মূল পৃষ্ঠা / স্বাস্থ্য / স্বাস্থ্য কিটিপ / ঘনাই প্ৰস্ৰাৱ হোৱা বা মূত্ৰথলীৰ অতিকাৰ্য্যতা হলেনো কেনেকৈ পৰিত্ৰাণ পাব পাৰি
অংশিদাৰী
Views
  • স্থিতি: সম্পাদনাৰ বাবে মুকলি

ঘনাই প্ৰস্ৰাৱ হোৱা বা মূত্ৰথলীৰ অতিকাৰ্য্যতা হলেনো কেনেকৈ পৰিত্ৰাণ পাব পাৰি

ঘনাই প্ৰস্ৰাৱ হোৱা বা মূত্ৰথলীৰ অতিকাৰ্য্যতা হলেনো কেনেকৈ পৰিত্ৰাণ পাব পাৰি, সেই বিষয়ে লিখা হৈছে ।

 


কেতিয়াবা প্ৰস্ৰাৱৰ সংক্ৰমনৰ ফলত বা গৰ্ভাৱস্থা বা অন্যান্য কাৰণত মূত্ৰথলীৰ মাংসপেশীৰ দুৰ্বলতাৰ কাৰণে প্ৰস্ৰাৱ ধৰি ৰাখিব নোৱাৰা হয়, যাৰ ফলত কেতিয়াবা ঘনে ঘনে বা কেতিয়াবা অজানিতে , জোৰকৈ হাহিঁলে, কাহিঁলে, হাঁচিয়ালে প্ৰস্ৰাৱ ওলাই যায় | এনেক্ষেত্ৰত প্ৰয়োজনীয় ঔষধীয় চিকিত্সা কৰোৱাৰ পাছতো কেতিয়াবা সুফল পোৱা নাযায় | তেতিয়া এটাই উত্তৰ: কেগেল ব্যায়াম
(Kegel Exercise)
প্ৰথমতে আপুনি প্ৰস্ৰাৱ কৰি থাকোতে মাজতে এবাৰ প্ৰস্ৰাৱ ওলোৱা বন্ধ কৰি দিয়ক আৰু মন কৰক..কোন কেইটা মাংসপেশীৰ সংকোচন হল | ঠিক ধৰিব নোৱাৰিলে আৰু এবাৰ কৰি ভালদৰে বুজি লওক | এতিয়া প্ৰস্ৰাৱ কৰি মূত্ৰথলী সম্পুৰ্ণ খালী কৰাৰ পাছত এই মাংসপেশীখিনি ঠিক তেনেদৰে সংকুচিত কৰাৰ চেষ্টা কৰক | এয়ে কেগেল ব্যায়াম |
মন কৰিব যাতে এই ব্যায়াম কৰোতে কেতিয়াও তপিনাৰ মাংসপেশী, পেটৰ মাংসপেশী আৰু উৰুৰ মাংসপেশীৰ যাতে সংকোচন নহয় | লাগিলে আপুনি প্ৰথমতে কেইদিন পিঠিৰ ওপৰত শুই , পেটটো ওপৰফালে ৰাখি ভৰিদুখন পেটলৈ বুলি কোচাই লৈ ড্ৰেচিং আইনাত চাই চাই এই ব্যায়াম কৰক আৰু ব্যায়াম কৰোতে তপিনাৰ মাংসপেশীৰ লৰচৰ হৈছে নেকি চাওক | যদি লৰচৰ নকৰে তেন্তে ব্যায়াম সঠিকভাৱে হৈছে | তেনেকৈ পেটত হাত এখন ৰাখি পেটৰ ভিতৰত মাংসপেশীৰ লৰচৰ হয় নেকি চাওক | যদি কিবা লৰচৰ কৰাযেন লাগে তেন্তে সঠিক ব্যায়াম হোৱা নাই | উৰুৰ মাংসপেশীৰ সংকোচন হয় নেকি চাই লওক | তপিনা, পেট আৰু উৰুৰ মাংসপেশীৰ সংকোচন নোহোৱাকৈ যদি ব্যায়ামটো কৰিব পাৰিছে তেনেহলেহে ই সঠিক কেগেল ব্যায়াম |
নিয়ম: প্ৰথম অৱস্থাত এবাৰ সংকোচন কৰি পাঁচ ছেকেণ্ড ধৰি ৰাখি এৰি দিয়ক আৰু পাঁচ ছেকেণ্ড পাছত পুনৰাবৃত্তি কৰক | এনেদৰে একেৰাহে চাৰি পাঁচবাৰ কৰিব | দুই তিনিদিন এনেদৰে কৰাৰ পাছত ১০ ছেকেণ্ডৰ বাবে সংকোচন কৰি ১০ছেকেণ্ডৰ অন্তৰালত একেৰাহে চাৰি-পাঁচবাৰ পুনৰাবৃত্তি কৰি এদিনত কমেও তিনিবাৰকৈ তিনিৰ পৰা ছয় সপ্তাহলৈ এই ব্যায়াম কৰিলেহে সুফল পোৱা যায় |
গৰ্ভৱতী মহিলাও এই ব্যায়াম কৰিলে পিছলৈ ঘনাই প্ৰস্ৰাৱ হোৱা সমস্যাৰ পৰা বাচিব পাৰে |
প্ৰয়োজনত চিকিত্সকৰ পৰামৰ্শ লওক তথাপি ভূল নকৰিব |
কেতিয়াও মূত্ৰথলীত প্ৰস্ৰাৱ জমা থকা অৱস্থাত এই ব্যায়াম নকৰিব কাৰণ তেনেক্ষেত্ৰত এই ব্যায়ামে মূত্ৰথলীৰ মাংসপেশীৰ শিথিলতা আনি দিব পাৰে আৰু আপোনাৰ সমস্যা বাঢ়িহে যাব |
এই ব্যায়াম কৰোতে উশাহ বন্ধ কৰি নাৰাখি সাধাৰণ ভাবে লৈ থাকিব ।

প্ৰস্ৰাৱৰ সংক্ৰমন -


প্ৰস্ৰাৱৰ সংক্ৰমন হলে কেনেকৈ বুজিম :
লক্ষণ সমূহ :
১. প্ৰস্ৰাৱৰ জ্বলন ৰ লগতে ঘনাই খুব জোৰেৰে প্ৰস্ৰাৱ লগা |
২. কম পৰিমানে কষ্টযুক্ত প্ৰস্ৰাৱ হোৱা |
৩. তলপেটত বিষ অনুভৱ কৰা |
৪. ঘোলা, তেজযুক্ত বা উগ্ৰগোন্ধযুক্ত প্ৰস্ৰাৱ হোৱা |
৫. হঠাতে মাজে মাজে খুব ঠাণ্ডা অনুভৱ কৰা |
৬. ঠাণ্ডা লাগি কঁপি কঁপি তীব্ৰ জ্বৰ হোৱা |
৭. গাৰ বিষ হোৱা বা বমি বমি লগা |
৮. কঁকালৰ বিষ অনুভৱ কৰা |


ভয়াবহতা -


১. যদি প্ৰাথমিক অৱস্থাত উপযুক্ত চিকিত্সা কৰা নহয় তেন্তে প্ৰস্ৰাৱৰ নলীৰ পৰা বীজাণু মূত্ৰথলীয়েদি মূত্ৰবাহী নলীত প্ৰবেশ কৰিব পাৰে আৰু ই দুই বৃক্কৰ সংক্ৰমন ঘটাই পায়েল'নেফ্ৰাইটিচ ৰোগৰ উদ্পন্ন কৰিব পাৰে বা বৃক্ক অকামিলা হৈ যাব পাৰে | অন্যথা মূত্ৰথলীৰ সংক্ৰমন( ছিছ্টাইটিচ), প্ৰস্ৰাৱদ্বাৰৰ সংক্ৰমন (ইউৰেথ্ৰাইটিচ) আদিৰ পুন:সংক্ৰমন ঘটাব পাৰে |
২. মহিলাৰ প্ৰস্ৰাৱদ্বাৰ চুটি আৰু মলদ্বাৰৰ ওচৰত হোৱা বাবে মলদ্বাৰৰ পৰা বীজাণু সহজে প্ৰস্ৰাবদ্বাৰেদি প্ৰবেশ কৰি সংক্ৰমন ঘটাব পাৰে বাবে প্ৰায় ৫০শতাংশ মহিলাই জীৱনত এবাৰ হলেও এই ৰোগত আক্ৰান্ত হয় | ইয়াৰে প্ৰায় ২০ ৰপৰা ৩০ শতাংশ মহিলাৰ পুন:সংক্ৰমন হয় | গৰ্ভৱতী মহিলাৰ ক্ষেত্ৰত এই ভয়াবহতা অতি বেছি |
৩. কিছুমান হঠাতে খুব বেচিকৈ হোৱা প্ৰস্ৰাৱৰ সংক্ৰমনৰ ফলত তেজত বীজাণুৰ প্ৰবেশ ঘটাই অতিপাত বৃদ্ধি ৰ ফলত ছেপ্টিছেমিয়া নামৰ এক প্ৰাণ ঘাতক অৱস্থাৰ সৃষ্টি কৰিব পাৰে |

লেখক: হেমন্ত কুমাৰ নাথ

উৎস: স্বাস্থ্য দ্য হেলথ ছলিউশ্যনছ

 

2.55555555556
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top