শৰীৰৰ যিকোনো অংশৰ তুলনাত তলপেটৰ চৰ্বি বৃদ্ধি অধিক বিপজ্জনক হ’ব পাৰে । ইয়াৰ সৈতে হৃদৰোগ,ষ্ট্ৰোক আৰু টাইপ টু ডায়েবেটিছ আদি ৰোগৰ কথা জড়িত হৈ আছে।সাধাৰণতে জিনগত কাৰণত তলপেটত চৰ্বি বৃদ্ধি হ’ব পাৰে । একেদৰে খাদ্যাভ্যাস আৰু ক্ৰটিপুৰ্ণ জীৱন-যাপনৰ পদ্ধতিৰ বাবেও পেটত চৰ্বি জমা হ’ব পাৰে।যিয়েই নহওক শৰীৰৰ আকাৰ আপেল আকৃতিৰ হোৱাৰ ফলত হাওঁফাওঁ আৰু তলপেটৰ কৰ্কটত আক্ৰান্ত হোৱাৰ শংকা বহু পৰিমাণে বৃদ্ধি পায় । বিশেষকৈ যুৱতীসকলৰ ক্ষেত্ৰত এই সম্ভাৱনা অতি বেছি । শেহতীয়াভাৱে চলোৱা গৱেষণাত এই তথ্য প্ৰকাশ পাইছে । গৱেষকসকলৰ মতে দেহত ইনছুলিনৰ পৰিমাণ বৃদ্ধি পালে সি বিভিন্ন ধৰণৰ হৰম’ন ক্ষৰণত ব্যাঘাত সৃষ্টি কৰে । ইয়াৰ ফলত শৰীৰৰ বিভিন্ন অংশত চৰ্বিৰ পৰিমাণ বৃদ্ধি পায় । যিসকল মহিলাৰ তলপেটত চৰ্বিৰ পৰিমাণ অধিক,তেওঁলোকৰ হাওঁফাওঁ আৰু তলপেটৰ কৰ্কট ৰোগত আক্ৰান্ত হোৱাৰ শংকাও বহু বেছি । ডেনমাৰ্কৰ নৰ্দিক বায়’ছায়েঞ্চৰ গৱেষকৰ মতে মেন’পজৰ পিছত যুৱতীসকলৰ শৰীৰৰ নিম্নাংশত চৰ্বি জমা হোৱাৰ সম্ভাৱনা দেখা যায় । ইয়াৰ ফলত কৰ্কটৰ শংকাও বৃদ্ধি পায় । সেয়ে বয়স বৃদ্ধিৰ লগে লগে যুৱতীসকলে জীৱন-ধাৰণৰ প্ৰণালীৰ প্ৰতিও গুৰুত্ব দিয়া উচিত ।আনহাতে,ইতালীৰ এদল গৱেষকৰ মতে কৰ্কটৰ বাবে বহু পৰিমাণে দায়ী মেদবহুলতা । গৱেষকসকলে কয় যে খাদ্যাভ্যাসৰ পৰিৱৰ্তন আৰু জীৱন-যাপনৰ পদ্ধতিৰ পৰিৱৰ্তন কৰি পেটৰ চৰ্বি হ্ৰাস কৰিব পাৰি । তেওঁলোকৰ মতে পেটৰ চৰ্বি কমোৱাত গ্ৰীন টী বহু পৰিমাণে সুফলদায়ক । গ্ৰীন টীত থকা কেটেচিন নামৰ পদাৰ্থই শৰীৰৰ কেলৰি প্ৰদাহ কৰি তলপেটৰ চৰ্বি কমোৱাত সহায় কৰে । একেদৰে প্ৰচুৰ পৰিমাণৰ ফলমুল ,শাক-পাচলি খোৱাৰ উপৰি নিতৌ ৩০ ৰ পৰা ৬০ মিনিটৰ ব্যায়ামেও শৰীৰৰ ওজন হ্ৰাস কৰাত গুৰুত্বপুৰ্ণ ভুমিকা পালন কৰে ।
উৎস:নিয়মীয়া বাৰ্তা
শেহতীয়া উন্নীতকৰণ: : 3/27/2020