অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

শাক-পাচলি

শাক-পাচলিৰ বতৰ-

 

শীতকাল বুলি ক’লেই সতেজ সেউজীয়া শাক-পাচলিবোৰ চকুৰ আগত জিলিকি উঠে। চকুৰ আগত জিলিকি উঠাই নহয়, বজাৰলৈ গ’লে শাক-পাচলিবোৰে মোক খা, মোক খা বুলি আমাৰ জিভাৰ পানী যেন বোঁৱাই দিয়ে। শীতকালি যিমান পাৰে সেউজীয়া শাক-পাচলিবোৰ মনৰ হেঁপাহ পলুৱাই খাই ল’ব লাগে। কিমান বিধৰ যে শাক-পালেং, বাবৰি, লাই, লফা, চুকা, ধনিয়া, মূলা, সৰিয়হ শাক। আনহাতে কবি, বিলাহী, মটৰ, বেঙেনা আদি আছেই। দক্ষ ৰান্ধনীসকলে জানে কোনবিধ শাক কেনেদৰে জুতি লগাই ৰান্ধি খাব লাগে। ঠাণ্ডা দিনৰ এই পাচলিবোৰ কেৱল সেউজীয়া আৰু সতেজেই নহয়, এই পাচলিবোৰৰ পৰা পোৱা যায় যথেষ্ট পৰিমাণে খনিজ, লৌহ পদার্থ, ভিটামিন আদি— যিবিলাক আমাৰ শৰীৰৰ বাবে অতি প্রয়োজনীয়। আমি ক’ব নোৱাৰাকৈ এই পাচলিবোৰে আমাক জীৱনীশক্তি যোগাই আছে। আমাৰ চকুযুৰি, চুলি, দাঁত, নখ, ছাল,  হিমগ্ল’বিন, দেহৰ হাড়ৰ গঠন এই সকলো সুস্থ-সবল কৰি ৰখাত আমি প্রতিদিনে ভাতৰ লগত খোৱা শাক-পাচলিবোৰে সহায় কৰি আছে। আগৰ লোকসকলে বা আমাৰ আইতা-ককাসকলে বাৰীৰ শাকমুঠিৰ ওপৰতে নিৰ্ভৰ কৰিছিল বাবে তেওঁলোকে এটা নিৰোগী সুস্থ-সবল জীৱন লাভ কৰিছিল। দীর্ঘ আয়ুসো লাভ কৰিছিল। লাহে লাহে মানুহে শাক-পাচলিতকৈ চালানী মাছ, ব্রয়লাৰ কুকুৰাৰ প্ৰতিহে বেছিকৈ নিৰ্ভৰ কৰা হৈছে। ল’ৰা-ছোৱালীক মাংসৰ নামত ব্ৰয়লাৰ খুৱাইহে যেন মাক-দেউতাকে শান্তি পায়। ইফালে ল’ৰা-ছোৱালীৰ কথা ক’বই নালাগে। তেওঁলোকে শাক-পাচলিৰ নাম শুনিলেই নাক কোঁচায়। মাংস নহ’লে ভাত পেটলৈ নাযায়।

শাক-পাচলিৰ হাজৰ গুণ গালেও বর্তমান কিন্তু কেমিকেল সাৰযুক্ত শাক-পাচলি, হাইব্রিড উপায়ে কৰা খেতি-বাতিয়ে আমাৰ ডাঙৰসকলৰো পাচলি খোৱাৰ আনন্দ বহুখিনি কমাই আনিছে। শাক-পাচলি খাবলৈ লৈ ভাবিবলগীয়া হয়— এয়া যেন সাৰহে এসোপা খাইছে। ৰাসায়নিক সাৰযুক্ত খাদ্যই মানৱ সমাজলৈ যে ভাবুকি কঢ়িয়াই আনিছে সেই বিষয়ে বর্তমান বিজ্ঞানীসকল সচেতন হৈছে। সমগ্র বিশ্বতে জৈৱিক সাৰৰ দ্বাৰা খেতি কৰাৰ পোষকতা কৰা হৈছে। আমাৰ দেশতো এই বিষয়ে চিন্তা-চৰ্চা কৰা হৈছে। সঁচাকৈ ইয়াৰ বাবে বিপ্লৱ হোৱা উচিত। নহ’লে খাদ্যৰ বিসংগতিৰ বাবেই ভৱিষ্যতৰ মানৱ সমাজে কি ৰূপ লয় সেই কথা ভাবি আজি সচেতন মহল যথেষ্ট চিন্তিত হৈ পৰিছে। তথাপি শাক-পাচলিৰ বতৰ যিহেতু আহিছে— আহক শাক-পাচলিৰ বিষয়েই আমি অলপ চৰ্চা কৰো।

    বজাৰত শাক-পাচলি কিনোতে অকণমান চিন্তা কৰিব—

  • আমাৰ নিজস্ব ধৰণে কৰা খেতি নে হাইব্ৰীড পদ্ধতিৰে কৰা খেতি। যিমান পাৰে চিনাকি পুৰণি শাক-পাচলি বিক্ৰেতাজনৰ পৰা শাক-পাচলি কিনক। কাৰণ তেওঁৰ পাচলিৰ উৎসৰ বিষয়ে আপোনাৰ বিশ্বাস আছে।
  • বজাৰত কেতিয়াবা আমাৰ পৰম্পৰাগতভাৱে কৰা খেতিৰ শাক-পাচলি পোৱা যায়। সেই বিষয়ে চকু ৰাখিব।
  • পাচলিবোৰ কিনি আনি ৰন্ধাৰ আগেয়ে বাছি-মেলি কমেও আধা ঘন্টামান সময় সৰহ পানীত তিয়াই ৰাখিব। আজিকালি খেতি নষ্ট নহ’বৰ বাবে, পোক আদি নহ’বৰ বাবে বা খেতি ভাল হ’বৰ বাবে নানা ঔষধ প্রয়োগ কৰে। এই ঔষধবোৰ আমাৰ শৰীৰৰ বাবে অতি অপকাৰী। গতিকে পানীত তিয়াই থ’লে পাচলিৰ পৰা ঔষধ যথেষ্ট পৰিমাণে আঁতৰাব পৰা যায়।
  • শাক বাছোতে সাৱধান হ’ব। কাৰণ শাকত চুলি আৰু আন অপতৃণ মিহলি হৈ থাকে। হাতত সময় থাকিলেহে শাক বাছিবলৈ ল’ব। শাক লৰালৰিকৈ বাছি কাটি-মেলি খোৱা বস্তু নহয়।
  • সৰহ পৰিমাণে শাক কিনিলে বাতৰি-কাকতত মেৰিয়াই ফ্ৰীজত থ’ব। তেতিয়া শাক সতেজ হৈ থাকে।
  • ৰাতি বাহিৰত উলিয়াই থ’লেও শাক সতেজ হৈ পৰিব।
  • এতিয়া বজাৰলৈ ওলালেই শাকৰ পয়োভৰ যেতিয়া এসোপামান শাক কিনাতকৈ খোৱা ভাগৰখিনি কিনাই ভাল।সতেজভাৱে খাবলৈ পাব।
  • ধনিয়া, চুকা, পালেঙৰ দৰে শাক লেৰেলি গ’লে ৰন্ধাৰ আধা ঘন্টা আগেয়ে পানীত তিয়াই থ’ব৷ সজীৱ হৈ পৰিব।
  • এতিয়া সজীৱ লাই শাকেৰে ৰান্ধি খাওক হাঁহৰ মাংস। লাই শাকৰ ভাজিখনত মাছ পেলাই দিও খাবলৈ অতি উত্তম। মাথোঁ জুই কমাই ৰাখিব আৰু ঢাকোন মাৰি কম জুইত ৰান্ধিব। পানী দিয়াৰ দৰকাৰ নাই। শাকৰ নিজা পানীৰেই সিজিব।
  • গৰম ভাতৰ সৈতে গৰম লাই শাকৰ ভাজি সানি খাবলৈ অতি সুস্বাদু। চীন-জাপান আদি দেশত গৰম ভাতত লাই শাক মিহিকৈ কুটি মিহলাই দি ঢাকনি মাৰি থয়। এই ভাতৰ সোৱাদ তৃপ্তিকৰ। লাই শাকৰ এটা ধুনীয়া সুবাস বৈ আহে।
  • যিসকলৰ খেতি কৰাৰ চখ আছে, ঘৰৰ সামান্য মাটিটো ধনিয়া, চুকা, পালেং, বাবৰি আদি খেতি কৰিব পাৰে। টাবত জলকীয়া আৰু বিলাহীৰ খেতি কৰিব পাৰে। চহৰত থকা লোকে নিশ্চয় এইখিনি কৰি আনন্দ লভিব পাৰে। ঘৰৰ ছাদত পলিথিনৰ ছিট্‌ পাৰি তাৰ ওপৰত জোখমতে মাটি দি কিছুমান শাক-পাচলিৰ খেতি কৰিব পাৰে। মজলীয়া আকাৰৰ ড্রামত মাটি ভৰাই লাও ৰঙালাউ খেতি কৰি বগাবলৈ চাং দি ঘৰৰ ছাদতে এখন সুন্দৰ কিচ্চেন গার্ডেন গঢ়ি তুলিব পাৰে।

লেখিকা: ৰাণু দাস চৌধুৰী, অসম বাণী।



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate