অংশিদাৰী
Views
  • স্থিতি: সম্পাদনাৰ বাবে মুকলি

গৰ্ভৱতী মহিলাৰ বাবে যোগাভ্যাস

গৰ্ভৱতী মহিলাৰ বাবে যোগাভ্যাসৰ বিষয়ে লিখা হৈছে ।

কেনেকৈ কি যোগাভ্যাস কৰিব -

যোগাভ্যাসৰ বাবে উত্তম সময় পুৱা । সেইবাবে পুৱা শোৱাপাটী এৰি ১-২ গিলাচ পানী খাই নিৰ্মল বতাহ বলি থকা ঠাইত অতি কমেও ২০ মিনিট ভ্ৰমণ প্ৰাণায়াম অভ্যাস কৰিব । তাৰ পিচত তলত উল্লেখ কৰা আসন, প্ৰাণায়ামসমূহ অভ্যাস কৰক ।

সহজ প্ৰাণায়াম নং – ১

কোঠাৰ দুৱাৰ-খিৰিকী খুলি মুক্ত বায়ু চলাচল কৰাৰ ব্যৱস্থা কৰক । মজিয়াত চাৰি বা কঠ পাৰি লওক । চিৎ হৈ শুই দিয়ক । ভৰি পোনকৈ ৰখাৰ লগতে হাত কঁকালৰ ওচৰত স্থাপন কৰক । এইবাৰ দীঘল শ্বাস গ্ৰহণ কৰি কৰি দুয়ো হাত মূৰৰ ওপৰলৈ নিয়ক আৰু প্ৰশ্বাস ত্যাগ কৰি পুনৰ কঁকালৰ ওচৰলৈ আনক ।

এনেদৰে ১০-১৫ বাৰ হাত অনা-নিয়া কৰক । তাৰ পিচত শ্বাস গ্ৰহন কৰি সোঁ ভৰি ওপৰলৈ তোলক, আঁঠু ভাঁজ নপৰাকৈ এইবাৰ প্ৰশ্বাস ত্যাগ কৰি ভৰি তললৈ নমাই আনক । এনেদৰে সোঁ-বাওঁ মিলি মুঠ ১০-১২ বাৰ অভ্যাস কৰক ।

ভদ্ৰাসন :-

গৰ্ভৱতী মহিলাৰ বাবে এই আসনটো বিশেষ উপকাৰী । ইয়াৰ দ্বাৰা গৰ্ভস্থ সন্তান ভূমিস্থ হোৱাত সহায়ক হয় । ভৰিৰ গোৰোহা দুটা যোনি স্থানৰ প্ৰায় ওচৰত লগ লগাই ৰাজহাড় পোন কৰি বহক ।

এতিয়া হাত দুখনেৰে দুয়ো ভৰিৰ আঙুলিবোৰত একেলগে ধৰি হাত পোন কৰি একেৰাহে ১-২ মিনিট আসনটো অভ্যাস কৰিব ।

পৱন মুক্তাসন :-

চিৎ হৈ শুই লওক । এতিয়া উশাহ লৈ সোঁ ভৰি ওপৰলৈ উঠাওক, এইবাৰ দুয়ো হাতেৰে ভৰি ভাঁজ কৰি আঁঠুৰ ওচৰত ধৰক আৰু সামান্য সোঁ দিশলৈ কৰি পেটৰ ওপৰলৈ আনক আৰু ৬-৭ ছেকেণ্ড পিচত এৰি দিয়ক আৰু হাত-ভৰি আগৰ ঠাইত ৰাখক । অনুৰুপভাৱে বাওঁ ভৰিখনো অভ্যাস কৰক ।

তাৰ পিচত দুয়ো ভৰি একেলগে পেটৰ সোঁ আৰু বাওঁ দিশলৈ আনক আৰু এৰি দিয়ক । এনেদৰে পাঁচবাৰ আসনটো অভ্যাস কৰক । গৰ্ভধাৰণ কৰাৰ চাৰি মাহলৈ এই আসন অভ্যাস কৰি পিচত এৰি দিব ।

সহজ প্ৰাণায়াম নং- ২

পদ্মাসন বা সুখাসনত ৰাজহাড় পোন কৰি বহক । হাত দুখন দুয়ো আঁঠুৰ ওপৰত ৰাখক । এতিয়া নাকৰ দুয়ো বিন্ধাৰে পূৰ্ণোদ্যমে শ্বাস গ্ৰহণ কৰক আৰু মুখেৰে প্ৰশ্বাস ত্যাগ কৰক ।

যিমান সময় শ্বাস গ্ৰহণ কৰিব তাতকৈ কিছু বেছি সময় প্ৰশ্বাস এৰিব । চকু মুদি একেৰাহে ৩ মিনিট এই প্ৰাণায়ামটো অভ্যাস কৰিব ।

সহজ প্ৰাণায়াম নং – ৭

সুখাসন বা পদ্মাসনত বহক । বাওঁ হাত বাওঁ আঁঠুৰ ওপৰত ৰাখক । সোঁ হাত ওপৰলৈ উঠাই বুঢ়া আঙুলিৰে নাকৰ সোঁ বিন্ধা বন্ধ কৰক ।

এইবাৰ নাকৰ বাওঁ বিন্ধাৰে দীঘলকৈ শ্বাস গ্ৰহণ কৰি সোঁ বিন্ধাৰে প্ৰশ্বাস ত্যাগ কৰক । এইবাৰ বাওঁ বিন্ধা বন্ধ কৰি সোঁ বিন্ধাৰে শ্বাস গ্ৰহণ কৰি বাওঁ বিন্ধাৰে প্ৰশ্বাস ত্যাগ কৰক । এইদৰে ওলোটা-উলাটিকৈ ৩ মিনিট প্ৰাণায়ামটো অভ্যাস কৰক ।

আসন, প্ৰাণায়াম অভ্যাস কৰাৰ সময়ত ভাগৰ লাগিলে অলপ সময় শৱাসন কৰি বিশ্ৰাম ল’ব । শেষত ধ্যান অভ্যাস কৰিব পাৰে ।

নিয়ম আৰু পথ্য -

গৰ্ভধাৰণ কৰা দিনৰ পৰা সন্তান প্ৰসৱ হোৱা দিনলৈকে মহিলাগৰাকীয়ে একপ্ৰকাৰ আদৰ্শময় জীৱন গঢ়ি তুলিব লাগে । য’ত আচাৰ-ব্যৱহাৰ, সময় আৰু নিয়মমতে খোৱা-লোৱা, পৰিষ্কাৰ- পৰিচ্ছন্নতাৰ কথাবোৰ জড়িত হৈ আছে ।

মূল কথা হ’ল, গোটেই দিনটো নিৰ্দিষ্টভাৱে বাছি লোৱা সময়ৰ মাজেৰে প্ৰতিটো কাম কৰি যাব লাগে । দিনে-নিশাই একো এটা নকৰাকৈ অনবৰত শুই থাকিব নালাগে । অত্যধিক সময় টিভি চোৱা ভাল নহয় । মধুৰ সংগীত মৃদুভাৱে শুনিব পাৰে ।

খোজ কাঢ়োতে ওখ জোতা-চেণ্ডেল নিপিন্ধিব । পৰ্যাপ্ত পৰিমাণত পৰিষ্কাৰ (বিশুদ্ধ) পানী খাব । দিনৰ আহাৰ গ্ৰহনৰ পিচত বিশ্ৰাম ল’ব ।

আন এটা মন কৰিবলগীয়া কথা হ’ল, খাদ্য গ্ৰহণৰ কথাটো । গৰ্ভৱতী মহিলাই সদায় দুজনৰ বাবে আহাৰ গ্ৰহণ কৰা উচিত । গৰ্ভত থকা সন্তানটিয়েও মাকৰ পঅৰই পুষ্টি লাভ কৰে ।

গতিকে আহাৰ দুজনৰ বাবে হোৱাৰ লগতে পুষ্টিকৰ হোৱা অতি প্ৰয়োজন । লৌহসমৃদ্ধ আহাৰ বেছিকৈ খোৱা দৰকাৰ । ভাত, ৰুটী, দাইল, সেউজীয়া শাক-পাচলি, গাখীৰ আদি এবাৰতে বেছিকৈ নাখাই ঘন ঘনকৈ খাব ।

যিসকলে মাছ, মাংস, কণী হজম কৰিব পাৰে বা খোৱাৰ অভ্যাস আছে খাব পাৰে । বতৰৰ ফল-মূল খোৱা আৱশ্যক ।

তাৰ ভিতৰত মধুৰিআম, আমলখি, শিলিখা, আপেল, নাৰিকল (গুড়ি), কাঁচকল তথা কেলছিয়ামসমৃদ্ধ আহাৰ গৰ্ভৱতী মাতৃৰ বাবে প্ৰয়োজন।

ধ্যান প্ৰণালী -

যিকোনো এটা ধ্যানাসনত বহক । চকু বন্ধ কৰি দেহ- মন শিথিল কৰি লওক । মনটোক সকলো বাহ্যিক চিন্তাৰ পৰা মুক্ত কৰি এক পৰম শক্তিবিন্দুত কেন্দ্ৰীভূত কৰক । এইবাৰ মনৰ সমস্ত শক্তি তাত নিবিষ্ট কৰি ধ্যানমগ্ন হওক ।

অৰ্থাৎ মনৰ দৃষ্টিৰে ভবা শক্তিবিন্দুত একান্ত মনে ভাবি থাকক । এনেদৰে ৪-৫ মিনিট সময় ধ্যানমগ্ন অৱস্থাত থকাৰ পিচত হাত দুখনেৰে চকু আৰু মুখমণ্ডল মোহাৰি হাত দুখন নমাই দি লাহে লাহে চকু মেলি ধ্যান সমাপ্ত কৰক ।

ওপৰত উল্লেখ কৰা প্ৰাণায়াম আৰু ধ্যান পুৱা আৰু গধূলিও অভ্যাস কৰিব পাৰে । ইয়াৰ লগতে গৰ্ভৱতী মহিলাই খাদ্য বা নিয়ম আৰু পথ্যৰ ওপৰত গুৰুত্ব দিব ।

লেখক :- হৰিপ্ৰসাদ তালুকদাৰ

উৎস – দেওবৰীয়া সম্ভাৰ

2.5
তৰাসমূহৰ ওপৰত ক্লীক কৰি মান প্ৰদান কৰক।
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top