অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

মানৱ জীৱনত নীতি-নিয়মৰ অৱদান:

মানৱ জীৱনত নীতি-নিয়মৰ অৱদান:

 

জন্মৰ পিছৰ পৰাই মানুহ নীতি-নিয়মৰ দাস হৈ পৰে। দৈনন্দিন জীৱনত কিছু নীতি-নিয়ম আমি মানি চালিব লাগে। সমাজ, দেশ আৰু ধৰ্মীয় চিন্তা-চৰ্চাৰ ক্ষেত্ৰ ভেদে, নীতি-নিয়ম বেলেগ বেলেগ হয়। প্ৰচলিত নীতি-নিয়মবোৰ মানি চলিলে জীৱনত বিফলতাৰ সন্মুখীন হ’বলগীয়া নহয়।

নীতি-নিয়ম কি?

 

নীতি-নিয়ম হ’ল কিছুমান বান্ধোন। সমাজ আৰু দেশভেদে প্ৰচলিত ৰীতি-নীতি শুদ্ধভাৱে আৰু বহল অন্তৰেৰে মানি চলিলে আমি শাৰীৰিক, মানসিক, আৰ্থিক, সামাজিক আদি প্ৰতিটো ক্ষেত্ৰতে সফলভাৱে আগবাঢ়ি যাব পাৰো। মানুহেই হৈছে একমাত্ৰ প্ৰাণী, যি নীতি-নিয়ম মানি চলে। নীতি-নিয়ম মানি চলা মানুহৰ জীৱনৰ গতি শৃংখলাবদ্ধভাৱে আগবাঢ়ে। হেনৰী ডেভিড থাৰোৱে কৈছিল- ‘যিয়ে নীতি-নিয়ম মানি চলে, তেওঁলোকৰ জীৱনৰ কৰ্মৰ ফলাফল সদায় ইতিহাচক আৰু সুখৰ হয়’।

জীয়াই থাকিবলৈ বা জীৱনটো সুন্দৰভাৱে উদযাপন কৰিবলৈ আমি নীতি-নিয়ম মানি চলিব লাগিব। অৱশ্যে, কৰ্ম অনুযায়ী নীতি-নিয়ম সুকীয়া সুকীয়া। অৰ্থাৎ সকলো কৰ্মৰে নীতি-নিয়মৰ গতিবিধি ভিন্ন ভিন্ন।

    কৰ্মৰ ক্ষেত্ৰত দায়িত্ববোধ:

মানৱ জীৱনৰ মূল আধাৰ হ’ল কৰ্ম। কৰ্ম অবিহনে মানুহ জীয়াই থাকিব নোৱাৰে। জীয়াই থাকিবলৈ কৰ্ম কৰাটো অপৰিহাৰ্য। সেয়ে, আমি প্ৰত্যেকেই সৰু-ডাঙৰ বিচাৰ নকৰি কৰ্ম কৰিব লাগে। কিন্তু কৰ্ম কৰিবলৈ যাওঁতে সদায় নিজৰ দায়িত্ববোধ বজাই ৰাখিব লাগে। আমি যি কামেই নকৰো কিয় প্ৰতিটো কাম দায়িত্ববোধ বজাই ৰাখিহে কৰিব লাগে। দায়িত্ববোধেৰে কাম কৰিলে কৰ্মৰ দ্বাৰা সফলতা লাভ কৰিব পাৰি।

    সময়ানুৱৰ্তিতা:

জোছেফ হেনৰীয়ে কৈছিল- ‘যিয়ে সময়ক মূল্য দিব জানে, তেওঁৰ দৰে সময়ানুৱৰ্তী কোনো নাই’। সময় অমূল্য ধন। সময়ক বাদ দি আমি জীয়াই থাকিব নোৱাৰো। সময় হৈছে এটি পক্ষীৰাজ ঘোঁৰা। এই ঘোঁৰাক বান্ধি ৰাখিব পাৰি কৰ্মৰেহে। জীৱনত উন্নতি কৰিবলৈ সময়ৰ মূল্য বুজি সময়ৰ সঠিক ব্যৱহাৰ কৰা উচিত। সময়ৰ অপব্যৱহাৰ নকৰিলে জীৱনৰ প্ৰতিটো মুহূৰ্তত সময়ানুৱৰ্তিতাই আমাক পিন্ধাৰ সফলতাৰ মুকুট।

    মিত্যবয়িতা:

কোৱা হয় No money, no life অৰ্থাৎ টকা অবিহনে জীৱন অৰ্থহীন। জীয়াই থাকিবলৈ আমাৰ অৰ্থ লাগিবই। কিন্তু ধন উপাৰ্জন কৰাটো বৰ সাধাৰণ কথা নহয়। পৰিশ্ৰমৰ অন্তত লাভ কৰা এই ধনৰ মূল্য বুজি মিতব্যয়ী গুণটো আয়ত্ব কৰা দৰকাৰ। যিহেতু অশেষ পৰিশ্ৰম কৰিহে ধন পোৱা যায়, সেয়ে সদায় মিতব্যয়ী অৰ্থাৎ হিচাপ-নিকাচ কৰিহে টকা খৰচ কৰিব লাগে। এনে সদগুণে মানুহক আৰ্থিকভাৱে সুখী কৰি তোলে।

    বাক সংযমতা:

কোৱা হয়- ‘কথাত কটা যায়, কথাত বঁটা পায়’। অৰ্থাৎ কথাই হ’ল আমাৰ ভাব-চিন্তা বিনিময় কৰাৰ এটি মাধ্যম। কথা অবিহনে মানৱ জাতি চলি থকাটো অসম্ভৱ। কিন্তু কথা কওঁতে সদায় সংযম বজাই ৰাখিব লাগে। কথা ক’ব লাগে বুলিয়েই হকে বিহকে কথা নকৈ সংযমত ৰাখিহে কথা ক’ব লাগে। তেনে কথাই সদায় মৰ্যাদা লাভ কৰে।

    স্বাস্থ্য ৰক্ষাত শুচিতা:

কথাকে কয়- দেহা থাকিলেহে বেহা, স্বাস্থ্য অমূল্য ধন। স্বাস্থ্যই হৈছে আমাৰ সৰ্বসুখৰ আধাৰ। স্বাস্থ্য ৰক্ষাত সেয়ে আমি প্ৰত্যেকেই ধুতি-নীতি অৰ্থাৎ শুচিতাৰ নিয়ম-নীতি, যেনে- খোৱা-বোৱাৰ নীতি, জীৱন যাপনৰ নীতি, চাফ-চিকুণতাৰ নীতি, পৰিষ্কাৰ-পৰিচ্ছন্নতাৰ নীতি আদি পালন কৰিব লাগে। জাতিৰ পিতা মহাত্মা গান্ধীয়ে কৈছিল- ‘Cleanliness is godliness’ অৰ্থাৎ পবিত্ৰ পৰায়ণতাই ঈশ্বৰ পৰায়ণতা। স্বাস্থ্য ৰক্ষাত এই শুচিতাৰ নীতি পালন কৰিলে আমি প্ৰত্যেকেই এটি নিৰোগী স্বাস্থ্যৰ অধিকাৰী হ’ব পাৰিম।

    পৰিকল্পনাৰ ক্ষেত্ৰত চিন্তা:

বিশিষ্ট অৰ্থনীতিবিদ, অৰ্মত্য সেনে কৈছিল- ‘Planning is the first step which helps to fulfill our dream’. পৰিকল্পনা অবিহনে মানুহ জীয়াই থাকিব নোৱাৰে। কিন্তু পৰিকল্পনাৰ ক্ষেত্ৰত চিন্তাৰ অতি প্ৰয়োজন। পৰিকল্পনা কৰিব লাগে বুলিলেই জধে-মধে বাস্তৱত ৰূপায়ন কৰাত অসম্ভৱ পৰিকল্পনা কৰিব নালাগে। নিজৰ স্থিতিৰ ওপৰত নিৰ্ভৰ কৰি বা নিজৰ সামৰ্থৰ কথা চিন্তা কৰিহে পৰিকল্পনা কৰিব লাগে আৰু তাক বাস্তৱায়িত কৰিব লাগে।

মুঠতে, জীৱন মানে কেৱল জীয়াই থকাৰ এটি পদ্ধতি নহয়, জীৱন মানে যন্ত্ৰণাও নহয়। জীৱন হৈছে, হেলাৰঙে সকলো বিধি-বিঘিনি অতিক্ৰম কৰি আনন্দেৰে অভিযান চলাব লগা এটি সেন্দুৰীয়া পথ। জীৱন দুদিনীয়া। সেয়ে জীৱনৰ প্ৰতিটো দিনেই আমি আনন্দমনেৰে নিজৰ কৰ্ম সম্পন্ন কৰিব লাগে। যিহেতু, নীতি-নিয়ম মানৱ জীৱনৰ মূল ভেটি, সেয়েহে নীতি-নিয়মক সাৰোগত কৰি জীৱনটো আগুৱাই নিলে জীৱন সুন্দৰ হোৱাটো নিশ্চিত।

উৎস: স্বাস্থ্য আৰু দীৰ্ঘজীৱন(দিগন্ত বৈশ্য)



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate