অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

শালিধানৰ পথাৰত উপদ্ৰৱ কৰা শুঁৰপোকৰ নিয়ন্ত্ৰণ ব্যৱস্থা

চমু বিৱৰণ

শালিধানৰ খেতিত শুঁৰপোক শ্বাৰমিং কেটাৰপিলাৰ (Swarming caterpillar) ৰ আক্ৰমণ বানপানী শুকুৱাৰ ঠিক পিছতেই আৰম্ভ হোৱা দেখা যায়| বতৰৰ প্ৰভাৱ অনূকুল হ’লে অৰ্থাৎ বানপানীৰ পিছতে কিছুদিন একেৰাহে অনাবৃষ্টি হ’লে এইবিধ পোকৰ উপদ্ৰৱ বাঢ়ি যায়| পথাৰৰ আলি, বঙিয়া আৰু চৌপাশে থকা ঘাঁহ বন বোৰেই শুঁৰপোকৰ আৱিৰ্ভাৱৰ প্ৰধান উৎস| এইবোৰৰ মাজত সোমাই থকা ইহঁতৰ লেটা বোৰক বানৰ পানীয়ে ভিন্‌ ভিন্‌ পথাৰলৈ কঢ়িয়াই নিয়ে আৰু বানপানী শুকুৱাৰ পিছতে লেটাবোৰৰ পৰা মথ্‌বোৰ ওলাই শস্যডৰাৰ মাটিতে কণী পাৰে| ইহঁতে এবাৰত প্ৰায় ৩০০-৫০০ কণী পাৰিব পাৰে| কণী ফুটি ওলোৱা পলুবোৰে ধানগছজোপাৰ পোখাৰ তলফালে সোমাই থাকি পোখা আৰু পাতবোৰ খায়| ডাঙৰ হৈ অহাৰ লগেলগে পলুবোৰৰ খোৱাৰ মাত্ৰা বাঢ়ি যায় আৰু অতি কম সময়ৰ ভিতৰতে একোখন পথাৰ সম্পূৰ্ণৰুপে টকলা কৰি পেলায়| শুঁৰপোকৰ এটা জীৱন চক্ৰ সম্পূৰ্ণ কৰিবলৈ অঞ্চল ভেদে ২৮ ৰ পৰা ৪০ দিন মানৰ প্ৰয়োজন হয়| অৱশ্যে একে সময়তে ওপৰা-ওপৰিকৈ কেইবাটাও জীৱন-চক্ৰ চলি থাকে বাবে ইহঁতৰ জাকৰুৱা আক্ৰমণৰ তীব্ৰতা যথেষ্ট পৰিমাণে বাঢ়ি যায়|

শুঁৰপোকৰ নিয়ন্ত্ৰণৰ ব্যৱস্থা:-

  • আক্ৰান্ত ধাননি পথাৰত কুইনালফছ ২৫ ইচি বা ক্লৰপাইৰিফছ্‌ ২৫ মি:লি:কৈ প্ৰতি লিটাৰ পানীত মিহলাই সমূহীয়াকৈ স্প্ৰে কৰক|
  • একে সময়তে পথাৰৰ আলি, বঙিয়া আৰু চৌ-পাশৰ ঘাঁহ বন বোৰতো স্প্ৰে কৰক বা মালাথিয়ন ৫% পাউদাৰ চটিয়াওক|
  • পথাৰৰ পৰিসীমাৰ পৰা ভিতৰফালে স্প্ৰে কৰিলে অধিক সুফল পোৱা যায়|

শুঁৰপোকৰ নিয়ন্ত্ৰণৰ ক্ষেত্ৰত কেইটামান অতি প্ৰয়োজনীয় কৃষি দিহা:-

  • বানপানী শুকুৱাৰ পিছৰ পৰাই ধাননি পথাৰ খন নিয়মিত পৰিদৰ্শন কৰক|
  • কঠীয়া ৰোৱাৰ ঠিক পিছতে পতংগভোজী চৰাইবোৰ (কেঁচু, শালিকা, দহিকতৰা,  হেঁতুলুকা বগলী আদি) পথাৰত পৰিব পৰাকৈ বাঁহৰ জেং (বিঘাই প্ৰতি ৫টা) পোওক|
  • পথাৰ প্ৰস্তুতিৰ সময়ত আলি আৰু বঙিয়া বোৰত গজা বন-বাতবোৰ নিৰাই দি বোকা মাটিৰে লেপি দিয়ক যাতে শুঁৰপোকৰ উৎস বোৰ নষ্ট হৈ যায়|
  • নিয়ন্ত্ৰণৰ ব্যৱস্থা সমুহ সদায় সমূহীয়াকৈ আৰু খৰখেদাকৈ কৰিবলৈ যত্ন কৰক|

লেখকৰ নামসমুহ:- ড° বিৰিঞ্চি কুমাৰ বৰা

ড° কল্যাণ কুমাৰ শৰ্মা

ড° তুলসী প্ৰসাদ শইকীয়া

আ:কৃ:গ:কে:, চিলঙনী, নগাঁও

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate