাললৈ উজ্জ্বলতা আনে। ফলত ৰ’দে পোৰা সমস্যা কমে। ৰক্ত সঞ্চালন  বৃদ্ধি পায়। চেল ৰিনিউয়েল প্ৰচেছ ত্বৰান্বিত হয়।

হালধি -

ৰ’দে পোৰা দূৰ কৰিবলৈ হালধিও খুবেই উপকাৰী। স্নান কৰাৰ আগেয়ে টেঙা দৈ আৰু কেঁচা হালধি পিহি শৰীৰত অনাবৃত অংশত লগাই থওক। শুকাই যোৱাৰ পাছত হাতত অলপ পানী লগাই অলপ সময় ঘঁহি ধুব স্নান কৰক। সপ্তাহত দুবাৰ এই পেক ব্যৱহাৰ কৰিলে ৰ’দে পোৰা বহু কমি যাব।

আলু:

প্ৰাকৃতিক ব্লিচ। থেতালি সামান্য অলিভ অইলৰ সৈতে মিহলাই এটা পেষ্ট তৈয়াৰ কৰি মুখত সানক। আধা শুকালে চাৰ্কুলাৰ মুভমেণ্টেৰে ঘহি ঘুই পেলাব।

আন কেইটিমান ঘৰুৱা পেক:

১)বিলাহীৰ ৰস অনাবৃত ঠাইসমূহত সানি আধা ঘন্টাৰ পাছত ধোৱক।

২)আধা কাপ তিয়ঁহৰ ৰস, অলপ গোলাপ জল আৰু গ্লিচাৰিণ মিহলাই ৰাতি শুবলৈ যোৱাৰ আগেয়ে লগাই থওক। পুৱা উঠাৰ পাছত মুখখন ধোৱক।

৩)অলপ হালধি গুড়ি, এচামুচ(টেবুল চামুচ) শুকান গাখীৰ, দুই টেবুল চামুচ, মৌ, আধা নেমুৰ ৰস একেলগে মিহলাই মুখ আৰু শৰীৰৰ অনাবৃত অংশত সানিব। শুকালে ধোৱক।

গৰম কালি বাহিৰলৈ ওলাই গ’লে ছাতি, ছানগ্লাছ ব্যৱহাৰ কৰাৰ উপৰি অনাবৃত অংশসমূহ ঢাকিবলৈ চেষ্টা কৰিব লাগে।

লেখিকা: শ্ৰুতি জৈন(অসম বাণী)

2.71428571429
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top