কপাহৰ খেতি

মাটি নিৰ্বাচন

বিভিন্ন ধৰণৰ মাটিত কপাহৰ খেতি কৰিব পাৰি, কিন্তু মাটিডৰাৰ পৰা পানী ওলাই যোৱাৰ সুবিধা থকা হ’ব লাগে ৷ কাৰণ পানী জমা হোৱা ঠাইত কপাহৰ গছ গা কৰি উঠিব নোৱাৰে ৷

পথাৰ প্ৰস্তুতি

আন খেতিৰ দৰে অতিশয় মিহি হোৱা মাটি কপাহৰ খেতিৰ বাবে আৱশ্যক নহয় ৷ দ'কৈ চাহ কৰা মাটিৰ বীজতলীৰ আৱশ্যক ৷ ইয়াৰ বাবে ৩-৪ বাৰ হালবাই মৈ দি সমান কৰি লব লাগে ৷

সিঁচাৰ সময় : জুলাই মাহ ৷

বীজ শোধন

জেকা মাটি আৰু গোবৰৰে খৰছি তৈয়াৰ কৰি লোৱা আঠােলতীয়া মিশ্ৰণৰ লগত সিঁচাৰ আগেয়ে বীজবোৰ ভালদৰে মোহাৰি কিছুসময় ছাঁত শুকাবলৈ দিব লাগে ৷ তেতিয়া বীজবোৰ এটা এটা হৈ যোৱাত সুবিধা হয় ৷

সিঁচাৰ সময়

শাৰীবদ্ধ ভাৱে প্ৰতিটো গাততে ৪-৫ টাকৈ বীজ দিব ৷

বীজৰ পৰিমান

হেক্টৰে প্ৰতি ২০-২৫ কি:গ্ৰাম ৷

ব্যৱধান

শাৰীৰ মাজত ৪৫ ছে:মিটাৰ আৰু পুলিৰ মাজত ৩০ ছে:মিটাৰ ব্যৱধান ৰাখিব ৷

বীজ পোতন : ১.৫ ৰ পৰা ২.০ ছে:মিটাৰ দ'ত বীজবোৰ পুতিব লাগে ৷

সাৰ প্ৰয়োগ :

প্ৰথমবাৰ মাটি চাহ কৰোতেই পচনসাৰ/পামজাত সাৰ মাটিৰ লগত মিহলাই দিব লাগে ৷ ফছফেট আৰু পটাছ সাৰখিনি সমূদায় শেষৰবাৰ মাটি চাহ কৰোতে প্ৰাথমিক সাৰ হিচাবে প্ৰয়োগ কৰা উচিত ৷ নাইট্ৰোজেন সাৰখিনি সমানে দুভাগ কৰি প্ৰথমভাগ প্ৰাথমিক সাৰ হিচাবে আৰু বাকী আধা ভাগ বীজ সিঁচাৰ পৰা ৪৫ দিনৰ পিছত অৰ্থাৎ শস্যৰ ফুল ধৰিবলৈ লোৱাৰ সময়ত প্ৰয়োগ কৰিব ৷

পৰিচৰ্য্যা

বীজ সিঁচাৰ পৰা ১৫ দিনৰ পিচত ৩ বাৰ হাতেৰে শস্যডৰাৰ বনবাত উভালি দিব ৷

শস্যৰক্ষা

বীজ সিঁচাৰ ৩০ দিন পিছত এন্দোছালফান (থায়োদান) ৩৫ ইচি ঔষধৰ ২ মিলিলিটাৰ ১ লিটাৰ পানীত মিহলাই লৈ প্ৰয়োগ কৰিব৷ প্ৰতি ২০ দিনৰ ব্যৱধানত এনেকৈ মুঠতে ৪ বাৰ ঔষধ প্ৰয়োগ কৰা উচিত ৷ প্ৰতিবাৰ প্ৰয়োগত হেক্টৰে প্ৰতি ৬০০-৮০০ লিটাৰ ঔষধ মিশ্ৰণৰ প্ৰয়োজন হয়৷

শস্য চপোৱা (কপাহ তোলা)

নবেম্বৰ মাহৰ শেষত প্ৰথমবাৰ আৰু সাধাৰণতে ৩-৪ বাৰ কপাহ গছৰপৰা আহৰণ কৰিব পাৰি ৷ ৰাতিপুৱা সময়ত কপাহ তুলি আনিব পাৰিলে শুকান পাত আৰু চোকোৰা আদিৰ পৰা হাত সাৰিব পাৰি ৷ সঁচৰ বাবে লোৱা কপাহৰ বীজবোৰ উলিয়াই অনাৰ পিচত কেইঘন্টামান ৰ’দত শুকুৱাই মজুত কৰি ৰাখিব লাগে ৷

উৎপাদন

দীঘল আঁহৰ কপাহৰ বীজৰ উৎপাদন প্ৰতি হেক্টৰত ৮-১২ কুইন্টল হয় আৰু চুটি আঁহৰ বীজৰ উৎপাদনৰ পৰিমান ৪-৬ কুইন্টল হয় ৷

উৎস: অসম কৃষি বিশ্ববিদ্যালয়।