অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

জাতিলাউ পুষ্টি আৰু ঔষধি গুণ :

জাতিলাউ পুষ্টি আৰু ঔষধি গুণ :

অসমীয়াৰ আভিধানিক অৰ্থত ‘লাউ’ শব্দই এবিধ চিঁচাৰ নিচিনা ডিঙি থকা লতাৰ ফলকে সুচায়। চিঁচা শব্দটো অৱশ্যে আজিৰ চামটোৰ বাবে অচিনাকি হ’ব পাৰে, কাৰণ ইয়াৰ প্ৰচলন আজিকালি নোহোৱাৰ দৰে হৈ পৰিছে। চিঁচা হৈছে ওপৰৰ ফালে ডিঙি থকা বটল। এনে বটল পুৰ্বতে গ্লাছৰ দ্বাৰা নিৰ্মিত আছিল। আজিকালি বটলবোৰ প্লাষ্টিকেৰে নিৰ্মিত হ’ব ধৰিছে আৰু আগেয়ে ব্যৱহাৰ কৰাৰ দৰে কামত তেনে বটলৰ ব্যৱহাৰ এতিয়া নোহোৱা হৈ পৰিছে। প্ৰকৃততে আগেয়ে চিঁচাবোৰ দোকানৰ পৰা কেৰাচিন বা মিঠাতেল ভৰাই অনাত ব্যৱহাৰ হৈছিল। বৰ্তমান চিঁচাৰ স্থান পেকেট বা গেলনে দখল কৰিবলৈ ধৰিছে। সেয়া বাৰু বাদ, মুঠতে লাউ হৈছে লতা গছত লগা এবিধ ডিঙিযুক্ত পাচলি । এনে পাচলিৰে এবিধক জাতিলাউ বুলি কোৱা হয়। ইয়াৰ কোনো নিজা সোৱাদ নথকাত খোৱাৰ সময়ত পানী পানী অনুভৱ হোৱাত বহুতে ইয়াক পানীলাউ বুলিও কয়। আৰু দেখাত বটলৰ নিচিনা হোৱাত ইংৰাজীত ইয়াৰ নাম ৰখা হৈছে Bottle Gourd । ইয়াৰ বৈজ্ঞানিক নাম হৈছে Lagemaria । আগেয়ে ইয়াৰ খেতি সাধাৰণতে ঘৰৰ চালতে কৰা হৈছিল বাবে কবিৰ ‘শুৱনি গাঁৱ’ৰ বৰ্ণনাত তাৰ প্ৰতিফলনো ঘটিছিল-

‘চালত কোমোৰা   লাউ জিকা ভোল

ভঁৰালত জহা ধান

গোহালিত গৰু    পুখুৰীত মাছ

বাৰীত তামোল পাণ’।

বাস্তৱত সম্প্ৰতি আমি দেখিবলৈ পাওঁ যে গাঁৱৰ ঘৰবোৰৰ ছালবোৰ খেৰৰ সলনি টিঙৰ (টিনপাটৰ) হ’ব ধৰাৰ পৰিপ্ৰেক্ষিতত চালত জাতিলাউৰ খেতি কৰা প্ৰথাৰো অৱলুপ্তি ঘটিব ধৰিছে। কিন্তু ইয়াক গ্ৰহণৰ প্ৰতি হ’লে আগ্ৰহ কমা পৰিলক্ষিত নহয়। ইয়াৰ জনপ্ৰিয়তা অসমীয়াসকলৰ মাজত আজিও অক্ষুণ্ণ আছে। বজাৰত লাউ আজিকালি বছৰৰ সকলো সময়তে পোৱাৰ উপায় কৰিছে এচাম কৃষকে। তথাপি অৱশ্যে শীতকালত ওলোৱা নতুন গছৰ লাউৰ এক সুকীয়া তৃপ্তি পোৱা যায়। সাধাৰণতে ইয়াক তৰকাৰী কৰি খোৱা হয় যদিও কুমলীয়া অৱস্থাত ভাজি কৰি খালেও অধিক তৃপ্তি পোৱা যায়। অলপ পুৰঠ হোৱাৰ পিছত অন্য পাচলিৰ লগত মিহলি কৰি, জোলৰ ৰুপত, ঘাইকৈ মাছৰ জোল প্ৰস্তুতিত, সৰিয়হ বা আফুগুটিৰে ভাজি কৰি বা টেঙা, খাৰ আজি কৰি খালেও যথেষ্ট আমেজ পোৱা যায়। এই সকলোৰে ভিতৰত সৰ্বাধিক আকৰ্ষণীয় উপকৰণ হৈছে বিলাহী আৰু মাছৰ লগত কৰা ইয়াৰ জোল। অসমীয়াসকলৰ মাজত এইবিধ খাদ্যৰ প্ৰচলন ইমানেই বেছি যে সমুহীয়া ভোজভাতৰ বেলিকা এই উপকৰণ বাধ্যতামুলক যেন লগা হয়। মাছৰ ভিতৰতো আকৌ টেঙা জোলৰ বাবে পাভ, কুঢ়ি, এলেং , ভাঞন আদি অধিক উত্তম। পকা ঔটেঙা অধিক মনোগ্ৰাহী হয়। গুৰুত্বপুৰ্ণ যে জাতিলাউৰ মঙহাল অংশটোৰ উপৰি ইয়াৰ বাকলি অংশটোও খোৱাৰ উপযোগী। ইবিলাকৰ সলনি পৰিৱেশত অলপ গৰম পৰাৰ সময়ত (ফাগুন-চ’ত মাহত) ওলোৱা পকা কণ বিলাহীৰ লগত ভাজি অথবা তৰকাৰী কৰি খালেও যথেষ্ট তৃপ্তি পোৱা যায়। মুঠতে কাজী তিৰোতাই যেনেকৈ সাধাৰণ টুকুৰা-টুকুৰ কাপোৰকে চিলাই চকুত লগা বস্তু তৈয়াৰ কৰিব পাৰে, তেনেকৈ নিপুণ ৰান্ধনীয়েও জাতিলাউৰ লগত ই বিধ-সিবিধ দ্ৰব্য মিহলাই বিবিধ তৃপ্তিদায়ক আহাৰ প্ৰস্তুত কৰি উলিয়াবও পাৰে।

জাতিলাউ খাই যেনেকৈ তৃপ্তি পোৱা যায় তেনেকৈ ইয়াক খোৱাৰ জৰিয়তে পুষ্টিও গোটাব পৰা যায়। ইয়াৰ ১০০ গ্ৰাম দ্ৰব্যত পোৱা পুষ্টি উপাদানবোৰ এনেধৰণৰ-

 

উপাদান

পৰিমাণ

 

ভিটামিন

জলীয় বাষ্প

৯৬.১ গ্ৰাম

নাই

কাৰ্ব’হাইড্ৰেট

২.৫ গ্ৰাম

বি১

০.০০৩ মি: গ্ৰাম

প্ৰ’টিন

০.২ গ্ৰাম

বি২

০.০১ মি: গ্ৰাম

আঁহ

০.৬ গ্ৰাম

বি৩

০.২ মি: গ্ৰাম

চৰ্বি

০.১ গ্ৰাম

চি

৬.০ মি: গ্ৰাম

মেগনিছিয়াম

৫.০ মি: গ্ৰাম

শক্তি

১২ কেলৰি

আইৰন

০.৭ মি: গ্ৰাম

 

 

কেলচিয়াম

২০ মি: গ্ৰাম

 

 

ফছফৰাছ

১০ মি: গ্ৰাম

 

 

পটাছিয়াম

৮৭ মি: গ্ৰাম

 

 

ছডিয়াম

১.৮ মি: গ্ৰাম

 

 

ক’পাৰ

০.০৫ মি: গ্ৰাম

 

 

ছালফাৰ

১০.০ মি: গ্ৰাম

 

 

 

উক্ত তালিকাৰ পৰা এইটো স্পষ্ট হৈ উঠে যে জাতিলাউ ভালেমান পুষ্টি উপাদানৰ উৎস। একোজন ব্যক্তিৰ সুস্থ-সবল দেহ লাভৰ বাবে লগা প্ৰায় সকলো উপাদানকে ইয়াত কম-বেছি পৰিমাণে পোৱা যায়। আনফালেদি ঔষধি গুণসম্পন্নও। মুখ্যত: ই লঘুপাকী খাদ্য আৰু সকলো বয়স বা সকলো ৰোগীৰ বাবে উপকাৰী হিচাপে পৰিগণিত হৈ আহিছে। বিশেষকৈ কাৰ্বহাইড্ৰেট আৰু প্ৰ’টিনৰ পৰিমাণ কম হোৱা, শক্তিৰ পৰিমাণ কম হোৱাৰ লগতে পটাছিয়াম আৰু ছডিয়ামৰ সবল স্থিতিৰ বাবে জাতিলাউ মধুমেহ আৰু হৃদৰোগীৰ বাবে অতি উপযোগী খাদ্য বুলিব পাৰি। আয়ুৰ্বেদ শাস্ত্ৰৰ ভিতৰত ই বিপাক মধুৰ, শীতবীৰ্ষক, মেধাবৰ্ধক, নিদ্ৰাকাৰক, তৃষ্ণা নিবাৰক, কফ নিবাৰক, মুত্ৰজনক, গৰ্ভপোষক, শুক্ৰবৰ্ধক, দ্ৰাহ প্ৰশমক, জ্বৰ নিবাৰক আৰু ৰচক (ৰেচন কাৰ্যৰ সহায়ক)। ইবিলাকৰ উপৰি ই বাত আৰু পিত্ত, পুয়মেহ অৰ্থাৎ প্ৰস্ৰাৱৰ লগত পুঁজ যোৱা ৰোগত বিশেষ উপকাৰী বুলি গণ্য কৰা হয়। পিছে সাধাৰণ জাতিলাউৰ বিপৰীতে এবিধ তিতা বনৰীয়া লাউ, যি লাউ বিষাক্ত বুলি তথ্য পোৱা যায়। গতিকে এনে লাউ খোৱাৰ পৰা বিৰত থকা উচিত। এইবিধ লাউৰ বাহিৰে অন্য জাতিলাউ খোৱাৰ প্ৰতি আমি যত্নপৰ হোৱা উচিত হ’ব।

লেখক: অৰ্পণ দত্ত (জি এনআৰচি স্বাস্থ্য)



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate