মূল পৃষ্ঠা / স্বাস্থ্য / শিশুৰ স্বাস্থ্য / শিশুৰ ভৰিৰ জন্মগত দোষ :
অংশিদাৰী
Views
  • স্থিতি: সম্পাদনাৰ বাবে মুকলি

শিশুৰ ভৰিৰ জন্মগত দোষ :

শিশুৰ ভৰিৰ জন্মগত দোষৰ বিষয়ে লিখা হৈছে ।

 

শিশুৱে জন্মগত দোষ লৈ আহিলে ই মাক-দেউতাক তথা পৰিয়ালৰ বাবে এক দু:চিন্তাৰ কাৰণ হৈ পৰে- সেয়া ভৰিতেই হওক বা দেহৰ অন্য অংগতে হওক । ভৰিতো বিভিন্ন ধৰণৰ দোষ লৈ শিশু জন্ম হ’ব পাৰে । তাৰ ভিতৰত সততে দেখা দোষবিধ হৈছে- ক্লাবফুট বা অভঁজা ভৰি , যাক চিকিৎসা বিজ্ঞানত কনজেনা- ইটেল টেলিপেছ ইকুইন’ ভেৰাছ (Congenital Talipes Equinovarus CTEV) বুলি কোৱা হয় ।

জন্মগতভাৱে ভৰি বেঁকা বা ভাঁজ লগা কথাটোক লৈ আমাৰ সমাজত এক অন্ধবিশ্বাস প্ৰচলিত হৈ আছে । সেই অনুসৰি, চন্দ্ৰগহণ আৰু সূৰ্যগ্ৰহণৰ সময়ত গৰ্ভধাৰণ কৰা মাতৃয়ে যদি ইচ্ছাকৃতভাৱে নিজৰ ভৰিখন বেঁকা কৰি থয়, তেন্তে গৰ্ভত থকা শিশুৰো ভৰিটো বেঁকা হ’ব পাৰে । এনে চিন্তা অমূলকেই নহয়, সম্পূৰ্ণৰুপে অন্ধবিশ্বাসো । কিন্তু এই কথাও ঠিক যে চিকিৎসা বিজ্ঞানেও ইয়াৰ এটা সঠিক কাৰণ দিব পৰা নাই । ভৰিৰ মাংসপেশী আৰু হাড়ৰ সন্তুলনবিহীন বিকাশ হোৱাৰ বাবেই এই সমস্যাৰ উৎপত্তি হয় ।

ভৰিৰ এই জন্মগত দোষবোৰ জন্মৰ সময়ত কম চকুত পৰা ধৰণৰ হ’ব পাৰে যদিও বেছিভাগ শিশুৰ ক্ষেত্ৰতে এই দোষবোৰ সততে চকুত পৰে । যেনে – ভৰিৰ গোৰোৱাটো সৰু হয়, ভৰিখন ভিতৰফালে ভাঁজ হৈ থাকে, ভৰিৰ ভিতৰ ফালটো বাহিৰ ফালতকৈ সৰু হয় , আঙুলিবোৰ তললৈ নমা হয় । খোজ কাঢ়িবলৈ আৰম্ভ কৰাৰ লগে লগে শিশুটো ভৰিৰ বাহিৰ ফালে ভৰ দি খোজ কাঢ়ে । ভৰিৰ এই দোষৰ লগত ওঁঠ, তালু, হৃৎপিণ্ড, ৰাজহাড় নাইবা অন্য অংশত জন্মগত দোষ থাকিব পাৰে। দিন আগুৱাই যোৱাৰ লগে লগে এই দোষবোৰ চকুত পৰা হয় । বহু সময়ত বিয়া-বাৰুৰ বয়সত উপনীত হ’লেহে ল’ৰা-ছোৱালী চিকিৎসকৰ কাষ চাপে আৰু তেনে সময়ত চিকিৎসা পদ্ধতি যথেষ্ট জটিল আৰু দীঘলীয়া হয় ।

কিছু বছৰৰ আগেয়ে ভৰিৰ এনে দোষ লৈ জন্ম হোৱা শিশুবিলাকক চিকিৎসা পলমকৈ দিয়া হৈছিল । কিন্তু বৰ্তমানে ইয়াৰ চিকিৎসা সোনকালে আৰম্ভ কৰা হয় । এনে সমস্যাৰ ক্ষেত্ৰত বহু সময়ত অপাৰেশ্যনৰ প্ৰয়োজন নহয় । বেছিভাগ শিশুক প্লাষ্টাৰৰ সহায়ত চিকিৎসা প্ৰদান কৰা হয় আৰু ইয়াৰ সুফলো পোৱা যায় ।

জন্মৰ পাছতে মাকক কিছুমান বিশেষ হস্তচালন (Manipulation) পদ্ধতি শিকোৱা হয়, যাতে মাকে গাখীৰ খুৱাই থকা অৱস্থাত ভৰিটো ঘূৰাই কিছু পৰিমাণে সুফল পায় । প্ৰায় এমাহমান হোৱাৰ পাছত প্লাষ্টাৰ পদ্ধতি আৰম্ভ কৰা হয় । প্লাষ্টাৰ কাষ্ট পদ্ধতিৰে ঠিক কৰিবলৈ দুমাহৰ পৰা চাৰি মাহ লাগে । এসপ্তাহৰ মূৰে মূৰে প্লাষ্টাৰ সলোৱা হয় । এই পদ্ধতিক প’নছেটি নিময় বুলি জনা যায় ।

প্লাষ্টাৰটোৱে কেনেধৰণে কাম কৰে ?

সাধাৰণতে ভৰিৰ তলুৱাৰ আগ অংশৰ পৰা ভৰিৰ ওপৰলৈকে প্লাষ্টাৰ কৰি অভঁজা ভৰিক পোন কৰি ৰখা হয় । প্লাষ্টাৰটোৱে ভৰিখনক সুন্দৰকৈ মেলি ৰখাৰ লগতে ইয়াক সঠিক অৱস্থানত ধৰি ৰাখে । এসপ্তাহ পাছত প্ৰথম প্লাষ্টাৰটো খুলি দি ভৰিৰ সঠিক অৱস্থানত পুনৰ এটা নতুন প্লাষ্টাৰ সংস্থাপন কৰা হয় । উল্লেখযোগ্য যে প্ৰতি এসপ্তাহ বা দুসপ্তাহৰ মূৰত শিশুটিক নতুন প্লাষ্টাৰ লগাবলৈ চিকিৎসা কেন্দ্ৰলৈ অনাটো বাঞ্চনীয় । ভৰিখনক সঠিক অৱস্থানলৈ আনিবৰ বাবে বেছিভাগ শিশুৰেই ছয়ৰ পৰা আঠটা প্লাষ্টাৰৰ প্ৰয়োজন হয় ।

বেছিভাগ শিশুৰ ক্ষেত্ৰত শেষৰ প্লাষ্টাৰৰ সময়ত এটা সৰু অপাৰেশ্যন দৰকাৰ হয় । তাক টেন’টমি (Tenotomy) বুলি কোৱা হয় । য’ত গোৰোৱাৰ ওপৰত লাগি থকা পেশীডাল (Tendom) কটা হয় আৰু পুনৰ প্লাষ্টাৰ লগাই দিয়া হয় । এই কাৰ্যত সাধাৰণতে সংজ্ঞাহৰণৰ প্ৰয়োজন নহয় আৰু শিশুক ঘৰলৈ যাব দিয়া হয় ।

প্লাষ্টাৰ লাগি থকা সময়ত মন কৰিব লগা দুটামান কথা হ’ল -

*প্লাষ্টাৰ পৰিষ্কাৰ আৰু শুকান কৰি ৰাখিব লাগে ।

*ভৰিৰ আঙুলিবোৰ সঘনাই পৰীক্ষা কৰি থাকিব লাগে । ইয়াৰ ৰং গুলপীয়া আৰু গৰম হৈ থকাটো বাঞ্চনীয় । কিবা কাৰণত ৰং সলনি হ’লে আৰু ঠাণ্ডা পৰিলে তৎক্ষণাৎ চিকিৎসকৰ কাষ চাপিব লাগে ।

*প্লাষ্টাৰ কৰি থোৱা অৱস্থাত শিশুক অন্য শিশুৰ লগত ওমলিবলৈ বা খেলিবলৈ দিব পাৰি ।

*প্লাষ্টাৰৰ কাম শেষ হোৱাৰ পাছত ভৰিটোত এক বিশেষ জোতা লগোৱা হয় । ইয়াৰ কাৰণ হৈছে যে চিধা হোৱাৰ পাছতো, কেতিয়াবা এই ভাঁজটো পুনৰ ঘূৰি আহিব পাৰে । জোতাযোৰ এনে হোৱাত বাধা দিয়ে ।

অস্ত্ৰোপচাৰৰ প্ৰয়োজনীয়তা -

যদিও CTEV বহু সময়ত প্লাষ্টাৰৰ সহায়ত ঠিক কৰিব পাৰি, কিন্তু কেতিয়াবা কেতিয়াবা ই সফল নহয় । তেনে ক্ষেত্ৰত অস্ত্ৰোপচাৰৰ সহায় লোৱা হয় । বয়স অনুযায়ী, অস্ত্ৰোপচাৰ বেলেগ বেলেগ কৰা হয় । এবছৰমান বয়সলৈকে সাধাৰণতে এই অস্ত্ৰোপচাৰ কেৱল সংকুচিত পেশী (Tendon) দীঘল কৰাৰ ব্যৱস্থা কৰা হয় । সাধাৰণতে ভৰিৰ ভিতৰফালে মাংশপেশীবিলাক সংকুচিত অৱস্থাত থাকে, সেইখিনি অপাৰেশ্যনযোগে দীঘল কৰি পুনৰ লগাই দিয়া হয় ।

শিশু ডাঙৰ হ’লে এই অস্ত্ৰোপচাৰ কেৱল মাংসপেশীতে সীমিত ৰাখিব নোৱাৰি, হাড়ৰো কৰিব লগোৱা হয় । তাক Osteotomy বোলা হয় ।

ডাঙৰ মানুহৰ ক্ষেত্ৰত কেৱল হাড়তে নহয়, বৰঞ্চ সন্ধিৰ ওপৰতো অস্ত্ৰোপচাৰেৰে পোন কৰি কিছুমান সন্ধিক গোটেই জীৱনৰ বাবে বন্ধ কৰি দিয়া হয়, যাক Arthrodesis  বোলা হয় ।

লেখক – ডা: বিপুল বৰঠাকুৰ

উৎস- দৈনিক জনমভূমি

3.14285714286
তৰাসমূহৰ ওপৰত ক্লীক কৰি মান প্ৰদান কৰক।
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top