অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

কান্ধৰ গাঁঠি সুলকি যোৱাৰ সমস্যা

কান্ধৰ গাঁঠি সুলকি যোৱাৰ সমস্যা

 

কান্ধ শৰীৰৰ এনে এটি অংশ যি তিনিডাল হাড়, চাৰিটা জোৰা আৰু ত্ৰিশটা মাংশপেশীৰ সমন্বয়েৰে তৈয়াৰী । এই ত্ৰিশটা মাংশপেশীৰ মাজৰ চাৰিটা পেশী আৰু চাৰিটা জোৰাৰে গঠিত গ্লেনো-হিউমেৰাল জইণ্ট খুবেই গুৰুত্বপূৰ্ণ । মানৱ শৰীৰৰ কান্ধৰ গাঁঠি গঠনগতভাৱে খুবেই অস্থিতিশীল, কিন্তু শৰীৰৰ অন্যান্য গাঁঠিবোৰৰ তুলনাত সকলোতকৈ বেছি লৰচৰ হয় । ফলত অতি সহজেই এই গাঁঠিটো ডিছপ্লেচমেণ্ট হয় বা সুলকি যায় । কোনো গাঁঠি একাধিকবাৰ সুলকি গ’লে তাক ৰিকাৰেণ্ট ডিছপ্লেচমেণ্ট বা ৰিকাৰেণ্ট চাবলেক্সন বোলা হয় ।

এবাৰ গাঁঠি ডিছপ্লেচমেণ্ট হ’লে পৰৱৰ্তী সময়ত জোৰাডাল শতকৰা ৮০% সুলকি যোৱাৰ সম্ভাৱনা থাকে । প্ৰথম আঘাতৰ ২ বছৰমানৰ ভিতৰতে এই অসুবিধা বাঢ়ি গৈ থাকে । সন্মুখৰ ফালে শতকৰা ৯৪%, পিছফালে ৪% আৰু তলফালে ১% ডিছপ্লেচমেণ্ট হয় । জন্মগতভাৱে জইণ্টৰ লিগামেণ্ট আৰু কেপচুল ঢিলা থাকিলে জইণ্টটো সকলো ফালে ডিছপ্লেচমেণ্ট হোৱাৰ সম্ভাৱনা থাকে । ক্ৰিকেট, ভলীবল, বাস্কেটবল, জেভলিন থ্ৰ’ খেলা খেলুৱৈৰ মাজত কান্ধৰ জইণ্ট ডিছপ্লেচমেণ্টৰ সম্ভাৱনা বেছি । ষ্ট’ক আৰু পেশী দুৰ্বলতা ৰোগৰ বাবে বেছি দুৰ্বল হ’লে জোৰা সুলকি যোৱাৰ সম্ভাৱনা বহুত থাকে । ইয়াৰ উপ ই প্ৰথম ডিছপ্লেচমেণ্টৰ পাছত সাৱধানতা অৱলম্বন নকৰিলে জোৰাডাল বাৰে বাৰে সুলকি যায় । গাঁঠি ডিছপ্লেচমেণ্ট হোৱাৰ ফলত কান্ধত অসহ্যকাৰ বিষ হয় । অৱশ্যে বাৰে বাৰে জইণ্ট ডিছপ্লেচমেণ্ট হ’লে কান্ধত বিষৰ পৰিমাণ কম অনুভৱ হয় । জোৰা সুলকি যোৱাৰ পাছত বাহু এটা নিৰ্দিষ্ট অৱস্থানত থাকে, ফলত লৰচৰ কৰিব পৰা নাযায় । জইণ্ট ডিছপ্লেচমেণ্ট হ’লে জইণ্টৰ ঠাইখিনি খালী আৰু ডিছপ্লেচমেণ্টৰ ঠাইত ফুলি উঠা দেখা যায় । কেতিয়াবা কেতিয়াবা টোপনিৰ সময়ত, সাঁতোৰাৰ সময়ত আৰু খেলা-ধুলাৰ সময়ত বাহুৰ এটা নিৰ্দিষ্ট অংশৰ লৰচৰ হোৱাৰ ফলত কান্ধৰ গাঁঠি সুলকি যায় । ইয়াৰ উপৰি ওপৰফালে কিবা ধৰিব বা বাছৰ হেণ্ডেল ধৰি বাছত উঠাৰ চেষ্টা ক ইলেও জোৰা সোলকি যোৱাৰ সম্ভাৱনা বহুত থাকে । জোৰা প্ৰথমে ডিছপ্লেচমেণ্ট হোৱা প্ৰায় ৪০% ৰোগীৰ ক্ষেত্ৰত হিউমেৰাল হে’ড ফ্ৰেকচাৰ হয় । বাৰে বাৰে জোৰা ডিছপ্লেচমেণ্টৰ বাবে গ্লেন’য়েড ৰিম (ব’নি বেংকাৰ্ট) ভাঙি যায়, ফলস্বৰুপে গাঁঠিত অস্থিঅ’আৰ্থ্ৰাইটিছ আৰু জইণ্ট নষ্ট হয় । বয়স্ক মানুহৰ জোৰাৰ পেশী ছিঙি যোৱাৰ ফলত হাত ওপৰলৈ তুলিব নোৱৰা হয় । স্কেপুলাৰৰ অনিয়মত লৰচৰ হোৱাৰ বাবে পেশী শুকাই যায় আৰু পিঠিত প্ৰচণ্ড বিষ অনুভৱ হয় ।

পৰীক্ষা-নিৰীক্ষা -

কান্ধৰ গাঁঠি ডিছপ্লেচমেণ্টৰ চিকিৎসাৰ আগত চিকিৎসকৰ পৰামৰ্শ মতে এক্স-ৰে, অৰ্থ’গ্ৰাফি, এম আৰ আই আদি পৰীক্ষাৰ মাধ্যমত ৰোগ সম্পৰ্কে নিশ্চিত হ’ব পাৰি ।

প্ৰতিকাৰ আৰু চিকিৎসা -

বাৰে বাৰে গাঁঠি সোলকি যোৱা ৰোগী ঔষধ খাই ভাল পোৱাৰ সংখ্যা তেনেই সীমিত । অস্ত্ৰোপচাৰেই ইয়াৰ একমাত্ৰ চিকিৎসা । সামূহিকভাৱে কিছুদিনৰ বাবে সকাহ পাবলৈ বাহুৰ যিটো মুভমেণ্টত কান্ধৰ জোৰা সুলকি যায়, সেইধৰণৰ মুভমেণ্ট নৰি পেশী শক্তিশালী হোৱা ব্যায়াম কৰিব পাৰি । বিভিন্ন পদ্ধতিৰে জইণ্ট ডিছপ্লেচমেণ্টৰ অস্ত্ৰোপচাৰ কৰিব পৰা যায় । ইয়াৰে ‘লেটাৰজেট’ পদ্ধতিত অস্ত্ৰোপচাৰ কৰিলে জোৰাৰ স্থিতিশীলতা বেছি হয় ।

বৰ্তমান সময়ত গাঁঠিৰ চিকিৎসাত সফল আৰু জনপ্ৰিয় কাৰ্যকৰ সমাধান আনি হে বিস্ময়কৰ অৰ্থ্ৰ’ছস্ক’পি নামৰ অস্ত্ৰোপচাৰটোৱে । অৰ্থ’পেডিক চিকিৎসাৰ বৰ্তমান যুগৰ জনপ্ৰিয় সৰ্বাধুনিক পদ্ধতি এইটো । সৰু ছিদ্ৰাৰ মাধ্যমত কেমেৰাযুক্ত অৰ্থ্ৰ’ছস্ক’প জোৰাৰ ভিতৰত প্ৰৱেশ কৰাই যন্ত্ৰৰ লগত সংযুক্ত বাহিৰ মনিটৰত চাই লেবৰাম, কেপচুল আৰু লিগামেণ্ট ৰিপায়েৰিং কৰা হয় । এই পদ্ধতিৰে ৰোগী অতি সোনকালে সুস্থ হৈ উঠে ।

বিশেষ সতৰ্কীকৰণ -

অত্যধিক বিষৰ পৰা পৰিত্ৰান পাবলৈ ব্যৱহাৰ কৰা পেইনকিলাৰ জাতীয় ঔষধৰ বহুল ব্যৱহাৰৰ ফলত কিডনিত পাথৰ, মাইগ্ৰেন আদি বেমাৰ হ’ব পাৰে ।

লেখক :- ডা: শ্বাহিদুল ইছলাম প্ৰীতম

উৎস :- দৈনিক জনমভূমি



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate