অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

স্বাস্থ্য সম্পৰ্কীয় বিভিন্ন তথ্য

স্বাস্থ্য সম্পৰ্কীয় বিভিন্ন তথ্য

পৰিশ্ৰম অবিহনে সুস্বাস্থ্য অসম্ভৱঃ

 

He who has health, has hope;

And he who has hope,

Has everything.

(Arabian Proverb)

সঁচাকৈয়ো জীৱনৰ সৌন্দৰ্যসুধা সেইজন লোকেহে পান কৰিব পাৰে, যিজন এক সুস্বাস্থ্যৰ অধিকাৰী। অৱশ্যে সুস্বাস্থ্য বুলিলে আমাৰ মনলৈ সাধাৰণতে আহে এটি সুন্দৰ হৃষ্ট-পুষ্ট শৰীৰ, দেখিবলৈ ধুনীয়া এটা শাৰীৰিক অৱয়ৱৰ ছবি এখন। কিন্তু এনেধৰণৰ ধাৰণা সমূলি ভুল। সুস্বাস্থ্যৰ গৰাকী হ’বলৈ এজন লোক বাহ্যিকভাৱে আৰু মানসিকভাৱে যথেষ্ট টনকিয়াল হ’ব লাগে। সুন্দৰ মন অবিহনে সুন্দৰ দেহৰ কল্পনা অমূলক। বহুতেই ভাবে ভাল খাদ্যইহে এটি সুন্দৰ স্বাস্থ্য গঢ়িব পাৰে, আন বহুতে আকৌ নিজৰ শৰীৰ দেখনিয়াৰ কৰিবলৈ ন ন পদ্ধতি অৱলম্বন কৰা দেখা যায়। নিজকে এগৰাকী অভিনেতা-অভিনেত্ৰীৰ দৰে সুন্দৰ হ’বলৈ চলায় নানা চেষ্টা। যিয়েই নহওক, তাৰকাসকলে ব্যস্ততাপূৰ্ণ জীৱনৰ মাজতো নিজকে আকৰ্ষণীয় কৰি ৰাখিবলৈ কি ধৰণে চেষ্টা চলায় সেই বিষয়ে জনাৰ হেঁপাহ থাকে বহুতৰে। তেনে তাৰকাসকলৰ সুস্বাস্থ্যৰ আঁৰৰ ৰহস্য জনাৰ উদ্দেশ্য আমাৰ এই শিতানৰ। আজিৰ অতিথি জনপ্ৰিয় অভিনয় শিল্পী উৎপল দাস।

সেয়া আছিল ২০০৫ চন। ‘ৰিঙা ৰিঙা মন’ শীৰ্ষক এখন ভিডিঅ’ ছবিয়ে তোলপাৰ লগাইছিল অসমত। প্ৰথমবাৰৰ বাবে এই ছবিখনৰ জৰিয়তে অভিনয় জগতত খোজ পেলোৱা এই অভিনেতাগৰাকীয়ে যোৱা এটা দশক ধৰি অভিনয় জগতত নিজৰ প্ৰতিভাৰ জৰিয়তে মন্ত্ৰমুগ্ধ কৰি ৰাখিছে দৰ্শকক। শান্ত-সৌম্য, ধীৰ-স্থিৰ, অপৰূপ সৌন্দৰ্য আৰু আকৰ্ষণীয় ব্যক্তিত্বৰ অধিকাৰী উৎপলৰ অভিনয় দক্ষতাক প্ৰথম স্থান দিবই লাগিব যদিও শাৰীৰিক সৌন্দৰ্যৰ বাবেও তেওঁ দৰ্শকৰ নয়নৰ মণি। মাৰ্জিত আচাৰ-ব্যৱহাৰ, সহজ-সৰল মনৰ অধিকাৰী উৎপলে ৰামধেনু, দুৰ্জন, ৰ’দ, দূৰদৰ্শন আদি চলচ্চিত্ৰ, বহু ভিডিঅ’ ছবি, মিউজিক ভিডিঅ’, ধাৰাবাহিকৰ উপৰি ভ্ৰাম্যমান নাট্যদলত অভিনয় কৰি দৰ্শকৰ সমাদৰ বুটলিছে। অতি নিষ্ঠা সহকাৰে কাম কৰি যাব বিচৰা উৎপলৰ সফলতাৰ আঁৰত আছে এক শৃংখলাবদ্ধ জীৱন। নিজকে স্বাস্থ্যৱান কৰি ৰখা সন্দৰ্ভত অভিনেতাগৰাকীয়ে কয়- ব্যস্ততাৰ বাবে সময় বেছি নাপাওঁ যদিও খোৱা-বোৱাত খুব গুৰুত্ব দিওঁ। তেলজাতীয় খাদ্য অধিক পৰিমাণে নাখাওঁ। যথেষ্ট পৰিমাণে আঁহজাতীয় খাদ্য, শাক-পাচলি, ফলমূল খাবলৈ চেষ্টা কৰোঁ। পৰাপক্ষত ফলমূল চোবাইহে খাওঁ। পেকেজিং ফুড, জুচ কম পৰিমাণে খাওঁ। দিনটোত বেছি পৰিমাণে পানী খাওঁ। খোৱা-বোৱা শোৱাৰ মাজত ভাৰসাম্য ৰখাৰ চেষ্টা কৰোঁ। অভিনেতাগৰাকীৰ মতে লাইফষ্টাইল মেনেজমেণ্ট সকলোৱে মিলাই ল’ব পাৰিলে জীৱন সহজ হৈ পৰে। আমাৰ বহুতে শৰীৰচৰ্চা একেবাৰে নকৰে। শৰীৰচৰ্চা মানেই কেৱল জীমলৈ যোৱাটোৱেই নুবুজায়। দৈনন্দিন জীৱনত আমি যিমান পৰিশ্ৰম কৰা প্ৰয়োজন সেয়া কৰাৰ পৰিৱৰ্তে কম দুৰত্বৰ স্থানলৈ খোজকাঢ়ি যাবলৈ হেলা কৰোঁ। ইয়াৰ বিপৰীতে গাড়ী লৈহে যাওঁ। শিল্পীগৰাকীয়ে আৰু কয় যে বাহ্যিক ৰূপটো ধৰি ৰখাৰ বাবে মানুহৰ আভ্যন্তৰীণ অংগ-প্ৰত্যংগসমূহ সঠিকভাৱে ৰখাটো অতি গুৰুত্বপূৰ্ণ। আমাৰ বহুতেই নিজৰ ল’ৰা-ছোৱালীক থলুৱা খাদ্য, শাক-পাচলি, ফলমূল আদি খাবলৈ দিয়াৰ বিপৰীতে ফাষ্টফুডৰ প্ৰতি আকৃষ্ট কৰাত অৰিহণা যোগাই আহিছে। যিটো শৰীৰৰ বাবে অতি ক্ষতিকৰ। কেৱল বাহু শক্তিশালী নাইবা ছিক্স পেকৰ শৰীৰ এটাই সকলো নহয়। শাৰীৰিকভাৱে কিমান শুৱনি সেয়া পিছৰ কথা, কিন্তু মূল কথাটো হৈছে আপুনি কিমান পৰিশ্ৰম কৰিব পাৰে। কেতিয়াবা দুই-তিনি দিন একেৰাহে নোশোৱাকৈ কাম কৰিবলগীয়া হোৱাৰ পাছতো ভাগৰি নপৰা অভিনেতাগৰাকীৰ মতে মানুহে নিতৌ ব্যায়াম কৰাৰ লগতে দৌৰিব লাগে। আজিকালি ল’ৰা-ছোৱালীৰ অধিকাংশই কষ্ট নকৰা আৰু এলেহুৱা স্বভাৱৰ বাবে আমাৰ আয়ুস কমি আহিছে। যুৱপ্ৰজন্মৰ প্ৰতি তেওঁৰ আহ্বান- মাদক দ্ৰব্য ত্যাগ কৰক আৰু হকে-বিহকে এনেয়ে সময় অতিবাহিত কৰাতকৈ সময়ৰ সদ্ব্যৱহাৰ কৰিবলৈ শিকক। ব্যস্ততাপূৰ্ণ জীৱনৰ মাজতো উচিত সময়ত উচিত পৰিমাণে খাদ্য খাবলৈ চেষ্টা কৰা অভিনয় শিল্পীগৰাকীৰ প্ৰিয় আহাৰ প্ৰ’টিন জাতীয় খাদ্য মুৰ্গীৰ মাংস। কম তেলত মুৰ্গী মাংস বনাই খাই ভাল পায় তেওঁ। একেদৰে কেঁচা শাক-পাচলি মগু, ফলমূল আৰু মিঠা খাদ্য খাই যথেষ্ট ভাল পায় শিল্পীগৰাকীয়ে। কিন্তু পৰিমিত আহাৰহে তেওঁ গ্ৰহণ কৰে। শিল্পীগৰাকীৰ মতে স্বাস্থ্য সন্দৰ্ভত সজাগতা অনাৰ উদ্দেশ্যে বিদ্যালয়সমূহতো ফিটনেছ সম্পৰ্কীয় পাঠ্যক্ৰমৰ ব্যৱস্থা কৰাটো অতি প্ৰয়োজন।

(উৎসঃ নিয়মীয়া বাৰ্তা, কিশোৰ গোস্বামী)।

তৰমুজ শৰীৰৰ বাবে কিমান উপকাৰীঃ

 

গৰমৰ দিনত সহজলভ্য ফলসমূহৰ অন্যতম তৰমুজ। পানীৰ বিকল্প হিচাপে এইবিধ ফলে ভাল কাম কৰে। শৰীৰত পানীৰ ঘাটি পূৰণ কৰাৰ লগতে শক্তি দিয়ে। তৰমুজত ৯২ শতাংশ পানী থাকে। যিয়ে শৰীৰক ডিহাইড্ৰেচনত ভোগাৰ পৰা ৰক্ষা কৰে। এইবিধ ফলত ২১ শতাংশ ভিটামিন চি, ১৮ শতাংশ ভিটামিন এ, ৫ শতাংশ পটাছিয়াম, ৪ শতাংশ মেগনেছিয়াম, ৩ শতাংশ ভিটামিন বি-১, বি-৫ আৰু বি-৬ থাকে। গৱেষকসকলৰ মতে তৰমুজত এনে কিছু উপকাৰী উপাদান পোৱা যায়, যিয়ে কৰ্কট প্ৰতিৰোধত সহায় কৰে। চুলি আৰু ছালৰ বাবে অতি উপকাৰী তৰমুজ। ছাল পৰিষ্কাৰ কৰি ৰখাৰ লগতে চুলি মজবুত কৰাত সহায় কৰে এইবিধ সুস্বাদু ফলে। একেদৰে হজম শক্তি বৃদ্ধিতো গুৰুত্বপূৰ্ণ ভূমিকা আছে তৰমুজৰ।

(উৎসঃ নিয়মীয়া বাৰ্তা)।

আম খাওক নিৰোগী হৈ থাককঃ

 

ফলৰ ৰজা আম শৰীৰৰ বাবে অতি উপকাৰী। সকলোৰে প্ৰিয়। পকা আমত প্ৰচুৰ পৰিমাণে লৱণ, ভিটামিন এ, ভিটামিন চি, ভিটামিন বি-৬, পটাছিয়াম, কপাৰ, এমিন’ এচিড, বিটা কেৰ’টিন, এণ্টিঅক্সিডেণ্ট, প্ৰ’টিন, টাৰটাৰিক এচিড, চাইট্ৰিক এচিড পোৱা যায়। ফলত চকুৰ দৃষ্টিশক্তি বৃদ্ধি হয়। আমত থকা ভিটামিন বি-কমপ্লেক্সে শৰীৰৰ স্নায়ুত অক্সিজেন সৰবৰাহ কৰে। ফলত শৰীৰ সতেজ হৈ থাকে। টোপনি ভাল হয়। ফলবিধত থকা বিটা কেৰটিন, ভিটামিন ই আৰু ছেলেনিয়ামে হৃদযন্ত্ৰৰ সমস্যা দূৰ কৰে। আমত প্ৰচুৰ পৰিমাণে থকা এণ্টিঅক্সিডেণ্টে স্তন কৰ্কট, কলন কৰ্কট, লিউকোমিয়া, প্ৰষ্টেট কৰ্কট প্ৰতিৰোধ কৰাত সহায় কৰে। প্ৰচুৰ পৰিমাণে থকা লৱণে নখ, দাঁত ভালে ৰাখে। আম খোৱাৰ ফলত দেহৰ ক্ষয় ৰোধ হয়। ওজন হ্ৰাস পায়। একেদৰে ফলবিধত থকা বি-৬এ কিডনী ষ্টোনৰ সম্ভাৱনা হ্ৰাস কৰে।

(উৎসঃ নিয়মীয়া বাৰ্তা)।

মগু মাহৰ ঔষধি গুণঃ

 

মগু এবিধ মাহজাতীয় উদ্ভিদ। ইয়াৰ মাখি পাতৰ সংখ্যা বিযোৰ। ইয়াৰ চিৰা (ফল) ১০ৰ পৰা ১২ চেণ্টিমিটাৰমান দীঘল হয় আৰু ০.৫ চেণ্টিমিটাৰমান বহল হয়। চিৰাবোৰত প্ৰায় ১০-১২টা মানকৈ বীজ থাকে। ইয়াক সাধাৰণতে দাইল হিচাপে খোৱা হয় যদিও বিভিন্ন পূজাত প্ৰসাদ হিচাপেও আগবঢ়োৱা হয়। মগু মাহ এনেয়ো তিয়াই খোৱা হয়। ই এবিধ পুষ্টিকৰ খাদ্য। ই প্ৰ’টিনযুক্ত। মগু মাহৰ পৰা বৰফি, হালোৱা আদি উপাদেয় খাদ্য তৈয়াৰ কৰা হয়। ইয়াক পিহি আদা-নহৰু, জলকীয়াৰে তৈয়াৰ কৰা চাটনিও সোৱাদযুক্ত। মগু মাহৰ ঔষধি গুণো আছে। ইয়াৰ কিছুমান ঔষধি গুণ এনেধৰণৰ-

  • পিত্তশূল ৰোগীৰ বাবে মগুমাহ উপকাৰী।
  • মগুমাহ সহজে হজম হয় কাৰণে ইয়াক ৰোগীৰ পথ্য হিচাপে ব্যৱহাৰ কৰা হয়।
  • গোটা মগুমাহ তিয়াই পুৱা খালী পেটত খালে কোষ্ঠকাঠিন্য দূৰ হয়।
  • মগুমাহ বটি মুখত লগালে ছাল নিমজ আৰু সজীৱ হয়।

(উৎসঃ অসম বাণী, ললিতা শৰ্মা লহকৰ)।

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate