অলপতে কাশী হিন্দু বিশ্ববিদ্যালয়ৰ বায়কেমেষ্ট্ৰিৰ অধ্যাপক এচ পি সিংঙৰ বিলাতী এন্দুৰৰ ওপৰৰ কৰা গবেষণাৰ ফলাফল সংবাদ জগতৰ মাধ্যমেৰে জনাজাত হোৱাত এক মৃদু চাঞ্চল্যৰ সৃষ্টি হয়৷ মতা এন্দুৰক বিচফিনল-এ নামৰ ৰাসায়নিক দ্ৰব্য তিনি সপ্তাহ সেৱন কৰিবলৈ দিয়াত দেখা গ’ল – এন্দুৰবিলাকৰ জননাংগ সৰু হ’ব ধৰিছে আৰু প্ৰজনন ক্ষমতাও হ্ৰাস পালে৷ এনেধৰণৰ প্ৰয়োগ ইতিমধ্যে বিদেশত বহু ঠাইত কেইবাবাৰো কৰা হৈছে আৰু ফলফলো একেই দেখা গৈছে৷
সম্পূৰ্ণ নাম বিচফিনল-এনথ্ৰাচিন৷ ইয়াৰ ৰাসায়নিক ফৰ্মূলা হ’ল (CH3)2 C(C6H4OH)2৷ যোৱা পাঁচটা দশক ধৰি বিশ্বৰ চুকে কোনে ইয়াৰ সাম্ৰাজ্য দিনক দিনে বৃদ্ধি পাই আহিছিল৷ কিন্তু যোৱা দুটা বছৰৰ পৰা ক্ৰমে ইয়াৰ বিৰুদ্ধে বিভিন্ন দেশত সজাগতা গঢ়ি উঠা পৰিলক্ষিত হৈছে৷ ইয়াৰ ব্যৱহাৰ হয় পলিমাৰ প্লাষ্টিক আৰু পলিষ্টাৰ ৰেজিনৰ বিভিন্ন সা-সামগ্ৰী তৈয়াৰ কৰিবলৈ৷ ই হ’ল ৰঙহীন, ওজনত পাতল, তাপ প্ৰতিৰোধ ক্ষমতাযুক্ত, কঠিন পদাৰ্থ৷ এককথাত কবলৈ হ’লে সকলো ধৰণৰ প্লাষ্টিকতেই থাকে বিচফিনল-এ৷ আকৌ বিচফিনল-এ হ’ল এবিধ চিন্থেতিক ইষ্ট্ৰ’জেন( স্ত্ৰী-হৰম’ন)৷
এতিয়া আপোনালোকে লক্ষ্য কৰক – মানুহৰ জীৱন শৈলীত প্লাষ্টিকৰ প্ৰভাৱ৷ এজন আমেৰিকান লোকে এবছৰত ব্যৱহাৰ কৰে তিনি কিলোগ্ৰামৰ অধিক প্লাষ্টিক আৰু সেয়ে নব্বৈ শতাংশ লোকৰ প্ৰসাৱত নিৰ্গত হয় বিচফিনল-এ৷ এইবিধ ৰাসায়নিক পদাৰ্থৰে নিৰ্মিত দৈনন্দিত ব্যৱহৃত বস্তুৰ এক চমু তালিকালৈ লক্ষ্য কৰক:
গাখীৰৰ বটল, নানা বিধ শীতল পানীয়ৰ বটল, খাদ্য সামগ্ৰী ভৰ্তি কেন, শিশু খাদ্যৰ পেকেট, খেলৰ সামগ্ৰী, বৈদ্যুতিক সৰঞ্জাম, বাচন, চি ডি-ডি ভি ডি, কাৰ্বন পেপাৰ, কিছুমান ফেব্ৰিক, চকুৰ লেঞ্চ,দাঁতৰ নানা ফিলিং সামগ্ৰী, মানৱ শৰীৰত উপস্থাপন কৰা সা-সৰঞ্জাম আদি৷
ইতিমধ্যে ২০০ৰো ওপৰ বৈজ্ঞানিক অধ্যয়ণ প্ৰকাশিত হৈছে আৰু ৭০০ৰো অধিক জন্তুৰ ওপৰত বিচফিনল-এৰ প্ৰয়োগ কৰি নিম্নলিখিত তথ্যসমূহ জনা গৈছে:
মতা লেবৰেটৰীৰ জন্তুৰ জননাংগৰ আকাৰ সংকুচিত হোৱা দেখা যায়৷
যৌন ক্ষমতা কমি যায়৷ বীৰ্যৰ পৰিমাণ হ্ৰাস পায়৷ লিংগ শিথিল হয়৷
পুৰুষ-মহিলা উভয়ে প্ৰজনন ক্ষমতা-বিহীন হ’ব পাৰে৷
মহিলাৰ ক্ষেত্ৰত সোনকালে আনকি ৬বছৰ বয়সতেই মাহেকীয়া আৰম্ভ হ’ব পাৰে৷
অভেৰিত চিষ্টৰ উৎপত্তি কৰিব পাৰে৷
গৰ্ভস্থ সন্তানৰ বিশেষকৈ ল’ৰাৰ জননাংগৰ বিকৃতি হ’ব পাৰে৷
মস্তিষ্কৰ বিকাৰ আনকি মেনিনজিঅ’মাৰ দৰে টিউমাৰ হব পাৰে৷ বান্দৰৰ ক্ষেত্ৰত দেখা গৈছিল মতা বান্দৰে মাইকীৰ দৰে আচৰণ কৰা৷মগজুত ডপামিনৰ ক্ৰিয়া হ্ৰাস কৰে৷ কিশোৰ-কিশোৰীৰ মনোযোগহীনতা দেখা যায়৷
থাইৰয়ড হৰম’নৰ সক্ৰিয়তাক কমাই দিয়ে যাৰ ফলত শৰীৰৰ ওজন বাঢ়িবলৈ ধৰে আৰু হাইপ’থাইৰইিজমডৰ লক্ষণে দেখা দিয়ে৷
পেনক্ৰিয়াজৰ অহিত কৰি ডায়েবেটিচ উৎপন্ন কৰে৷
লিভাৰৰ নানা বিধ এনজাইম বৰ্ধিত মাত্ৰাত উৎপাদন কৰে৷
স্তনৰ আৰু প্ৰষ্টেটৰ কেঞ্চাৰ কৰিব পাৰে৷
প্ৰাথমিক উৎস হ’ল আমি খোৱা খাদ্যৰ যোগেদি৷ প্লাষ্টিকৰ বটলৰ নানাবিধ শীতল পানীয়, কেনত অহা নানা বিধ মোহনীয় আহাৰৰ সামগ্ৰী আদিত যথেষ্ট পৰিমাণৰ বিচফিনল-এ থাকে৷ বিচফিনল-এৰ এটা লেপ কিছুমান কেনত দিয়া থাকে যাতে ভিতৰৰ খাদ্য-সামগ্ৰীখিনি বেচিদিনলৈ সংৰক্ষিত হৈ থাকে৷ পানীৰ সৈতে আৰু ধূলিকণাৰ সৈতেও বিচফিনল-এৰ আমাৰ দেহত অনুপ্ৰবেশ ঘটিব পাৰে৷
মাতৃদুগ্দ্ধৰ যোগেদি বিচফিনল-এ কেঁচুৱাৰ শৰীৰত প্ৰবেশ কৰিব পাৰে৷
গাড়ীত ৰাখি থোৱা প্লাষ্টিকৰ পানীৰ বটলত ৰ’দৰ বাৰে বাৰে উত্তাপ পৰি থাকিলে বিচফিনল-এ বটলৰ পৰা ওলাব ধৰে, গতিকে ইয়াক উদৰস্থ কৰাৰ আগতে চিন্তা কৰক৷
দিনটোত যদি বহুতবাৰ প্লাষ্টিকৰ কাপত চাহ বা কফি খায়- বিপদৰ কথা চিন্তা কৰক৷ শিশাৰ বা ষ্টিলৰ কাপ ব্যৱহাৰ কৰিবলৈ আৰম্ভ কৰক৷
মাইক্ৰঅভেনত প্লাষ্টিকৰ বাচনত একো খাদ্য-সামগ্ৰী গৰম নকৰিব৷
প্লাষ্টিক পেইন্টৰ ব্যৱহাৰ কৰোতে হাত মোজা আৰু মুখত সুৰক্ষা-আৱৰণী পিন্ধি লব৷
কেনত অহা নানাবিধ ৰেডিমেড খাদ্য,ফল, ফলৰ ৰস,পানীয় আদিৰ মোহ ত্যাগ কৰক৷
শিশুক প্লাষ্টিকৰ খেলা সামগ্ৰী,চি ডি আদি লবলৈ পৰাপক্ষত নিদিব-কাৰণ শিশুৱে প্ৰত্যেকটো বস্তুৱেই মুখত ভৰায়৷ শিশুৰকোনো খাদ্য সামগ্ৰী যাতে প্লাষ্টিকৰ বটল বা কেনৰ নহয় তালৈ লক্ষ্য ৰাখক৷ আজিকালি আমেৰিকাৰ দৰে কিছুমান দেশতএনেসামগ্ৰীত “বিচফিনল-এ মুক্ত” বুলি লিখা থাকে৷
উপসংহাৰ
২০১০ চনৰ চেপ্টেম্বৰ মাহত বিশ্বত পোন প্ৰথম বাৰৰ বাবে কানাডাই বিচফিনল-এক এবিধ বিষাক্ত দ্ৰব্য বুলি জাননী জাৰি কৰে৷ বহুতবোৰ উন্নত দেশে “বিচফিনল-এ মুক্ত” পানীৰ বটল নিৰ্মাণ কৰিবলৈ আৰম্ভ কৰিছে৷ কেনেডা, আমেৰিকা, নিউজিলেণ্ড, অষ্ট্ৰেলিয়া, কেলিফৰ্নিয়া আৰু চিকাগোত শিশুৰ বাবে প্লাষ্টিকৰ সকলো ধৰণৰ বটল নিসিদ্ধ কৰা হৈছে৷
প্লাষ্টিকে সংঘটিত কৰিব পৰা এই বিপদসমূহৰ ধাৰণাটো জনাজাত হ’বৰ আজি দুবছৰ সময়েই অতিবাহিত হোৱা নাই৷ এতিয়াও প্লাষ্টিকৰ সপক্ষে আৰু বিপক্ষে বাদানুবাদ চলি আছে৷ এদিনত এজন ব্যক্তিয়ে প্ৰতিকিলো শৰীৰৰ ওজনৰ বিপৰীতে সৰ্বোচ্চ ৫মিলিগ্ৰাম বিচফিনল-এ শৰীৰৰ ক্ষতি নোহোৱাকৈ গ্ৰহণ কৰিব পাৰে বুলি আমেৰিকাৰ এফ ডি এ বিভাগে জনাইছে৷ জানিব পৰা মতে প্ৰাপ্তবয়স্কৰ তুলনাত কম বয়সীয়ালোকক বিচফিনল-এ (চমুকৈ বি পি এ) বেছি অহিত সাধিব পাৰে৷ আমেৰিকা, কেনেডা, ব্ৰিটেইন, স্পেইন আদি নানা উন্নত দেশত কৰা অধ্যয়নৰ সহায়ত জানিব পৰা মতে ইয়াৰ অপকাৰিতাৰ ফলত সৃষ্টি হব পৰা প্ৰমাণিত প্ৰমুখ বিপদসমূহ হ’ল – ডায়েবিটিজ, অবেচিটি বা মেদবহুলতা, হৃদৰোগ,কেঞ্চাৰ আৰু উভয় লিংগতে কৰা প্ৰজনন তন্ত্ৰৰ অপকাৰিতা৷
এই প্ৰাথমিক ধাৰণাটোৰ ওপৰত গোটৰ নানা বিজ্ঞজনে আৰু জনা কথা সংযোজন কৰিব বুলি মই আশা ৰাখি এই চমু লিখনি আজিলৈ সামৰিলোঁ৷
ডাঃ ভূপেন্দ্ৰ শইকীয়া
শেহতীয়া উন্নীতকৰণ: : 3/17/2020