মূল পৃষ্ঠা / স্বাস্থ্য / স্বাস্থ্য কিটিপ / চৰ্বি কমোৱাৰ সহজ উপায় :
অংশিদাৰী
Views
  • স্থিতি: সম্পাদনাৰ বাবে মুকলি

চৰ্বি কমোৱাৰ সহজ উপায় :

চৰ্বি কমোৱাৰ সহজ উপায়ৰ বিষয়ে লিখা হৈছে ।

 

মেদবহুলতা বৰ্তমান সমাজত সকলো বয়সৰ সমস্যা। ফাষ্টফুড, জাংক ফুড, হৰ’মনৰ বিসংগতি আৰামপ্ৰিয় জীৱনশৈলী ইত্যাদি কাৰণকে ইয়াৰ মুখ্য ঘটক হিচাপে চিহ্নিত কৰিব পাৰি। শৰীৰত অত্যাধিক মেদ বা চৰ্বি জমা হোৱাৰ ফলত মানুহ এজনৰ শৰীৰৰ ওজন বাঢ়ি যায় আৰু তেওঁলোক বিভিন্ন ধৰণৰ বেমাৰত আকৰন্ত হোৱাৰ সম্ভাৱনা বৃদ্ধি পায়। বহুত ক্ষেত্ৰত তেওঁলোকৰ আত্মবিশ্বাস কমি যোৱা আৰু হীনমন্যতাত ভোগাও দেখা যায়। মেদবহুলতা বা শৰীৰত অত্যধিক চৰ্বি জমা হোৱা আৰু শৰীৰৰ প্ৰয়োজনতকৈ ওজন বাঢ়ি যোৱাটো গম পোৱা যায় মানুহজনৰ বি এম আইৰ জৰিয়তে। এজন মানুহৰ বি এম আই স্বাভাৱিকতে ১৮.৫ ৰ পৰা ২৫ ৰ ভিতৰত হ’ব লাগে। ইয়াতকৈ কমি গ’লে খীনাই যোৱা বা ওজন হ্ৰাস হোৱা আৰু ইয়াতকৈ বাঢ়ি গ’লে শকত হোৱা বা ওজন বাঢ়ি যোৱা বুলি কোৱা হয়। মানুহ এজনৰ বি এম আই নিৰ্ধাৰণ কৰা সুত্ৰটো হ’ল বি এম আই= মানুহজনৰ ওজন কিলোগ্ৰাম হিচাপে/মানুহজনৰ উচ্চতা মিটাৰত  x মানুহজনৰ উচ্চতা মিটাৰত।

উদাহৰণস্বৰুপে যদি এজন মানুহৰ ওজন ৬০ কেজি হয় আৰু তেওঁৰ উচ্চতা ১.৫ মিতাৰ হয়, তেন্তে তেওঁৰ বি এম আই=৬০/১.৫*১.৫= ১৬.৬৭। আগতে উল্লেখ কৰা হৈছে যে বেছিভাগ ক্ষেত্ৰতে মানুহ এজনৰ এই  সমস্যাটোস্তেওঁৰ অশুদ্ধ জীৱনশৈলী আৰু খাদ্যাভ্যাস, যেনে- চৰ্বিযুক্ত সংশোধিত খাদ্য অধিক পৰিমাণে গ্ৰহণ, প্ৰয়োজনতকৈ অধিক পৰিমাণে খাদ্য গ্ৰহণ, শীতল পানীয় আৰু শৰ্কৰাজাতীয় পানীয়ৰ অধিক সেৱন, শাৰীৰিক শ্ৰমৰ অভাৱ, দৈনিক অত্যধিক বা কমকৈ শোৱা আৰু অন্য এনেধৰণৰআৰামপ্ৰিয় জীৱনশৈলীৰ প্ৰভাৱত উদ্ভৱ হয়। অৱশ্যে জেনেটিক বা বংশগত কাৰক আৰু হৰম’নৰ তাৰতম্যৰ ফলতো এই সমস্যটো হোৱাৰ আশংকা থাকে। মেদবহুলতাৰ ফলত হ’ব পৰা সম্ভাব্য গম্ভীৰ সমস্যাবিলাক, যেনে-ডায়েবেটিছ, উচ্চ ৰক্তচাপ, হৃদৰোগ ইত্যাদিয়েহে মানুহ এজনক বেছি জুৰুলা কৰিব পাৰে বা অধিক জটিলতাৰ সৃষ্টি কৰিব পাৰে আৰু কেতিয়াবা মৃত্যুৰ মুখলৈও ঠেলি দিব পাৰে। গতিকে স্বাস্থ্যসন্মত জীৱনশৈলীৰ অভ্যাস কৰি আমি এই সমস্যাটোৰ পৰা পৰিত্ৰাণ পাব পাৰো।

শৰীৰৰ ওজন কমোৱাৰ বাবে কেইটামান সাধাৰণ স্বাস্থ্যসন্মত উপায় আৰু ঘৰুৱা দিহা উল্লেখ কৰা হ’ল-

*দৈনন্দিন খোৱা খাদ্যত যথেষ্ট পৰিমাণে প্ৰ’টিনজাতীয় খাদ্যবস্তু সেৱন কৰিব লাগে। প্ৰ’টিনজাতীয় খাদ্যবস্তুৰ পৰা আমাৰ শৰীৰৰ মাংসপেশীবিলাকে কম কৰিবলৈ শক্তি আহৰণ কৰে। প্ৰ’টিনজাতীয় খাদ্যবস্তুৱে আমাৰ শৰীৰৰ বিপাক ক্ৰিয়া ত্বৰান্বিত কৰে আৰু লগতে প্ৰ’টিনযুক্ত খাদ্য খালে দেৰিকৈ ভোক লাগে। ফলত শৰীৰৰ ওজন হ্ৰাস হোৱাত সহায় হয়। মুখ্যত: উদ্ভিদজাত প্ৰ’টিন যেনে-ফ্ৰেন্সবীন, অ’টছ, লেছেৰা, দাইল ইত্যাদি খাদ্যত যথেষ্ট পৰিমাণে প্ৰ’টিন পোৱা যায়। তদুপৰি মাংস, কণী ইত্যাদিতো যথেষ্ট পৰিমাণে প্ৰ’টিন থাকে যদিও জন্তুজ প্ৰ’টিন নিৰ্দিষ্ট পৰিমাণত খাব লাগে।

*সংশোধিত খাদ্যবস্তু খোৱাৰ অভ্যাস পৰিত্যাগ কৰা উচিত। সংশোধিত খাদ্য, যেনে-বিভিন্ন ধৰণৰ ফাষ্ট ফুড, জাংক ফুড ইত্যাদিত যথেষ্ট পৰিমাণে ছ’ডিয়াম, চৰ্বি, শৰ্কৰা ইত্যাদি সংযোজিত কৰা হয় আৰু এই খাদ্যবিলাকে নিজৰ প্ৰকৃত গুণাগুণ হেৰুৱাই পেলায়। যৰ ফলত মানুহৰ শৰীৰৰ ওজন বৃদ্ধি হোৱাৰ লগতে বিভিন্ন ধৰণৰ গম্ভীৰ ৰোগৰ দ্বাৰা আক্ৰান্ত হয়। সেয়েহে এনেকুৱা খাদ্যবস্তু পৰিহাৰ কৰি উপযুক্ত পোষকতত্ত্ব থকা খাদ্য সেৱন কৰা উচিত।

*স্বাস্থ্যসন্মত খাদ্যাভ্যাস গঢ়ি তোলা উচিত। স্বাস্থ্যসন্মত আৰু প্ৰাকৃতিকভাৱে উৎপাদিত খাদ্য আৰু লঘু আহাৰ গ্ৰহণ কৰা উচিত। যেনে-লাচ্চি বা প্ৰাকৃতিকভাৱে উৎপাদিত দৈ, ফল-মুল, বাদাম, গাজৰ, সিজোৱা কণী ইত্যাদি।

*শৰ্কৰামিশ্ৰিত খাদ্য খোৱাত সীমাবদ্ধতা অৱলম্বন কৰিব লাগে। অতিৰিক্তভাৱে শৰ্কৰামিশ্ৰিত খাদ্য খোৱাৰ ফলত আমাৰ বিভিন্ন ধৰণৰ গম্ভীৰ বেমাৰ, যেনে- হৃদৰোগ, মধুমেহ , কৰ্কট ৰোগ আদিৰ দ্বাৰা আক্ৰান্ত হোৱাৰ আংশকা বৃদ্ধি পায় আৰু লগতে শৰীৰৰ ওজনো বৃদ্ধি হয়। গতিকে অতিৰিক্তভাৱে শৰ্কৰামিশ্ৰিত খাদ্যৰ লগতে শীতল পানীয়, ফলৰ ৰস, চকলেট মিশ্ৰিত গাখীৰ, তুৰন্তে শক্তিপ্ৰদানকাৰী পানীয় ইত্যাদিৰ সেৱনো পৰিহাৰ কৰিব লাগে।

*যথেষ্ট পৰিমাণে পানী সেৱন কৰিব লাগে। আধা লিটাৰ পানী সেৱন কৰাৰ ফলত শৰীৰৰ ২৪-৩০ শতাংশ কেলৰি এঘণ্টাৰ ভিতৰত দহন হয় বুলি গৱেষণাৰ পৰা গম পোৱা গৈছে। সদায় কুহুমীয়া গৰম পানীহে সেৱন কৰিব লাগে।

*চেনি নিমিহলোৱাকৈ কফি আৰু গ্ৰীন টি সেৱন কৰিব লাগে। কফি আৰু গ্ৰীন টি এণ্টিঅক্সিডেণ্ট গুণেৰে সমৃদ্ধ। কেফেইনযুক্ত কফি আৰু গ্ৰীন টিয়ে আমাৰ শৰীৰৰ বিপাক ক্ৰিয়াত সহায় কৰে আৰু আমাক ডায়েবেটিছ ৰোগ হোৱাত বাধা প্ৰদান কৰে।

*টিভি চাই খাদ্য খোৱাৰ অভ্যাস পৰিত্যাগ কৰিব লাগে। কাৰণ টিভি চাই চাই খাদ্য খালে আমাৰ মনটো টিভিৰ ওপৰত নিমজ্জিত হৈ থাকে, ফলত আমি কি খাইছো বা কিমান পৰিমাণৰ খাইছো, সেইটো ধ্যান ৰখা নাযায়।

*ৰিফাইনযুক্ত কাৰ্বহাইড্ৰেট গ্ৰহণ বন্ধ কৰা উচিত। কাৰণ এনেকুৱা খাদ্যত আমাৰ শৰীৰক লাগতিয়াল পোষকতত্ত্ব বা আঁহ নাথাকে। যেনে-ময়দা বা ময়দাৰে বনোৱা পাউৰুটী, পেষ্টি, মিঠাই, পাষ্টা, চাওমিন ইত্যাদি । লগতে আৰৈ চাউল খোৱা পৰিত্যাগ কৰিব লাগে।

*মাজে মাজে উপবাসে থকাৰ অভ্যাস গঢ়িব লাগে। সপ্তাহত এদিন বা মাহত দুই-তিনিদিনমান উপবাসে থকাৰ ফলত আমাৰ শৰীৰত জমা হোৱা দুষিত পদৰ্থসমুহৰ নাশ হোৱাত সহায় হয়। উপবাসৰ সময়ত মানুহজনে কেৱল আৱশ্যকতা অনুসৰি পানী আৰু কেতিয়াবা ফল-মুল সেৱন কৰা উচিত।

*ফল-মুল আৰু শাক-পাচলিঅধিক পৰিমাণে খোৱা উচিত। যিহেতু ফল-মুল আৰু শাক-পচলিত অধিক পৰিমাণৰ এণ্টি-অক্সিডেণ্ট, খনিজ পদাৰ্থ আৰু আঁহ-পোৱা যায়, ই শৰীৰত চৰ্বি হিচাপে জমা নহৈ আমাৰ শৰীৰক প্ৰয়োজনীয় পোষকতত্ত্বৰ যোগান ধৰে।

*খাদ্য সদায় সৰু সৰু কাঁহী বা প্লেটত লৈহে পৰিবেশন কৰা উচিত। যিমান ডাঙৰ কাঁহী খাদ্যও সিমান বেছিকৈ লোৱা যায়। গৱেষণাৰ পৰা দেখা গৈছে যে খাদ্য খাবলৈ সৰু কাঁহী ব্যৱহাৰ কৰিলে মানুহে খোৱা খাদ্যৰ পৰিমাণ কমি যায়, কাৰণ কাঁহীখনত আমি যিমান পৰিমাণৰ খাদ্য দেখা পাওঁ, সেইটোৱে আমাৰ মনত এটা প্ৰভাৱ বিস্তাৰ কৰে। ডাঙৰ কাঁহী বেছি পৰিমাণৰ খাদ্যবস্তু ল’লেও সেয়া কাঁহীখনৰ আকাৰ হিচাপে কম পৰিমাণৰ দেখা যায়।

*খাদ্য খুব লাহে লাহে চোবাই খাব লাগে। আমি খোৱা খাদ্যবস্তু পাকস্থলীলৈ যোৱাৰ বিশমিনিট পিচতহে আমাৰ মগজুলৈ সংকেত পৰিবাহীত হয় পেট ভৰিল নে নাই। যদিহে আমাৰ মগজুলৈ সংকেত যোৱাৰ আগতে আমি খুব দৌৰাদৌৰিকৈ খাদ্য খাওঁ, আমি আমাৰ শৰীৰক দৰকাৰতকৈ বেছি খাদ্য খোৱাৰ সম্ভাৱনা থাকি যায়। গতিকে আমি খুব লাহে লাহে চোবাই চোবাই খাদ্য খোৱা উচিত যাতে আমাৰ পাকস্থলীৰ পৰা মগজুলৈ সংকেত যায়। তেনেহ’লে আমি আমাৰ ভোক অনুপাতে খাদ্য খাব পাৰো।

*সদায় কণী খোৱাৰ অভ্যাস গঢ়ি তোলা উচিত। কণীত প্ৰচুৰ পৰিমাণে প্ৰ’টিন থাকে। সমীক্ষাৰ পৰা দেখা গৈছে যে ব্ৰেকফাষ্টত কণী খালে খুব কম সময়ত ওজন হ্ৰাস কৰিব পাৰি। যিহেতু কণীত অধিক পৰিমাণে প্ৰ’টিন থাকে, কণী খালে পেট ভৰ্তি হৈ থাকে আৰু দেৰিকৈ ভোক লাগে। অৱশ্যে প্ৰশ্ন উদয় হ’ব পাৰে কণীৰ অকল যে বগা প্ৰ’টিনযুক্ত অংশ খাব নে ভিতৰৰ কলেষ্ট্ৰ’ৰেলযুক্ত কুহুমসহ কহব। নতুন গৱেষণাৰ পৰা পোৱা তথ্য অনুসৰি কণী বা মাংস ইত্যাদিত থকা কলেষ্ট্ৰৰেল মানুহৰ বাবে বেছি হানিকাৰক নহয়, যদিহে উপযুক্ত মাত্ৰাত খোৱা হয়। বৰঞ্চ এই কলেষ্ট্ৰৰেলে আমাৰ যৌন হৰম’ন, যেনে টেষ্টষ্টেৰন উত্‌পাদনত সহায় কৰে, লগতে আমৰ মগজুৰ বিকাশতো সহায় কৰে। অৱশ্যে এই বিষয়ত মতানৈক্য হোৱাৰ অৱকাশ নথকা নহয়।

*গৱেষণাৰ পৰা দেখা গৈছে যে খাদ্য ৰন্ধা-বঢ়াত নাৰিকলৰ তেল আৰু অলিভ অইল ব্যৱহাৰ কৰিলেও চৰ্বি হ্ৰাস হয়। কাৰণ নাৰিকলৰ তেলত থকা চৰ্বি অন্য তেলত থকা চৰ্বিতকৈ অলপ বেলেগ ধৰণৰ আৰু ই আমাক বিপাক ক্ৰিয়াত সহায় কৰে আৰু কেলৰি দহনতো সহায় কৰে।

*যিমান অপৰি গাড়ী বা বাহনৰ ব্যৱহাৰ কমকৈ কৰিব লাগে। যদি ওচৰৰ কোনোবা ঠাইলৈ যাব লগা হয়, য’ত গাড়ী বা বাহনৰ ব্যৱহাৰ নকৰিলেও চলে, তেনে ঠাইলৈ খোজ কাঢ়ি যোৱাৰ অভ্যাস গঢ়িব লাগে।

*প্ৰ’বায়’টিক সেৱন কৰিব লাগে। প্ৰ’বায়’টিক হ’ল জীৱিত বেক্টেৰিঅয়, যিয়ে আমাৰ পাচন প্ৰক্ৰিয়াত সহায় কৰে। আমাৰ পাচন তন্ত্ৰৰ ক্ষুদ্ৰান্তৰ বেৰত এনেকুৱা ধৰণৰ বহুতো বেক্টেৰিয়া, যাক লেক্টবেচিলাছ গেছেৰি বুলি কোৱা হয়, থাকে আৰু ইহঁতে আমাক খাদ্য পাচন প্ৰক্ৰিয়াত সহায় কৰে। প্ৰ’বায়’টিকে আমাৰ ক্ষুদ্ৰান্তৰ বেক্টেৰিয়াবিলাকক স্বাস্থ্যৱান কৰে আৰু খাদ্যবস্তুত থকা চৰ্বিৰ শোষণ প্ৰক্ৰিয়াতো বাধা প্ৰদান কৰিব পাৰে। যাৰ ফলত মেদবহুলতা ৰোধত সহায়ক হয়।

*দৈনিক ৬ ৰ পৰা ৮ ঘণ্টা শুব লাগে। গৱেষণাৰ পৰা দেখা গৈছে যে যিবিলাক মানুহে দৈনিক ৬ ৰ পৰা ৮ ঘণ্টা বহলকৈ নোশোৱে, তেনেমানুহৰ শকত হোৱাৰ প্ৰৱণতা বাঢ়ি যায় আৰু হৰম’নৰ বিসংগতিয়েও দেখা দিব পাৰে।

*দিনত শোৱাৰ অভ্যাস পৰিত্যাগ কৰিব লাগে। অৱশ্যে যিসকলে নিশা জাগি থাকি কৰ্তব্য কৰে, তেনেলোক দিনত শুব পাৰে।

*দৈনিক ব্যায়াম, যোগাসন, চাইকেল চলোৱা ইত্যাদি অভ্যাসবোৰ গঢ়ি তুলিব লাগে।

*বৰ্তমান সমাজত সঘনাই উচ্চাৰিত এটা শব্দ হ’ল ডায়েটিং। কিন্তু ডায়েটিং যদি সঠিক নিয়ম অনুসৰি কৰা নাযায়, ই জীৱননাশকো হ’ব পাৰে। প্ৰায়ভাগ ডায়েটিং কৰা মানুহক দেখা যায় নিজৰ শৰীৰক দৰকাৰী পৰিমাণতকৈ কমকৈ খাদ্য খায় বা শৰীৰক লাগতিয়াল পোষকতত্ত্বযুক্ত খাদ্য গ্ৰহণ নকৰে। পৰিণতিত প্ৰায়ভাগ ডায়েটিঙত শৰীৰৰ মাংসপেশীৰ অৱক্ষয় হ’লে বা শুকাই গ’লে আমাৰ শৰীৰৰ কেলৰি দহন প্ৰক্ৰিয়া বাধাপ্ৰাপ্ত হয় ফলত বিচৰা ধৰণৰ ফল পোৱা নাযায়। গতিকে ডায়েটিং কৰিলেও সঠিক নিয়মানুযায়ী , দৰকাৰ হ’লে ডায়েটিচিয়ানৰ পৰামৰ্শ লৈহে কৰা উচিত।

*অকল ওজন কমোৱাটোৱে মুল লক্ষ্য হিচাপে নধৰি স্বাস্থ্যকৰ জীৱনশৈলীৰ অভ্যাস তথা স্বাস্থ্যকৰ আৰু পোষকতত্ত্বযুক্ত খাদ্য গ্ৰহণ কৰাৰ ওপৰতো বিশেষ গুৰুত্ব প্ৰদান কৰা উচিত।

লেখক: ডা: মুকুল শৰ্মা (দেওবৰীয়া সম্ভাৰ )

3.07142857143
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top