অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

গাজৰ, মূলা, পালেংশাক আৰু ধনীয়া শাকৰ পৰিচৰ্যা

গাজৰ, মূলা, পালেংশাক আৰু ধনীয়া শাকৰ পৰিচৰ্যা

গাজৰৰ খেতি

খেতি আৰু প্ৰণালী

গাজৰৰ বীজ অক্টোবৰ/নবেম্বৰ মাহত সিঁচা হয়৷ গাজৰৰ বীজবোৰ অঙ্কুৰণ হওঁতে পলম হয় বাবে বীজ সিঁচাৰ আগতে ভালদৰে হাতেৰে মোহাৰি পানীত তিয়াই থব লাগে৷ পিছত পানীৰ পৰা টুকি ছাঁত শুকুৱাই অলপ কেপ্টাফ পাউদাৰ (৩ গ্ৰাম প্ৰতি কিলোগ্ৰাম বীজৰ লগত) মিহলাই লব লাগে৷ প্ৰটি বিঘা মাটিৰ বাবে ৭৫০-৮০০ গ্ৰাম বীজ প্ৰয়োজন হয়৷ বীজবোৰ সিঁচোতে চাব লাগে যাতে মাটিডৰা একেবাৰে শুকান নহয়৷ যদি মাটিডৰা শুকান হয় তেন্তে বীজ সিঁচাৰ আগতে অলপ পানী ছটিয়াই লব লাগে৷ বীজবোৰ ৩০ চে: মি: শাৰী পাতি ১.৫ চে: মি: দকৈ পাতলীয়াকৈ সিঁচিব লাগে৷ ৮-১০ দিন মানৰ পিচত বীজবোৰ গজিবলৈ আৰম্ভ কৰে ৷ মাটিডৰাত জীপ নাথাকিলে জিঞ্জিৰিৰে পানী ছটিয়াব লাগে৷

পৰিচর্যা

পুলি গজাৰ ১০-১৫ দিনৰ মূৰত দুটা পুলিৰ মাজত ১০ চে: মি: ব্যৱধানত ৰাখি বাকি থকা পুলিবোৰ উভালি পেলাব লাগে যাতে পুলিবোৰৰ শিপাবোৰ ভালকৈ বাঢ়িব পাৰে৷  বীজ সিঁচাৰ এমাহৰ পিচত বাকি থকা নাইট্ৰোজেন সাৰ, শুকান গোবৰ বা পচন সাৰৰ লগত মিহলাই মাটিত প্ৰয়াগ কৰিব লাগে৷ সময়ে সময়ে অলাগতীয়াল বন-বাতবোৰ আঁতৰাই পেলাব লাগে৷

শস্যৰক্ষা

গুৰিকটা পোকে গছডৰা আক্ৰমণ কৰিলে মালাথিয়ন ৫% পাউদাৰ ছটিয়াই দিব লাগে৷ মাটিডৰাত নিমাটোডৰ সমস্যা থাকিলে গুটি সিঁচাৰ আগতে ফুৰাডনৰ দানা ২ গ্ৰাম প্ৰতি বৰ্গ মিটাৰ মাটিত মিহলাই লব লাগে নতুবা মাটি চহাওঁতে নিমৰ খলিহৈ প্ৰয়োগ কৰিব লাগে৷ গাজৰৰ পাতবোৰ গেলি যোৱা দেখিলে ইনন্দোফিল এম-৪৫ নামৰ ঔষধ আধা লিটাৰ পানীৰ লগত মিহলাই স্প্ৰে কৰিব লাগে৷ জাত অনুসৰি ৯০-১০০ দিনত গাজৰ উভালি খাব পৰা হয়৷

মূলা খেতি

মূলা আন এবিধ শিপা জাতীয় পাচলি৷ এইবিধ পাচলিত ভিটামিন ‘চি’ যথেষ্ট পৰিমাণে পোৱা যায়৷ মূলাখেতি বছৰৰ বিভিন্ন সময়ত কৰিব পাৰি৷ কিন্তু বেলেগ বেলেগ সময়ত কৰিবলৈ বেলেগ বেলেগ জাত আছে৷

গাজৰৰৰ খেতিৰ দৰে মূলা খেতিৰ বাবেও পলসুৱা বালিচঁহীয়া মাটি উপযোগী৷ আগতীয়া সঁচৰ মূলাবোৰ হৈছে পুছা দেচি, পুচা চেত্কী, পুচা হিমানী৷ এই সঁচৰ গুটিবোৰ অক্টোবৰ নৱেম্বৰ মাহত সিঁচিব পাৰি৷

খেতি কৰাৰ প্ৰণালী

মূলা খেতিৰ বাবে বিঘাই প্ৰতি ৮০০ গ্ৰাম মান বীজ আৱশ্যক হয়৷ মূলা সমান মাটিত সিঁচিবলৈ হ’লে ২০ ছে: মি: ব্যৱধানত শাৰী পাতি নতুবা ৪৫ চে: মি: ব্যৱধানত মাটি ঢিপ কৰি সিঁচা হয়৷

পৰিচৰ্যা

মূলাখেতি কৰাৰ আগতে মাটিডৰা ভালদৰে চহাই ল'ব লাগে আৰু নিমাতোডৰ সমস্যা থকা মাটিত গাজৰৰ খেতিত উল্লেখ কৰাৰ দৰে ফুৰাদন নাইবা নিমৰ খলিহৈ প্ৰয়োগ কৰিব লাগে৷

পুলিবোৰ গজাৰ পিছত দুটা পুলিৰ মাজত ১০ ছে: মি: ব্যৱধান ৰাখি মাজৰ পুলিবোৰ উঠাই দিব লাগে যাতে মূলাবোৰৰ বাঢ়ণ প্ৰক্ৰিয়াত সহায় হয়৷ বীজ সিঁচাৰ এমাহ মানৰ পিচত বাকি থকা ইউৰীয়া খিনি পুলিৰ শাৰীৰ মাজত ছটিয়াই দি কোৰেৰে পাতলীয়াকৈ মিহলাই দিব লাগে৷ কোমল সতেজ মূলা পাবলৈ হ’লে মাটিডৰাত সদাই জীপ থাকিব লাগে৷ মূলা ডৰাৰ পৰা বীজ সিঁচাৰ ২০ দিন মানৰ পিচত বন-বাতবোৰ আঁতৰাই পেলাব লাগে৷ মোৱা পোকে কেতিয়াবা মূলা খেতিত অনিষ্ট কৰা দেখা যায়৷ এই ক্ষেত্ৰত মালাথিয়ন ৫০ ইচি ২ মি: লি: প্ৰতি লিটাৰ পানীত মিহলাই স্প্ৰে কৰিব লাগে৷

পালেংশাকৰ খেতি

পলেংশাক আমাৰ সকলোৰে প্ৰিয়৷ এই বিধ শাকত যঠেষ্ট পৰিমাণে ভিটামিন ‘এ’ আৰু ‘চি’ পোৱা যায়৷ ওখ, ৰ’দ পৰা, বালিচঁহীয়া সাৰুৱা মাটি এই খেতিৰ বাবে উপযোগী৷ বীজ সিঁচাৰ আগতে মাটিডৰা ভালদৰে চহাই সমান কৰি ল’ব লাগে৷ পলেংশাকৰ উন্নত জাতবোৰৰ ভিতৰত অলগ্ৰনি, পুচাজ্যোতি, বেনাৰ্জী, জায়েন্ত, জবনাৰ গ্ৰীন উল্লেখযোগ্য৷

খেতি কৰা প্ৰণালী

পালেংশাকৰ খেতি কৰিবৰ বাবে বিঘাই প্ৰতি ২.৫-৩ কি: গ্ৰাম বীজৰ প্ৰয়োজন হয়৷ বীজখিনি ভালদৰে অঙ্কুৰণ হ’বলৈ এৰাতি পনীত তিয়াই থৈ পাচদিনা পানীৰ পৰা টুকি ছাঁত শুকুৱাই মাটিত ছটিয়াই দিব লাগে৷ বীজখিনি ছটিওৱাৰ আগতে ৩ গ্ৰাম কেপ্টাফ পাউদাৰ প্ৰতি কে জি বীজৰ অনুপাতত মিহলাই সিঁচি দিব লাগে৷ পালেংশাকৰ বীজ মাটিত ছটিয়াই নতুবা শাৰী-শাৰীকৈ ছটিয়াব লাগে৷ এই ক্ষেত্ৰত দুশাৰীৰ মাজত ৫-৭ চে: মি: দূৰত্ব ৰাখিব লাগে৷ বীজ সিঁচাৰ ১৫-২০ দিন মানৰ পিছত বন-বাতবোৰ মটিডৰাৰ পৰা আঁতৰাই পেলাব লাগে৷

খাবৰ বাবে পালেংশাকৰ গছবোৰ এবাৰতে উভালি নেপেলাই ১৫-২০ দিনৰ মূৰে মূৰে কাষৰ ডাঙৰ পাতবোৰ চোকা কটৰী এখনেৰে কাটি যাব পাৰি৷ এনে কৰিলে এজোপা গছৰ পৰা কমেও ৩-৪ বাৰ পাত চিঙিব পাৰি৷ এই ক্ষেত্ৰত প্ৰতিবাৰ পাত চিঙাৰ পিচত এচামোচ ইউৰীয়া ৫ লিটাৰ পানীত মিহলাই জলসিঞ্চন কৰিলে পাতৰ বাঢ়ন শক্তি বৃদ্ধি পায়৷

ধনীয়াৰ খেতি

ধনীয়া আমাৰ সকলোৰে প্ৰিয় শাক৷ শুকান ধনীয়াৰ গুড়িবোৰ মছলা হিচাপে ব্যৱহাৰ কৰা হয়৷ ধনীয়াৰ কোমল পাতবোৰ ভাজি-তৰকাৰীৰ লগত ব্যৱহাৰ কৰিলে খাবলৈ সোৱাদ হয়৷ ধনীয়াৰ পাতবোৰ চাটনি কৰ খাবলৈকো ভাল৷

ধনীয়া খেতি যিকোনো ধৰণৰ যেনে বালিয়া, আলতীয়া ইত্যাদি মাটিত কৰিব পাৰি ৷ কিন্ত এনে মাটিত যথেষ্ট জৈৱিক পদাৰ্থ থাকিব লাগে, ওখ চানেকিয়া আৰু ৰ’দ পা হোৱাৰ উচিত৷  বীজ সিঁচাৰ আগতে মটিডৰা ভালদৰে চহাই লৈ সমান কৰি লব লাগে ৷ এই পুথিত উল্লেখ কৰা অনুসৰি বীজ সিঁচাৰ ৪-৫ দিন মানৰ আগতে পচন সাৰ নতুবা শুকান গোবৰ আৰু ৰাসায়নিক সাৰ প্ৰয়োগ কৰিব লাগে৷ অসমত অক্টোবৰ আৰু নৱেম্বৰ মাহত বীজ সিঁচা হয়৷

পৰিচৰ্যা

ধনীয়াৰ বীজবোৰ অঙ্কুৰণ হওঁতে পলম হয়৷ গোটা ধনীয়াৰ বীজবোৰ হাতৰ তলুৱাৰে মোহাৰী দুফাল কৰি কুহুমীয়া পানীত তিয়াই থব লাগে৷ পাতল ওপঙি বীজবোৰ অঙ্কুৰণ নহয়, সেইবাবে এইবোৰ বীজ আঁতৰাই পেলাব লাগে৷ পিচদিনা বীজবোৰ পানীৰ পৰা টুকি কাপোৰ এখনেৰে বান্ধি মাটিৰ তলত ২৪ ঘন্টা মান পুতি থব লাগে৷ পিচত বীজখিনি মাটিৰ পৰা মাটিৰ পৰা উলিয়াই কেপটাফ পাউদাৰে শোধন কৰি মাটিডৰাত চটিয়াই দিয়া হয়৷

বীজবোৰ পোনে পোনে নচটিয়াই শাৰী-শাৰীকৈ ছটিয়াব পাৰি৷ এই ক্ষেত্ৰত শাৰীৰ মাজৰ দূৰত্ব ৫-৭ চে: মি: হোৱাৰ উচিত৷ ধনীয়া খেতিৰ মাজত হোৱা বন বাতবোৰ সময়ে সময়ে আঁতৰাই ৰাখিব লাগে৷ ধনীয়া সিঁচা মাটিডৰাত যথেষ্ট পৰিমাণে জীপ থকা উচিত৷ সেইবাবে মাজে মাজে জলসিঞ্চন কৰিব লাগে৷ ধনীয়াৰ পাতবোৰ মাজে মাজে বগা পাউদাৰ দৰে বেমাৰ হেজাৱা দেখা যায়৷ এনে বেমাৰ হলে ৱেটৱল ছালফাৰ  জাতীয় ঔষধ যেনে হেক্সচুল, থিয়ডেট্ আদি বিঘাই প্ৰতি ২৫০ গ্ৰাম মানকৈ ছটিয়াব লাগে৷

গুটি মছলাৰ বাবে ধনীয়া খেতিত বীজবোৰ পুৰঠ হৈ শুকাবলৈ ধৰোতে গছজোপাৰ সৈতে উভালি আনি শুকাবলৈ দি পিচত গুটিবোৰ পৃথক কৰিব লাগে৷

উৎস: অসম কৃষি বিশ্ববিদ্যালয়।


© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate