মূল পৃষ্ঠা / স্বাস্থ্য / স্বাস্থ্য কিটিপ / শৈশৱত ব্যায়ামৰ প্ৰভাৱ :
অংশিদাৰী
Views
  • স্থিতি: সম্পাদনাৰ বাবে মুকলি

শৈশৱত ব্যায়ামৰ প্ৰভাৱ :

শৈশৱত ব্যায়ামৰ প্ৰভাৱৰ বিষয়ে লিখা হৈছে ।

 

বৰ্তমান সমাজৰ দ্ৰুত পৰিৱৰ্তনে আমাৰ জীৱনশৈলীত অস্বাভাৱিক ধৰণে প্ৰভাৱ পেলাইছে । এই প্ৰভাৱ ল’ৰাৰ পৰা বুঢ়ালৈকে পৰিছে । সমাজৰ এই পৰিৱৰ্তনৰ বাবে মানুহৰ জীৱনলৈ স্থবিৰতাও আহিছে । এটা সময় আছিল, যি সময়ত ল’ৰা-ছোৱালীক দৌৰা-দৌৰি কৰিবলৈ, সাঁতুৰিবলৈ, গছত উঠিবলৈ, ফমূৰ্টি দলিয়াবলৈ বাধা প্ৰদানহে কৰিবলগীয়া হৈছিল । সেই সময়ৰ জীৱনশৈলী এনেধৰনৰ আছিল যে সাধাৰণ জীৱনত এইবোৰ আছিল স্বাভাৱিক ঘটনা । কিন্তু এতিয়া সমাজৰ পৰিৱৰ্তনে ল’ৰা-ছোৱালীৰ জীৱনটোত অদ্ভুত ধৰণে প্ৰভাৱ পেলাইছে । সিহঁতৰ খেলিবলৈ খেলপথাৰৰ অভাৱ, দৌৰিবলৈ ঠাইৰ অভাৱ অথবা লগৰীয়াৰ অভাৱ । দুটা কোঠাৰ মাজত সিহঁতৰ জীৱন সীমাবদ্ধ হৈ পৰিছে । সাঁতুৰিবলৈ যোৱাটো বাধ্যতামূলক হৈছে, যিটোৰ বাবে সিহঁতে সাতোঁৰাৰ আনন্দ হেৰুৱাইছে । ল’ৰা-ছোৱালীৰ জীৱনৰ এই পৰিৱৰ্তনে সিহঁতৰ স্বাস্থ্যৰ ওপৰতো প্ৰভাৱ পেলাইছে । শৈশৱতে সিহঁত মধুমেহ ৰোগৰ চিকাৰ হৈছে । চিকিৎসা বিজ্ঞানে এই কথা স্বীকাৰ কৰিছে যে সমাজৰ দ্ৰুত পৰিৱৰ্তন অৱশ্যম্ভাৱী । ইয়াক কোনেও ৰুধিব নোৱাৰে । কিন্তু তাৰ মাজতেই আমি সুস্থ জীৱনৰ বাবে কিছুমান নিয়ম বান্ধি ল’ব লাগিব । যিবোৰৰ জৰিয়তে সমাজো সুস্থ হৈ থাকিব আৰু জীয়াই থকাৰ প্ৰেৰণাও পাব ।

ল’ৰা-ছোৱালীৰ জীৱনত ব্যায়ামৰ ভূমিকাৰ কথা চিকিৎসা বিজ্ঞানে স্বীকাৰ কৰিছে । ব্যায়ামৰ জৰিয়তে হৃৎপিণ্ডলৈ তেজৰ চলাচল বৃদ্ধি পায় । শৰীৰত হৃৎপিণ্ডৰ স্পন্দন বৃদ্ধি হয় বাবেই এই প্ৰভাৱ পৰে । ইয়াৰ ফলত উশাহ ঘন হয় আৰু হাঁওফাঁওলৈ অক্সিজেনৰ মাত্ৰা বৃদ্ধি পায় । সেয়ে শিশুৰ গতানুগতিক কামবোৰৰ লগতে ব্যায়ামৰ ওপৰতো সৰ্বাধিক গুৰুত্ব দিয়া প্ৰয়োজন । ইয়াৰ কাৰণে শিশুক কোনো এৰ’বিকছ ক্লাছত ভৰ্তি কৰাব নালাগে । পিতৃ- মাতৃ বা পৰিয়ালৰ জ্যেষ্ঠসকলে শিশুৰ লগতে এই অভ্যাসবোৰ কৰিব পাৰে । সেইবোৰৰ ভিতৰত নাচ আৰু যিকোনো এটা খেল খেলা, জঁপিওৱা, দৌৰা, খৰকৈ খোজ কঢ়া ইত্যাদিয়েই প্ৰধান । শিশুৰ শৰীৰত ইয়াৰ প্ৰভাৱ এনেধৰণে পৰে ।

হাঁওফাঁও আৰু হৃৎপিণ্ডৰ পৰা প্ৰভাৱ -

যেতিয়া আমি ব্যায়াম কৰো, তেতিয়া হৃদস্পন্দনৰ মাত্ৰা বৃদ্ধি পায় । ফলত হৃৎপিণ্ডলৈ বেছিকৈ তেজৰ চলাচল হয় । একেধৰণে অক্সিজেনো হৃৎপিণ্ডই সেই সময়খিনিত বেছিকৈ পায় । ইয়াৰ প্ৰভাৱ হাওঁফাওঁতো পৰে । এই ব্যায়ামে হাঁওফাঁও আৰু হৃৎপিণ্ডক সুস্থ ৰখাত সহায় কৰে ।

ওজন নিয়ন্ত্ৰণ কৰে -

তুলনামূলকভাৱে শিশুৱে বেছি কেলৰিযুক্ত আহাৰ গ্ৰহণ কৰে । সেই কেলৰি সাধাৰণ জীৱন- যাত্ৰাত ব্যয় হোৱাটো অসম্ভৱ বাবে শৰীৰৰ ওজন বৃদ্ধি হৈ মেদবহুলতাৰ চিকাৰ হয় । শৰীৰৰ এই অপ্ৰয়োজনীয় চৰ্বি কমাবৰ বাবেও এই ব্যায়ামৰ প্ৰয়োজন । ব্যায়ামৰ জৰিয়তে কেলৰি ক্ষয় কৰিবলৈ সহজ ।

পেশী সবল কৰে :-

সাধাৰণতে শিশুৰ পেশী মজবুত কৰাৰ কোনো ব্যায়াম নাই যদিও ব্যায়ামে শৰীৰটো সুগঢ়ী কৰি তোলে । ইয়াৰ পৰা এই কথা প্ৰমাণ হৈছে যে এটা কোঠাত চকীত বহি টেলিভিছন চাই বা ম’বাইলত গেম খেলি কটোৱা শিশুতকৈ বাহিৰত খেলা-ধুলা কৰা শিশুৰ পেশী বেছি মজবুত । ব্যায়ামেই এইক্ষেত্ৰত অধিক গ্ৰহণীয় ।

হাড় মজবুত কৰে :-

ভৱিষ্যৎ জীৱনৰ এজন সুদক্ষ সেনা বিষয়া বা সামৰিক বিষয়া হ’বৰ কাৰণে শৈশৱৰ পৰাই হাড়ৰ গঠন মজবুত হোৱাৰ প্ৰয়োজন । এইক্ষেত্ৰত ব্যায়ামে যথেষ্ট সহায় কৰে ।

শৰীৰৰ দূষণ ক্ষমতা নাইকিয়া কৰে -

আমাৰ শৰীৰৰ সুস্থ হৈ থকাৰ বাবে শৰীৰৰ পৰা দূষিত বস্তু আঁতৰ কৰাৰ প্ৰয়োজন । ব্যায়ামে এইক্ষেত্ৰত সহায় কৰে । অৰ্থাৎ আমাৰ প্ৰস্ৰাৱ-পায়খানা নিয়মীয়া কৰে, যিটোৱে শৰীৰ সুস্থ ৰখাত সহায় কৰে । শৰীৰৰ পৰা টক্সিন ঘামৰ জৰিয়তে ওলাই যায় । ফলত লিভাৰ আৰু ছালৰ ওপৰত বিশেষ প্ৰভাৱ পৰে ।

ৰোগ প্ৰতিৰোধ ক্ষমতা বঢ়ায় -

ব্যায়ামে শৰীৰৰ ওপৰত সৰ্বাধিক প্ৰভাৱ পেলায় বাবে যিকোনো ৰোগে আক্ৰমণ কৰিব নোৱাৰে । এই অধ্যয়নত এই কথাও উল্লেখ কৰিছে যে শ্বেতৰক্ত কণিকাৰ ওপৰতো ব্যায়ামে প্ৰভাৱ পেলায় বাবে ৰোগ প্ৰতিৰোধ ক্ষমতা বৃদ্ধি পায় ।

হতাশগ্ৰস্ততা নাইকিয়া কৰে :-

শৰীৰৰ সকলো অংগৰ খৰকৈ হোৱা সঞ্চালনে এণ্ড্ৰ’ফিনছ হৰম’নৰ উৎপত্তিত সহায় কৰে । ইয়াৰ প্ৰভাৱ মনৰ ওপৰত পৰে । সেয়ে মানসিকভাৱে সবল কৰে । উত্তেজনা কমে । সম্প্ৰতি এই কথাও প্ৰমাণ হৈছে যে যিসকল ব্যক্তি হতাশগ্ৰস্ততাৰ বলি হৈছে তেওঁলোকে ইয়াৰ সৈতে যুঁজিবৰ বাবে ব্যায়াম কৰাৰ প্ৰয়োজন ।

শিশুক সমাজপ্ৰিয় কৰি তোলে -

ব্যায়াম কৰোতে কেইবাজনো লগ হৈ কৰা হয় । সেইবাবে মিলাপ্ৰীতি বেছিকৈ হয় । আনৰ সুখ বা দুখ বুজাত এই স্বভাৱে সহায় কৰে । হাঁহি-ধেমালিৰে কৰা ব্যায়ামে শিশুক সমাজপ্ৰিয় কৰি তোলে ।

মনোযোগ বৃদ্ধি কৰে :-

এটা সুস্থ মনে এটা সুস্থ শৰীৰত প্ৰভাৱ পেলায় । এই অধ্যয়নত এই কথাও প্ৰমাণ হৈছে যে যেতিয়া মন সুস্থ থাকে তেতিয়া পঢ়া-শুনা বা অন্যান্য প্ৰতিযোগিতাতো ভাল ফল দেখুৱাবলৈ সম্ভৱ হয় । এইটো নিয়মীয়াকৈ কৰা ব্যায়ামৰ জৰিয়তেহে সম্ভৱ । কিয়নো ব্যায়ামে মগজুৰ কোষ বৃদ্ধিতো সহায় কৰে ।

এৰ’বিকছ ভাল ব্যায়াম -

এজন বয়স্ক মানুহে শৰীৰ সুস্থ ৰখাৰ বাবে জিমলৈ অহা-যোৱা কৰিব পাৰে । এইটো শিশুৰ ক্ষেত্ৰতো কৰিব পাৰে যদিও সিহঁতৰ বাবে এনেধৰণৰ অনুশীলন আমনিদায়ক হ’ব পাৰে । এইক্ষেত্ৰত ব্যায়ামে সিহঁতলৈ নতুনত্ব কঢ়িয়াই আনে । কিয়নো, ব্যায়াম প্ৰতিদিনে বিভিন্ন পদ্ধতিৰে সালসলনি কৰিব পাৰি ।

লেখিকা:- গীতিমালিকা নেওগ

উৎস :- জি এনআৰচি স্বাস্থ্য

2.0
তৰাসমূহৰ ওপৰত ক্লীক কৰি মান প্ৰদান কৰক।
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top