অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

শালিধান চপোৱাৰ পিচতে জি’ৰ টিলেজ পদ্ধতিৰে ঘেঁহু খেতি

শালিধান চপোৱাৰ পিচতে জি’ৰ টিলেজ পদ্ধতিৰে ঘেঁহু খেতি

মাটি চহ নকৰাকৈ জিৰ’ টিল চীড-কাম-ফাৰ্টিলাইজাৰ-ড্ৰিল মেচিনৰ সহায়ত পোনপটীয়াকৈ শস্যৰ বীজ সিঁচাকে “জিৰ’টিলেজ” বা “বিনা চহে” কৰা খেতি বোলা হয়| গৱেষনাৰ পৰা দেখা গৈছে যে অসমত ঘেঁহু খেতিৰ বীজ যদি নৱেম্বৰৰ ২৫ তাৰিখৰ পিছত সিঁচা হয় তেনেহ’লে প্ৰতিদিনে প্ৰতি হেক্ট্‌ৰ কৃষি ভূমিত ৩০ কিলোগ্ৰামকৈ উৎপাদন হ্ৰাস পায়| খেতিডৰা চপাবৰ সময়ত মাৰ্চ মাহত অহা আগতীয়া বৰষুণ শস্যডৰাৰ বাবে বৰ অনিষ্টকাৰক |

জিৰ’ টিলেজ পদ্ধতিত কৰা ঘেঁহু খেতি সময়মতে কৰিব পাৰি বাবে এই উৎপাদান হ্ৰাস যঠেষ্টখিনি কমাব পৰা যায়| তদুপৰি ইয়াৰ দ্বাৰা মাটি চাহ কৰোতে হোৱা ব্যয়ো হ্ৰাস কৰিব পাৰি|

জিৰ’টিলেজ কেনেদৰে কৰা হয়?

ধান খেতি চপোৱাৰ কেইদিনমান আগেয়ে জলসিঞ্চন কৰা হয়| ইয়াৰ পিছত ধানডৰা যিমান পাৰি গুৰিতে কাটি ট্ৰেক্টৰচালিত জিৰ’ টিলেজ মেচিনৰ সহায়ত ঘেঁহু বীজ সিঁচা হয়| এই পদ্ধতিৰে ঘেঁহু খেতি কৰিলে বীজ সিঁচাৰ সময় কিছুদিন আগুৱাব পাৰি কিয়নো এই পদ্ধতিত মাটি প্ৰস্তুতিৰে সময়খিনি ৰাহি হয়|

জিৰ’টিলেজ ক’ত কৰা হয়?

শালিধানৰ দীৰ্ঘকালীন জাতৰ খেতি কৰা বাবে যিবোৰ অঞ্চলত বীজ সিঁচা কাৰ্য ২৫ নৱেম্বৰতকৈ পিছুৱাই যায় তেনেবোৰ অঞ্চলত জিৰ’টিলেজ পদ্ধতিৰে ঘেঁহু খেতি কৰিব পাৰি| এই মেচিন খুউৱ বেছি বোকা আলতীয়া মাটিৰ বাহিৰে আন সকলো ধৰণৰ মাটিতে ব্যৱহাৰ কৰিব পাৰি|

জিৰ’টিলেজৰ উপযোগিতা সমূহ:

১)ই এটা লাভজনক পদ্ধতি যিহেতু এই পদ্ধতিত ইন্ধন্‌, শ্ৰম আৰু সময় ৰাহি হয়| মাটি প্ৰস্তুতিৰ বাবে প্ৰয়োজন হোৱা খৰচ বিঘাই প্ৰতি প্ৰায় ৫০০-৭৫০ টকাকৈ ৰাহি কৰিব পাৰি|

২) এই পদ্ধতিত যিহেতু মাটি প্ৰস্তুতিৰ প্ৰয়োজন নহয় সেইবাবে ৮-১০ দিন আগতিয়াকৈ ঘেঁহু বীজ সিঁচিব পৰা যায়| ইয়াৰ ফলসৰূপে খেতিডৰা বৰষুণৰ আগেয়ে চপাব পৰা যায়|

৩)শস্যৰ বীজ আৰু ৰাসয়নিক সাৰ একেলগে সিঁচিব পৰা যায়,ফলত বনুৱাৰ মজুৰীৰ খৰচ কমে|

৪)মাটি চাহ নকৰাৰ বাবে খেতিডৰাত বন-বাতৰ সমস্যা কম হয়|

৫)শাৰী শাৰীকৈ ঘেঁহু বীজ সিঁচিব পৰা যায় আৰু সেইবাবে উৎপাদন যঠেষ্ট ভাল হয়|

জিৰ’টিলেজ পদ্ধতিৰে কৰা ঘেঁহু খেতিৰ জাতসমূহ

অসমৰ বাবে অনুমোদিত সকলোবিধ জাতৰেই খেতি এই পদ্ধতিৰে কৰিব পাৰি|ইয়াৰ উপৰিও কে ০৩০৭, কে ১০০৬, এইচ ডি ২৯৬৭ আদি জাতৰ খেতি এই পদ্ধতিৰে কৰিলে ভাল উৎপাদন পোৱা যায়|

বীজৰ পৰিমাণ

এই পদ্ধতিৰে খেতি কৰিলে মাটি চাহ কৰি কৰা সৰ্বসাধাৰণ খেতিতকৈ শতকৰা ২৫ ভাগ বেছি বীজৰ প্ৰয়োজন হয়| সেই অনুপাতে বিঘাই প্ৰতি ১৭-২০ কিলোগ্ৰাম বীজৰ আৱশ্যক হয়|

সাৰ প্ৰয়োগ

বিঘাই প্ৰতি ২০ কিলোগ্ৰাম ইউৰীয়া, ৪০ কিলোগ্ৰাম একক চুপাৰ ফচ্‌ফেট্‌,১০ কিলোগ্ৰাম মিউৰিয়েট অব্‌ পটাচ্‌ আৰু ১ কিলোগ্ৰাম ব’ৰাক্স সাৰ প্ৰয়োগ কৰিব লাগে| ইয়াৰে ইউৰীয়াৰ বাদে বাকীখিনি সাৰ মেচিনত একেলগে ভৰাই প্ৰ্য়োগ কৰিব পাৰি| ইউৰীয়াখিনি সমানে দুভাগ কৰি এভাগ বীজ সিঁচাৰ আগয়ে মাটিত প্ৰয়োগ কৰি বাকীভাগ ২০-২৫ দিনৰ পিছত টপ ড্ৰেচিং কৰিব লাগে|

নিৰনি আৰু প্ৰতিপালন

বীজ সিঁচাৰ ২৫-৩০ দিন পিছত পুলিবোৰ নিৰাই দিব লাগে| প্ৰয়োজন হ’লে প্ৰথমবাৰ নিৰাই দিয়াৰ ২০-২৫ দিন পিছত দ্বিতীয়বাৰ নিৰনি কৰিব লাগে| বনবাত বোৰ ৪-৫ পতীয়া হওঁতেই নিৰাই দিব লাগে|

সাধাৰণ নিৰ্দেশনাসমূহ:

১) ধান খেতিডৰা যিমান পাৰি সিমান ভূমিৰে সমানকৈ কাটিব লাগে যাতে নৰাবোৰৰ উচ্চতা ১৫ চে:মি:ৰ বেছি নহয়|

২) বীজ সিঁচা মেচিনটো মূল পথাৰত চলোৱাৰ আগেয়ে পৃথকে পৃথকে বীজ আৰু সাৰ অনুমোদিত পৰিমাণত পৰাকৈ মিলাই ল’ব লাগে|

৩)বীজবোৰ ৫-৭ চে:মি: তকৈ বেছি গভীৰতাত সিঁচিব নালাগে|

৪)দানাকাৰ ৰাসায়নিক সাৰহে ব্যৱহাৰ কৰিব লাগে অন্যথা সাৰ প্ৰয়োগত বাধা উপজিব পাৰে|

৫)বীজ সিঁচাৰ ১৫-২০ দিনৰ পিছত প্ৰথমবাৰ পানী দিব লাগে|

৬)মেচিনতো চলাই থকা সময়ত বীজ আৰু সাৰৰ নলীবোৰ ভালদৰে নিৰীক্ষণ কৰিব লাগে যাতে নলীসমূহ বন্ধ হৈ নাযায়|

৭)বীজ সিঁচাৰ পিছত সীৰলুসমূহত কিছুমান বীজ ওলাই থাকিলেও তেনে বীজ সময়ত গজি উঠে|

লেখক:  ড° তুলসী প্ৰসাদ শইকীয়া

প্ৰধান বিজ্ঞানী(শস্য বিজ্ঞান)

অনুষ্ঠান: আঞ্চলিক কৃষি গৱেষণা কেন্দ্ৰ,অসম কৃষি বিশ্ববিদ্যালয়

চিলঙনী,নগাঁও-৭৮২০০২,অসম



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate