অংশিদাৰী
Views
  • স্থিতি: সম্পাদনাৰ বাবে মুকলি

সু-স্বাস্থ্যৰ দিহা

সু-স্বাস্থ্যৰ দিহা লিখা হৈছে

সু-স্বাস্থ্যৰ বাবে সু-নিদ্ৰাঃ

 

আমি যদি নিৰ্দিষ্ট সময়ত শুবলৈ গৈ টোপনিত লালকাল হৈ পৰোঁ আৰু নিৰ্দিষ্ট সময়ত টোপনিৰ পৰা সাৰ পাওঁ, আমি বুজিব লাগিব যে ইয়ে আমাৰ সু-স্বাস্থ্য ৰক্ষা কৰাত সহায়ক হ’ব। আনহাতে নিৰ্দিষ্ট সময়ত শুবলৈ গৈ বিছনাত ধৰফৰাই থাকিবলগীয়া হয় নাইবা টোপনি আহিলেও মাজে মাজে সাৰ পাই শুই উঠাৰ কোনো নিৰ্দিষ্ট সময়ত নহয়, তেনেহ’লে বুজিব লাগিব ইয়ে আমাৰ সু-স্বাস্থ্য ৰক্ষাত বিৰূপ প্ৰতিক্ৰিয়াৰ সৃষ্টি কৰিব। ভালদৰে টোপনি যোৱা আৰু নিৰ্দিষ্ট সময়ত সাৰ পোৱা এই প্ৰক্ৰিয়াটো আমাৰ দেহত কেনেদৰে সম্পন্ন হয়, এই বিষয়ে শেহতীয়া গৱেষণাৰ তথ্যৰ ভিত্তিত চমুকৈ উল্লেখ কৰা হ’ল। টোপনি যোৱা আৰু সাৰ পোৱা অৰ্থাৎ নিদ্ৰা আৰু জাগি উঠা এই কাৰ্য আমাৰ দেহত কেনেদৰে সম্পন্ন হয় সেই সম্পৰ্কে যুক্তৰাষ্ট্ৰৰ UMSOM (University of Maryland School of Medicine)-ৰ এদল গৱেষকে মস্তিষ্কৰ যি অঞ্চলে নিদ্ৰা আৰু জাগি উঠা নিয়ন্ত্ৰণ কৰে বুলি আলোকপাত কৰিব বিচাৰিছে, সেয়া হ’ল মস্তিষ্ক হাইপ’থেলামাছৰ (Hypothalamus) অন্তৰ্গত Supra-chiasmatic nuclear (SCN)। এই অঞ্চলটোৱে মগজুৰ ভিতৰত ঘড়ীৰ দৰে কাম কৰে। অৰ্থাৎ আমি কেতিয়া শুবলৈ যাম, কিমান সময় শুম আৰু কেতিয়া জাগি উঠিম- এই সমস্ত ক্ৰিয়া-কাৰ্য এটি সূক্ষ্ম ঘড়ীৰ দৰে নিয়ন্ত্ৰিত হয়।

SCN-ৰ অন্তৰ্গত কিছু আয়ন জাতীয় ৰসায়ন হ’ল প্ৰ’টিন কণা যিয়ে বিদ্যুৎ প্ৰৱাহ বহন কৰে। এটা স্নায়ুকোষৰ পৰা আন এটা স্নায়ুকোষলৈ প্ৰয়োজনীয় তথ্য বা খা-খবৰ বহন কৰে। গৱেষকসকলে আন এবিধ গতিপথৰ গোষ্ঠীৰ ওপৰতো সমানে গুৰুত্ব প্ৰদান কৰিছে, সেয়া হ’ল BK Potassium Channels আৰু SCN-ৰ ভিতৰত বিশেষভাৱে সক্ৰিয়। এই আন্তঃৰাষ্ট্ৰীয় গৱেষকসকলে এই সমস্ত গৱেষণা সম্পন্ন কৰিছে এন্দুৰৰ ওপৰত। আমি জানো যে এন্দুৰ শোৱা আৰু জাগি থকা মানুহৰ সম্পূৰ্ণ বিপৰীত। অৰ্থাৎ এন্দুৰে দিনত শুই থাকে আৰু ৰাতি জাগি থাকি আহাৰ গ্ৰহণ কৰে। গৱেষকসকলে ভালদৰে লক্ষ্য কৰিছে যে এন্দুৰবোৰ জাগি থকাৰ সময়ত BK Channel বোৰ সক্ৰিয় হৈ থাকে। আনহাতে নিদ্ৰা অৱস্থাত এই চেনেল নিষ্ক্ৰিয় হৈ থাকে। এই নতুন গৱেষণাৰ পৰা ন ন তথ্য আৱিষ্কাৰ কৰিবলৈ সক্ষম হৈছে গৱেষকৰ দলটোৱে। কি ধৰণৰ কিমান চেনেলে কাৰ্য সম্পন্ন কৰে সেয়া জনাৰ উপৰি সক্ৰিয় আৰু নিষ্ক্ৰিয় ২৪ ঘণ্টাৰ ভিতৰত কিমান সময় হয় সেয়াও নিশ্চিতভাৱে জানিবলৈ সক্ষম হৈছে গৱেষকসকলে।

গৱেষকসকলে Hypothalamus-ৰ পিছত Hippocampus সম্পৰ্কেও উল্লেখ কৰিছে। যিসকল লোকে অনবৰতে মানসিক উদ্বেগ, উত্তেজনা, আকাংক্ষা, ভয়, সংশয় লৈ জীৱন-যাপন কৰে, ইয়াৰ নেতিবাচক প্ৰভাৱ পৰে শৰীৰৰ ৰোগ প্ৰতিৰোধ (immune system) ক্ষমতাৰ ওপৰত, যি পাকক্ৰিয়া আৰু হৃদযন্ত্ৰৰ ওপৰত প্ৰভাৱ পেলায়। বদহজম, এচিডিটী, উচ্চ ৰক্তচাপ, ডায়েবেটিছ ইত্যাদি বিভিন্ন ৰোগ বঢ়োৱাৰ লগতে আটাইতকৈ ক্ষতিকাৰক প্ৰভাৱ পৰে হিপোকেম্পাছৰ ওপৰত। ফলত ধীৰে ধীৰে ক্ষয় হ’বলৈ ধৰে হিপোকেম্পাছ। ইয়াৰ ফলস্বৰূপে প্ৰথমে পুৰণি স্মৃতি ক্ৰমে ক্ৰমে মনৰ পৰা লোপ পাবলৈ ধৰে। মানসিক স্থিৰতা সম্পূৰ্ণভাৱে লোপ হ’ব পাৰে।

যিসকল লোকে নিয়মিতভাৱে মানসিক উদ্বেগ, হতাশাত ভোগে তেনে লোকৰ ক্ষেত্ৰত স্নায়ুৰ মাধ্যমেৰে উদ্দীপনা মস্তিষ্কলৈ প্ৰেৰণৰ সময়ত এটিয়ে আনটোৰ লগত গণ্ডগোলৰ সৃষ্টি কৰে। ইয়াৰ ফলস্বৰূপে মানসিক অৱসাদ Alzheimer, Dimensia-ৰ দৰে ৰোগে ভয়াৱহভাৱে দেখা দিব পাৰে।

উদ্বেগৰ (Dipression) চিকিৎসা উপযুক্ত সময়ত ভালদৰে কৰিলে আৰু লগতে শাৰীৰিক সক্ৰিয়তা বঢ়ালে হিপোকেম্পাছৰ কৰ্মদক্ষতা বঢ়াব পাৰি, তাৰবাবে লাগিব আপোনাৰ সক্ৰিয় সহযোগ আৰু মনৰ দৃঢ়তা। আপোনাৰ সম্পূৰ্ণ সহযোগ নাথাকিলে অকল চিকিৎসকে আপোনাক সম্পূৰ্ণ মুক্ত কৰিব নোৱাৰে। আপোনাৰ মনৰ পৰা নিগেটিভ থিংকিং বাদ দিয়ক, আপোনাৰ ক্ষমতা অনুযায়ী কাম কৰি যাওক- অযথা কথা বা অযুক্তিকৰ কথা চিন্তা কৰি সময় অবাবতে নষ্ট নকৰিব। ঘটি যোৱা দুৰ্ঘটনাই মনত যিমানে ক্ৰিয়া কৰক, তাক ভালদৰে আয়ত্ত কৰি নিয়ন্ত্ৰণ কৰক। সুখী থকাৰ চাবি-কাঠী আপোনাৰ হাতত।

(উৎসঃ আমাৰ অসম, ড সনাতন ডেকা)।

মেদবহুলতাৰ চিকিৎসাঃ

 

শৰীৰৰ পক্ষে মেদ অৰ্থাৎ চৰ্বি অত্যাৱশ্যকীয়। চৰ্বিয়ে আমাৰ শৰীৰৰ উত্তাপ ৰক্ষা কৰে। চৰ্বি আছে বাবেই দেহ তুলাৰ দৰে কোমল হয়। দেহৰ মাংসপেশীত হাড়ৰ সন্ধিস্থান আদিত চৰ্বি থাকে কাৰণেই এইবোৰ যন্ত্ৰ সুন্দৰভাৱে সক্ৰিয় হৈ নিজৰ নিজৰ কৰ্তব্য সম্পাদন কৰে। খাদ্যৰ অভাৱত দেহত পৰিমিত চৰ্বি সঞ্চিত হয়। সঞ্চয়ৰ স্বাভাৱিক মাত্ৰা হেৰাই গ’লেই দেহ মেদবহুল হৈ পৰে।

পুৰুষৰ দেহতকৈ নাৰীদেহত স্বাভাৱিক নিয়মেই চৰ্বি কিছু বেছি থাকে। অতিৰিক্ত চৰ্বিয়ে দেহযন্ত্ৰ পৰিচালনাত ব্যঘাত সৃষ্টি কৰে। মেদবহল দেহধাৰীসকল সহজেই ৰক্তচাপ বৃদ্ধি ৰোগ প্ৰভৃতিত আক্ৰান্ত হয়।

মেদবহুলতা ৰোগ হোৱাৰ কাৰণঃ

 

শাৰীৰিক পৰিশ্ৰম বিমুখিতা, দিনত শোৱাৰ অভ্যাস কৰিলে, অতিমাত্ৰা মাছ-মাংস, মিঠাই, ঘিউ, মাখন, চানা আদি মধুৰ স্বাদবিশিষ্ট খাদ্য গ্ৰহণ, জাংকফুড, ফাষ্টফুড আদি সঘনাই খালে দেহত অতিৰিক্ত চৰ্বি সঞ্চিত হৈ দেহ মেদ ৰোগাক্ৰান্ত হয়। মেদ বৃদ্ধিৰ ফলত ধমনী, সিৰা, স্নায়ু আদিৰ কাৰ্যত ব্যাঘাত সৃষ্টি হয়। দেহত মেদ সৃষ্টিৰ ফলত পেটৰ বায়ু সঞ্চৰণত বাধাপ্ৰাপ্ত হৈ ক্ষুব্ধ হৈ উঠে। এই ক্ষোভিত বায়ুৰ প্ৰভাৱত জঠৰাগ্নিত উদ্দীপ্ত হৈ উঠে। এইবাবে মেদ ৰোগীসকল কিছু ভোজনবিলাসী হয়। মাছ-মাংস, মিঠাই মিষ্টান্নৰ প্ৰতি এওঁলোকৰ আসক্তি বেছি হয়।

মেদ ৰোগ দুই প্ৰকাৰৰ- বংশগত আৰু আৰ্জিত। মেদবহুল পিতা-মাতাৰ সন্তান সম্ভাৱতে স্থূলকায় হয়। স্থূলকায় নৰ-নাৰীৰ ভিতৰত প্ৰায় শতকৰা ৫০ জনে এনেকৈ বংশানুক্ৰমে মেদবহুল হয়। এক কথাত ক’ব পাৰি, চৰ্বিজাতীয় খাদ্যৰ উপযুক্ত দহন ক্ৰিয়াৰ অভাৱত এই মেদ ৰোগ সৃষ্টি হয়। শিৱসতী গ্ৰন্থি (Pituitary), ইন্দ্ৰ গ্ৰন্থি (Thyroid) প্ৰভৃতি দেহৰ প্ৰধান প্ৰধান গ্ৰন্থিবোৰ অন্তঃস্ৰাৱী ৰসে প্লীহা, যকৃত, অগ্ন্যাশয় (Pancreas) প্ৰভৃতিয়ে অগ্নিগ্ৰন্থি অৰ্থাৎ জঠৰাগ্নিক প্ৰজ্বলিত ৰখাত সহায় কৰে। পাশ্চাত্য চিকিৎসা শাস্ত্ৰৰ মতে “Every pound of excess fat may mean a month less of life.”

প্ৰত্যেক পাউণ্ড অতিৰিক্ত চৰ্বিয়ে এমাহ আয়ুস হৰণ কৰে।

চিকিৎসাঃ

(যোগাসন) সহজ বস্তি ক্ৰিয়া আৰু তাৰ লগত আসন মুদ্ৰা আদি। গধূলি মকৰাসন, যোগমুদ্ৰা ৮ বাৰ, সৰ্বাংগন ৩ মিনিট, শীৰ্ষাসন ৩ মিনিট।

নিয়ম আৰু খাদ্যঃ

মেদ ৰোগীসকলে ফলমূল খাব। ফল খোৱাৰ আগতে এক চামুচ মৌৰ সৈতে আধা গিলাচ কুহুমীয়া পানী খাব। দুপৰীয়া ভাতৰ লগত যথেষ্ট পৰিমাণে শাক-পাচলি খাব। বয়স ৫০-ৰ ঊৰ্ধত হ’লে মাছ-মাংস পৰিহাৰ কৰিব। ৰন্ধনত তেল-মচলা, ঘিউ কমকৈ ব্যৱহাৰ কৰিব। দুপৰীয়া ভোজনৰ পাছত এপোৱা (২৫০ গ্ৰাম) ঘোল খালে ভাল। ৰাতি ভোক অনুযায়ী শাক-পাচলিৰ লগত দুই এখন ৰুটি, এক কাপ গাখীৰ আৰু ১০-১২টা কিচমিচ খাব। ক’লা ৰঙৰ কিচমিচ হ’লে বেছি ভাল। ৰাতি তিয়াই থৈ পিছদিনা ৰাতিপুৱা খাব।

অকুপ্ৰেছাৰ চিকিৎসাঃ

মেদবহুলতা বা বৰকৈ শকত হোৱাৰ মূল কাৰণ হ’ল থাইৰয়ড আৰু পেৰাথাইৰয়ড গ্ৰন্থিৰ বিজুতি ঘটাৰ ফলত পায়নিয়েল গ্ৰন্থিয়ে শৰীৰত পানীৰ পৰিমাণ বঢ়াই তোলে আৰু ইয়াৰ ফলত অতিৰিক্ত চৰ্বি শৰীৰত জমা হয়। মহিলাৰ ক্ষেত্ৰত মেদবহুলতা হোৱাৰ কাৰণ হ’ল- যৌন গ্ৰন্থিৰ বিজুতি ঘটা। অতিৰিক্ত খাদ্য গ্ৰহণ, প্ৰয়োজনতকৈ বেছি কেলৰিযুক্ত খাদ্য গ্ৰহণ, জাংকফুড, ফাষ্টফুড গ্ৰহণ কৰাৰ ফলত মেদবহুলতা হ’ব পাৰে।

চিকিৎসাঃ

 

- প্ৰতিদিনে ductless glands বিলাক ১ মিনিটকৈ দিনে ২ বাৰকৈ পইণ্টবিলাকত টিপিব লাগে। প্ৰায় ১ মাহ ধৰি গ্লেণ্ডৰ পইণ্টবিলাক টিপিব লাগে। চৰ্বি কমি যাব।

- ৪ গিলাচ চেঁচা পানী জুইত উতলাই ২ গিলাচ পৰিমাণত ৰাখি সেই পানী কুহুমীয়া অৱস্থাত খাব। ১ মাহ ধৰি খাব।

-  ৰাতিপুৱা প্ৰতিদিনে ১ গিলাচ কুহুমীয়া পানীত আধা চামুচ নেমুৰ ৰস মিহলাই তাত ১ চামুচ মৌজোল মিহলাই নিয়মিত এমাহ ধৰি খাব লাগে। চৰ্বি কমি যাব।

-  দৈনিক ২-৩ কাপ ফল-মূলৰ ৰস খাব। ডালিম, তিয়ঁহ, আম আদিৰ ৰসে ভাল কাম কৰে।

-  আবেলি বা ৰাতিপুৱা গজা মগু, বুট, তিয়ঁহ মিহলি কৰি চালাড খাব। তাত ক’লা নিমখ মিহলাব।

-  প্ৰতিদিনে সৰ গুচোৱা গাখীৰ এগিলাচ খাব।

-  অধিক পৰিমাণৰ চেনি, গুৰ, চানা, মিঠাই খোৱাৰ পৰা বিৰত থাকিব।

মেদবহুলতা আঁতৰ কৰাত বনদৰবঃ

-  শুকান মূলাৰ গুৰি ৫০ গ্ৰাম ২ চামুচ মৌজোলত মিহলাই ২ বাৰকৈ ১০-১৫ দিন খালে মেদ কমি যায়।

-  এৰা গছৰ (ৰঙা পাতৰ) পাতৰ খাৰ তৈয়াৰ কৰি ২ চামুচকৈ ১-২ মাহ খালে চৰ্বি কমি যায়। এৰা গছৰ শিপাৰ ৰসেও এই সমস্যা দূৰ কৰাত সহায় কৰে। ৰসৰ পৰিমাণ ১ চামুচ ২০-২৫ দিন খাব লাগে।

-  ৰাতি বিছনালৈ যোৱাৰ আগে আগে ১ চামুচ খাটি মৌজোল ১ গিলাচ পানীত মিহলাই ১ মাহ পৰ্যন্ত খালে মেদ কমে।

-  গণিয়াৰি ছালৰ ৰস বা ক্কাথ ৫-৬ ৰতিত শিলাজিত গুড়ি মিহলাই ১ ৰতি খালে কম দিনৰ ভিতৰতে মেদ কমি যায়। দিনে ১ বাৰকৈ ২৫ দিন খাব লাগে।

-  আমলখিৰ ৰস ৫ চামুচত পুৰণি গুৰ ১ চামুচ মিহলাই দিনে ২ বাৰকৈ ১ মাহ পৰ্যন্ত খালে চৰ্বি কমি যায়।

-  ১ গিলাচ কুহুমীয়া গৰম পানীত ১ গ্ৰাম ডালচেনিৰ গুড়ি মিহলাই দিনে ১ বাৰকৈ ১ মাহ খাব লাগে। মেদ কমি যাব।

-  কেঁচা হালধিৰ ৰস ২ চামুচত অলপ গুৰ মিহলাই দিনে ১ বাৰকৈ ২ মাহ পৰ্যন্ত খালে চৰ্বি কমি যাব।

মেদবহুলতাত ভোগা মানুহৰ খাদ্যঃ

কাৰ্ব’হাইড্ৰেট প্ৰসিদ্ধ খাদ্য, প্ৰ’টিনযুক্ত খাদ্য কমকৈ ব্যৱহাৰ কৰিব লাগে। ভাত খোৱাতকৈ শুকান ৰুটী, শাক-পাচলি, ওট্‌ছ, ডালিয়া খাব। জাংকফুড, ফাষ্টফুড, ঘিউ, মাখন, চানামিঠাই কমকৈ খাব। মগু দাইল, ধনীয়, পালেং, মৰিচা, মাটিকাদুৰী, নৰসিংহ পাত, মানিমুনি, ব্ৰাহ্মীশাক খাব। অমিতা, ডালিম, কল, মধুৰিআম, মৌচুম্বী, আম প্ৰচুৰ পৰিমাণে খাব। গাজৰ, মূলা, চালগোম খাব লাগে। সৰু মুৰ্গীৰ মাংস, সৰু মাছ যেনে- শিঙৰা, কাৱৈ, গৰৈ, ভাঙোন মাছ খাব। ৰৌ, বৰালি, ইলিচ, বাহু, আৰি আদি চৰ্বিযুক্ত মাছ নাখাব।

প্ৰতিদিনে কপালভাটি, অনুলম, বিলম, ভস্তিকা প্ৰাণায়াম কৰিব লাগে। বেছিকৈ নিমখ নাখাব, চেনি, অ’ৰেঞ্জ, স্কোৱাচ খাব নালাগে। তাৰ সলনি নেমুৰ চৰবত, ডাব নাৰিকলৰ পানী, তৰমুজ খাব।

(উৎসঃ আমাৰ অসম, উপেন দত্ত, ফোনঃ ৯৮৫৪০-৭০১৮৪)।

ছফ্‌ট ড্ৰিংকছঃ

 

ছফ্‌ট ড্ৰিংকছৰ সোৱাদ নোলোৱা মানুহ কমেই আছে। ৰাতি-দিন নাই, জাৰ-জহ সকলো ঋতুতে ছফ্‌ট ড্ৰিংকছ সেৱন কৰা বহুতৰে অভ্যাসত পৰিণত হৈছে অৱশ্যে গৰমকালি অলপ বেছিকৈ খায়।

ছফ্‌ট ড্ৰিংকছত কাৰ্বনেটেড ৱাটাৰ, কেফেইন, প্ৰাকৃতিক ৰং, গোন্ধ আৰু এটিডিটী ৰেগুলেটৰ থাকে।

বিশেষজ্ঞৰ মতে, ২০০ মিলিলিটাৰ ছফ্‌ট ড্ৰিংকছত, যেনে- কোকাকোলাত চেনি ৫ গ্ৰাম, কেলৰি শক্তি ৮৬, ডায়েট-কোকাকোলাত চেনি নাথাকে, কেলৰি শক্তি ০.৯, লেমনেটেডত চেনি ১০ গ্ৰাম, কেলৰি শক্তি ৪২, ডায়েট অৰেঞ্জ জুচত চেনি ১ গ্ৰাম, কেলৰি শক্তি ৩, লাইম জুচত চেনি ১০ গ্ৰাম, কেলৰি শক্তি ১০ আৰু অৰেঞ্জ স্কোৱাছত চেনি ১০ গ্ৰাম আৰু কেলৰি শক্তি ১০ উপলব্ধ।

এনে ধৰণৰ সকলো মিঠা ছফ্‌ট ড্ৰিংকছে দেহক যথেষ্ট পৰিমাণে শক্তি প্ৰদান কৰে যদিও প্ৰয়োজনীয় পুষ্টিদ্ৰব্য নাথাকে। বেছি চেনিযুক্ত ছফ্‌ট ড্ৰিংকছ খালে দাঁতৰ ৰোগত জীয়াতু ভুগিবলগীয়া হয়। বহু সময় ধৰি চিপ্ চিপ্‌কৈ খাই থাকিলে দাঁত বেয়া হয় অথবা দাঁতৰ পচন আৰম্ভ হয়। কাৰণ ছফ্‌ট ড্ৰিংকছত থকা এচিডে দাঁতৰ আলু নষ্ট কৰে। সেইদৰে বেছি এচিডযুক্ত ফলৰ ৰসেও দাঁতৰ আলু নষ্ট কৰে। সেয়েহে ছফ্‌ট ড্ৰিংকছ আহাৰ খোৱাৰ পূৰ্বে খাব লাগে আৰু লগে লগে দাঁত মাজি চাফা কৰিলে দাঁতৰ একো অনিষ্ট নহয়।

কৃত্ৰিম মিঠা আৰু কম কেলৰিযুক্ত ছফ্‌ট ড্ৰিংকছ সকলোৰে বাবে ভাল। এনে ছফ্‌ট ড্ৰিংকছে দাঁতৰ আলুৰ হানি-বিঘিনি নকৰে, দাঁত নপচে আৰু দেহৰ ওজনো নাবাঢ়ে। সেইদৰে ফলৰ জুচেৰে তৈয়াৰী ছফ্‌ট ড্ৰিংকছ স্বাস্থ্যৰ বাবে উত্তম।

কিছুমান ছফ্‌ট ড্ৰিংকছ, যেনে- এজো ডাইজ (Azo Dyes), ছানছেট ইয়েল’ (Sunset Yellow) আৰু টেট্ৰাজাইন (Tetrazine) নামৰ এধেছিভেৰে (Adhessive) বনোৱা কমলা জুচ, নেমু জুচ আৰু লাইম (Lime) স্কোৱাছ পানীৰে মিহলাই খাব লাগে। পাছে এনে জুচে বহুতকে এলাৰ্জীত ভুগিবলগীয়া কৰে বুলি বিশেষজ্ঞই কয়।

সম্প্ৰতি কম কেলৰিযুক্ত আৰু চেনিমুক্ত ছফ্‌ট ড্ৰিংকছ উদ্যোগসমূহে বজাৰত উলিয়াই দিছে। এনে ছফ্‌ট ড্ৰিংকছ স্বাস্থ্যৰ বাবে মংগলজনক বুলি বিশেষজ্ঞই দাবী কৰে। খেলুৱৈৰ বাবে আইছ’টনিক (Isotonic) ড্ৰিংক্‌ছ ওলাইছে আৰু এনে ড্ৰিংক্‌ছে দেহক যথেষ্ট শক্তি প্ৰদান কৰে আৰু খেলাৰ সময়ত দেহে ঘামৰ জৰিয়তে নিৰ্গত কৰা ইলেকট্ৰ’লাইট যেনে- ছ’ডিয়াম, পটাছিয়াম, মেগনেছিয়াম আৰু ক্ল’ৰাইডসমূহ পৰিপূৰ কৰে। সাধাৰণতে আইছ’টনিক ড্ৰিংক্‌ছত ৫ শতাংশহে চেনি থাকে আৰু দেহক শক্তিৰ যোগান ধৰে, যিখিনি বিশুদ্ধ পানীয়ে দিব নোৱাৰে। এনে ছফ্‌ট ড্ৰিংক্‌ছ হেনো ডায়েবেটিছ ৰোগীৰ বাবে ভাল। এনে ড্ৰিংক্‌ছে দাঁত নপচায়, দাঁতৰ আলু নষ্ট নকৰে আৰু দাঁতত ‘কেভিটিজ’ৰ সৃষ্টি নকৰে।

ইতিহাসৰ পাত লুটিয়াই চালে গম পোৱা যায় যে আমেৰিকাৰ আটলাণ্টাৰ জন এছ প্ৰেমবাৰ্টন নামৰ ফাৰ্মাচিষ্ট এজনে ১৮৮৬ চনত কোকাকোলা প্ৰস্তুত কৰিছিল। ১৮৯১ চনত Cocacola formula-ৰ মালিকীস্বত্ব আছা কেণ্ডলাৰ নামৰ লোক এজনে কিনি লয়। আকৌ ১৮৯৮ চনত Pepsi Cocacola তৈয়াৰ কৰে কালেব ডি, ব্ৰধান নামৰ ব্যৱসায়ী এগৰাকীয়ে। এনে পেপছি কোকাকোলাই অজীৰ্ণতাৰ পৰা নিৰাময় কৰে আৰু সেয়ে এনে কোকাকোলাৰ নাম ৰখা হয় Pepsi-CocaCola।

(উৎসঃ আমাৰ অসম, ড পবিত্ৰ কুমাৰ পাটোৱাৰী, ফোনঃ ৯৪৩৫৩-০৮৮১৬)।

2.88235294118
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top