তিলৰ লগত আমাৰ সম্পৰ্ক বহুদিনীয়া। আমাৰ বাপতিসাহোন উৎসৱ বিহুৰ প্ৰধান আকৰ্ষণ হৈছে তিলেৰে বনোৱা বিভিন্ন পিঠা পনা যেনে তিল পিঠা, সুতুলি পিঠা, তিলৰ লাড়ু আদি। ভোগৰ উৎসৱ ভোগালী মানেই হৈছে এনেবোৰ পিঠা পনাৰ জুতি লোৱাৰ বতৰ।
তিল নহলে আমাৰ বিহুৱেই উকা হৈ পৰিব। ইয়াৰ উপৰিও পৰম্পৰাগত থলুৱা খাদ্য সম্ভাৰত তিলৰ বিভিন্ন সুস্বাদু ব্যঞ্জন আছে যেনে তিলৰ চাটনি, তিল দি বনোৱা মাছ বা মাংসৰ ব্যঞ্জন ইত্যাদি।
মুঠৰ ওপৰত কবলৈ গলে তিল আমাৰ বাবে অতি আদৰৰ বস্তু।
অতি প্রাচীন কালৰে পৰা অসমকে ধৰি ভাৰতৰ অন্যান্য বহুতো ৰাজ্যত তিলৰ ব্যৱহাৰ চলি আহিছে। গুণৰ ফালৰ পৰা উৎকৃষ্ট হোৱাৰ বাবে ইয়াৰ চাহিদা বেছি।
তিলৰ পৰা তৈয়াৰ কৰা তিল তেল চুলিৰ বাবে অতি উপকাৰী। এছিয়া আৰু মধ্য প্ৰাচ্যৰ দেশসমূহতো বিভিন্ন ব্যঞ্জনত তিলৰ ব্যৱহাৰ হয়।
কিছুমান দেশত শুকানকৈ ভজা তিল আৰু অলিভৰ পৰা তৈয়াৰ কৰা 'তাহিনী' নামৰ ব্যঞ্জন অতি জনপ্ৰিয়।
থাইলেণ্ড, ভিয়েটনাম আদি দেশৰ বিভিন্ন ব্যঞ্জনত তিল এবিধ আৱশ্যকীয় উপকৰণ। ইয়াৰ উপৰিও চাইনীজ ব্যঞ্জনতো তিল তেলৰ ব্যৱহাৰ হয়।
নকলেও হব যে এইবোৰ দেশৰ লোকৰ ছাল চুলিৰ সৌন্দৰ্য্যই সকলোকে আকৰ্ষণ কৰে। তিলৰ বৈজ্ঞানিক নাম Sesamum indicum।
আমাৰ দেশত তিল প্ৰধানকৈ দুবিধ এবিধ বগা তিল আৰু আনবিধ ক'লা তিল।
ইয়াৰ ভিতৰত বগা তিলত থকা আইৰণৰ পৰিমাণ ক'লা তিলতকৈ বেছি। আনহাতে ক'লা তিলত কেলচিয়ামৰ পৰিমাণ বগা তিলতকৈ বেছি।
বগা তিল মুখ্যতঃ বিভিন্ন ব্যঞ্জনৰ উপকৰণ হিচাপে ব্যৱহাৰ কৰা হয় যেনে বান, কুকিজ, কেক, বাৰ্গাৰ, তিলৰ চিক্কি আদি বনাওঁতে আৰু ক'লা তিল অন্য বহুতো উদ্দেশ্যত ব্যৱহাৰ কৰা হয়।
অসমত অৱশ্যে বগা তিলতকৈ ক'লা তিলহে বেছি ব্যৱহাৰ হয়।
স্বাস্থ্য ৰক্ষা আৰু সৌন্দৰ্য্য চর্চাত তিলৰ ভূমিকা কিমান গুৰুত্বপূৰ্ণ অলপ জানি লওঁ আহক।
তিলত থকা প্ৰটিনে আমাক শক্তি প্ৰদান কৰে, শৰীৰ গঠনত সহায় কৰে আৰু মাংসপেশী মজবুত কৰে।
ইয়াত থকা কেলচিয়াম, জিঙ্ক আদিৰ বাবে-
তিল তেলত থকা ট্ৰাইঅ'চিন নামৰ এবিধ এমিন' এচিডে চেৰ'টনিন নামৰ হৰমনৰ নিঃসৰণ বৃদ্ধি কৰে।
ইয়াৰ ফলত-
ইয়াৰ উপৰিও তিলত থকা চেচামিন(sesamin) আৰু চেচামলিন(sesamolin) নামৰ যৌগইও কলেষ্টৰল সমস্যা কম কৰাত সহায় কৰে।
বগা তিলত আইৰণৰ পৰিমাণ বেছি থাকে বাবে ই ৰক্তহীনতা দূৰ কৰাত সহায় কৰে।
আনহাতে ক'লা তিলত কেলচিয়াম বেছি থকা বাবে ই-
গৰ্ভস্থ শিশুৰ বিকাশতো সহায় কৰে বাবে গৰ্ভৱতী মহিলাৰ বাবে তিল উপকাৰী।
শেহতীয়া গৱেষণাৰ পৰা দেখা গৈছে যে তিলে কেনচাৰৰ ৰেডিয়েচন চিকিৎসাৰ ক্ষতিকাৰক প্ৰভাৱৰ পৰাও ৰক্ষা কৰে।
তিল তেল গৰম কৰি চুলিৰ গুৰিত ভালকৈ মালিচ কৰিব লাগে। শ্বেম্পু কৰাৰ দিনা বা আগদিনা তেনেকৈ মালিচ কৰি গৰম পানীত তিয়াই চেপি লোৱা টাৱেলেৰে মূৰটো ২০ মিনিট মান বান্ধি ৰাখিব লাগে।
তাৰ পিছত কোমল শ্বেম্পুৰে চুলি ধুব লাগে। সপ্তাহত দুদিনমান এনেকৈ কৰিলে চুলি সৰা সমস্যা ভালেখিনি কমি যায়।
তিল তেলৰ লগত অলিভ অইল, কেষ্টৰ অইল আদিও সম পৰিমাণে মিহলাই একেদৰে ব্যৱহাৰ কৰিব পাৰি।
চুলিৰ সমস্যা থকা লোকে মাজে মাজে তিলৰ ব্যঞ্জন খালেও সুফল পাব।
প্ৰাচীন আয়ুৰ্বেদ শাস্ত্ৰ যেনে চৰক সংহিতা আদিত তিলৰ গুণাগুণ আৰু বিভিন্ন ৰোগত ইয়াৰ প্ৰয়োগ সম্বন্ধে বিস্তৃত বৰ্ণনা আছে।
তিলে প্ৰকুপিত বায়ুক প্ৰশমন কৰে।
সেয়েহে আয়ুৰ্বেদত বিভিন্ন বায়ুজনীত ৰোগত তিল তেলৰ ব্যৱহাৰ হয়। পৰম্পৰাগত থলুৱা চিকিৎসা পদ্ধতি আৰু সৌন্দৰ্য্য চর্চাতো তিল তেলৰ বহুল ব্যৱহাৰ হোৱা দেখা যায়।
অতীজৰ বৈদ্যসকলৰ এই জ্ঞানকে আৰ্হি হিচাবে লৈ আজিৰ বৈদ্যসকলে শাস্ত্ৰীয় পদ্ধতিৰে চিকিৎসা সেৱা আগবঢ়াই আছে।
ঠিক তেনেদৰে আমাৰ থলুৱা খাদ্যসম্ভাৰত থকা তিলৰ ব্যঞ্জন থকাটো আমাৰ পূৰ্বজসকলৰে অৱদান।
স্বাস্থ্যসন্মত এই ব্যঞ্জন সমূহেই আমাৰ সুস্বাস্থ্যৰ মূল চাবিকাঠি।
বি:দ্ৰ:-
কিছুমান ব্যক্তিৰ শৰীৰত কেতিয়াবা তিলৰ পৰা এলাৰ্জি হোৱাৰ সম্ভাৱনা থাকিব পাৰে। অত্যাধিক মাত্ৰাত বা নিয়মিতভাৱে তিলৰ সেৱন কৰা অনুচিত।
লেখিক: ডাঃ ৰেইনী দেৱী
উৎস: স্বাস্থ্য দ্য হেলথ ছলিউশ্যনছ
ফোন নং- 7399114617
শেহতীয়া উন্নীতকৰণ: : 3/18/2020