মূল পৃষ্ঠা / স্বাস্থ্য / ৰোগসমূহ / গলৰ বেমাৰ আৰু ইয়াৰ চিকিৎসা
অংশিদাৰী
Views
  • স্থিতি: সম্পাদনাৰ বাবে মুকলি

গলৰ বেমাৰ আৰু ইয়াৰ চিকিৎসা

গলৰ বেমাৰ আৰু ইয়াৰ চিকিৎসাৰ বিষয়ে লিখা হৈছে ।

 

সাধাৰণতে গলৰ বেমাৰ বুলি ক’লে গল বিষোৱা, গল খজুওৱা বা গলৰ খচখচনি ভাব এটাকে বুজায় । এনে অৱস্থাত কিবা জুলীয়া বা গোটা আহাৰ খালে গলত বিষ অনুভৱ হয় । গলৰ বেমাৰৰ আন লক্ষণবিলাক থাকিলেও ইয়াৰ মূল লক্ষণটো হ’ল বিষ । ইয়াৰ উপৰি-

১) গল শুকাই যোৱা

২) গলৰ চাৰিওফালে থকা গুটিবিলাক ফুলি যোৱা

৩) টনচিলত বগা দাগ হোৱা

৪) মাত ভাঙি যোৱা আদি লক্ষণ দেখা দিয়ে ।

যিকোনো বয়সৰ মানুহৰ এই বেমাৰ হ’ব পাৰে যদিও তলত উল্লেখ কৰাসকলৰ ক্ষেত্ৰত এই বেমাৰ বেছি হয় ।

১) সৰু সৰু ল’ৰা-ছোৱালীৰ

২) ধূমপান কৰাসকলৰ

৩) এলাৰ্জী থকাসকলৰ

৪) দুৰ্বল মানুহসকলৰ

লক্ষণবিলাক কি কি ?

গলৰ বেমাৰ বহু কাৰণত হ’ব পাৰে-

ভাইৰেল ইনফেকচন (Viral infection) :-

গলৰ অসুখৰ বেছি অংশই ভাইৰাছৰ সংক্ৰমণৰ পৰা হয় । সাধাৰণ চৰ্দি বা ফ্লু ইয়াৰ অন্যতম উদাহৰণ । ইয়াৰ উপৰি আন আন ভাইৰাছৰ আক্ৰমণৰ পৰা হোৱা বেমাৰ, যেনে- আই (pox), কাহ(croup) আদি হ’লে গলৰ ওপৰত বিভিন্ন প্ৰভাৱ পেলায় ।

বেক্টেৰিয়াৰ সংক্ৰমণ :-

বেক্টেৰিয়াৰ সংক্ৰমণৰ পৰাও গলৰ বেমাৰ হ’ব পাৰে । ষ্ট্ৰেপ থ্ৰ’ট, ডিপথেৰিয়া, হুপিং কাহ আদি ।

পৰিৱেশজনিত কাৰণ -

আমাৰ পৰিৱেশৰ চাৰিওফালে থকা বিভিন্ন ধৰণৰ প্ৰদূষণজনিত কাৰণত এলাৰ্জী হ’ব পাৰে আৰু এই এলাৰ্জীৰ বাবে ঘন ঘন হাঁচি আৰু নাকেৰে পানী ওলায় । এই বিজলুৱা পানী গলৰ ওপৰ অংশত জমা হৈ খজুৱতি, প্ৰদাহ আৰু বিষৰ সৃষ্টি কৰিব পাৰে ।

১) শুকান বতাহে গলৰ ওপৰত প্ৰভাৱ পেলায় ।

২) অত্যধিক চিগাৰেট খোৱাৰ পৰাও গলৰ বেমাৰ হ’ব পাৰে ।

৩) জোৰে কথা কোৱা বা বেছি কথা কোৱাৰ পৰাও গলৰ বেমাৰ হ’ব পাৰে ।

গেষ্ট্ৰিকজনিত কাৰণ -

গেষ্ট্ৰিকজনিত কাৰণত ঢেকুৰৰ জৰিয়তে যেতিয়া এচিড আমাৰ মুখলৈ আহে তেতিয়া ই গলৰ এক পোৰাণিৰ সৃষ্টি কৰে ।

গলৰ বিষ বা জ্বলা-পোৰাৰ কাৰণে চিকিৎসকৰ পৰামৰ্শ ল’ব লাগেনে ?

গলৰ বেমাৰ (Sore Throat) ৰ বাবে সাধাৰণতে চিকিৎসকৰ পৰামৰ্শ লোৱাৰ প্ৰয়োজন নহয় । কিন্তু অসুখ বেছি দিনলৈ হৈ থাকিলে চিকিৎসকৰ পৰামৰ্শ লোৱাটো আৱশ্যক হয়  ।

তলত উল্লেখ কৰা লক্ষণবিলাক দেখা দিলে চিকিৎসাৰ প্ৰয়োজন হয় ।

১) উশাহ লোৱাত অসুবিধা

২) গাঁঠিৰ বিষ

৩) খাদ্য গিলিবলৈ অসুবিধা

৪) কাণৰ বিষ

৫) গলত ৰঙা ৰঙা দাগ হোৱা

৬) ১০১° ফাৰেনহাইটতকৈ বেছি জ্বৰ হোৱা

৭) গলত কিবা লাগি থকা অনুভৱ হোৱা

৮) দুই সপ্তাহতকৈ বেছি মাত ভাঙি থাকিলে

গলৰ অসুখৰ চিকিৎসা -

গলৰ অসুখৰ চিকিৎসা নিৰ্ভৰ কৰে ইয়াৰ কাৰণৰ ওপৰত । বেছিভাগ গলৰ অসুখৰ চিকিৎসা ঘৰুৱাভাৱে কৰিব পাৰি । যেনে-

১) নিমখীয়া পানীৰে গৰগৰ কৰা

২) গৰম পানীয় বেছি খোৱা

৩) এলাৰ্জী হ’ব পৰা বস্তুৰ পৰা আঁতৰি থকা

৪) গল পৰিষ্কাৰ কৰা চকলেট খোৱা

৫) এণ্টি-ইনফ্লেমেচন ঔষধ লোৱা

যদি বেক্টেৰিয়া সংক্ৰমণৰ বাবে গলৰ অসুখ হয় তেন্তে এণ্টিবায়টিক দিয়া হয় । এক সপ্তাহতকৈ বেছি দিন ঔষধ ল’ব লাগে । কম দিন ঔষধ ল’লে পুনৰ সংক্ৰমনৰ সম্ভাৱনা থাকে ।

গলৰ অসুখৰ হোমিঅ’পেথিক চিকিৎসা -

বেমাৰৰ লক্ষণবিলাক অধ্যয়ন কৰি সঠিক ঔষধ প্ৰয়োগ কৰিলে অতি কম দিনত এই বেমাৰৰ পৰা ৰক্ষা পাব পাৰি । প্ৰায়ে ব্যৱহৃত হোৱা কেইটামান হোমিঅ’পেথিক ঔষধ তলত আলোচনা কৰা হ’ল ।

বেলাডোনা (Belladonna) :-

গলৰ ভিতৰখিনি প্ৰচণ্ড শুকান হৈ থাকে । প্ৰদাহিত হোৱাৰ বাবে গলৰ ভিতৰৰ অংশ টনছিল আদি ৰঙা হৈ যায় । সোঁফালৰ টনছিল বেছি ফুলি যায় । সদায় ঢোক গিলাৰ ইচ্ছা হয় । জুলীয়া আহাৰ খালে বিষ অনুভৱ হয় ।

মাৰ্ক ছল (Merc Sol) :-

গলৰ বেমাৰৰ বাবে ই এটা অতি দৰকাৰী ঔষধ । বিষ, শুকান ভাব আৰু অনবৰত ঢোক গিলাৰ ইচ্ছা থাকে । গলৰ ওচৰত থকা গ্লেণ্ডখিনি ফুলি যায় । মুখৰ পৰা অনবৰত লালটি ওলায় আৰু বেয়া গোন্ধ এটা সদায় থাকে ।

ফাইট’লাক্কা (Phytolacca) :-

গলৰ ভিতৰৰ অংশ ডাঠ ৰঙা বৰণৰ হয় । টনছিল ফুলি যায় ।কিবা খালে বিষ গলৰ পৰা কাণলৈ যায় । কোনো গৰম বস্তু খাব নোৱাৰি । গলত সদায় কিবা বস্তু লাগি থকাৰ অনুভৱ হয় । গলত ঘা হয় আৰু গৰম ভাব এটা থাকে ।

গলৰ অসুখ (Sore Throat) নহ’বলৈ কি কি ব্যৱস্থা ল’ব লাগে -

এই বেমাৰৰ বেছিভাগ কাৰণ হ’ল বেক্টেৰিয়া বা ভাইৰাছৰ আক্ৰমণ, গতিকে সতৰ্কমূলক ব্যৱস্থা গ্ৰহণ কৰিলে ভৱিষ্যতৰ আক্ৰমণৰ পৰা নিজক বচাব পাৰি । বাৰে বাৰে হাত ধোৱাৰ অভ্যাস থাকিলে আমি সহজে সংক্ৰমিত হোৱাৰ পৰা হাত সাৰিব পাৰো ।

তলত উল্লেখ কৰা ব্যৱস্থাবোৰ আমি গ্ৰহণ কৰিব লাগে-

১) আনৰ পানী খোৱা বা আহাৰ খোৱা পাত্ৰ আমি ব্যৱহাৰ কৰিব নালাগে ।

২) পানী আৰু চাবোন নাথাকিলে হেণ্ড ছেনিটাইজাৰ ব্যৱহাৰ কৰিব লাগে ।

৩) সদায়ে বহু মানুহে স্পৰ্শ কৰি থকা স্থানোবোৰ আমি যিমান পাৰো কমকৈ স্পৰ্শ কৰিব লাগে ।

৪) এলাৰ্জীৰ কাৰণ, যেনে- ধূলি (Sust), প্ৰদূষণ আদিৰ পৰা আঁতৰি থাকিব লাগে ।

৫) ধূমপান কৰিব নালাগে ।

৬) ঘৰৰ ভিতৰৰ আৰ্দ্ৰতা স্থিৰ কৰি ৰখাৰ ব্যৱস্থা কৰিব লাগে, যাতে অত্যন্ত শুকান (Dry) অৱস্থাৰ সৃষ্টি নহয় ।

লেখক : ডা: ৰাজুল আলম

উৎস :- জি এনআৰচি স্বাস্থ্য

4.0
সঞ্জয় বৰা Apr 22, 2020 03:07 PM

গলৰ শিৰ বাগৰিলে কি কৰিম

আপোনাৰ পৰামৰ্শ প্ৰদান কৰক

(এই লিখনি সম্পৰ্কে যদি আপোনাৰ কোনো মতামত নাইবা পৰামৰ্শ আছে তেন্তে ইয়াত প্ৰদান কৰক।)

Enter the word
দিক্‌ নিৰ্ণায়ক
Back to top