অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

সুস্বাস্থ্য ৰক্ষাত মানসিক প্ৰভাৱ :

সুস্বাস্থ্য ৰক্ষাত মানসিক প্ৰভাৱ :

 


আয়ুৰ্বেদিক চিকিৎসা পদ্ধতি অনুযায়ী এজন ব্যক্তি শাৰীৰিক ( দোষ ধাতু মল মূলং হি শৰীৰং) আৰু মানসিক ভাৱে সুস্থ হলেহে স্বাস্থ্যৱান হয় । বেক্টেৰিয়া, পেৰাচাইট, ভাইৰাছ , প্ৰদূষণ, ফুলৰ ৰেণুৰ পৰা হোৱা এলাৰ্জীৰ কাৰণে শাৰীৰিক ৰোগ উৎপন্ন হয় । কিন্তূ মানসিক ৰোগ উৎপন্নৰ ক্ষেত্ৰত ওপৰোক্ত কাৰকৰ প্ৰভাৱ নাথাকে। অধিক সংখ্যাক মানসিক ৰোগ নিজে সৃষ্টি কৰা। ঋণাত্মক চিন্তা ধাৰাও এই ৰোগৰ এক মূখ্য কাৰণ । বহুক্ষেত্ৰত এগৰাকী মহিলাৰ কাৰণেও গোটেই ঘৰখনৰ ব্যক্তি মানসিক বিকাৰগ্ৰস্ত হব পাৰে। যেনে ধৰক , পত্নীয়ে ৰাতিপূৱাৰ পৰা স্বামীক সদায় ভোৰভোৰাই থাকে আপুনি কিডাল কৰিছে। অমুকাই সাধাৰণ চাকৰি কৰে যদিও নগৰত কেবাটাও প্ৰাসাদোপম অট্টালিকা, কেবাখনো বিলাসী গাড়ী, লৰা-ছোৱালী বাহিৰত পঢ়ে , ঘৈণীয়েকৰ ডিঙিত হীৰাৰ চেইন ,বহুত সুখী পৰিয়াল।আমাৰ আছে কি, তাহানিৰ মাৰুতি 800 কাৰ , মোৰ ডিঙিত মণিপুৰী গল্ডৰ চেইন, শহুৰ দেউতাই বনোৱা পুৰণি আসাম টাইপৰ ঘৰ, মোৰ লগৰীয়াক আমাৰ ঘৰলৈ মাতিবলৈকে লাজ লাগে , ইত্যাদি চিন্তা ধাৰা বিলাক হৈছে মানসিক ব্যাধি।
আছলতে চাবলৈ গলে দুয়োটা পৰিয়াল মানসিক বিকাৰগ্ৰস্ত। কাৰণ প্ৰথম পৰিয়ালত ঘৈণীয়েকৰ টেকটেকনিৰ কাৰণে ঘৰুৱা পৰিবেশ বিনষ্ট , সন্তানে ভালকৈ পঢ়িব নোৱাৰে আৰু স্বামী হতাশগ্ৰস্ত , আনহাতে মহিলা গৰাকীও হৈ পৰে খিংখিঙীয়া।
দ্বিতীয় পৰিয়ালৰ অৱস্থাও তথৈবচ, দূৰ্নীতিৰ টকাৰে দেখাত ধনী যদিও নাই কোনো মানসিক শান্তি। নিচাসক্ত দঙ্কী আৰু মঙ্কীয়ে পকেটমাণি নাপালে চিধাই মম আৰু ডেডৰ গলটোত চেপি ধৰে । ঘৰুৱা অশান্তি,নানান দু:চিন্তাত আক্ৰান্ত হৈ নিদ্ৰাহীনতাত ভোগা আঢ়ৈকুৰি বছৰীয়া ডেড এদিন চিৰনিদ্ৰাত মগ্ন হ'ব । ওপৰৰ পৰা আত্মাই হুমুনিয়াহ কাঢ়ি চাই থাকিব, লুন্ঠিত ধনৰ বিশাল সম্পত্তি কৰিব নোৱাৰিলো ভোগ‌।
লোভ, মোহ, ঈৰ্ষা, দ্বেস, হিংসা আদিৰ পৰা নিজৰ মনটো সংযত ‌কৰিব পাৰিলেই মানসিক ব্যাধিৰ পৰা ৰক্ষা পাব পাৰি। সুখ আৰু শান্তি দুটা বেলেগ বস্তু। ধনাত্মক চিন্তা ধাৰাৰ মাজেৰে আমি দুয়োটা পাব পাৰো। সেয়েহে প্ৰখ্যাত আয়ুৰ্বেদাচাৰ্য চৰক, বাগভট্টই মানসিক ব্যাধিৰ পৰা বিৰত থকাৰ বাবে কিছুমান উপদেশ দিছে যিবোৰ সম্পূৰ্ণ বাস্তৱ সম্পন্ন। ইয়াত অষ্টাঙ্গ হৃদয়ত থকা দহবিধ উপদেশৰ সংক্ষিপ্ত বিবৰণ উল্লেখ কৰা হৈছ
" হিংসা স্তেয়া অন্যথাকামং পৈশুন্য পৰুষানৃতে
সন্ভিন্নালাপং ব্যাপাদম্ অভিধ্যা দৃগ্বিপৰ্যয়ম্
পাপং কৰ্মেতি দশধা কায়বাঙ্ মানসৈস্তয়জেত্"
(১) হিংসা- হিংসা ভাৱ মনলৈ আনিব নালাগে। আন ব্যক্তিক আঘাত অথবা নিৰ্যাতন কৰিব নাপায়।
(২) স্তেয়া-চুৰি কাৰ্য্য আৰু ডকাইতিৰ পৰা বিৰত থাকিব লাগে।
(৩) অন্যথাকাম- অবৈধ যৌনাচাৰত লিপ্ত হব নালাগে।
(৪) পৈশুন্য- মুখেৰ ভাল থাকি পিছফালৰ পৰা কাকো আক্ৰমণ কৰিব নালাগে‌।
(৫) পৰুষ- কেতিয়াও আনক বেয়া কথা কব বা কৰ্কথনা কৰিব নালাগে।
(৬) অনৃত ভাষণ- কেতিয়াও মিছা কথা কব বা ফাকি দিব নালাগে।
(৭) সংভিন্ন আলপ- সমাজত সংঘাত সৃষ্টি কৰিব পৰা, বিভ্ৰান্তিমূলক, অনৈকতা সৃষ্টি কৰিব পৰা কথা কেতিয়াও কব নালাগে।
(৮) ব্যাপদ- কাজিয়া আৰু ইচ্ছাকৃত অন্যায় কামৰ পৰা বিৰত থকা।
(৯) অভিধ্যা- ঈৰ্ষাপৰায়ন মনোভাৱ পৰিত্যাগ কৰিব লাগে। আনৰ উন্নতি দেখাপাই জ্বলি-পুৰি মৰিব নালাগে।
(১০) দৃগবিপৰ্যয়-বিজ্ঞ আৰু জ্যেষ্ঠসকলৰ ওচৰত বিশ্বাস ভঙ্গ, দোষণীয় আৰু ভুল বুজাবুজি সৃষ্টি হব পৰা ধৰণৰ কাম কৰিব নালাগে।

লেখক: ডা:মনোজ কুমাৰ শইকীয়া
ফোন নং: 9435209704

উৎস: স্বাস্থ্য দ্য হেলথ ছলিউশ্যনছ

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate