অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

গো-পালন: এটি গুৰুত্বপূৰ্ণ কথা :

গো-পালন: এটি গুৰুত্বপূৰ্ণ কথা :

 

গোহালি থকা ঘৰৰ পৰা কিছু আঁতৰত ৰ’দ খাই, ওখ ঠাই আৰু সহজে বতাহ চলাচল কৰা ঠাইত সাজিব লাগে। গোহালিৰ চাৰিও কাষে পানী জমা হোৱা ঠাই, নলা-নর্দমা, গেলাপচা বস্তু আদি থাকিব নালাগে। গোহালিলৈ যাতায়াতৰ সুবিধা থকা অতি প্রয়োজন।

সাম্প্ৰতিক কালত যিহেতু পশুপালন এক গুৰুত্বপূর্ণ উদ্যোগ হিচাপে গঢ় লৈ উঠিছে। বিশেষকৈ গো-পালনেৰে বহুতো নিবনুৱা শিক্ষিত যুৱক-যুৱতীয়ে স্ব-নিৰ্ভৰশীল হোৱা পৰিলক্ষিত হৈছে। গো-পালনেৰে অধিক লাভৱান হ’বলৈ পালকসকলে কিছু কথা শুনাৰ অতি প্রয়োজন। বাস্তৱ ক্ষেত্ৰত দেখা গৈছে যে বহুতো গোপালক যেনেদৰে লাভৱান হ’ব লাগে, কিছু সম্যক জ্ঞানৰ অভাৱৰ বাবে তেনেদৰে লাভৱান হ’ব পৰা নাই। এই নিবন্ধটোত গো-পালনেৰে অধিক লাভৱান হ’বলৈ পালকসকলে জানিব লগা কিছু কথা আগবঢ়োৱা হৈছে।

১। গোহালি থকা ঘৰৰ পৰা কিছু আঁতৰত ৰ’দঘাই, ওখ ঠাই আৰু সহজে বতাহ চলাচল কৰা ঠাইত সাজিব লাগে। গোহালিৰ চাৰিওকাষে পানী জমা হোৱা ঠাই, নলা-নৰ্দমা, গেলাপচা বস্তু আদি থাকিব নালাগে। গোহালিলৈ যাতায়াতৰ সুবিধা থকা অতি প্রয়োজন।

২। গোহালিৰ ভেটিটো অলপ ওখকৈ এনেদৰে সাজিব লাগে যাতে গৰুৰ প্ৰস্ৰাৱ আৰু গোহালি চাফা কৰোঁতে ব্যৱহাৰ কৰা পানী ৰৈ নাথাকে।

৩। গোহালিৰ মজিয়াখন মিহি কৰা উচিত নহয়। যিহেতু মিহি মজিয়াত পিচলি পৰি গাইজনীৰ ভৰিৰ হাড়ৰ জোৰা এৰাই উঠিব নোৱাৰা হৈ অৱশেষত মৃত্যুপর্যন্ত হ’ব পাৰে।

৪। অতিৰিক্ত ঠাণ্ডাৰ পৰা ৰক্ষা পাবলৈ শীতকালত গোহালিৰ চাৰিওফালে হেচিয়ান কাপোৰেৰে ঢাকি দিব লাগে।

৫। গৰমৰ দিনত অতিপাত গৰমৰ পৰা ৰক্ষা পাবলৈ গোহালিত বিজুলী পাংখাৰ ব্যৱস্থা কৰাটো অতি প্ৰয়োজন।

৬। গোহালি সদায় উত্তৰা-দক্ষিণাকৈ সাজিব লাগে, যাতে সূৰ্যৰ ৰশ্মি পোনপটীয়াকৈ গোহালিত পৰে।

৭। নিতৌ পুৱা-গধূলি প্রতিজনী গাইক ওচৰৰ পৰা হাত ফুৰাই লক্ষ্য কৰিলে খোৱা-বোৱা, বেমাৰ-আজাৰ বা গৰম হোৱাৰ লক্ষণ আদিৰ উমান পাব পাৰি। কর্মচাৰীৰ ওপৰত নিৰ্ভৰ নকৰি নিজে পর্যবেক্ষণ কৰাটোহে প্রকৃত পালকৰ কর্তব্য।

৮। গাইজনীৰ পৰা ভাল ফল পাবলৈ হ’লে সকলো সময়তে গাইজনীক আন্তৰিকতাৰে মৰম কৰক। কোনো পৰিস্থিতিতে গাইজনীক মাৰপিট নতুবা ভয় খুৱাই উত্তেজিত কৰিব নালাগে।

৯। গাইকেইজনীক সদায় চাফ-চিকুণ কৰি ৰখাত গুৰুত্ব দিব লাগে। এনে কৰিবলৈ বজাৰত পোৱা বুৰুজ, শুকান খেৰ বা ঘাঁহ বা নাৰিকলৰ বাকলিৰে গাইজনীৰ সমগ্ৰ শৰীৰ মাজে মাজে বুৰুজ কৰি দিব লাগে। এনে কৰিলে চাফ-চিকুণতাৰ উপৰি ৰক্ত সঞ্চালনত সহায়ক হয়।

১০। গাখীৰ খীৰোৱা, দানা-পানী দিয়া আদি কাম একেজন মানুহে একে সময়তে কৰিলে ভাল। তাৰতম্য ঘটিলে উৎপাদন হ্রাস হোৱাৰ লগতে গাইজনীৰ স্বাস্থ্যৰ অৱনতি ঘটিব পাৰে।

১১। গাইজনীৰ পৰা অধিক উৎপাদন পাবলৈ হ’লৈ দৈনিক ৩০-৪০ কিল’গ্ৰাম কেঁচা ঘাঁহৰ লগতে সুষম দানাৰ যোগান ধৰাটো অতি প্রয়োজন।

১২। সুষম দানাৰ উপৰি গাইজনীৰ খাদ্যত উপযুক্ত পৰিমাণৰ খনিজ লৱণ, কেলচিয়াম আদি দিব পাৰিলে ভাল।

১৩। সাধাৰণতে গাইজনী জগাৰ ২-৩ মাহৰ ভিতৰতে পুনৰ গৰম হ’ব লাগে। গৰম হোৱাৰ ১৬–১৮ ঘণ্টাৰ ভিতৰত কৃত্রিম প্ৰজননৰ ব্যৱস্থা কৰিব লাগে।

১৪। পামৰ গাই কেইজনী পুৱা-গধূলি মনোযোগেৰে পৰ্যবেক্ষণ কৰিলে গৰম হৈছেনে নাই অতি সহজে ঠাৱৰ কৰিব পাৰি।

১৫। বহু সময়ত বহুতো গাই বিশেষকৈ হলষ্টেইন ফ্রিজিয়ান জাতীয় গায়ে গৰমৰ বাহ্যিক লক্ষণ নেদেখুৱায়। তেনেক্ষেত্ৰত পুৱা-গধূলি ভালদৰে পর্যবেক্ষণ কৰিলে তেনে জাতীয় গাইৰ গৰমৰ লক্ষণ সহজে ধৰিব পাৰি।

১৬। গাইজনী বেজী দিয়াৰ ১ /২ মাহৰ পাছত অভিজ্ঞ চিকিৎসকৰ দ্বাৰা পৰীক্ষা কৰোৱাই গাভিনী হৈছেনে নাই নির্ণয় কৰাব লাগে। যিহেতু বহুক্ষেত্ৰত গাভিনী নহ’লেও গৰমৰ লক্ষণ নেদেখুৱাব পাৰে।

১৭। পোৱালি দিয়াৰ পাছত জলখন সাধাৰণতে ৩-৪ ঘণ্টাৰ ভিতৰত সৰিব লাগে। বিলম্ব হ’লে অভিজ্ঞ লোকৰ দ্বাৰা সৰোৱাৰ ব্যৱস্থা কৰিব লাগে।

১৮। বাৰে বাৰে গৰম হৈ থকা গাইজনী প্ৰজনন নকৰাই চিকিৎসকৰ দ্বাৰা চিকিৎসাৰ ব্যৱস্থা কৰিব লাগে |

১৯। চেউৰি গৰু প্রথম গৰমত প্রজনন নকৰাই দ্বিতীয়বাৰ হোৱা গৰমতহে প্ৰজননৰ ব্যৱস্থা কৰিব লাগে।

২০। এখন টোকা বহীত গাইজনীৰ নাম, পোৱালি জন্ম হোৱাৰ দিন, গৰম হোৱাৰ দিন, বেজী দিয়াৰ সময় আৰু তাৰিখ বা অন্যান্য লক্ষণ আদি লিপিবদ্ধ কৰি ৰাখিব লাগে। বেজী দিয়াৰ ১৮ ৰ পৰা ২১/২২ দিনলৈ পুনৰ পৰম হৈছে নেকি লক্ষ্য কৰা উচিত। পোৱালি জগাৰ নির্দিষ্ট সময়ৰ ভিতৰত গাইজনী গৰম নহ’লে বা গাইজনী বেজী দিয়াৰ পাছতো গাভিনী নহৈ বাৰে বাৰে গৰম হৈ থাকিলে চিকিৎসকৰ দিহা-পৰামৰ্শ গ্রহণ কৰা উচিত।

লিখকদ্বয়: ডাঃ চন্দ্ৰকুমাৰ সিংহ আৰু ডাঃ প্রবীণ কুমাৰ নেওগ, দৈনিক জনমভূমি।



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate