স্মাৰ্টফোনত ক্ষুদ্ৰ আহিলাই দিব গাড়ীৰ সন্ধান

আমেৰিকা যুক্তৰাজ্যৰ কেলিফ’ৰ্ণিয়াস্থিত এটা কোম্পানীয়ে এনে এটা ক্ষুদ্ৰ আহিলা তৈয়াৰ কৰি উলিয়াইছে যাক স্মাৰ্টফোনত ব্যৱহাৰ কৰি আপোনাৰ গাড়ীখনৰ অৱস্থান উলিয়াব পাৰিব| এই আহিলাটোৰ নাম ৰখা হৈছে ট্ৰেক-আৰ| এই ক্ষুদ্ৰ অত্যাধুনিক আহিলাটোৱে আপোনাৰ গাড়ীখনক চোৰৰ হাতৰ পৰা ৰক্ষা কৰাত বিশেষভাৱে সহায় কৰিব| এই আহিলাটোৱে বাৰু স্মাৰ্টফোনত কিদৰে কাম কৰে? প্ৰথমতে আপুনি ট্ৰেক-আৰ এপছ্‌টো আপোনাৰ স্মাৰ্টফোনত ইনষ্টল কৰি ল’ব লাগিব| এইটো সম্পূৰ্ণ বিনামূলীয়া এপ্‌ছ| যাক ইণ্টাৰনেটৰ পৰা সহজে ডাউনলোড কৰিব পাৰি| এই এপছ্‌টো আপোনাৰ ট্ৰেক-আৰ আহিলাটোৰ সৈতে সংযোগ কৰাৰ লগে লগে কাৰ্যক্ষম হৈ পৰিব| ট্ৰেক-আৰ আহিলাটো আপুনি আপোনাৰ গাড়ীৰ চাবি, ব্ৰীফকেছ, ধন ৰখা বেগ আদি যিকোনো বস্তুৰ সৈতে ৰাখি থ’ব পাৰে| তদুপৰি ইয়াক আপোনাৰ গাড়ীৰ ফ্লৰ মেট, ডিকী বা আন যিকোনো স্থানত চোৰে দেখা নোপোৱাকৈ ৰাখিব পাৰে| আপোনাৰ গাড়ীখন দূৰ্ভাগ্যবশত: চোৰে যদি চোৰ কৰি পলায়ন কৰিছে, তেন্তে আপোনাৰ ম’বাইলত থকা ট্ৰেক-আৰ এপছ্‌টোলৈ গৈ থকা গাড়ীখন চোৰে ক’লৈ লৈ গৈছে বা কোন পথেৰে গৈ আছে তাৰ সন্ধানত নিমিষতে উলিয়াব পাৰিব| বৰ্তমান গাড়ীখনৰ অৱস্থান জানিবলৈ জি পি এছ ছিষ্টেমৰ দৰে সুবিধা আছে যদিও সেইবোৰ ব্যয়বহুল| জি পি এছ ছিষ্টেম বা ট্ৰেকিং ছাৰ্ভিচৰ বাবদ ৫-১৫ হেজাৰ টকা পৰ্যন্ত খৰচ কৰিব লগা হয়| কিন্তু ইয়াৰ বিপৰীতে ট্ৰেক-আৰৰ মূল্য হ’ল ২৯ ডলাৰ অৰ্থাৎ ভাৰতীয় মূল্যত দুই হেজাৰ টকাতকৈয়ো কম| এই সুবিধা গ্ৰহণ কৰিবলৈ কোনো মাহেকীয়া মাচুল ভৰি থকাৰো প্ৰয়োজন নাই| গাড়ীৰ উপৰি আপোনাৰ বহুমুলীয়া লেপটপ বা মটৰ চাইকেলখনতো ট্ৰেক-আৰ স্থাপন কৰি সুৰক্ষিত ৰাখিব পাৰে| অকল সেয়াই নহয়, আপোনাৰ অতি মৰমৰ পোহনীয়া জন্তুকো নজৰত ৰাখিব পাৰিব| আপোনাৰ উন্নত জাতৰ পোহনীয়া কুকুৰটোৰ ক’লাৰত আহিলাটো স্থাপন কৰিব পাৰে| আপোনাৰ গাড়ী, মটৰ চাইকেল, লেপটপ আদিৰ দৰে মূল্যৱান সামগ্ৰীৰ উপৰি পোহনীয়া কুকুৰটোও কেনেবাকৈ যদি চোৰৰ কবলত পৰে, তেন্তে আপুনি ট্ৰেক-আৰৰ সহায়ত তাৰ প্ৰকৃত অৱস্থান নিৰ্ণয় কৰি আৰক্ষীৰ সহযোগত সহজে উলিয়াব পৰাৰ লগতে চোৰক ধৰা পেলাই শাস্তি বিহাৰ ক্ষেত্ৰতো সহায় কৰিব পাৰিব|

লেখক:- অমৰজ্যোতি ভুঞা

উৎস:-দৈনিক অসম