অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

সংৰক্ষিত খাদ্যৰ ঔষধি গুণ

 

আমাৰ খোৱাৰ ৰুচি আৰু সুস্বাস্থ্য সাধনাৰ বাবে কিছুমান খাদ্য আছে, যিবোৰে আমাৰ হজম শক্তি বঢ়ায় আৰু বিভিন্ন ৰোগৰ নিৰাময়ৰ বাবে মহৌষধ । এই খাদ্যবোৰক সংৰক্ষণ কৰি খাব পৰা যায় । এই সংৰক্ষিত খাদ্যৰ খাদ্যৰ ঔষধি গুণ আছে । এইবোৰে স্বাস্থ্য গঢ়াত সহায় কৰে ।

বতৰৰ খাদ্যবস্তু সংৰক্ষণ কৰিব পৰা আৰু বনৌষধি গুণসম্পন্ন খাদ্য আছে । সেইবোৰ মুখৰ অৰুচি হ’লে, অসুখ হ’লে এই খাদ্বোৰ সযতনে ৰাখি পিছত খোৱা হয় ।

খাৰলি -

কলাখাৰ তাত খাটি সৰিয়হৰ তেল সানি খাৰলি তৈয়াৰ কৰা হয় । খাৰলিয়ে খোৱাৰ ৰুচি বঢ়ায় । পেট পৰিষ্কাৰ কৰে, ই শক্তিদায়ক ।

তেঁতেলী :-

পকা তেঁতেলীৰ গুটিবোৰ ভালদৰে গুড় মিথৈত থৈ দিব লাগে । খোৱাৰ সময়ত দাইল আঞ্জা আৰু উখুহা ভাতৰ লগত খাই বৰ জুতি পোৱা যায় । পকা তেঁতেলী উচ্চ ৰক্তচাপ ৰোগীৰ মহৌষধ । ই ৰক্তচাপ নিয়ন্ত্ৰণ কৰি ৰাখিব পাৰে । পুৰণা এই তেঁতেলীয়ে কাহ-কফ নাশ কৰে বুলি কোৱা হয় ।

কলাখাৰ -

ভীমকল বা কেচেলপা কল কাটি সেইবোৰ ৰ’দত শুকাই পুৰি কলাখাৰ তৈয়াৰ কৰে । কলাখাৰৰ আঞ্জা বৰ উপকাৰী । বুকু জ্বলা-পোৰা কৰা, টেঙা উগাৰ অহা আৰু পেটৰ ঘূৰণীয়া পেলু নাশ কৰিব পাৰে । হজম শক্তি বঢ়ায় ।

খৰিচা :-

বাঁহৰ কোমল গাজৰ পৰা খৰিচা তৈয়াৰ কৰিব পৰা যায় । খৰিচা দুই প্ৰকাৰৰ । পকা খৰিচা আৰু কেঁচা খৰিচা । এই বাঁহ গাজৰ খৰিচাই হজম শক্তি বঢ়ায় । খোৱাৰ ৰুচি বঢ়ায়, বসন্ত ৰোগ হ’লে বা মাম্পছ হ’লে পিছত মাগুৰ লগত খৰিচা ৰান্ধি খালে ভাল হয় । শক্তিবৰ্ধক ।

গোল নেমুৰ আচাৰ -

গোল নেমুবোৰৰ বাকলি গুচাই নিমখ-পানীত তিয়াই থৈ তাৰ পিছত হালধি-তেল সানি ৰ’দত দিব লাগে । ইয়াৰ পিছত কাচৰ বৈয়ামত থৈ ভিনেগাৰ সানি ৰ’দত দি শুকুৱাই জীৰাগুড়ি-জলকীয়া দি থ’ব লাগে । ই খাবলৈ বৰ সোৱাদ লগা হয় । খোৱাৰ ৰুচি বঢ়ায় । খাদ্য হজম হোৱাত সহায় কৰে । বিশেষকৈ পেটৰ অসুখ, গ্ৰহণী, হাপানী, বাতবিষ নাইকিয়া কৰিব পাৰে ।

বেতগাজৰ :-

বেতগাজৰ খৰিচা বৰ উপকাৰী । কেঁচুমূৰি (অৰ্শ) ৰোগ আৰু গ্ৰহণী, কৃমি, কুষ্ঠৰোগৰ বাবে অতি উত্তম ঔষধ ।

কুঁজি-থেকেৰাৰ :-

কুঁজি-থেকেৰা কাটি ৰ’দত শুকুৱাই থ’ব লাগে । ইয়াৰ আঞ্জা খালে গ্ৰহণী, বাতবিষ নাইকিয়া হয় ।

থেকেৰা -

থেকেৰা কাটি ৰ’দত শুকাই তাত নিমখ আৰু তেল সানি থ’ব লাগে । যিমানে থেকেৰা শুঠি পুৰণা হয় সিমানে পেটৰ অসুখৰ বাবে উপকাৰী । ইয়াক গৰম দিনত চৰবত তৈয়াৰ কৰি খাব পাৰি । মাছৰ লগত আলু দি থৈকাৰা টেঙাৰ আঞ্জা খাবলৈ বৰ সোৱাদ লগা হয় । ইয়ে শৰীৰৰ সজীৱতা আনে । খোৱাৰ ৰুচি বঢ়ায় ।

সংৰক্ষিত কৰি ৰখাবোৰৰ ভিতৰত মৰাপাটৰ আগ, মূলাৰ শুঠি, চিদল মাছ, পচেতীয়া, নৰসিংহ, তিতাফুল, শেৱালি ফুল উল্লেখযোগ্য ।

মৰাপাট (শুকতি) -

মৰাপাটৰ কোমল আগ আৰু পাত শুকুৱাই সংৰক্ষণ কৰি থোৱা হয় । শুকতি জনজাতি লোকসকলে সংৰক্ষণ কৰি থয় । পিছত এই শুকতি মাছৰ লগত থপথপীয়াকৈ ৰান্ধি খায় । ই মানুহৰ কৃমি নাশ কৰে । পেটৰ ৰোগ নাইকিয়া কৰে । তেজ চলাচল ভাল হয়, গাৰ বিষ নাইকিয়া হয় বুলি কোৱা হয় ।

মূলাৰ শুঠি :-

মূলা সৰু সৰুকৈ কাটি ৰ’দত শুকাই থয় । ইয়াৰ পিছত এই শুকোৱা শুঠিবোৰ সৰু মাছ দি খাৰ দি ৰান্ধি খাই বৰ ভাল লাগে । ইয়াক যিকোনো ঋতুতে খাব পৰা যায় । ই হজম শক্তি বঢ়ায় । পেট পৰিষ্কাৰ কৰে । খোৱাৰ ৰুচি বঢ়ায় ।

চিদল :-

চিদল মাছ হৈছে শুকুৱাই ঢেঁকীত খুন্দি এটা এটা বাঁহৰ চুঙাত ভৰাই ৰান্ধনিঘৰৰ চাঙত থৈ দিয়া হয় । মাছ পুৰি নহ’লে এই চিদল মাছ শাকৰ লগত খাৰ আঞ্জা কৰি খায় । ই খোৱাৰ ৰুচি বঢ়ায় । চকুৰ দৃষ্টিশক্তি বৃদ্ধি কৰে বুলি কয় ।

পচেতীয়া -

পচেতীয়াৰ পাত ৰ’দত শুকুৱাই গুড়ি কৰি মাটিৰ বাচনত থৈ দিব লাগে । নতুবা আইনাৰ বৈয়ামত থৈ পিছত ইয়াক সৰু মাছৰ লগত বা আলুৰ লগত থপথপীয়াকৈ খাব পৰা যায় । ই গাৰ বিষ, কঁকালৰ বিষ নাইকিয়া কৰে । খোৱাৰ ৰুচি বঢ়ায় । হজম শক্তি বৃদ্ধি কৰে ।

নৰসিংহ :-

নৰসিংহ এবিধ বৰ পুষ্টিকৰ খাদ্য । ইয়াৰ পাত গুড়ি কৰি ভালদৰে বৈয়ামত সাঁচি থৈ পিছত খাব পৰা যায় । নৰসিংহ পাত গুড়ি মাছৰ লগত থপথপীয়াকৈ আদা-নহৰু, পিঁয়াজ-জলকীয়া দি ৰান্ধি খাব পাৰি । আলুৰ লগতো ইয়াক খাব পৰা যায় । নৰসিংহই পেটৰ বিভিন্ন ৰোগ নিৰাময় কৰে । ই কৃমিনাশক । তেজবৰ্ধক । শক্তিদায়ক । পায়েৰীয়া ৰোগৰ মহৌষধ । চকুৰ দৃষ্টিহীনতা ৰোগ নাশ কৰে । ৰক্তহীনতা ৰোগৰ বৰ উপকাৰী এই নৰসিংহৰ গুড়িৰ আঞ্জা ।

শেৱালি ফুল -

আহিন-কাতি মাহত শেৱালি ফুল গোটাই শুকুৱাই থ’ব লাগে । শেৱালি ফুল শুকুৱাই সাঁচি ৰাখি খাব পাৰি । বৰালি মাছৰ কাণ-মূৰেৰে শেৱালি ফুলৰ আঞ্জাখন খাবলৈ বৰ জুতি লগা হয় । ই ডায়েবেটিছ ৰোগৰ মহৌষধ । সপ্তাহত দুদিন মাছৰ লগত আঞ্জা কৰিয়ে হওক বা ভাতৰ লগত শুকান শেৱালি ফুল থপথপীয়াকৈ খাব পাৰি । ই খোৱাৰ ৰুচি বঢ়ায় । কৃমি নাশ কৰে । বিশেষকৈ ডায়েবেটিছ ৰোগৰ তেজৰ শৰ্কৰা নিয়ন্ত্ৰণ কৰি ৰখাত শেৱালি ফুল বৰ উপকাৰী । এনেকৈ বিভিন্ন ধৰণৰ গছ, পাত,ফুল সংৰক্ষণ কৰি আমি বিভিন্ন ধৰণে খাব পাৰো ।

লেখক :- ধনেশ্বৰ হুজৰী

উৎস :- জি এনআৰচি স্বাস্থ্য

শেহতীয়া উন্নীতকৰণ: : 5/8/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate