ফ্ৰেঞ্চবিন

ফ্ৰেঞ্চবিন এবিধ প্ৰ’টিন,ভিটামিনযুক্ত উৎকৃষ্ট পাচলি।নিৰামিষভোজীসকলৰ অতি উপাদেয় এইবিধ পাচলিৰ খেতিৰ বাবে অসমৰ মাটি আৰু জলবায়ু উৎকৃষ্ট।মাৰ্চ মাহলৈ কৰিব পৰা এইবিধ খেতিৰ কৃষি পদ্ধতি চমুকৈ এনেধৰণৰ-

মাটি:পানী ওলাই যোৱাৰ সু-ব্যৱস্থা থকা,৫.৫ ৰ পৰা ৬.০ লৈতে অম্লতা থকা বালিচহীয়া পলসুৱা মাটি নিৰ্বাচন কৰিব লাগে।

মাটি-প্ৰস্তুতি:মাটিডৰা ৩-৪ বাৰ হাল বাই মৈয়াই মিহিকৈ চাহ কৰি ল’ব লাগে।

জাত:পুছা পাৰ্বতী,কনটেণ্ডাৰ,ইউ পি এফ-২০৩,ইউ পি এফ ১৯১ আৰু প্ৰিমিয়াৰ।জাতবোৰৰ বৈশিষ্ট্য হৈছে এনেধৰণৰ-

(১)কনটেণ্ডাৰ:জোপোহা,৫০ দিনতে খেতি চপাব পৰা হয়।ছেইবোৰ ঘুৰণীয়া,সেউজীয়া আৰু দীঘল।আগটো বেঁকা,ডাঠ মঙহাল আৰু আঁহ নথকা।উৎপাদন অধিক।প্ৰতি হেক্টৰত ১৬০ কুইণ্টল সেউজীয়া ছেই।

(২)পুছা পাৰ্বতী:জোপোহা,ছেইবোৰ পাতল সেউজীয়া ৰঙৰ আৰু ঘুৰণীয়া।আগতীয়া জাত।উৎপাদন হেক্টৰে প্ৰতি ১৭৯ কুইণ্টল সেউজীয়া ছাই।

বীজ সিঁচাৰ সময়:অক্টোবৰ মাহৰ পৰা মাৰ্চ মাহলৈ।

বীজৰ পৰিমাণ:বিঘাই প্ৰতি ৭.৫ কিলোগ্ৰাম।

বীজ শোধন:প্ৰতি কিলো বীজ ৩ গ্ৰাম কেপটাফ বা ষ্ট্ৰেপটোমাইচিন ছালফেট ২.৫ গ্ৰাম ঔষধ-এই পৰিমাণত মহিলাই বীজবোৰ শোধন কৰিব লাগে।

সাৰ প্ৰয়োগ:বিঘাই প্ৰতি ১০ কুইণ্টল পচন সাৰ,লগতে ইউৰীয়া সাৰ ৬ কিলোগ্ৰাম,ছুপাৰ ফছফেট ৩৩ কিলোগ্ৰাম আৰু মি: অ: পটাছ ৩ কিলোগ্ৰামৰ প্ৰয়োজন।ইয়াৰে ইউৰীয়া সাৰৰ আধা ৰাখি সমুদায় সাৰ মাটি চাহ কৰা সময়তে প্ৰয়োগ কৰিব লাগে।বাকী থকা ইউৰীয়া সাৰখিনি ফুল ধৰাৰ সময়ত টপদ্ৰেছ হিচাপে ব্যৱহাৰ কৰিব লাগে।

ব্যৱধান:শাৰীৰ পৰা ৪৫ ছেণ্টিমিটাৰ আৰু গছৰ পৰা গছৰ দুৰত্ব ৩০ চেণ্টিমিটাৰ হ’ব লাগে।

জলসিঞ্চন:শস্য বাঢ়ন অৱস্থাত,ফুল ধৰা সময়ত আৰু ছেই ডাঙৰ হৈ অহা সময়ত পানী যোগান ধৰিব লাগে,যাতে মাটিত আদ্ৰতা অটুট থাকে।

বনবাত নিৰোৱা:সিঁচাৰ ২৫-৩০ দিন পিছত এবাৰ বন-বাত নিৰাই দিব লাগে।

শস্য ৰক্ষা:মোৱা পোক,ফুটিপোক নিয়ন্ত্ৰণৰ বাবে শতত্ৰা ০.১৫ ভাগ শক্তিৰ মালাথিয়ন ৫০ ই চি ঔষধ (১ লিটাৰ পানীত ১.৫ মিলিলিটাৰ ঔষধ)স্প্ৰে কৰিব লাগে।লিফ স্নট ৰোগৰ বাবে মেনকোজেব ৭৫ ঔষধ ২ গ্ৰাম*১ লিটাৰ পানী এই পৰিমাণত ১৫ দিনৰ ব্যৱধানত দুবাৰ প্ৰয়োগ কৰিব লাগে।

চপোৱা:ফুল ফুলাৰ ২-৩ সপ্তাহ পিছত ছেইবোৰ চিঙিব পৰা হয়।

উৎপাদন:প্ৰতি হেক্টৰত ৮০-১২০ কুইণ্টল সেউজীয়া ছেই।

লেখক:প্ৰবোধ চন্দ্ৰ শৰ্মা (দৈনিক অসম)