অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

বৰপেটা সত্ৰৰ পেঁকযাত্ৰা

বৰপেটা সত্ৰৰ পেঁকযাত্ৰা

বিৱৰণি

অনাদি, অনন্ত, অসীম শক্তি স্বৰুপ ভগৱান শ্ৰীকৃষ্ণৰ জন্মৰ সৈতে যুক্ত এটি আনন্দ-উৎসৱ হৈছে নন্দোৎসৱ বোকাযাত্ৰা ভাওনা| শ্ৰীকৃষ্ণৰ জন্মাষ্টমীৰ পিছদিনাখন পুৰুষ সকলে বোকা ভাওনা নামৰ এই আনন্দ উৎসৱ পালন কৰে| বোকা শব্দৰ অৰ্থ হৈছে পানীৰে মিহলি হৈ কোমলা মাটি|

আভিধানিক অৰ্থ

বোকা ভাওনাৰ আভিধানিক অৰ্থ হ’ল জন্মাষ্টমীৰ দিনা বোকাৰে কৰা ভাওনা বা ধেমালি|

বৰপেটা সত্ৰত ‘পেকঁযাত্ৰা’

শ্ৰী কৃষ্ণ জন্মাষ্টমী উপলক্ষত গোকুলত পালন কৰা নন্দোৎসৱক অনুসৰণ কৰি অসমৰ কোনো কোনো সত্ৰ-নামঘৰ বা থানত বোকা ভাওনা কৰাৰ পৰম্পৰা এতিয়াও প্ৰচলিত আছে| অসমৰ বৰপেটা সত্ৰত এই নন্দোৎসৱ বা বোকা ভাওনা বৰ আনন্দেৰে পালন কৰা হয়| নিৰ্মল আনন্দ প্ৰদান কৰি অহা উপভোগ্য-আকৰ্ষণীয় এই উৎসৱক বৰপেটাৰ স্থানীয় লোকে ‘পেকঁযাত্ৰা’ বুলি কয়| বৰপেটা সত্ৰত সত্ৰীয়া ৰীতি-নীতি আৰু বিধিগত ব্যৱস্থাৰে এই উৎসৱ উদ্‌যাপিত হয়| সেইদিনাখন কীৰ্তন ঘৰত পুৱা যথাবিধি অনুযায়ী পুৱাৰ গীত-ভটিমা গাই নাম-প্ৰসংগ কৰা দেখা যায়| পিছত যথানিয়ম অনুসৰি গায়ন বায়নে খোল-বাজনা পৰিৱেশন কৰাৰ অন্তত ভৱানীপুৰীয়া গোপাল আতা বিৰচিত ‘জন্ম যাত্ৰাৰ নন্দোৎসৱ বা বোকা যাত্ৰা’ নাটখন পৰিৱেশন কৰা হয়| তদুপৰি কীৰ্তন ঘৰৰ কাঁথিত বহি আই মাতৃ সকলে গীত পদৰ সুৰেৰে নন্দোৎসৱ তথা পেঁকযাত্ৰাৰ পুৱাটো মুখৰিত কৰি আনন্দময় পৰিৱেশৰ সৃষ্টি কৰে| -‘আহা সখি, আহা বাই নন্দৰ ঘৰে যাওঁ/যশোদাৰ পুত্ৰ হৈছে নয়ন ভৰি চাওঁ|’

‘পেঁকযাত্ৰা’ৰ পৰম্পৰা আৰু ৰীতি-নীতি

বৰপেটাৰ কীৰ্তনঘৰৰ ভিতৰত সত্ৰীয়া ৰীতি-নীতিৰ ব্যৱস্থা অনুসৰি নন্দোৎসৱৰ ক্ৰিয়া-কাৰ্য সম্পন্ন হোৱাৰ পিছতেই কেলিকদম গছৰ তলৰ টুপৰ চোতালত শিশু, চেমনীয়া, চেঙেলীয়া যুৱ ল’ৰাই পেঁকযাত্ৰাত অংশগ্ৰহণ কৰি আনন্দত মতলীয়া হয়| টুপৰ চোতালত নিৰ্দ্দিষ্ট চাৰিসীমাৰ ভিতৰত তেল সানি বোকা-মাটিৰে পিছল কৰি তোলা হয়| তাতে বোকাত লুতুৰি পুতুৰি হৈ ল’ৰাবোৰে সাঁতোৰাৰ নিচিনাকৈ বাগৰা-বাগৰি কৰি এক সুকীয়া আনন্দ লাভ কৰা দেখা যায়| ইজনে-সিজনৰ গাত বোকা (পেঁক) সানি পুলকিত কৰি তোলে নিজৰ দেহ-মন| ইজনে-সিজনক টানি নি বোকাপানীত বগৰাই পৰম আনন্দ লাভ কৰা ‘পেঁকযাত্ৰা’ৰ দৃশ্যই শাওণ-ভাদ মাহৰ হয়তো ক’ব পাৰি পেকযাত্ৰা ভাওনা মূলতঃ আছিল চহা আৰু কৃষিজীৱি মানুহৰ অনুষ্ঠান| ব্ৰজধামত নন্দ ৰজাৰ আনন্দ-উৎসৱৰ স্মৃতি সজীৱ কৰি ৰখাৰ প্ৰয়াসেৰে বৰপেটা সত্ৰত এনেদৰে ‘পেঁকযাত্ৰা’ৰ পৰম্পৰা চলি আহিছে|

সমাজ জীৱনত বিশেষ ভূমিকা পালন কৰি অহা এই উৎসৱ-পাৰ্বণে মানুহক সংস্কৃতি সম্পন্ন কৰি গঢ়ি তোলাৰ লগতে মানুহৰ মনত সাংস্কৃতিক আধ্যাত্মিক ভাৱধাৰাৰ জন্ম দিয়ে| তদুপৰি ধৰ্মৰ প্ৰতি আকৃষ্ট কৰাৰ লগতে সংঘবদ্ধ আৰু সুন্দৰ সমাজ গঢ়াত প্ৰেৰণা যোগাই মানুহৰ জীৱনত এক মধুৰ আত্মীয়তা গঢ়ি তোলাত বিশেষ বৰঙণি যোগায়|

লেখক:-মণ্টুৰাজ দাস

উৎস:-দৈনিক অসম

 

 

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate