অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

উৎকৃষ্ট আৰু পুষ্টিকৰ খাদ্য কল

উৎকৃষ্ট আৰু পুষ্টিকৰ খাদ্য কল

 

কল যে দেহৰ বাবে অতি পুষ্টিকৰ খাদ্য- এই কথা শ শ বছৰ আগৰে পৰাই মানুহে উপলব্ধি কৰিছিল । প্ৰায় দুশ বছৰ আগতে উইলিয়াম ৰাইট নামৰ এজন লেখকে ‘কল আৰু কলৰ খেতি’ সম্পৰ্কে চিকিৎসা-বিজ্ঞানৰ এখন আলোচনীত লিখিছিল যে জামাইকাৰ মানুহে নিতৌ কল খায় বাবেই মানুহৰ স্বাস্থ্য-পাতি ভাল আছিল আৰু তেওঁলোক সবল আৰু শক্তিশালী আছিল । কোনো কাম কৰিবলৈ এলাহ নকৰিছিল । আন এটা তথ্য মতে দেশত খাদ্যৰ অভাৱ হোৱাত আফ্ৰিকাৰ কেতবোৰ জনজাতীয় লোকে বছৰৰ কে’বামাহো কল খায়েই জীৱন নিৰ্বাহ কৰিছিল । কালৰ এনে পুষ্টিকৰ খাদ্যৰ গুণাগুণৰ সম্ভেদ পাই কিছু ইংৰাজ ভ্ৰমণকাৰীয়ে কলৰ পৰা তৈয়াৰ কৰা আটাৰ ৰুটী খাই তিনিটা বছৰ পাৰ কৰি দিছিল । স্বাস্থ্যৰ কোনো অৱনতি ঘটা নাছিল । বৰঞ্চ মন আৰু দেহত শক্তি পাইছিল ।

কলৰ ৰাসায়নিক বিশ্লেষণত গৱেষকে পাইছে যে কলত বহুবিধ খনিজ পদাৰ্থ আৰু ভিটামিন থাকে । খনিজ পদাৰ্থৰ ভিতৰত পটাছিয়াম, কেলচিয়াম, মেগনেছিয়াম, ফছফৰাছ, ছালফাৰ, ছডিয়াম, আইৰন আদিয়েই প্ৰধান । (ভিটামিনৰ ভিতৰত এ-বি (থিয়ামাইন), চি (এছকৰবিক এচিড), ৰিব’ফ্লেভিন আৰু নিয়াছিন থাকে । যথেষ্ট পৰিমাণে ভিটামিন-এ আৰু কেলচিয়াম থাকে বাবেই কলে চকুৰ ‘ৰক্ষক’ৰ কাম কৰে আৰু দাঁতৰ সুস্থ-সবল গঠনতো বিশেষ অৰিহণা যোগায় । সেইদৰে অধিক পৰিমাণত আইৰন থাকে বাবেই কলে দেহৰ ৰক্ত বৃদ্ধি কৰে । পটাছিয়ামো সৰহ পৰিমাণত আছে বাবেই দেহৰ স্নায়ুতন্ত্ৰ ৰক্ষা কৰি আছে ।

ৰাসায়নিক বিশ্লেষনত কলত প্ৰ’টিনৰ পৰিমাণ কম । কিন্তু একেলগে সৰহ কল খালে দেহে বহুলাংশে প্ৰ’টিন লাভ কৰে । বুৰঞ্জীৰ পাত লুটিয়ালে দেখা যায় যে কংগোৰ ৰবৰ খেতিত কাম কৰা বনুৱাসকলে খাদ্যৰ অভাৱত কংগোত উপলব্ধ কল যথেষ্ট পৰিমাণে খায়েই বহু মাহ কটাইছিল । সেইবুলি তেওঁলোকৰ স্বাস্থ্যৰ কোনো অৱনতি ঘটনা নাছিল । ৰবৰ খেতিত কাম কৰিবলৈও দেহত শক্তি পাইছিল ।

কলৰ কেলৰি শক্তি অতি বেছি । এটা ডাঙৰ কলৰ পৰা দেহে যথেষ্ট পৰিমাণে তাপ আৰু শক্তি পায় । সেইদৰে কলত গ্লুক’জৰ পৰিমাণ বেছি বাবেই কল খালেই দেহে শক্তি পায় আৰু দেহৰ ভাগৰ তৎকালে আঁতৰে ।

গৱেষণা কৰি বিশেষজ্ঞসকলে পাইছে যে গাখীৰৰ লগত কল খালে ই অতি পুষ্টিকৰ খাদ্য হৈ পৰে । সেইবাবেই গাখীৰ-কল মিহলাই শিশুক নিয়মিতভাৱে খুৱাব লাগে । তাৰ ফলত দেহত ওজন বৃদ্ধি পায় । কল-গাখীৰে বয়সস্থ মানুহৰ শৰীৰতো বয়সৰ চাপ পৰাত বাধা দিয়ে আৰু বহু বছৰলৈকে স্বাস্থ্য অটুট থাকে ।

পুষ্টিহীনতাত ভোগা ৰোগীৰ বাবে কল অতি উত্তম খাদ্য । অন্ত্ৰীয় অসুখৰ বাবে কল অতি প্ৰয়োজন । আলচাৰেটিভ, কলাইটিছ, ডিছেণ্ট্ৰী, এমিবায়’ছিছ আদি ৰোগৰ বাবে কল মহৌষধ । টাইফয়ড ৰোগীৰ বাবেও কল অতি আৱশ্যকীয় খাদ্য ।

দেহত জখম হ’লে অথবা ঘা হ’লে নিতৌ কল খালে সোনকালে ঘা শুকাই যায় । আনহাতে নিতৌ এটা বা দুটাকৈ কল খালে দেহৰ ৰক্তচাপ নিয়মিত অৱস্থাত থাকে । এই তথ্য সদৰী কৰিছে মণিপাল কষ্টুৰীয়া মেডিকেল কলেজৰ এদল গৱেষকে । তেওঁলোকৰ মতে উচ্চ ৰক্তচাপ থকা লোকৰো দহ শতাংশ ৰক্তচাপ নিম্নগামী হয় । কিছু বছৰ আগতে কেমব্ৰিজৰ ডন ক্লিনিকেল নিউট্ৰিচন চেণ্টাৰৰ কেইবাগৰাকী বিজ্ঞানীয়ে এলানি গৱেষণাৰ অন্তত মত প্ৰকাশ কৰিছে যে কলে ভয়াৱহ কেন্সাৰ ৰোগ প্ৰতিৰোধ কৰিব পাৰে । তাৰ কাৰণ কলত কেতবোৰ হজম কৰিব নোৱাৰা শ্বেতসাৰ থাকে আৰু এই শ্বেতসাৰতেই লিভাৰ কেন্সাৰক প্ৰতিহত কৰিব পৰা শক্তি নিহিত থাকে । এইবিধ শ্বেতসাৰ হজম নোহোৱাকৈ কলনলৈ গুচি যায় আৰু তাৰ পিছত তাত থকা বেক্টেৰিয়াসমূহে এইবোৰ ভাঙি কেতবোৰ ফেটী এচিড (বিউটাইৰেট) লৈ পৰিৱৰ্তন কৰে ।

এই বিউটাইৰেটেই কেন্সাৰ কোষৰ বৃদ্ধিত বাধা দিয়ে বুলি গৱেষকসকলে কয় ।

পুৰাকলো এবিধ ভাল পাচলি । তৰকাৰী বনাই খালেও কলত নিহিত গুণাগুণৰ কোনো বিঘ্নিত নহয় । এই তথ্য প্ৰকাশ পাইছে কাৰেণ্ট ছায়েন্স নামৰ আলোচনীত । পুৰাকলৰ পৰা উলিওৱা পাউদাৰ ৰুটী বনাই খাবলৈ বৰ সোৱাদ আৰু অতি পুষ্টিকৰ । পাতল পায়খানা কে’বাবাৰো হ’লে পুৰাকল সিজাই পিটিকা কৰি খালে উপশম হয় । ভীমকলৰ পাউদাৰৰ পৰা দৰবো ওলাইছে- যি শিশুৰ দাঁত, হাড়, পেশী মজবুত কৰাৰ উপৰি দেহত শক্তি প্ৰদান কৰে । সেয়েহে আপোনাৰ খাদ্য তালিকাত পকা কল, ভীমকল অথবা পুৰাকলক স্থান নিদিয়াকৈ নাথাকিব ।

লেখক : ড: পৱিত্ৰ কুমাৰ পাটোৱাৰী

উৎস :- জি এনআৰচি স্বাস্থ্য



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate