অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

অসমত স্বনিয়োজনৰ বাটত সৃষ্টিৰুপম বনছাই শিল্প

অসমত স্বনিয়োজনৰ বাটত সৃষ্টিৰুপম বনছাই শিল্প

 

ফুল, ফল আৰু শাক-পাচলিৰ ৰপ্তানিৰ ক্ষেত্ৰত বিশ্বত ভাৰতবৰ্ষৰ স্থান চীনৰ পিছতে। এনেবোৰ ক্ষেত্ৰত অনাগত দিনত অকল্পনীয় প্ৰসাৰৰ আশা কৰিব পাৰি। একমাত্ৰ ফুলৰ ব্যৱসায়ৰ ক্ষেত্ৰতেই বছৰেকীয়া ঘৰুৱা চাহিদা পঁচিছ শতাংশ হাৰত বৃদ্ধি পাইছে আৰু আন্তঃৰাষ্ট্ৰীয় বজাৰত ইয়াৰ চাহিদা প্ৰায় নব্বৈ হাজাৰ কোটি টকাৰ ওপৰত। সামগ্ৰিক জৈৱ বৈচিত্ৰ্য, বিভিন্ন প্ৰকাৰৰ বতৰ, বৈচিত্ৰ্যময় জীৱনশৈলীৰ প্ৰয়োভৰ থকা ভাৰতবৰ্ষত নতুন শিল্প হিচাপে পুষ্প উদ্যোগ আৰ্থিক উন্নতিৰ দিশত বিশেষ সহায়ক হ’ব পাৰিছে।

অসমৰ পৰিবেশত বনছাই শিল্প

 

দেশে – বিদেশে অত্যন্ত চাহিদা থকা অন্যতম সজীৱ পৰিশীলিত পুষ্প কলা হ’ল বনছাই। অসমৰ নাতিশীতোষ্ণ পৰিৱেশ এই শিল্পৰ বাবে অতি অনুকূল। তুলনামূলকভাৱে কম পৰিসৰতে, কম মূলধনেৰেই এই শিল্প চৰ্চা কৰিব পাৰি। প্ৰকৃতিৰ প্ৰতি আন্তৰিকতা থকা, সৃষ্টিশীল একোটা মনৰ গৰাকীয়ে সৌন্দৰ্য প্ৰয়াসী হাতেৰে এই শিল্প নিশ্চয়কৈ গঢ় দিব পাৰে। বৰ্তমান অসমত কেইবাজনো স্বনামধ্যন শিল্পীয়ে এই শিল্প সাধনা কৰি আহিছে। তাৰে ভিতৰত শিল্পী ভাষ্কৰ বেণু মিশ্ৰ, লাবু সেনাপতি অন্যতম।

‘বনছাই’ৰ পাৰিভাষিক অৰ্থ হ’ল ‘জীৱন্ত ভাস্কৰ্য’। পুৰণি ইতিহাস বিজড়িত বনছাই কলা জাপানত ‘বনছাই’ (Bonsai) আৰি চীনত ‘পেনজাই’ (Penzai) হিচাপে জনাজাত। প্ৰায় দুহেজাৰ বছৰৰ পূৰ্বে চীনত আৰম্ভ হোৱা এই ধ্ৰুপদী কলা বিধ ৰপ্তানি বাণিজ্যৰ যোগেদি জাপান, কোৰিয়া, ভিয়েটনাম, বাংলাদেশত খোপনি পোতেহি। প্ৰকৃতিৰ উপলদ্বিৰে নান্দনিক সৌন্দৰ্য অন্বেষণ কৰা এই প্ৰক্ৰিয়াত একোজোপা বৃহৎ গছক একোটা সৰু পাত্ৰত স্বমহিমামণ্ডিত বৈশিষ্ট্য অক্ষুণ্ণ ৰাখি পাঁচ/ছয় ছেণ্টি মিটাৰৰ পৰা এক – ডেৰ মিটাৰ উচ্চতালৈকে সীমাবদ্ধ কৰি ৰখা হয়। ইয়াৰ বিভিন্ন প্ৰকাৰ পোৱা যায়, যেনে – ব্ৰুম, ৰুটঅভাৰ ৰক, ৰুট এক্সপ’জ, টুইনট্ৰাংক, লেণ্ডস্কেপ, একুৱা বনছাই ইত্যাদি। ইয়াক সৃষ্টি কৰা প্ৰক্ৰিয়া ধৈৰ্যসহকাৰে দীৰ্ঘম্যাদী প্ৰচেষ্টাৰে সূক্ষ্ম কাৰিকৰী জ্ঞানৰ প্ৰয়োগেৰে চলোৱা হয়। নক্ষিকাৰুৱে প্ৰথম পদক্ষেপত এজোপা গছৰ জীৱনকাল আৰু সংলগ্ন বৈশিষ্ট্যবোৰ সম্পূৰ্ণৰুপে অধ্যয়ণ কৰি ল’ব লাগে। দ্বিতীয়তে নিৰ্দিষ্ট পুলি, গুটিৰ সঁচ সংগ্ৰহ কৰি পানী নিষ্কাসনৰ ব্যৱস্থা থকা চীনা মাটিৰ পাত্ৰত ঋতু অনুযায়ী ৰুব লাগে। ইয়াৰ বাবে বিশেষ হাথিয়াৰপাতি বজাৰত পোৱা যায়। অৱশ্যে খাদ্য হিচাপে বা ঔষধি হিচাপে এনে গছ কেতিয়াও ৰোৱা নহয়। ইয়াক প্ৰতিপালনৰ ক্ষেত্ৰত শান্তিৰ পৰিৱেশ অতীব প্ৰয়োজন আৰু অনাহকত গছজোপাক স্পৰ্শ কৰি থকাটোও উচিত নহয়। প্ৰজাতি অনুযায়ী একোজোপা বনছাই তৈয়াৰ কৰিবলৈ অতি কমেও দুবছৰৰ পৰা পাঁচ বছৰৰ প্ৰয়োজন হয়। বনছাই একোজোপাৰ বয়স আৰু আকৃতি অনুযায়ী তাৰ মূল্য নিৰ্ধাৰণ হয়; বজাৰত এহাজাৰৰো অধিক টকালৈকে একোজোপা বনছাইৰ দাম উঠে। এই কলা শিকিবলৈ বিভিন্ন প্ৰতিষ্ঠানত প্ৰশিক্ষণৰ ব্যৱস্থা গঢ় লৈ উঠিছে, সেইদৰে প্ৰতিপালনৰ ক্ষেত্ৰত প্ৰয়োজন হোৱা তাৎক্ষণিক সমস্যা যেনে – অসময়ত গছজোপাৰ পাত সৰি যোৱা ইত্যাদিৰ বাবে অনলাইন প্ৰশিক্ষণৰো ব্যৱস্থা আছে। বনছাই সৃষ্টিৰ ক্ষেত্ৰত ইয়াৰ প্ৰজাতি নিৰ্ণয়ে অত্যন্ত গুৰুত্বপূৰ্ণ ভূমিকা লয়। অসমৰ পৰিৱেশত আহত গছৰ পৰা আৰম্ভ কৰি সুমথিৰা, শিলিখা, ডালিম, জলফাইৰ দৰে গুটি লগা গছৰ উপৰিও এজেলিয়া, ব’গেনভিলিয়া, মেগন’লিয়া আদি ফুল ফুলা গছৰ প্ৰজাতিৰেও সুন্দৰ বনছাই একোজোপা পাব পাৰি। প্ৰতিপালনৰ সময়ছোৱাত উন্মুক্ত পৰিৱেশত ৰখা বনছাই জোপাক একাগ্ৰতাৰে লাগি থাকি নিয়মীয়াকৈ নিৰ্দিষ্ট মানত সাৰ – পানী দিয়াৰ প্ৰয়োজন হয়। পূৰ্ণ পৰ্যায়ৰ বনছাই জোপাক যেতিয়া ঘৰৰ ভিতৰত সৌন্দৰ্যবৰ্ধনত ব্যৱহাৰ কৰা হয়, তেতিয় কোঠাটোত মুকলি বতাহৰ চলাচলত চকু দিয়াটো দৰকাৰী। দিনটোৰ ভিতৰত অলপ সময়ৰ বাবেও ৰ’দ পৰা ঠাইত, যেনে – খিৰিকী কাষত ইয়াক থোৱাটোহে সৰ্বোত্তম।

এটা বিশেষ দৃষ্টি কোণৰ পৰা মাজে মাজে প্ৰকৃতি বিৰুদ্ধ কাৰ্য হিচাপেও সমালোচিত হোৱা এইবিধ কলাক ব্যৱসায়ীক স্তৰলৈ ৰুপান্তৰ কৰিব পাৰিলে পুষ্প উদ্যোগৰ ক্ষেত্ৰত অসমৰ অৰ্থনৈতিক ছবিখন উন্নত হোৱাৰ লগতে স্বনিয়োজনেৰে নিবনুৱা সমস্যা কিছুপৰিমাণে হ’লেও লাঘৱ কৰিব পৰা যাব। অসংখ্য আধুনিক কাৰ্যালয় – প্ৰতিষ্ঠানত সৌন্দৰ্য বৰ্ধনৰ বাবে এইবিধ গছৰ চাহিদা ক্ৰমাৎ দ্ৰুতগতিত বৃদ্ধি পাইছে, সেইদৰে ঘৰুৱা পুষ্পসজ্জা হিচাপেও জনপ্ৰিয়তা অৰ্জন কৰিছে। বিশ্ববন্দিত এইবিধ অভিনৱ কলাই আৰ্থক স্বাৱলম্বন সৃষ্টিত অদূৰ ভৱিষ্যতে প্ৰভূত অৰিহণা যোগাব পাৰিব, তাত সন্দেহ নাই।

 

লেখিকা: গায়ত্ৰী গোস্বামী অধ্যাপক।



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate