অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ত্ৰিকোণাসন :

ত্ৰিকোণাসন :

 

শৰীৰটোক তিনিকোণীয়া মুদ্ৰাত ৰখা হয় বাবে এই আসনটোক ত্ৰিকোণাসন বুলি কোৱা হয়।

প্ৰায়োগিক বিধি :

এই আসনটি অনুশীলন কৰাৰ আগতে প্ৰস্তুত হ’বলৈ আপুনি বিশ্ৰামৰ ভংগীত থিয় হওক। দুয়োটা ভৰিৰ মাজত প্ৰায় এফুটমান ব্যৱধান ৰাখিব। সোঁহাতখন ওপৰলৈ পোন কৰি উঠাওক। ওপৰলৈ তোলা হাতখন মূৰত লগাই মূৰটোৰ সৈতে বাওঁফালে হাউলি যাওক আৰু বাওঁ হাতখনে বাওঁ ভৰিৰ পানী গাঁঠিৰ তলত স্পৰ্শ কৰক।

এই ক্ৰিয়া কৰাৰ আগতে হাতখন ওপৰলৈ তোলাৰ লগে লগে দীঘলীয়াকৈ উশাহ লওক, বাওঁ হাতেৰে বাওঁ ভৰিৰ পানী গাঁঠি স্পৰ্শ কৰাৰ লগে লগে নিশ্বাস এৰক।

এই ক্ৰিয়াটোক এতিয়া ওলোটাকৈ কৰক অৰ্থাৎ বাওঁহাতখন ওপৰলৈ উঠাওক আৰু সোঁ হাতখনেৰে সোঁ ভৰিৰ পানী গাঁঠি স্পৰ্শ কৰক।

ত্ৰিকোণাসনত ধ্যান -

ত্ৰিকোণাসন ‘ধ্যান’ কৰিব পৰা আসন নহয়। এই এটি স্বাস্থ্য ৰক্ষাৰহে ব্যায়াম।

উপকাৰিতা:

এই আসন নিয়মীয়াকৈ অনুশীলন কৰিলে বৃহদান্ত্ৰ, প্লীহা, লিভাৰ(যকৃৎ) কঁকাল, মেৰুদণ্ড, পিঠি, বাহু, ভৰি আদিৰ ওপৰত প্ৰভাৱ পৰে। পেশী আৰু স্নায়ুবিলাক শক্তিশালী হয়। কঁকাল সুগঠিত আৰু সুগঢ়ী হয়।

সাৱধানতা:

*উত্তৰ পিনে মুখ কৰি এই আসন নকৰিব।

*এই আসন কৰাৰ সময়ত ভৰি দুটা যিমান পাৰি পোনকৈ ৰাখক, চাব যতে ভাজ নেলাগে।

অৰ্ধচন্দ্ৰাসন -

শুক্লপক্ষৰ সাত বা আঠ দিন পাৰ হৈ যোৱাৰ পিছত চন্দ্ৰাটো যিটো ৰূপত দেখা যায়, শৰীৰটো এক নিৰ্দিষ্ট মুদ্ৰাত আসন কৰি সেইটো ৰূপতে সজাব পৰা যায় আৰু সেইটো আসনকে অৰ্ধচন্দ্ৰাসন বুলি কোৱা হয়।

প্ৰায়োগিক বিধি:

পোন হৈ থিয় হৈ ভৰিৰ দুয়োটা গোৰোহা লগ লগাই লওক। পতা দুখন ৪৫° কোণ কৰি ৰাখক। দুয়োটা বাহু ওপৰলৈ উঠাওক। হাত দুখন নমস্কাৰ কৰাৰ ভংগীত ৰাখক।

দীঘলীয়াকৈ গভীৰ উশাহ লওক আৰু হাত দুখন ওপৰলৈ নি বাওঁফালে হাউলি যাওক। উশাহ এৰি পূৰ্বৰ অৱস্থালৈ আহক। পুনৰ শ্বাস লৈ আৰু পূৰ্বৰ দৰে সোঁফালে হাউলি দিয়ক। মণিপুৰ চন্দ্ৰৰ ফালে মনোযোগ দিয়ক। (এই চক্ৰৰ কাৰণে ‘কুণদলিনী’ দ্ৰষ্টব্ৰ)। এই ব্যায়ামটো আপুনি ভাগৰ নলগালৈকে কৰিব পাৰে, কৰিবও লাগে।

অৰ্ধচন্দ্ৰাসনত ধ্যান -

এইটো প্ৰধানতঃ এটি শাৰীৰিক ব্যায়াম। এই আসন অনুশীলনৰ সময়ত শৰীৰৰ মণিপুৰ চক্ৰৰ ওপৰত ‘ধ্যান’ কেন্দ্ৰিত কৰিলে অধিক উপকাৰ পোৱা যায়।

উপকাৰিতা:

প্লীহা, লিভাৰ, বৃহদান্ত্ৰ, মেৰুদণ্ড আৰু কঁকালৰ সন্ধিৰ হাড়বিলাকক শক্তিশালী আৰু সুস্থ কৰি তোলে। কঁকাল, মেৰুদণ্ড, বাহু, পিঠি আদি অংশৰ বাবে ই এক উত্তম ব্যায়াম। এই আসনৰ অনুশীলনে শৰীৰৰ পেশী, স্নায়ু আদি নমনীয় আৰু সক্ষম কৰি ৰাখে।

মহিলাৰ কাৰণে এই আসন অতি উত্তম আৰু মহিলাৰ ভালেমানে ৰোগ এই আসনে প্ৰতিৰোধ কৰিব পাৰে।

সাৱধানতা:

*উত্তৰ ফালে মুখ কৰি এই আসন নকৰিব।

*ভৰি আৰু বাহু পোনকৈ ৰাখিব।

*আৰম্ভণিতে আপুনি বৰ বেছিকৈ হাউলিব নোৱাৰিব। সেয়ে লাহে লাহে হাউলাৰ অভ্যাস কৰক।

তাড়াসন(তাল আসন):

তাড়াসন কৰিলে শৰীৰৰ মুদ্ৰা তাল গছৰ দৰে পোন আৰু ওখ হ’ব পাৰে। সেয়ে এই আসনক ‘তাড়াসন’ বুলি হোৱা হয়।

প্ৰায়োগিক বিধি:

পাতল তুলি বা কম্বলৰ ওপৰত পোন হৈ থিয় হওক আৰু ভৰিৰ দুয়োটা গোৰোহা লগ লগাই পতা দুতা ৪৫° কোণ কৰি ৰাখক। শৰীৰটোক সম্পূৰ্ণ পোন কৰি ৰাখক। দীঘলীয়াকৈ উশাহ লৈ দুয়োখন হাত ওপৰলৈ উঠাই লৈ যাওক আৰু উশাহ বন্ধ কৰি(কুম্ভক) ৰাখক। হাতৰ তলুৱা দুখন মুখামুখিকৈ ৰাখক। গোৰোহা দুটা ওপৰলৈ উঠাই ভৰিৰ আগত ভৰ দি থিয় হৈ সমস্ত শৰীৰটো ওপৰৰ পিনে উঠাই ৰাখক।

উশাহ বন্ধ কৰি ৰাখিব পৰালৈকে এই আসন কৰক। বেছি জোৰ দি উশাহ বন্ধ ৰখাৰ চেষ্টা নকৰিব। এইবাৰ উশাহ এৰি হাত দুখন তললৈ নমাওক আৰু গোৰোহা দুতাও তললৈ নমাই মজিয়াত লগাই আসনটি শেষ কৰক। এই আসন মজিয়াত শুই লৈও কৰিব পাৰি। বেৰত আউজি লৈও এই আসন কৰিব পাৰি।

তাড়াসনত ধ্যান -

এই আসনত উপবিষ্ট হৈ ধ্যান অনুশীলন কৰিলে আশাতীত উপকাৰ হয়। সিদ্ধ লাভ কৰিবলৈ এই আসনত ‘ধ্যান’ কৰিলে উপযুক্ত ফল পাব পাৰি।

উপকাৰিতা:

এই আসন অভ্যাস কৰিলে পুৰুষ-মহিলা উভয়ে শৰীৰৰ উচ্চতা বৃদ্ধি কৰিব পাৰে। লগতে মেদবহুলতাও দূৰ হয়। বেঁকা হৈ পৰা মেৰুদণ্ড পোন কৰাৰ বাবে নাভি-পেট আদি সুগঢ়ী কৰাত, বক্ষস্থল সুদৌল কৰাৰ লগতে ৰক্ত সঞ্চালনো স্বাভাৱিক হৈ পৰে। এই আসনৰ অভ্যাসে কঁকালৰ বিষ, চায়েনিকা, চাৰ্ভাইকেল স্পণ্ডিলাইটিচ আদি ৰোগ নিৰাময় কৰে। এই আসন কৰি থাকিলে শৰীৰৰ স্নায়ুতন্ত্ৰও সুস্থ আৰু সক্ৰিয় হৈ উঠে।

সাৱধানতা:

*উত্তৰ দিশে মুখ কৰি বা উত্তৰ দিশে মূৰ কৰি শুইহে এই আসন অনুশীলন কৰা উচিত।

*এই আসনৰ বাবে অংগ সঞ্চালন অতি ধীৰ-স্থিৰভাৱে কৰিব লাগে।

উৎস: স্বাস্থ্য আৰু দীৰ্ঘজীৱন



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate