লাহৰীঘাটত উন্নত জাতৰ বগৰীৰ খেতি :

কৰ্মস্পৃহাই মানুহক যে সদায় উদ্যমী কৰি ৰাখে, তাৰ জ্বলন্ত নিদৰ্শন দাঙি ধৰিছে মৰিগাঁও জিলাৰ বান-খহনীয়াত বিধ্বস্ত লাহৰীঘাটৰ অৱসৰপ্ৰাপ্ত শিক্ষক আফাজউদ্দিনে। লাহৰীঘাট ৰাজহ চক্ৰৰ অন্তৰ্গত বৰখাবল গাঁৱৰ এইগৰাকী অৱসৰপ্ৰাপ্ত শিক্ষকে যোৱা বছৰ পৰীক্ষামূলকভাৱে এবিঘা মাটিত দুটা প্ৰজাতিৰ(আপেল বগৰী) বগৰী খেতি কৰিছিল। অৱসৰপ্ৰাপ্ত শিক্ষক তথা খেতিয়কজনে জনোৱা মতে, তেওঁ পৰীক্ষামূলকভাৱে কৰা এবিঘা বগৰী খেতিৰপৰা প্ৰায় ৮০ হাজাৰ টকা উপাৰ্জন কৰিবলৈ সক্ষম হৈছে। অন্য খেতিতকৈ কম পৰিশ্ৰম আৰু অধিক লাভৰ মুখ খেতি এইবছৰ খেতিয়কজনে আৰু দুবিঘা মাটিত বগৰী খেতি কৰিছে। তেওঁৰ খেতিডৰাত উৎপাদিত বগৰী ডিচেম্বৰ মাহৰ শেষৰপৰা বিক্ৰী আৰম্ভ কৰিছে। আফাজউদ্দিনৰ খেতিত এটা আপেলৰ দৰে ৰঙৰ আৰু আন এটা সেউজীয়া ৰঙৰ উন্নত জাতৰ বগৰী আছে। বৰ্তমান আপেল ৰঙৰ প্ৰতি কিলোগ্ৰাম বগৰীৰ পাইকাৰী বজাৰমূল্য ৬ টকা, খুচুৰা ৮০ টকা আৰু সেউজীয়া বগৰীবিধৰ পাইকাৰী মূল্য ৩৫ টকা আৰু খুচুৰা ৬০-৬৫ টকা। এই বগৰীবিধৰ ৮-৯টাতে এক কিলোগ্ৰাম ওজন হয়। এই সন্দৰ্ভত খেতিয়কজনে জনোৱা মতে, যোৱা বছৰ লগোৱা বগৰী বিঘাত এইবেলি ভাল উৎপাদন হৈছে যদিও নতুনকৈ ৰোপণ কৰা দুবিঘাত সিমান উৎপাদন হোৱা নাই। এইবাৰ মুঠতে বগৰী বিক্ৰী কৰি খেতিয়কজনে দুই লাখমান টকা পোৱাৰ আশা কৰিছে। কোনোধৰণৰ প্ৰশিক্ষণ নোলোৱাকৈ বাতৰি কাকতত বগৰী খেতিৰে স্বাৱলম্বী হোৱাৰ লেখা পঢ়ি তেওঁ নিজেও উন্নত জাতৰ বগৰী খেতি কৰিবলৈ আগবাঢ়ি আহিছিল। ২০১১ চনত অৱসৰ গ্ৰহণ কৰা শিক্ষকজনে অঞ্চলটোৰে এখন ছিনিয়ৰ মাদ্ৰাছাত শিক্ষকতা কৰিছিল। অৱসৰ গ্ৰহণৰ পিছতে তেওঁ পুনৰ উদ্যমেৰে বগৰী খেতিত নিয়োজিত হৈ পৰে। উল্লেখযোগ্য যে বৰ্তমানলৈকে খেতিয়কজনে কৃষি বিভাগৰ তৰফৰপৰা কোনোধৰণৰ সা-সুবিধা লভ কৰা নাই। খেতিয়কজনে কৃষি বিভাগৰ তৰফৰপৰা কোনোধৰণৰ সা-সুবিধা লাভ কৰা নাই। খেতিয়কজনে জনোৱা মতে, বগৰী খেতি সন্দৰ্ভত কৃষি বিভাগে কিছু দিহা-পৰামৰ্শ দিয়াহেঁতেন, তেওঁ হয়তো ফচল অধিক উৎপাদনেৰে অধিক উপাৰ্জন কৰিব পাৰিলেহেঁন। ইফালে, অঞ্চলটোৰ অৱসৰপ্ৰাপ্ত শিক্ষকজনে বগৰী খেতিত নিয়োজিত হৈ পৰা দেখি বান-খহনীয়াগ্ৰস্ত অঞ্চলটোৰ একাংশ লোক ওলাই আহিছে এই খেতি কৰিবলৈ। বৰ্তমান অঞ্চলটোৰ লগতে সমগ্ৰ জিলাখনৰ বাবেই আদৰ্শ হৈ পৰা বয়সীয়াল খেতিয়কজনৰ বগৰী খেতিত পূৰ্ণ সহযোগ কৰিছে নিজৰ দুই শিক্ষিত সন্তানে। বগৰী খেতিৰ জৰিয়তে ৰাজ্যখনত উপাৰ্জনৰ যথেষ্ট স্থল আৰু আৰু এইক্ষেত্ৰত কৃষি বিভাগক আগ্ৰহী খেতিয়কসকলক সহযোগিতা আগবাঢ়িবলৈ খেতিয়কজনে আহ্বান জনায়।

উৎস: দৈনিক অসম(বিষ্ণু ডেকা)