অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ডালিমৰ ঔষধি গুণ :

ডালিমৰ ঔষধি গুণ :

 

গৱেষক ডালিমৰ ৰাসায়নিক বিশ্লেষণ কৰি পাইছে যে প্ৰতি ১০০ গ্ৰাম ৰসত ৭৮ শতাংশ পানী, ১৬ শতাংশ প্ৰ’টিন, ০.১ শতাংশ খনিজ পদাৰ্থ, ৫.১ শতাংশ আঁহজাতীয় পদাৰ্থ আৰু ১৪.৫ শতাংশ কাৰ্ব’হাইড্ৰেট উপলব্ধ। ভিটামিন আৰু খনিজ পদাৰ্থৰ ভিতৰত ১০ মিলিগ্ৰাম শতাংশ কেলচিয়াম, ৭০ মিলিগ্ৰাম শতাংশ ফছফৰাছ, ০.৩ মিলিগ্ৰাম শতাংশ আইৰণ, ০.০৬ মিলিগ্ৰাম শতাংশ থিয়মাইন, ০.১০ মিলিগ্ৰাম শতাংশ ৰিব’ফ্লেভিন আৰু ০.৩ মিলিগ্ৰাম নিয়াছিন আৰু ভিটামিন চি ১৬ মিলিগ্ৰাম শতাংশ পোৱা যায়। ডালিমৰ কেলৰি শক্তি ৬৫।

ডালিমৰ ৰস বিভিন্ন বেমাৰৰ বাবে অতি উপকাৰী বন-দৰৱ আৰু খাদ্যও। জ্বৰ আৰু গাৰ সাধাৰণ অসুস্থতাত পিয়াহ কমাবলৈ ডালিমৰ ৰস অতি প্ৰয়োজন। বৃহদান্ত্ৰ ফুলিলে ডালিমৰ ৰসে আৰোগ্য কৰে। পিতৰসৰ পৰা বমি হ’লে অথবা আন কোনো কাৰণতে বমি বমি ভাব হ’লে, পেট ফুলিলে আৰু অতিপাত পিতৰস নিঃসৃত হৈ বুকু বিষালে এচামুচ ডালিমৰ ৰসৰ লগত এচামুচ মৌ মিহলাই খাব লাগে। তেতিয়া এনে বেমাৰসমূহৰ পৰা বেছ আৰাম পোৱা যায়। ডায়েৰিয়া হ’লে ৫০ মিলিলিটাৰমান ডালিমৰ ৰস সঘনে খান লাগে। তেতিয়া ডায়েৰিয়া নিয়ন্ত্ৰণলৈ আহে। শৌচৰ লগত তেজ ওলালেও তেজ ততালিকে বন্ধ হৈ যায়। বিশেষজ্ঞৰ মতে, কনজাংটিভিটিছ হ’লে চকুৰ ডালিমৰ ৰস প্ৰয়োগ কৰিলে অতি সোনকালেই আৰোগ্য হয়।

ডালিমৰ শুকান বাকলিৰ পাউডাৰে তৈয়াৰ কৰি জালুক আৰু নিমখৰ লগত মিহলাই দাঁত মাজিলে দাঁতৰ আলু শক্তিমন্ত হয়। তদুপৰি পায়েৰিয়া আৰু আলুৰ পৰা তেজ ওলোৱা বন্ধ হয়। দাঁত পৰিষ্কাৰ হয় আৰু বহু দিনলৈ দাঁত মজবুত হৈ থাকে।

গৱেষকৰ মতে, ডালিমৰ শিপাৰ বাকলিত এবিধ উপক্ষাৰ থাকে। তাক পিউনিচাইন বোলে। এই পিউনিচাইনে ফিটা পেলু সমুলঞ্চে ধ্বংস কৰিব পাৰে। সেয়ে বয়সীয়াল লোকৰ ফিটা পেলু হ’লে ২০-৩০ চামুচ পৰিমাণৰ শিপাৰ বাকলিৰ ৰস অলপ-অলপকৈ এঘন্টাৰ মূৰে মূৰে খুৱাব লাগে। শেষৰ চামুচৰ পাছতেই ৰোগীক জুলাপ খুৱাব লাগে।

ডালিমৰ আদি বাসস্থান ইৰাণ আৰু আফগানিস্তান। তাৰ পাছত ডালিম ইউৰোপ আৰু ভূমধ্য সাগৰীয় অঞ্চল কেতবোৰত অনা হৈছিল। পাছত ভাৰতবৰ্ষ, চীন, জাপান আদি দেশত বিস্তাৰিত হৈ পৰিল।

লেখক: ডাঃ পবিত্ৰ কুমাৰ পাটোৱাৰী(অসম বাণী)



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate