অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

আপুনি মেদবহুলতাত ভুগিছে নেকি?

আপুনি মেদবহুলতাত ভুগিছে নেকি?

 

সমগ্ৰ বিশ্বতে মেদবহুলতা এটা প্রধান সমস্যা। আমাৰ ভাৰতবৰ্ষও এই ক্ষেত্ৰত পিছ পৰি থকা নাই। মেদবহুলতাত ভাৰত সমগ্র বিশ্বৰ ভিতৰত পুৰুষৰ ক্ষেত্ৰত পঞ্চম স্থান আৰু মহিলাৰ ক্ষেত্ৰত তৃতীয় স্থানত আছে। অতিৰিক্ত চর্বি — যি চর্বিয়ে আমাৰ শৰীৰৰ অপকাৰ কৰা সম্ভাৱনা বেছি। যিসকল লোক মেদবহুলতাত ভুগিছে, তেওঁলোকৰ বিভিন্ন ধৰণৰ স্বাস্থ্যজনিত ৰোগে দেখা দিয়াৰ সম্ভাৱনা খুবেই বেছি। অতিৰিক্ত দেহৰ ওজনৰ ফলত সাধাৰণতে দেখা ৰোগসমূহ হৈছে— বহুমূত্র, উচ্চ ৰক্তচাপ, উচ্চ কলেষ্টেৰল, হৃদৰোগ, ষ্ট্ৰ’ক, গল ব্লাডাৰ, অষ্টিয় আর্থাইটিছ আদি। সময়ত যদি শৰীৰৰ ওজন নিয়ন্ত্ৰণ কৰা নহয় পিছলৈ এই ৰোগসমূহে জটিল ৰূপ ধাৰণ কৰে আৰু মানুহৰ মৃত্যু পর্যন্ত হ’ব পাৰে।

এতিয়া প্রশ্ন হ’ল আমি কিয় মেদবহুলতাত ভোগো।

মেদবহুলতাৰ প্রধান কাৰণবোৰ হ'ল -

*অতিৰিক্ত খাদ্য গ্রহণ। আজিকালি সকলো উন্নত দেশতেই মানুহৰ খাদ্যাভাস সলনি হৈছে। মানুহে অতিৰিক্ত কেলৰিযুক্ত খাদ্য গ্রহণ কৰিবলৈ লৈছে। ঘৰত নিজে ৰান্ধি খোৱাতকৈ বাহিৰত কোনোবা হোটেল বা ৰেস্তোৰাত ফাষ্টফুড খোৱাৰ প্ৰৱণতা বাঢ়িছে। ফলত পুষ্টিকৰ খাদ্যৰ পৰা তেওঁলোক নজনাকৈয়ে বঞ্চিত হৈছে।

*আগৰ দৰে খোজ কঢ়া, চাইকেল চলোৱা আদিৰ সলনি মানুহে গাড়ী, মটৰ চাইকেল আদিৰ ওপৰত বেছি নিৰ্ভৰশীল হৈ পৰিল।

*টেলিভিছন, কম্পিউটাৰ, ৰিম'ট কন্ট্রল, ৱাশ্বিং মেচিন আদি বিজ্ঞান আৰু প্রযুক্তিবিদ্যাৰ ন ন আৱিষ্কাৰে মানৱ জাতিক আৰু অধিক অকামিলা কৰিবলৈ ধৰিছে।

*ঘৰতে বহি মানুহে খোৱাৰ অৰ্ডাৰ, বিভিন্ন অত্যাৱশ্যকীয় সামগ্ৰীৰ বজাৰ মাত্ৰ তেওঁৰ স্মাৰ্ট ফ'নটোৰ বাটন টিপি দিলেই পোৱা হ’ল।

*কিছু কিছু ক্ষেত্ৰত অৱশ্যে পৰিৱেশ, বিভিন্ন ঔষধ আৰু বংশগতিৰ ওপৰতো মানুহৰ শৰীৰৰ ওজন বৃদ্ধি নিৰ্ভৰ কৰে।

সাধাৰণতে দেখা যায় এজন মেদবহুলতাত ভোগা ব্যক্তিয়ে নিজকে সামাজিকভাৱে খুব অতি সহজতে হীনম্মন্যতাত ভোগা দেখা যায়। তদুপৰি তেওঁৰ দৈনন্দিন কাম-কাজবোৰ কৰিবলৈ যথেষ্ট অসুবিধাৰ সন্মুখীন হয়। অৱশ্যে এই মেদবহুলতা আমি আমাৰে কিছুমান জীৱন-ধাৰণৰ পদ্ধতি সলনি কৰি নিশ্চয়কৈ কমাব পাৰোঁ। লাগে মাথোঁ অলপ ধৈর্য, একাগ্রতা, অলপ পৰিশ্রম আৰু দৃঢ় বিশ্বাস।

মেদবহুলতাৰ প্ৰতিৰোধৰ ব্যৱস্থা -

*শৰীৰৰ অতিৰিক্ত চর্বি কমোৱাটো বৰ সহজ নহয়। এই কাম কৰাৰ পূর্বে আপুনি নিজে ত্যাগ আৰু কষ্টৰ কৰিবলৈ সম্পূৰ্ণৰূপে সাজু থাকক।

*নিজৰ ব্যায়ামৰ এখন ৰুটিন তৈয়াৰ কৰি লওক। মনত ৰাখিব এই ৰুটিনখন যাতে কোনো কাৰণতেই খতি নহয়।

*আপোনাৰ খোৱা আৰু ব্যায়ামৰ মাজত অতি কমেও তিনি ঘণ্টা সময়ৰ ব্যৱধান ৰাখক।

*যিমান পাৰে সিমান পানী খাওক, পানীয়ে কেৱল আমাৰ শৰীৰৰ টক্সিন বাহিৰ কৰাত যদি উপযুক্ত পানী থাকে তেন্তে শৰীৰটো সুস্থ আৰু সবল হৈ থাকে আৰু আটাইতকৈ গুৰুত্বপূর্ণ কথাটো হ’ল পানীত কোনো কেলৰী নাথাকে। পুৱা শুই উঠিয়েই অন্ততঃ দুগিলাচকৈ পানী খাওক।

*আপুনি খোৱা খাদ্য-প্রণালীৰ ওপৰতেই শৰীৰটোৰ ওজন নিৰ্ভৰ কৰে। যদি আপুনি সদায় তেলযুক্ত আৰু মছলাযুক্ত খাদ্য, বাহিৰৰ ফাষ্টফুড, পেকেট ফুড আদি খায় তেন্তে আপুনি শৰীৰৰ ওজন কমোৱাৰ কথা পাহৰি যাওক।

*সঘনাই বাহিৰত খোৱা খাদ্য, পার্টি, বিয়া-সবাহ আদিয়ে আপোনাৰ অযথা শৰীৰৰ চর্বি বৃদ্ধি কৰে।

*যথাসম্ভৱ কমকৈ খাওক, অতিমাত্ৰা খোৱাটো স্বাস্থ্যৰ বাবে হানিকাৰক।

*কমকৈ খাওক কিন্তু সঘনাই খাওক, কিন্তু মনত ৰাখিব আপুনি যাতে পুষ্টিকৰ খাদ্যহে খায়।

*খাদ্যবস্তু খাওঁতে চোবাই খোৱাটো অতি প্রয়োজনীয়। কাৰণ আমাৰ পাচনক্রিয়া আৰম্ভ হয় মুখৰ পৰাই। যেতিয়া আমি খাদ্যবস্তু চোবাই খাওঁ তেতিয়া আমাৰ মুখৰ ছেলিভাৰ সহায়ত এনজাইমৰ যোগেদি পাচন হ’বলৈ আৰম্ভ কৰে।

*যিমান পাৰে ষ্ট্ৰেচৰ পৰা আঁতৰত থাকক, অধ্যয়নত গম পোৱা গৈছে যে ষ্ট্ৰেচৰ ফলত শৰীৰৰ ওজন বৃদ্ধি হয়।

*খোৱাৰ পূর্বে মৃদু সংগীত নতুবা মেডিটেশ্যন কৰাটো ভাল।

*দুপৰীয়াৰ আহাৰত যথাসম্ভৱ ছালাদ ব্যৱহাৰ কৰক।

*গ্রীন-টি খাবলৈ আৰম্ভ কৰক। ই আপোনাৰ ওজন নিয়ন্ত্ৰণত যথেষ্ট গুৰুত্বপূর্ণ ভূমিকা পালন কৰে।

*আপুনি দৈনিক প্রায় আঠ ঘণ্টাকৈ শোৱক। ৰাতি সোনকালে শোৱাপাটীলৈ যাওক আৰু পুৱা সোনকালে শোৱাপাটী এৰক। অধ্যয়নত গম পোৱা গৈছে যে কম টোপনিয়ে আপোনাৰ শৰীৰৰ ওজন বৃদ্ধি কৰাত অৰিহণা যোগায়।

*পুৱা খৰকৈ খোজকাঢ়ক।

লিখক: মৃদুপৱন বৰগোহাঁই, দৈনিক জনমভূমি।



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate