সাধাৰণতে আম, কঠাল, বগৰী, আমলখি আদি ফল-মূলকে ধৰি বিভিন্ন সেউজ উপকৰণেৰে তৈয়াৰ কৰা আচাৰ খাই কম-বেছি পৰিমাণে সকলোৱে ভাল পায় । আচাৰ প্ৰস্তুতিকৰণ প্ৰক্ৰিয়া খাদ্য পদাৰ্থ সুৰক্ষিত কৰি ৰখাৰ এক সুন্দৰ উপায় হিচাপে অতীজৰে পৰা ৰন্ধনশালসমূহত প্ৰয়োগ হৈ আহিছে । পুৰণিকালত গ্ৰীষ্মকালীন সময়ছোৱাত গৰম আৰু পানীৰ অভাবৰ বাবে খাদ্য পদাৰ্থৰ উৎপাদন কম হৈছিল । যাৰ ফলত শীতকালত উৎপাদিত খাদ্য পদাৰ্থ বেছিকৈ সংৰক্ষণ কৰাৰ প্ৰয়োজনীয়তা আহি পৰিছিল । এই সমস্যা দূৰ কৰিবলৈ আচাৰ বনোৱাৰ প্ৰক্ৰিয়াৰ আৱিষ্কাৰ হৈছিল।
পৰম্পৰাগত শৈলীত দীঘলীয়া সময়লৈকে আচাৰৰ প্ৰয়োগ কৰিবলৈ বিভিন্ন মছলাৰ লগতে নিমখ, তেল, শুকান জলকীয়া গুড়ি আৰু ভিনেগাৰ জাতীয় উপকৰণৰ ব্যৱহাৰ কৰা হয় । কেচা ফল-মূল অথবা শাক-পাচলিৰ সৈতে এই সামগ্ৰীসমূহ নিৰ্ধাৰিত মাত্ৰা অনুসৰি মিহলাই আচাৰ প্ৰস্তুত কৰা হয় ।
দৈনন্দিন খাদ্যপ্ৰণালীত দেশে-বিদেশে বিশেষ সমাদৰ লাভ কৰা আচাৰৰ গুণাগুণসমূহ উল্লেখনীয় ।আচাৰ খালে শৰীৰৰ পাচন প্ৰক্ৰিয়া সুচাৰু ৰপত সম্পন্ন হয় । আচাৰ হল শৰীৰৰ বাবে প্ৰয়োজনীয় এণ্টি অক্সিডেণ্টৰ এটা ভাল উৎস, যি ৰোগ সৃষ্টিকাৰী ফ্ৰি ৰেডিকেল্চসমূহৰ সংক্ৰমণৰ পৰা আমাক ৰক্ষা কৰে ।
আচাৰ পেটৰ লগতে মগজুৰ বাবেও লাভজনক ।আচাৰত উপলব্ধ প্ৰবায়টিকছ বেক্টেৰিয়া মগজুৰ বাবে উপকাৰী । বৈজ্ঞানিক গৱেষণাৰ দ্বাৰা প্ৰমাণ হৈছে যে কেন্দ্ৰিয় তন্ত্ৰিকা আৰু মগজুৰ মাজত এটা গভীৰ সম্পৰ্ক থাকে । পেট ভালে থাকিলে মগজুৱেও ভাল কাম কৰে । আচাৰ খোৱাৰ ক্ষেত্ৰত দুটামান মন কৰিবলগীয়া কথা আছে । আপোনালোকে যিয়েই আচাৰ নাখাৱক কিয় ঘৰত বনোৱা আচাৰ খোৱাটোহে লাভজনক বুলি কব পাৰি । কিয়নো আচাৰত নিমখৰ পৰিমাণ বেছি থাকে । যাৰ কাৰণে ই স্বাস্থ্যৰ ওপৰত বেয়া প্ৰভাৱ পেলায় । তদুপৰি আচাৰত তেলৰ মাত্ৰা অধিক হোৱাৰ বাবে ই শৰীৰত কলেষ্টৰলৰ পৰিমাণ বৃদ্ধি কৰে । যাৰ বাবে ওজন বৃদ্ধি হয় তথা হৃদয়ৰোগ হোৱাৰ আশংকা থাকে । ঘৰত আচাৰ বনালে আপোনালোকে নিমখৰ লগতে মা-মছলা তথা জলকীয়াৰ পৰিমাণো প্ৰয়োজন মতেহে লব পাৰে, যিটো স্বাস্থ্যৰ ফালৰ পৰা সুবিধাজনক।
লেখক – ৰিদিপ ৰঞ্জন চেতিয়া
শেহতীয়া উন্নীতকৰণ: : 3/9/2020