ধানখেতিত চৰহা পোক নামৰ ক’লা ৰঙৰ কাঁইটীয়া গুৱৰুৱা জাতীয় কীটৰ মাৰাত্মক উপদ্ৰৱৰ ফলত অসমত প্ৰতি বছৰে এক বুজন পৰিমাণৰ উৎপাদন হ্ৰাস হৈছে৷ এই বিধংশীকাৰী পোকটোৰ সমগ্ৰ অংশ কাঁইটেৰে ভৰা৷ ইয়াৰ পলু আৰু প্ৰাপ্তবয়স্ক পোকবোৰে সাধাৰণতে কঠীয়া বা কোমল ধান গছৰ পাতবিলাক সেউজীয়া অংশ বিশেষ খাই নষ্ট কৰে৷ পলুবিলাক পাতৰ ভিতৰতেই ডাঙৰ হৈ লেটা বান্ধে৷ কণীৰ পৰা পূৰ্ণাঙ্গ অৱস্হা পাবলৈ ক্ৰমেও তিনিৰ পৰা পাঁচ সপ্তাহ সময় লাগে৷ এই হিচাবত প্ৰতিটো খেতিৰ বতৰত দুটা বা চাৰিটাকৈ বংশ বৃদ্ধি হ’ব পাৰে ৷ ধাননি পথাৰ মাৰাত্মক ভাবে আক্ৰমিত হ’লে পথাৰবোৰ বগা পৰি জ্বলি যোৱাৰ দৰে হয়৷
পলু আৰু গুৱৰুৱা বিলাক অতি সহজে এখন পথাৰৰ পৰা আন এখনলৈ বিয়পি পৰে ৷ কম বেছি পৰিমাণে সকলো ধানৰ জাতকে এই পোকে আক্ৰমণ কৰে৷ সেয়ে এখন পথাৰত চৰহা পোকৰ আক্ৰমণ দেখাৰ লগে লগে সমীপবৰ্ত্তী সকলো পথাৰতে নিবাৰণমূলক ব্যৱস্হা গ্ৰহণ কৰিব লাগে৷ বিশেষ মন কৰিবলগীয়া যে এই পোকে ঘাঁহজাতীয় উৰি দল, বিনয়, ববছা আদি বিভিন্ন ঘাঁহবিলাকত বংশ বৃদ্ধি কৰি সিহঁতক বংশক্ৰম ৰক্ষা কৰিব পাৰে৷ সাধাৰণতে ফাগুণ (ফেব্ৰুৱাৰী – মাৰ্চ) মাহত উল্লেখিত ঘাঁহবিলাকত প্ৰথমে চৰহা পোকবোৰে বংশ বৃদ্ধি কৰি ক্ৰমাম্বয়ে ধাননি পথাৰলৈ বিয়পি পৰে৷
(১)চৰহা পোকৰ দ্বাৰা আক্ৰান্ত পথাৰবিলাকৰ নৰা বিলাক পুৰি বা অন্য উপায়েৰে নষ্ট কৰিব লাগে, কিয়নো ধানৰ মূঢ়া নাইবা শিপাত চৰহা পোকৰ পূৰ্ণাঙ্গ গুৱৰুৱা বিলাকে শতিকালত অতিবাহিত কৰে ৷ সেয়েহে শালিখেতিৰ পাচত আহুখেতি কৰিলে বিশেষভাৱে আক্ৰান্ত অঞ্চলৰ নৰাবিলাক পুৰি পেলাব লাগে ৷
(২) পথাৰত গহৰা ধানপুলিবোৰ আৰু মুঢ়াৰ পৰা গজা পুলিবোৰ নষ্ট কৰিবৰ বাবে বহাগ বিহুৰ পাচৰ পৰাই মাটি দ’কৈ চহাব লাগে৷ ইয়াৰ ফলত চৰহা পোকৰ খাদ্যৰ অভাবহৈ বংশ বৃদ্ধিত বাধাগ্ৰস্ত হয় ৷
(৩) চৰহা পোক বিলাকে বছৰত ধান নথকা সময়ছোৱাত দলনি আৰু পিতনিত থকা দল, উৰিদল, বাহঁপতীয়া আদি ঘাঁহবিলাকত ফেব্ৰুৱাৰী – এপ্ৰিললৈ (মাঘ মাহৰ পৰা বহাগলৈ) বংশ বৃদ্ধি কৰে ৷ এনে ধৰণৰ ঘাঁহবিলাক ৰ্মাচ মাহৰ ভিতৰত নষ্ট কৰিব লাগে৷
(৪) কঠীয়া তোলাৰ ৫-৭ দিনমান আগতে কাৰ্বফুৰন ৩-জি কঠীয়া তলীৰ প্ৰতি বৰ্গ মিটাৰত ৩ গ্ৰামকৈ ছতিয়াব লাগে ৷ ইয়াৰ লগতে তলী ডৰা জীপাই ৰখাৰ ব্যৱস্হা লব লাগে ৷ এনে ব্যৱস্থা গ্ৰহণ কৰিলে ধানৰ কঠীয়া বিলাক ২০-২৫ দিন পৰ্য্যন্ত প্ৰাৰম্ভিক কীট-পতঙ্গৰ আক্ৰমণৰ পৰা ৰক্ষা পৰিব ৷
(৫) পৰাপক্ষত ব্যাপক অঞ্চলত চৰহা প্ৰতিৰোধী ধানৰ জাত ব্যৱহাৰ কৰিব লাগে ৷ মনোহৰ শালি, গুবিন্দ, বৰো-১, গেৰেম শালি আদি জাতৰ কিছু পৰিমাণে চৰহাৰ আক্ৰমণ প্ৰতিৰোধ কৰাৰ ক্ষমতা আছে ৷
(৬) ৰোৱাৰ আগতে কঠীয়া বিলাকৰ আগ কাটিব লাগে আৰু এই বিলাক ততালিকে গৰু-মহক খাবলৈ দি বা অন্য উপায়েৰে নষ্ট কৰিব লাগে ৷ কিয়নো চৰহা পোক আৰু অন্যান্য প্ৰায়বিলাক ধানৰ অনিষ্টকাৰী কীট পতঙ্গই পাতৰ আগ অংশত কণী পাৰে ৷
(৭) মাৰাত্মকভাবে চৰহা পোকে আক্ৰমণ কৰা ৰোৱাবিলাকৰ আগ অংশ কাটি নষ্ট কৰিব লাগে ৷ এনেদৰে কটা অংশ পথাৰত কেতিয়াও পেলাব নালাগে ৷ এনে কৰিলে পাতৰ পৰা পলুবোৰ ওলাই গৈ পুনৰ ধান গছত আক্ৰমণ কৰিব পাৰে ৷
(৮) পথৰুৱা আলিত আৰু পথাৰৰ ওচৰে-পাজৰে ও মাজত থকা ঘাঁহজাতীয় সকলোবোৰ বন-বাত আঁতৰাই পৰিষ্কাৰ কৰি ৰাখিব লাগে৷ কাৰণ এনেধৰণৰ সকলোবোৰ বন-বাতেই চৰহা পোকৰ বিকল্প খাদ্য আৰু বংশ বৃদ্ধিৰ স্থল ৷
(৯) কেতবোৰ চৰাই, মকৰা, পতঙ্গভোজী কীট আদিয়ে চৰহা পোক ভক্ষণ কৰি প্ৰাকৃতিক ভাবে চৰহাৰ বংশ নিয়ন্ত্ৰণ কৰি ৰাখে ৷ গতিকে এনে ধৰণৰ পতঙ্গভোজী জীৱ বোৰক উৎসাহিত কৰিব পৰা ব্যৱস্থা কৰিব লাগে ৷
(১০) ঘৰৰ কাষৰ পথাৰবিলাক চৰহা পোকৰ আক্ৰমণ আৰম্ভ হলে লগে লগে হাঁহ চৰিবলৈ দিব লাগে ৷ হাঁহে এই পোক বিলাক খোৱাৰ উপৰিও অন্যান্য অনিষ্টকাৰী কীট-পতঙ্গও ভক্ষণ কৰে ৷
(১১) জৈৱিক নিয়ন্ত্ৰণ উপায় হিচাবে বিউভেৰীয়া বেচিয়ানা নামৰ ভেঁকুৰবিধ চৰহা পোক নিয়ন্ত্ৰণৰ বাবে কামত লগোৱা হৈছে ৷ ইয়াক এক বিশেষ মধ্যমত বংশ বৃদ্ধি কৰা হয় ৷ প্ৰতি ৪০০-৭০০ লিটাৰ পানীত তিনি কিলোগ্ৰাম উক্ত ভেঁকুৰ বাহক মাধ্যমটি মিহলি কৰি প্ৰতি হেক্টৰ মাটিত ছতিয়াব লাগে৷
পথাৰত প্ৰতিজোপা ধান গছত এটাতকৈ অধিক চৰহা পোকৰ পলু বা পূৰ্ণাঙ্গ গুবৰুৱা দেখাৰ লগে লগে তলত উল্লেখ কৰা নিৰিখত কীটনাশক ঔষধ ব্যৱহাৰ কৰিব লাগে৷
দৰবৰ নাম |
দৰবৰ পৰিমাণ প্ৰতি হেক্টৰত |
পানীৰ পৰিমাণ |
|
শক্তিচালিত স্প্ৰেয়াৰ |
হস্তচালিত স্প্ৰেয়াৰ |
||
ফচফামিদন (ডাইমেক্ৰন ১০০ ই চি) |
৬৫০ মি: লি: |
১২৫ লিটাৰ |
৭০০ লিটাৰ |
ক্লৰোপাইৰিফচ (ডাৰ্চবেন ২০ ই চি) |
১০০০ মি:লি: |
১২৫ লিটাৰ |
৭০০ লিটাৰ |
কুইনালফচ (ইকালাক্স ২৫ ই চি) |
১৫০০ মি:লি: |
১২৫ লিটাৰ |
৭০০ লিটাৰ |
ফচালন (জোলন ৩৫ ই চি) |
১৪৫০ মি:লি: |
১২৫ লিটাৰ |
৭০০ লিটাৰ |
ডাইক্লৰ’ভচ (নুভান ১০০ ই চি) |
৫০০ মি:লি: |
১২৫ লিটাৰ |
৭০০ লিটাৰ |
উৎস: অসম কৃষি বিশ্ববিদ্যালয়।
শেহতীয়া উন্নীতকৰণ: : 4/25/2020