অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ব্যৱসায়িক ভিত্তিত ফুলৰ খেতি

আমাৰ দৈনন্দিন জীৱনত ফুলৰ ব্যৱহাৰ অপৰিসীম। পূজা-পাৰ্বণৰ পৰা আৰম্ভ কৰি শ্ৰাদ্ধ-সকাম, বিয়া-বাৰু, মাল্যাৰ্পণ, সম্বৰ্দ্ধনা, মঞ্চসজ্জা, বিয়াৰ ৰভাতলী সজোৱা আদি বিভিন্ন কর্মত ফুলৰ প্রয়োজন হয়।

কর্ণাটক ৰাজ্যৰ হুৱলি চহৰত আমি দেখিছিলো অলিয়ে-গলিয়ে ফুলৰ দোকান। কাৰণ সেই অঞ্চলৰ যুৱতী-মহিলাসকলে খোপা বা চুলিত পিন্ধে জীৱন্ত ফুলৰ অলংকাৰ। তাৰোপৰি গোটেই চহৰতে আমোলমোলাই থাকে এটি সুগন্ধি সুবাস।

আমি সাধাৰণতে ঘৰৰ সৌন্দর্য বৃদ্ধিৰ কাৰণে মাটিৰ টাবত ফুল ৰুওঁ। ব্যৱসায় ভিত্তিত ফুলৰ খেতি কৰা নহয় বুলিয়েই ক’ব পাৰি। অৱশ্যে হাজোৰ ওচৰে-পাঁজৰে শিঙিমাৰী, দদৰা, পচৰীয়া আদি ঠাইত দুই-একোডৰা ফুলৰ খেতি দেখিবলৈ পোৱা যায়। সেয়েহে অসমত প্ৰতিদিনে যিমান ফুলৰ প্রয়োজন হয় তাৰে অভাৱ পূৰণ নহয়। সেয়েহে অন্য ৰাজ্যৰ পৰা ফুল আমদানি কৰিব লগা হয়।

অসমৰ দৰে ৰাজ্যত সৰু-সুৰা খেতিয়কসকলে ফুলৰ খেতি কৰি লাভৱান হ’ব পাৰে। আনকি মহিলাসকলেও ইয়াত হাত উজান দিব পাৰে। তামিলনাডু, বংগ আৰু মহাৰাষ্ট্ৰত ক্ৰমে ৩২০০০, ২৩০০০ আৰু ১৭৫০০ হেক্টৰ মাটিত ফুলৰ খেতি কৰা হয়। ইয়াৰ বিপৰীতে অসমত মাত্র ১৮০০ হেক্টৰ মাটিতহে ফুলৰ খেতি কৰা হয়। এইটো অনুমান কৰা হৈছে যে অসমত প্রতি হেক্টৰ মাটিত ধান, মৰাপাট, সৰিয়হ আদিৰ খেতি কৰি এজন খেতিয়কে ৭০০০০ৰ পৰা ৮৫০০০ টকালৈ প্রতিবছৰে উপাৰ্জন কৰিব পাৰে। ইয়াৰ তুলনাত ফুলৰ খেতি কৰি ২৪০০০০ৰ পৰা ৪২০০০০ টকালৈকে উপাৰ্জন কৰিব পাৰে।

চৰকাৰী ব্যৱস্থা

মুখ্যমন্ত্রী মাননীয় তৰুণ গগৈৰ দিনত পুষ্পকৃষি উন্নয়নৰ বাবে উদ্যান শস্য আৰু খাদ্য সংসাধন (DHFP) সঞ্চালকালয়ৰ জৰিয়তে অতিৰিক্ত ৫০০০ হেক্টৰ মাটিত ফুলৰ খেতি কৰিবলৈ সিদ্ধান্ত লোৱা হৈছিল আৰু ইয়াৰ দায়িত্ব অৰ্পণ কৰা হৈছিল Chief Minister's Special Floriculture Missionক। সেই হিচাপে Horticulture Research Station, Assam Agriculture University, Kahikuchi, Guwahati বিশেষজ্ঞসকলৰ লগত আলোচনা কৰি DHEPয়ে এক বিস্তৃত প্রতিবেদন প্ৰস্তুত কৰিছিল।

ফুলৰ ব্যৱসায়

হাজোৰ সাতদলা গাঁৱৰ নৰেন দাস নামৰ এজন খেতিয়কে প্রতিদিনে নিজৰ খেতিৰ ফুল লৈ গুৱাহাটীলৈ আহে আৰু মানুহৰ ঘৰত ফুলৰ যোগান ধৰে। সকলো খৰচ বাদ দি দাসৰ মাহিলী উপার্জন ১৬০০০ টকাৰ অধিক হয়। এনেকুৱা আৰু প্ৰায় ৩০০ যুৱক আছে, যাৰ উপাৰ্জনৰ পথ ফুলৰ ব্যৱসায়।

গুৱাহাটী ফাঁচীবজাৰ অঞ্চলত এনে কিছুমান বাতানুকূল ফুলৰ বিপণিও আছে, যিসকলে ক্ষুদ্র ব্যৱসায়ীসকলক সহায় কৰে। সেইসকল পাইকাৰী ব্যৱসায়ীয়ে বিয়াৰ ৰভা সজোৱা, মঞ্চ সজ্জা আদিৰ কাম কৰে।

গুৱাহাটীৰ শুক্লেশ্বৰ ঘাট অঞ্চলত এখন ভাল ফুলৰ বজাৰ আছে। বিভিন্ন সময়ত যেতিয়া ফুলৰ প্রয়োজন হয় তেতিয়া সকলোৱে শুক্ৰেশ্বৰ ঘাটলৈ দৌৰে। তাৰোপৰি সৰস্বতী পূজা, বিশ্বকৰ্মা পূজা, দুৰ্গা পূজা আদি বিভিন্ন পুজা-উৎসৱত প্ৰায় সকলো ঠাইতে ফুল বিক্ৰী হয়।

ফুল সংস্কৃতিৰ অন্য দিশ

ফুলৰ প্ৰয়োজন যে কেৱল পূজা-পাৰ্বণত আৱশ্যক এনে নহয়। ইয়াৰ অন্য দিশো আছে। পুষ্প সংস্কৃতিৰ লগত ফুলৰ উপৰিও আলংকাৰিক উদ্ভিদ, ধর্মীয় উদ্ভিদ আৰু নতুন ফুলৰ উদ্ভাৱন আদিৰ সম্পৰ্ক আছে।  উদাহৰণস্বৰূপে ক’ব পাৰি হাজোৰ হয়গ্ৰীৱ মাধৱ মন্দিৰত তুলসীৰ মালা ভক্তগণে অৰ্পণ কৰা দেখা যায়। সেয়েহে সেই অঞ্চলত বহুতে তুলসীৰ খেতি কৰে। তেনেদৰে কেতিয়াবা দূবৰি বিচাৰিও হায়ৰাণ হ’ব লগা হয়।

পাত্ৰ উদ্ভিদ সজাবৰ কাৰণে, ওলোমা ফুলৰ পাত্ৰ আদিৰ কাৰণেও ই ব্যৱসায় হ’ব পাৰে। এনে বহুতো ফুলৰ পাত্র বিভিন্ন কার্যালয়, হোটেল আদিত দেখা যায়।

বর্তমান ভাৰতৰ প্ৰায়ভাগ প্রদেশত ব্যৱসায়িক ভিত্তিত ফুলৰ খেতি কৰা হয়। ইয়াৰ ভিতৰত তামিলনাডুত ১৭ শতাংশ, কর্ণাটকত ১৪ শতাংশ, বংগত ১০ শতাংশ মাটিত ফুলৰ খেতি কৰা হয়। তাৰোপৰি মধ্যপ্রদেশ, মিজোৰাম, গুজৰাট, অন্ধ্রপ্রদেশ, ওড়িশা, ঝাৰখণ্ড, হাৰিয়ানা, অসম আৰু ছত্তীশগড়ত দিনক দিনে পুষ্পকৃষিৰ প্ৰতি আগ্ৰহ প্ৰকাশ কৰা দেখা গৈছে।

মোখনি

ফুল যে কেৱল সৌন্দর্যৰে আধাৰ সেয়া নহয়, ফুলৰ পৰাই ফল হয়, ফলৰ পৰাই হয়তো সৃষ্টি হয় জীৱনৰ অংকুৰ খাদ্যৰ ভঁৰাল। আৰু হয়তো ফুলৰ জৰিয়তেই কোনোবাই বিচাৰি পাব পাৰে জীয়াই থকাৰ সম্বল।

প্রশিক্ষণ

গুৱাহাটীৰ কাঁহিকুছিত অৱস্থিত কৃষিবিজ্ঞান কেন্দ্র, কামৰূপত এদিনৰ পৰা এমাহ পৰ্যন্ত ফুলৰ খেতিৰ বিষয়ে প্রশিক্ষণ প্রদান কৰা হয়। অন্যান্য জিলাতো এই সুবিধা আছে। বিশদ বিৱৰণৰ কাৰণে যোগাযোগ কৰিব পাৰে।

১) সঞ্চালক, সম্প্ৰসাৰণ শিক্ষা সঞ্চালকালয়, অসম কৃষি বিশ্ববিদ্যালয়, যোৰহাট।

২) মুখ্য বিজ্ঞানী, HRS, কাঁহিকুছি।

৩) মুখ্য বিজ্ঞানী, উদান শস্য গৱেষণা কেন্দ্ৰ,  কাঁহিকুছি।

৪) মুখ্য অধ্যাপক, উদ্যান বিজ্ঞান বিভাগ, অসম কৃষি বিশ্ববিদ্যালয়, যোৰহাট।

৫) কৃষিবিজ্ঞান কেন্দ্র, কামৰূপ।

লিখক: প্রদীপ ভূঞা।



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate