মূল পৃষ্ঠা / স্বাস্থ্য / ঔষধ / অসমৰ বনৌষধি / তিতাফুল বা বাহক(বা বাহাকা):
অংশিদাৰী
Views
  • স্থিতি: সম্পাদনাৰ বাবে মুকলি

তিতাফুল বা বাহক(বা বাহাকা):

তিতাফুল বা বাহক(বা বাহাকা)ৰ বিষয়ে লিখা হৈছে ।

 

বিভিন্ন ভাষাত ইয়াৰ নাম -

সংস্কৃত:

বাসক, আতাৰুষক, সিংহস্য, বাসিকা

হিন্দীত:

বগা বাসা, অভুছা, অৰুশি

গুজৰাটী: অডুসা

মাৰাঠী: অডুসা

পাঞ্জাৱী: বংস

ইংৰাজীত:

তেলেগু: পেডিয়ামানু, আড্ডাচাশমু

অসমীয়া: তিতাফুল, বাহক বা বাহাকা

প্ৰচলিত নাম:

বাহক বা বাহাকা। উজনি অসমত ইয়াক তিতাফুল ইয়াক তিতাফুল বুলি কয়।

ব্যৱহৃত অংগ:

পঞ্চাংগ। (পত্ৰ, পুষ্প, মূল, ফল আৰু চাল)।

পৰিচয়:

এই গছ সাধাৰণতে দুবিধ। এবিধ ৰঙা আৰু আনবিধ বগা। দুয়োটা প্ৰজাতিৰ গছেই চিৰসেউজীয়া। বগা বাহক গছ বৰ বেছি ওখ নহয় আৰু ইয়াৰ ঠা-ঠেঙুলি বেছি।

কিন্তু ৰঙা বাহকৰ ডাল কমকৈ ওলায় আৰু সাধাৰণতে ওপৰলৈ গা-গছডাল বাঢ়ি গৈ ১০-১২ ফুট মান ওখ হয়।

বগা বাহক ৪ ফুটৰ পৰা ৮ ফুট মান হয়। পাত যোৰ পাতি ওলায়।

গা-গছ বা ডালৰ পৰা যোৰা যোৱাকৈ পাত ওলায়। দুয়োবিধ বাহকৰে পাত ডাঙৰ আৰু আগবোৰ জোঙা হয়।

বগা বাহকৰ আগত চুটি পুষ্পদণ্ডত থোপা পাতি আৰু ৰঙা বাহকৰ ফুল জানুৱাৰী-ফেব্ৰুৱাৰী মাহত ফুলে।

সোৱাদ:

ফুলৰ সোৱাদ তিতা আৰু কটু। ৰঙা বাহকৰ ফুল কেঁচাকৈ ছিঙি আনি সামান্য শুকুৱাই ভাজি বা জোল কৰি খোৱা হয়। ইয়াৰ এটা বিশেষ সোৱাদ আৰু ভাল গোন্ধ আছে।

ঔষধীয় গুণ -

কফ নিঃসাৰক, হাপানি নিবাৰক, পাত তিতা কাৰণে জন্তুৱে নেখায়, ফুল মূত্ৰ নিঃসাৰক, শোথহাৰক, কৃমিধ্ন, কুষ্ঠ নিবাৰক।

কাহ, শ্বসাৰোগ, আমবাত(গাত চকলা উঠা), জ্বৰ, ক্ষয়ৰোগ আদি ৰোগ প্ৰতিৰোধ কৰে। কফবিলাকত ইয়াৰ পাতৰ বেছিকৈ ব্যৱহাৰ হয়।

ইয়াৰ পাতৰ স্বৰস(আধা তোলাৰ পৰা ডেৰ তোলা পৰ্যন্ত), মৌৰ লগত মিহলাই খুৱালে যিকোনো কফৰ বিকাৰৰ লগত শ্বাসতন্ত্ৰৰ ৰোগো নিয়ন্ত্ৰণ হয়।

*ৰক্তপিত্ত(যকৃতৰ পৰা ৰক্ত নিৰ্গমন হোৱা ৰোগ):

১)ইয়াৰ স্বৰস মৌৰ লগত মিহলাই সেৱন কৰিলে ৰোগ নিৰাময় হয়।

২)ইয়াৰ পাত বটি ৰস উলিয়াই মৌৰ লগত মিহলাই তিনিবাৰকৈ একাপ পৰিমাণত খুৱাই এই ৰোগ নিৰাময় হয়।

৩)তিনিমাহ ধৰি ছাঁত শুকুৱাই লোৱা বাহাকাৰ পাত গুড়ি কৰি এচামুচ পৰিমাণত লৈ আধাচামুচ মৌৰ লগত মিহলাই চেলেকি খাই থাকিলে লাগে।

৪)ইয়াৰ ফুল(বগা আৰু ৰঙা বাহক) ছাঁত শুকুৱাই গুড়ি কৰি আধা চামুচ মৌৰ লগত মিহলাই চেলেকি খাই থাকিব লাগে।

*মেলেৰিয়া জ্বৰ:

বাহাকাৰ পাতৰ গুড়ি কুহুমীয়া গৰম পানীৰ লগত মিহলাই খুৱালে মেলেৰিয়া জ্বৰৰ প্ৰকোপ কমে। গ্ৰহণী, ডায়েৰিয়া বা পনীয়া পায়খানা ৰোগত ইয়াৰ পাতৰ ৰস খুৱাব লাগে।

এই ৰসে অন্ত্ৰত থকা জীৱাণু নাশ কৰে আৰু খাদ্যৰ পাচন নিয়মীয়া কৰি ৰাখে।

*যক্ষ্মা ৰোগ:

এই ৰোগ হ’লে ৰোগীৰ কাহ হয় আৰু লগতে কফ ওলায়। এনে অৱস্থা হ’লে বাহাকাৰ বিছটামান পাত ছিঙি আনি ভালদৰে ধুই বটি ৰস উলিয়াই, সেই ৰস পুৱা আৰু গধূলি সেৱন কৰাই থাকিলে যক্ষ্মাৰ তীব্ৰতা কমে আৰু লাহে লাহে ৰোগো নিৰাময় হয়।

*শ্বাসৰোগ:

১)বাহাকাৰ পাত, সম পৰিমাণৰ শিলিখা আৰু ক’লা আঙুৰ মিহলাই বটি ৰস উলিয়াই গৰম কৰি সামান্য ডাঠ কৰি খুৱালে বা বাহাকাৰ পাতৰ ৰসত আদা আৰু মৌ মিহলাই খুৱাই থাকিলে শ্বাস ৰোগৰ পৰা উপশম পোৱা যায়।

২)আদা এক ইঞ্চি(জোখৰ) এডোখৰ কুটি লৈ উতলাই লওক। পিছত ঠাণ্ডা হ’লে চেকি লৈ তাৰ লগত এচামুচ মৌ মিহলাই খুৱালে এই ৰোগ আৰোগ্য হয়।

*কৃমি ৰোগ:

বাহাকাৰ পাতৰ ৰসৰ লগত মৌ মিহলাই খুৱালে কৃমি নাশ হৈ বাহিৰলৈ ওলাই যাব।

*চৰ্মৰোগ(খজুৱতি, খৰ, ফোঁহা আদি):

বাহাকাৰ ২০ খন পূৰঠ পাত ভালদৰে ধুই লৈ ১০ গ্ৰাম হালধি গোমূত্ৰৰে বটি পেষ্ট এটা বনাই ছালৰ ৰোগ থকা অংশত লেপ দি থ’লে এনেবিলাক ৰোগ আৰোগ্য হয়।

*বমি:

বাহাকা পাতৰ ৰসত মৌ বা নেমুৰ ৰস মিহলাই সেৱন কৰিলে বমি বন্ধ হয়।

*জ্বৰ:

বুকুত কফ জমা হৈ জ্বৰ হ’লে বাহাকাৰ গাত, গিলোয়, তুলসীৰ পাতৰ ক্কাথ বনাই সেৱন কৰালে জ্বৰ নাইকিয়া হয়।

*জণ্ডিচ ৰোগ:

বাহাকাৰ পাত বা ফুল বটি ৰস উলিয়াই মৌৰ লগত খুৱাব লাগে। দুচামুচ চালকুৱঁৰী পাতৰ ৰস(বিজল), চাৰি চামুচ বাহাকা পাতৰ ৰস, একেলগে মিহলাই খুৱালেও জণ্ডিচ ৰোগ নিৰাময় হয়।

*প্ৰস্ৰাৱ বন্ধ হ’লে:

কুঁহিয়াৰৰ ৰস বা ক’লা আঙুৰৰ ৰস উলিয়াই তাৰ লগত বাহাকা পাতৰ ৰস দুচামুচ মিহলাই খুৱালে বন্ধ হয় থকা প্ৰস্ৰাৱ খোলোচা হয়।

বাহাকাৰ পাত উতলাই বা ইয়াৰ শিপা উতলাই ৰস উলিয়াই ডাঠ কৈ ক্কাথ বনাই ৰোগীক খুৱাব লাগে।

*পানী লগা:

বাহাকা পাতৰ দুচামুচ ৰসৰ সৈতে তুলসী পাতৰ ৰস এচামুচ আৰু মৌ এচামুচ মিহলাই পুৱা-গধূলি দুবাৰকৈ খুৱাব লাগে।

পৰিমাণ:

কেঁচা পাতৰ ৰস ১০-১২ মিঃলিঃ। ফুলৰ সতেজ ৰস ১০-২০ গ্ৰাম। শিপাৰ ক্কাথ ২০-৬০ মিঃলিঃ। পঞ্চাংগ চূৰ্ণ ১০-২০ গ্ৰাম।

ঔষধি গুণ:

*মূৰৰ বিষ:

বাহাকাৰ ফুল ছাঁত শুকুৱাই খুব মিহিকৈ বটি গুড়িৰ ১০ গ্ৰাম(দুচামুচ) লৈ গুড়ৰ সৈতে ভালদৰে মিহলাই চাৰিটা সৰু সৰু বড়ি বনাই লওক।

মূৰৰ বিষ আৰম্ভ হোৱাৰ লগে লগে এই বড়িৰ এটা ৰোগীক খুৱাওক। মূৰৰ বিষ লগে লগে ভাল পাব।

*হিকটি, চকুৰ বিষ, কাহ:

বাহাকাৰ শিপা ২০ গ্ৰাম ভালদৰে ধুই লওক আৰু ২০০ মিঃলিঃ গাখীৰৰ লগত ভালদৰে বটি লওক। এতিয়া গাখীৰখিনি চেকি উলিয়াই লওক। এই গাখীৰৰ লগত ৩০ গ্ৰাম মিচিৰি, ১৫টা জালুকৰ গুড়ি ভালদৰে মিহলাই লওক।

চকুৰ ৰোগ, চকুৰ বিষ, হিকটী, কাহ আদি ৰোগীক মিশ্ৰন খুৱালে এনে বিকাৰ নিৰাময় হয়।

*মূৰৰ বিষত ভুগি থকা ৰোগীক, ছাঁত শুকুৱাই লোৱা বাহাকা পাতৰ চাহ বনাই তাৰ লগত সোৱাদৰ কাৰণে অকণমান নিমখ মিহলাই খুৱাওক।

*চকুৰ ৰোগ:

চকুৰ ৰেটিনাৰ বিষ হ’লে বাহাকা ফুল ৪-৫টা সামান্য গৰম কৰি, পৰিষ্কাৰ কাপোৰ এখনত বান্ধি বিষাই থকা চকুৰ ওপৰত বান্ধি ৰাখক।

*মুখ গহ্বৰৰ ৰোগ:

মুখৰ ভিতৰত ঘা হ’লে ভালদৰে ধুই লোৱা বাহাকা পাত দুখিলা মুখত লৈ চোবাই থাকক। ইয়াৰ ৰসখিনিব গিলি খাওক আৰু সিতাবোৰ পেলাই দিয়ক।

দাঁতৰ বিষ আৰু অন্য ৰোগ -

দাঁতৰ বিষ হ’লে বা আলুত সংক্ৰমন হ’লে বাহাকাৰ সৰু ডাল এটি দাঁতোন হিচাপে ব্যৱহাৰ কৰক। সোনকালেই দাঁতৰ ৰোগ নিৰাময় হ’ব।

*মৃগী ৰোগ:

যিসকল মৃগী ৰোগীয়ে কেৱল গাখীৰ ভাতহে খাই থাকে, তেওঁলোকে নিয়মীয়াকৈ বাহাকাৰ ফুলৰ গুড়ি ২ৰ পৰা ৫ গ্ৰাম মাত্ৰাত লৈ তাৰ লগত এচামুচ মৌ নিয়মীয়াকৈ খাই থাকিলে পুৰণি মৃগী ৰোগো নিৰাময় হয়।

*হাপানি:

এমুঠিমান বাহাকাৰ পাত ছাঁত শুকুৱাই লওক আৰু তাৰ লগত শুকান ক’লা ধতুৰাৰ পাত চাৰিটা মিহলাই লওক। দুয়োবিধ পাত একেলগে মিহিকৈ গুড়ি কৰি লওক।

এই চিগাৰেট প্ৰস্তুত কৰি লওক আৰু ৰোগীক এই চিগাৰেটত অগ্নি সংযোগ কৰি ধূমপান কৰিবলৈ দিয়ক। ইয়াৰ ধোঁৱাই হাপানি ৰোগীক ৰোগ যন্ত্ৰণাৰ পৰা আশাতীত ৰেহাই দিয়ে।

*১০ৰ পৰা ২০ গ্ৰাম পৰিমাণৰ বাহাকাৰ পাত সিজোৱা ডাঠ ৰস লওক। তাৰ লগত হালধি, ধনিয়া গুটি, গুডুচি, পিপলি, আদা আৰু এক গ্ৰাম জালুকৰ গুড়ি মিহলাই লওক।

এই মিশ্ৰণৰ এচামুচ পৰিমাণত দিনটোত তিনিবাৰ সেৱন কৰিবলৈ দিয়ক। এই মিশ্ৰণে ব্ৰংকিয়েল হাপানি সম্পূৰ্ণৰূপে নিৰাময় কৰিব।

*কাহ:

বাহাকাৰ সতেজ পাতৰ ৰস ডেৰ চামুচ, এচামুচ মৌৰ লগত ৰোগীক খাবলৈ দিয়ক। এই মিশ্ৰণে কাহ, ব্ৰংকিয়েল হাপানি আৰু ক্ষয় ৰোগ(যক্ষ্মা ৰোগ) নিৰাময় কৰিব পাৰে।

*বাহাকা পাত সিজোৱা ডাঠ ৰস, কিচমিচ আৰু মিচিৰি মিহলি কৰি ভালদৰে বাট লৈ দিনটোত ৩-৪ বাৰ খুৱাই থাকিলে পুৰণি কাহ ভাল হয়।

*বাহাকা পাতৰ এচামুচ ৰস, এচামুচ আদাৰ ৰস আৰু এচামুচ মৌ মিহলাই খুৱাই থাকিলে যিকোনো ধৰণৰ পুৰণি কাহ নিৰাময় হয়।

উৎস: স্বাস্থ্য আৰু দীৰ্ঘজীৱন

3.04545454545
আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top