অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ক্ষীণকায় লোকসকলে কিদৰে শৰীৰৰ ওজন বঢ়াব ?

ক্ষীণকায় লোকসকলে কিদৰে শৰীৰৰ ওজন বঢ়াব ?

ক্ষীণকায় লোকসকলৰ  শৰীৰৰ ওজন বঢ়োৱাৰ উপায়-

 

আজিৰ স্বাস্থ্যকথাত আলোচনা কৰিবলৈ ওলাইছো ক্ষীণ মানুহে কিদৰে নিজৰ শৰীৰৰ ওজন বৃদ্ধি কৰিব পাৰিব। সচৰাচৰ দেখা যায় কিছুমান ক্ষীণ মানুহে যথেষ্ট পৰিমাণত সকলো ধৰণৰ খাদ্য খায়, তথাপি তেওঁলোকৰ শৰীৰৰ আকৃতি সলনি নহয় আৰু তেওঁলোকে মেদবহুলতা আৰু ডায়েবেটিছত নোভোগে। এনে লোক বহুতৰ বাবে ঈৰ্ষাৰ পাত্ৰ। কিন্তু তেনে লোকৰ কিছু সংখ্যকে হীনমন্যতাত ভোগে। চিকিৎসকসকলৰ বাবে মেদবহুল লোকে ওজন কমোৱাটো আৰু ক্ষীণকায়সকলৰ ওজন বঢ়োৱাটো দুয়োটাই একোটা কঠিন কাৰ্য। ৰোগীৰ নিজৰ উদ্যম, আগ্ৰহ আৰু সহযোগ অবিহনে কোনো এটা লক্ষ্যতেই চিকিৎসক উপনীত হ’ব নোৱাৰে। তদুপৰি সঠিক আঁচনি নহ’লে জধেমধে এসোপামান খালেই শৰীৰৰ ওজন নাবাঢ়ে। কথাখিনি তলৰ আলোচনা পঢ়িলেই পৰিষ্কাৰ হ’ব।

পোনতে জানি থোৱা ভাল হ’ব ক্ষীণ কোন আৰু শকত কোন। ইয়াৰ বাবে ব’ডীমাছ ইনডেক্সৰ সহায় ল’ব লাগিব। আজিৰ পৰা দুশ বছৰ আগতে বেলজিয়ামৰ এজন পৰিসংখ্যাবিদ এডল্ফ ক্ক্যোতেলেটে মানুহৰ শৰীৰৰ স্থূলতা জুখিবলৈ এটি সূত্ৰ আৱিষ্কাৰ কৰিছিল। আন্তঃৰাষ্ট্ৰীয় মান্যতা পোৱা এই সূত্ৰ মতে শৰীৰৰ ওজনক (কিলোগ্ৰামত) শৰীৰৰ উচ্চতাৰে (বৰ্গমিটাৰত) ভাগ কৰি পোৱা ফলাফলক ব’ডীমাছ ইনডেক্স বোলে। স্বাভাৱিক বি এম আই হ’লঃ ১৮.৫-২৪.৯। ১৮.৫ৰ তল হ’লে শৰীৰৰ ওজন হ’বলগীয়াতকৈ কম বুজায়। ২৪.৯ৰ বেছি হ’লে ওজন স্বাভাৱিকতকৈ বেছি। ৩০ৰ ওপৰ হ’লে স্থূলকায় আখ্যা দিয়া হয়। থূলমূলকৈ সাধাৰণতে এজন ব্যক্তিৰ বি এম আই ২৫ হোৱাটো বাঞ্ছনীয়। বি এম আই ১৮ৰ তল হ’লে তেওঁক ক্ষীণ বা Underweight বোলা হয় আৰু ইয়াৰ বিপৰীতে বি এম আই ৩০ৰ অধিক হ’লে তেওঁক স্থূলকায় বা Obese বোলা হয়।

ক্ষীণকায় হোৱাৰ সম্ভাৱ্য কাৰণসমূহঃ


  • কমকৈ খাদ্য খোৱাৰ অভ্যাস।
  • দুবাৰ খোৱাৰ মাজত দীঘলীয়া ব্যৱধান।
  • খাদ্যৰ বাছনিত বেমেজালি।
  • শাৰীৰিক অতিশ্ৰম আৰু খাদ্যৰ পৰিমাণ নবঢ়ালে প্ৰয়োজনতকৈ কেলৰি কমকৈ পোৱা।
  • দীঘলীয়া অসুস্থতাৰ ফলত বদহজম।
  • কৰ্কট ৰোগ, যক্ষ্মা ৰোগ, হাইপাৰ থাইৰয়ডিজম, ডায়েবেটিছ।
  • এনৰেক্সিয়া নাৰ্ভোচা, বুলিমিয়া নাৰ্ভোচা জাতীয় মানসিক ৰোগ।

এজন ব্যক্তিৰ শৰীৰৰ ওজন বঢ়াবলৈ সুখাদ্য, নিয়মীয়া ব্যায়াম, প্ৰয়োজনীয় বিশ্ৰাম-টোপনি, মানসিক প্ৰশান্তি আৰু নিয়মীয়া শ্বাস-প্ৰশ্বাসৰ আৱশ্যক হয়। তলত বহলাই আলোচনা কৰিম।

এজন প্ৰাপ্তবয়স্ক নিয়মীয়া স্বাস্থ্যৰ লোকক ২৪ ঘণ্টা কাৰ্যক্ষম হৈ থাকিবলৈ পুৰুষক ২,১০০ কেলৰি আৰু মহিলাক ১,৯০০ কেলৰি দৈনিক শক্তিৰ প্ৰয়োজন। ব্যক্তিজনৰ কাম বা শ্ৰমৰ ওপৰত নিৰ্ভৰ কৰি কম বা বেছি কেলৰিৰ শৰীৰক প্ৰয়োজন হয়। খাদ্যৰ মূল তত্ত্ব তিনিবিধ এই ধৰণেৰে আয়ত্ত কৰাটো বাঞ্ছনীয়- ৪৫%-৬৫% কেলৰি কাৰ্ব’হাইড্ৰেটৰ পৰা, ২০%-৩০% কেলৰি ফেট বা চৰ্বিৰ পৰা, ১০%-৩৫% প্ৰ’টিনৰ পৰা। আকৌ প্ৰতি এক গ্ৰাম কাৰ্ব’হাইড্ৰেটৰ পৰা আহে ৪ কেলৰি শক্তি, প্ৰতি এক গ্ৰাম চৰ্বিৰ পৰা আহে ৯ কেলৰি শক্তি, প্ৰতি এক গ্ৰাম প্ৰ’টিনৰ পৰা আহে ৪ কেলৰি শক্তি।

সপ্তাহত আধা কেজি শৰীৰৰ ওজন বঢ়াবলৈ দৈনিক কমেও ১০০০ কেলৰি অতিৰিক্ত খাদ্য গ্ৰহণ কৰাৰ প্ৰয়োজন আহি পৰিব। দিনতো ২-৩ বাৰৰ পৰিৱৰ্তে ৫-৬ বাৰ খাব লাগিব। প্ৰতি তিনি ঘণ্টাৰ মূৰত আমাৰ উদৰ খালী হয়, গতিকে দিনটোত ৫-৬ বাৰ খোৱাটো সম্ভৱপৰ। ইয়াৰ বাবে শৰীৰত তিনিটা মূল খাদ্যৰ মাজত ২-৩টা সৰু খাদ্যৰ যোগান ধৰিব লাগিব।

কি কি বাছনি কৰিব খাদ্যৰ তালিকাত ?


সুখাদ্যত প্ৰ’টিন, কাৰ্ব’হাইড্ৰেট আৰু ফেটৰ সঠিক বাছনিৰ প্ৰয়োজন। আমিষভোজীৰ প্ৰ’টিন মাংস আৰু মাছত অহাৰ পৰিৱৰ্তে নিৰামিষভোজীৰ প্ৰ’টিন চয়াবিন আৰু দাইলৰ পৰা আহে। কাৰ্ব’হাইড্ৰেট আলু আৰু ভাতৰ পৰা ঘাইকৈ আহে। ভাত উখোৱা চাউলৰ হ’লে বেছি ফাইবাৰ পোৱা যাব। ফেটৰ ভিতৰত চেচুৰেটেড ফেট আৰু ট্ৰান্সফেট (যেনে- ডালডা) বাদ দিব। চোডা আৰু কফী বাদ দিব। জাংক ফুডো অখাদ্যৰ তালিকাত পৰে। কাৰণ ইয়াৰ দ্বাৰা শৰীৰৰ মেদবহুলতাহে আহিব। একে কাৰণতে ৰেডীমেড বা প্ৰচেচড ফুডৰ লোভ পৰিত্যাগ কৰিব।

এতিয়া কিছুমান খাদ্যৰ বিশ্লেষণ চাওক-


  • কলঃ এটা কলত ১০৫ গ্ৰাম কেলৰি থাকে। কলে খোৱাৰ লগে লগে তাৎক্ষণিকভাৱে শক্তিৰ যোগান ধৰে। সুষম খাদ্যৰ তালিকাত দৈনিক এটা কল অপৰিহাৰ্য।
  • কণীঃ ইয়াত প্ৰ’টিন, ভিটামিন- এ, ডি, ই, বি ১২, লৌহ পদাৰ্থ, জিংক, কেলচিয়াম আৰু ভাল কলেষ্টেৰল থাকে। কণীত থকা ল্যুটিন চকুৰ বাবে উপকাৰী। কণী হাঁড়, কাৰ্টিলেজ, ছাল, চুলি, হৰম’ন আদিৰ বাবে লাগতিয়াল। কণীত থকা এমাইনো এচিড মাংসপেশীৰ বাবে উপকাৰী। ১০০ গ্ৰাম কণীৰ পৰা ১৩ গ্ৰাম প্ৰ’টিন শৰীৰে আয়ত্ত কৰে।
  • চয়াবিনঃ ১০০ গ্ৰাম চয়াবিনৰ পৰা ৩৬ গ্ৰাম প্ৰ’টিন শৰীৰে আয়ত্ত কৰে।
  • চিকেনঃ ১০০ গ্ৰাম মুৰ্গীৰ মাংসৰ পৰা ২৫ গ্ৰাম প্ৰ’টিন শৰীৰে আয়ত্ত কৰে।
  • বাটাৰঃ ১০০ গ্ৰাম মাখনত ৮১ গ্ৰাম ফেট থাকে। সতৰ্ক হ’ব যাতে অত্যধিক মাখন খাই হৃদৰোগত আক্ৰান্ত হ’বলগীয়া নহয়।
  • অ’টছঃ ১০০ গ্ৰাম অ’টছত ১৭ গ্ৰাম প্ৰ’টিন আৰু কিছু পৰিমাণে লৌহ পদাৰ্থ থাকে।
  • টুনা মাছঃ স্বাস্থ্যৰ বাবে উপকাৰী ফেটি এচিডযুক্ত।
  • পাষ্টাঃ কাৰ্ব’হাইড্ৰেটৰ এক ভাল উৎস। যথেষ্ট কেলৰিযুক্ত। লগত সেউজীয়া শাক-পাচলি মিহলাই ইয়াক অধিক পুষ্টিকৰ কৰি ল’ব পাৰে।
  • চীজঃ প্ৰ’টিন, ফেট, কেলচিয়ামৰ সমাহাৰ।
  • খোৱা তেলঃ সৰ্বোত্তম হ’ল অলিভ অইল।
  • দৈঃ উপযোগী খাদ্য।
  • পি নাট বাটাৰঃ উপযোগী খাদ্য।
  • গাখীৰঃ প্ৰ’টিন আৰু কেলৰিৰ বাবে প্ৰয়োজনীয়। ১০০ গ্ৰাম গাখীৰত ৩-৫ গ্ৰাম প্ৰ’টিন থাকে অৰ্থাৎ দুগিলাচ গাখীৰৰ পৰা ১৪ গ্ৰাম প্ৰ’টিন আহিব।
  • নুডুলছ হ’ল কেলৰি আৰু কাৰ্ব’হাইড্ৰেটযুক্ত। ইয়াক সেউজীয়া শাক-পাচলি মিহলাই ইয়াক অধিক পুষ্টিকৰ কৰি ল’লে ভাল।
  • ড্ৰাই ফ্ৰুইটছে কেলৰি যোগান ধৰে।
  • ফলমূল আৰু সেউজীয়া শাক-পাচলি হ’ল ভিটামিন, ট্ৰেচএলিমেণ্ট, কেলচিয়াম, লৌহপদাৰ্থ আৰু এণ্টিঅক্সিডেণ্টৰ স্ৰোত। এইবিলাকত ডায়েটাৰী ফাইবাৰো প্ৰচুৰ থাকে।
  • দিনটোত তাজা ফলৰ ৰস প্ৰচুৰ খাই দেহ-মন ডিহাইড্ৰেচনমুক্ত আৰু সতেজ কৰি ৰাখিব লাগে।

ইয়াৰ লগতে যোগ দিও- মই মোৰ কেইবাজনো ৰোগীক নিয়মীয়াকৈ এইকেইটা খাদ্যৰ পৰামৰ্শ দি উপকৃত হোৱা দেখি আহিছোঁ-

এমুঠি বুট বা কাবুলি চানা লগতে সমপৰিমাণৰ বাদাম পানীত ৰাতিটো ভিজাই থৈ পুৱা এটা বইল কণী, এটা জাহাজী বা মালভোগ কল আৰু এগিলাচ গাখীৰৰ সৈতে এমাহলৈ খাব লাগে।

খাদ্যাভ্যাস সম্বন্ধে ক’বলগীয়া লাগতিয়াল কথা এয়ে যে কোনো এটা সাঁজ নোখোৱাকৈ থাকিব নালাগে। ক্ষীণকায় লোকে লঘোণ দিব নালাগে। মূল খাদ্যৰ কমেও আধা ঘণ্টা আগত বা পিছত আন জুলীয়া দ্ৰব্য ল’ব লাগে। মূল খাদ্যৰ মাজত পানী খালে হজম কমকৈ হ’ব পাৰে। লগতে খাদ্যৰ পৰিমাণো কমি যাব পাৰে। সতৰ্ক হ’ব যাতে অতি বেছি পৰিমাণৰ খাদ্য খাই হাগনি বা বমিত নোভোগে।

শৰীৰৰ মাংসপেশীসমূহৰ শ্ৰীবৃদ্ধি বঢ়োৱাৰ লগতে তাক সুগঢ়ী, আটিল আৰু অধিক সক্ৰিয় কৰি তুলিবলৈ সুষম, পুষ্টিকৰ খাদ্যৰ উপৰি নিয়মীয়া ব্যায়াম বা কচৰতৰ প্ৰয়োজন।

এটা অতি লাগতিয়াল সতৰ্কবাণী-


বজাৰত নানাবিধ এনাবলিক ষ্টেৰয়ডৰ বেজী বা খোৱা পিল উপলব্ধ। ডুৰবলিন, ডেকাডুৰবলিন এনে নাম বহুতৰ জ্ঞাত। চিকিৎসকে এই এনাবলিক ষ্টেৰয়ড হৰম’ন বিভিন্ন অসুখত ভোগা ৰোগীৰ ক্ষেত্ৰত প্ৰয়োজনসাপেক্ষে ব্যৱহাৰ কৰে। কিন্তু কিছুমান অৰ্ধজ্ঞানী ফাৰ্মাচীত কাম কৰা লোকৰ পৰামৰ্শত বা নিজৰ স্থূল বুদ্ধিৰে শকত, দেখনিয়াৰ হ’বলৈ বুলি এনে ঔষধৰ প্ৰয়োগ কৰে। এইবিলাকৰ হ’ব পৰা অপকাৰিতা হ’ল- পুৰুষৰ শুক্ৰানু হ্ৰাস, টেষ্টিজ সৰু হোৱা, বক্ষ বাঢ়ি যোৱা আদি। মহিলাৰ চুলি সৰা, কণ্ঠস্বৰ পুৰুষৰ দৰে হোৱা, বক্ষ শুকাই যোৱা, ক্লাইটৰিছ বাঢ়ি অহা ইত্যাদি। ইয়াৰ উপৰি পুৰুষ-মহিলা উভয়ৰে লিভাৰ ৰোগ, ৰক্তচাপ, চৰ্বিজনিত ৰোগ, কেঞ্চাৰ আদি হোৱাৰ সম্ভাৱনা বৃদ্ধি পায়।

মোখনিত কেইটিমান খুটি-নাটি কথাঃ

শৰীৰক কমেও ৮ ঘণ্টা ভাল নিদ্ৰাৰ প্ৰয়োজন, তেহে স্বাস্থ্যৰ উন্নতি সম্ভৱপৰ হ’ব। বহু ৰাতিলৈকে উজাগৰে থাকি টোপনি খতি কৰা বাদ দিব। বলপূৰ্বক লোকচান হোৱাৰ ভয়ত নিজৰ খাব পৰা পৰিমাণতকৈ বেছি খাই শৰীৰৰ বিপদ নচপাব। গাড়ীতে বহি লাঞ্চ বা ডীনাৰ খোৱাৰ অভ্যাস থাকিলে তাক পৰিহাৰ কৰক। টিভি চাই খাদ্য খোৱাসকলে টিভিতকৈ নিজৰ খাদ্যৰ প্ৰতি অধিক মনোযোগ দিয়ক। খোৱা খাদ্য ভালদৰে চোবাইহে গিলিব যাতে সহজে হজম হয়। পদিনা, নৰসিংহ পাতৰ চাটনি এইবিলাক হ’ল ৰুচিবৰ্ধক। দৈনিক খাদ্যত একঘেয়ামি নথকাটো বাঞ্ছনীয়। অতি ক্ষিপ্ৰ ওজন বৃদ্ধি বিচাৰিব নালাগে। মাহত ৪-৫ কেজি বঢ়োৱাটোৱেই গ্ৰহণযোগ্য। টিভি আৰু বাতৰি কাকতৰ ৰঙীণ বিজ্ঞাপনত ভোল গৈ শক্তিবৰ্ধক দৰবৰ অৰ্ডাৰ দিয়াৰ চিন্তা পৰিহাৰ কৰক। চিকিৎসকৰ হতুৱাই নিয়মীয়া স্বাস্থ্য পৰীক্ষা কৰাই স্বাস্থ্যৰক্ষাৰ এই কিটিপসমূহ মানি চলক।

(উৎসঃ নিয়মীয়া বাৰ্তা, ডাঃ ভূপেন শইকীয়া)।

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate