অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ছাগলী পালনেৰে আদৰ্শ ৰাখিছে ঘটবৰৰ বিক্ৰমজিৎ কলিতাই :

ছাগলী পালনেৰে আদৰ্শ ৰাখিছে ঘটবৰৰ বিক্ৰমজিৎ কলিতাই :

 

ছাগলী পালনেৰে স্বাৱলম্বী হৈ আনৰ বাবে অনুপ্ৰেৰণাৰ উৎস হৈছে বৰপেটা জিলাৰ ঘটবৰৰ বিক্ৰমজিৎ্ কলিতা। আত্মীয়ৰ ঘৰত ছাগলী পালন কৰা কলিতাৰ এই যাত্ৰাত সংগী হৈছে শেৱালী বৰুৱা, হিৰণ্য বৰুৱা আৰু সৰযু বৰুৱা। কোনো ধৰণৰ চৰকাৰী সাহায্য অবিহনে ব্যৱসায়িক ভিত্তিত ছাগলী পালন আৰম্ভ কৰা কলিতাৰ ছাগলী পামত বৰ্তমান আছে বিভিন্ন জাতৰ প্ৰায় ৭০টা ছাগলী। স্থানীয় ছাগলীৰ উপৰি ৰাম ছাগলী, বিটেল, চিৰহি, আজমিৰী, যমুণাবাৰী, টোটাবাৰী, হায়দৰাবাদী আদি জাতৰ ছাগলী থকা পামখনে কিন্তু মাংস বিক্ৰী নকৰে। তিনি মাহৰ মূৰে মূৰে মাথোন বিক্ৰী কৰে পোৱালি। কেৱল ছাগলীৰ পাম খুলিবলৈ বিচৰা লোকসকলেই যে উন্নতমানৰ পোৱালিৰ বাবে এই পামখনলৈ আহে এনে নহয়, বৰং হাউলী, চিৰাং কৃষি বিজ্ঞান কেন্দ্ৰ আদিয়েও এই পামৰপৰা ছাগলী পোৱালি নিয়ে। পাঠশালা চহৰৰপৰা ১২৭ নম্বৰ ৰাষ্ট্ৰীয় ঘাইপথেৰে প্ৰায় ৫ কিলোমিটাৰ গ’লেই পোৱা যায় পামখন। ২০০৮ চনত স্থানীয় জাতৰ ছাগলীৰে নামমাত্ৰ মূলধনেৰে আৰম্ভ কৰা কলিতাই সেই বছৰতেই বৰ্ণসংকৰ জাতৰ ছাগলীৰে নামমাত্ৰ মূলধনেৰে আৰম্ভ কৰা কলিতাই সেই বছৰতেই বৰ্ণসংকৰ জাতৰ ছাগলী পালন আৰম্ভ কৰে। কলিতাৰ ভাষাত- ‘বৰ্ণসংকৰ জাতৰ ছাগলীৰ মূল্য কিছু বেছি যদিও তাৰপৰা ভাল আয় কৰিব পাৰি। সেয়ে মই পঞ্জাবৰপৰা উন্নত জাতৰ ছাগলী অনা আৰম্ভ কৰিলোঁ। পঞ্জাবৰ এজন ছাগলীপালক, ব্যৱসায়ীৰ সহায়ত বিভিন্ন জাতৰ ছাগলী আনিলোঁ। তেওঁ ৰেলযোগে বঙাইগাঁও ষ্টেচনলৈ পঠিয়াই দিয়ে। মই তাৰপৰা ঘৰলৈ আনোঁ। এতিয়া পোৱালি আমাৰ পামতেই জন্ম হয়’। ছাগলী পালনৰ কোনো আনুষ্ঠানিক প্ৰশিক্ষণ নোলোৱা কলিতাই সকলো শিকিছে ব্যৱহাৰিক অভিজ্ঞতাৰ আধাৰত। ছাগলী পালনেৰে দুটা পৰিয়াল সুন্দৰভাৱে চলোৱা কলিতাক লগ পাইছিলোঁ তেওঁৰ ঘটবৰৰ পামত। কলিতাই দিয়া হিচাপ মতে, মাহেকত প্ৰায় ৭০টা ছাগলীৰ খাদ্যত(মাকৈ, খুদি, চাপৰ, মিনাৰেল পাউদাৰ) তেওঁৰ ২০ হাজাৰ টকা ব্যয় হয়। অন্য আনুষংগিক ব্যয়ো আছে। চৰকাৰী সাহায্য পালে পামখন ডাঙৰ কৰাৰ মন আছে আটাইকেইজনৰ। প্ৰথমতে গো-পালন কৰাৰ মন আছিল যদিও পৰ্যাপ্ত ধনৰ অভাৱত সেয়া হৈ নুঠিল। জাতভেদে মূখ্যতঃ তিনিমহীয়া পোৱালি বিক্ৰী কৰা পামখনে সম্প্ৰতি বছৰেকত প্ৰায় ২০০টা পোৱালি বিক্ৰী কৰিব পাৰে। পিছে চাহিদা অনুযায়ী যোগান ধৰিব নোৱাৰা বাবে বহু লোক উভতি যায়। অইনক লাভজনক এই বৃত্তি ল’বলৈ তেওঁ আহ্বান জনাইছে।

লেখক: অৰূপ শাণ্ডিল্য(দৈনিক অসম)

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate