<p style="text-align: justify; "> </p> <p style="text-align: justify; ">এৰীপলুৰ প্ৰধান খাদ্যবৃক্ষ হৈছে এৰা গছ (Ricinuscommunis) আৰু কেচেৰু (Heteropanax Pragranseem) । এবাহ সুস্থ-সবল এৰি পলু তুলিবলৈ পলুৰ স্তৰ অনুসৰি পাতৰ যোগান দিয়া প্ৰয়োজন । চালুকীয়া অৱস্থাৰ পৰা পূৰঠ অৱস্থালৈকে এবাহ এৰীপলুৱে চাৰিটা চালকটা অৱস্থা আৰু চাৰিটা পলু অৱস্থা অতিক্ৰম কৰি জীৱনচক্ৰৰ পূৰ্ণাংগ অৱস্থালৈ গতি কৰে । এৰীপলু অৱস্থা অনুসৰি প্ৰধানকৈ এৰীপলুৰ মুখ্য খাদ্য এৰাপাতৰ ৰ্নিৰ্বাচন অতি সূক্ষ্মভাৱে কৰিব লগা হয় । এৰীপলুৰ বাবে পাতৰ নিৰ্বাচন :- (Selection Castor leaf) চালুকীয়া পলুৰ বাবে প্ৰথম আৰু দ্বিতীয় পলুৰ বাবে কুমলীয়া পাত আৰু তৃতীয়-চতুৰ্থ পলুৰ বাবে কুমলীয়া পাত আৰু পঞ্চম স্তৰৰ বাবে ক্ৰমান্বয়ে পূৰঠ এৰাপাতৰ প্ৰয়োজন ।</p> <h3 style="text-align: justify; ">প্ৰথম অৱস্থাৰ এৰীপলু পালন -</h3> <p style="text-align: justify; ">১) প্ৰথম অৱস্থাৰ এৰীপলুবোৰে ৩-৪ দিন পৰ্যন্ত পাত খায় । ৩-৪ দিন পাত খোৱাৰ পাছত পলুবোৰ ২৫-২৮ ঘণ্টা চালকটা অৱস্থাত থাকে । গ্ৰীষ্মকালত পলু প্ৰথম অৱস্থাত ৩ দিন আৰু শীতকালত ৪ দিন পৰ্যন্ত থাকে ।</p> <p style="text-align: justify; ">২) এৰীপলুৰ বাবে ২৭° পৰা ২৮° উষ্ণতাৰ প্ৰয়োজন ।</p> <p style="text-align: justify; ">৩) ডলা বা কাঠৰ ট্ৰে’ত যদি এৰীপলু পালন কৰা হয়, তেন্তে প্ৰথম অৱস্থাত এবাৰ এৰীপলুখিনি পৰিষ্কাৰ কৰিব লাগে আৰু এৰীপলু থোৱা ডলাৰ পৰিসৰ বৃদ্ধি কৰিব লাগে ।</p> <p style="text-align: justify; ">৪) পুৱা-গধূলি আৰু দুপৰীয়া নতুন পাত এৰীপলুখিনিক দিব লাগে । অৱশ্যে প্ৰথম অৱস্থাত পুৱা আৰু গধূলি পাত দিলেই যথেষ্ট হয় ।</p> <p style="text-align: justify; ">৫) যদি জলীয় বাষ্প ৮০ শতাংশ কম থাকে তেন্তে ডলাৰ তলত মমৰ কাগজ (পেৰস্ফিন পেপাৰ) প্ৰয়োগ কৰি পানীত তিয়াই দিয়া স্পঞ্জৰে পলুখিনি চাৰিওফালে মেৰিয়াই ওপৰত আকৌ মমৰ কাগজেৰে ঢাকি দিব লাগে ।</p> <h3 style="text-align: justify; ">দ্বিতীয় অৱস্থাৰ এৰীপলু পালন পদ্ধতি -</h3> <p style="text-align: justify; ">১) চিত্ৰত দেখুওৱাৰ দৰে দ্বিতীয় অৱস্থাৰ এৰীপলুবিলাকক ৰঙা চানেকীয়া এৰাপাত খুৱাব লাগে ।</p> <p style="text-align: justify; ">২) যদি আমি এৰাপাতখিনি কাটি দিওঁ, তেন্তে এক বৰ্গ চেণ্টিমিটাৰৰ জোখত কাটি দিব লাগে ।</p> <p style="text-align: justify; ">৩) এৰীপলুখিনিক দিনে ২-৩ বাৰকৈ এৰাপাত দিব লাগে ।</p> <p style="text-align: justify; ">৪) দ্বিতীয় অৱস্থাত এৰীপলুখিনি ৩-৪ দিন পৰ্যন্ত পাত খাই আৰু ২৫-২৮ ঘণ্টা সময় চাল কাটিবলৈ প্ৰয়োজন হয় ।</p> <h3 style="text-align: justify; ">তৃতীয় অৱস্থাৰ এৰী পলু পালন -</h3> <p style="text-align: justify; ">১) তৃতীয় অৱস্থাৰ এৰীপলুৰ বাবে মধ্যমীয়া পূৰঠ এৰাপাত খাবলৈ দিব লাগে ।</p> <p style="text-align: justify; ">২) মধ্যমীয়া অৱস্থাৰ এৰীপলুখিনি দিনে তিনিবাৰকৈ পাত দিয়াৰ প্ৰয়োজন ।</p> <p style="text-align: justify; ">৩) এই অৱস্থাত পলুৰ ডলাৰখন এবাৰেই পৰিষ্কাৰ কৰা প্ৰয়োজন ।</p> <p style="text-align: justify; ">৪) তৃতীয় অৱস্থাত এৰীপলুখিনি ৩-৪ দিন পৰ্যন্ত থাকে আৰু চাল কাটিবলৈ সিহঁতক ২৫-২৮ ঘণ্টা সময়ৰ প্ৰয়োজন ।</p> <h3 style="text-align: justify; ">চতুৰ্থ অৱস্থাৰ এৰীপলু পালন -</h3> <p style="text-align: justify; ">১) চতুৰ্থ অৱস্থাৰ পৰা এৰীপলুখিনিক পূৰঠ এৰাপাত দিয়াৰ প্ৰয়োজন । পলুখিনিক দিনে ৪ বাৰকৈ পাত দিয়াৰ প্ৰয়োজন ।</p> <p style="text-align: justify; ">২) চতুৰ্থ অৱস্থাৰ পৰাই এৰীপলুত মমৰ কাগজ আৰু ফমফেডৰ প্ৰয়োজন নাই । মমৰ কাগজৰ সলনি পুৰণি বাতৰি কাগজ কাঠৰ ট্ৰে’ৰ তলত পাৰি দিব লাগে ।</p> <p style="text-align: justify; ">৩) চতুৰ্থ অৱস্থাত থকা ডলাৰ পলুখিনি প্ৰতিদিনেই পৰিষ্কাৰ কৰা প্ৰয়োজন ।</p> <p style="text-align: justify; ">৪) চতুৰ্থ অৱস্থাৰ পৰাই এৰীপলুখিনি থোৱা ডলাৰ সংখ্যা বঢ়াই দিব লাগে, যাতে পলুখিনি ওপৰা-ওপৰিকৈ নাথাকে ।</p> <p style="text-align: justify; ">৫) প্ৰতিদিনে ৪ বাৰকৈ পাত দিয়া প্ৰয়োজন ।</p> <h3 style="text-align: justify; ">পঞ্চম অৱস্থাৰ এৰীপলু পালন -</h3> <p style="text-align: justify; ">১) পঞ্চম অৱস্থাৰ এৰীপলুখিনিক সম্পূৰ্ণ এৰাপাত খাবলৈ দিয়া প্ৰয়োজন । পাতখিনি যাতে হালধীয়া পৰা নহয়, তালৈ লক্ষ্য ৰাখিব লাগে ।</p> <p style="text-align: justify; ">২) প্ৰতিদিনে পলুৰ ডলাবোৰ পৰিষ্কাৰ কৰা প্ৰয়োজন ।</p> <p style="text-align: justify; ">৩) প্ৰতিদিনে ৪ বাৰকৈ পাত দিব লাগে । পাতখিনি একোটা নিৰ্দিষ্ট সময়ৰ অন্তৰে অন্তৰে দিয়া উচিত ।</p> <p style="text-align: justify; ">লক্ষ্য ৰাখিব লাগে যাতে এৰীপলুক খাবলৈ দিয়া এৰাপাতখিনি নিৰোগী, স্বাস্থ্যৱান আৰু সতেজ হ’ব লাগে । সুস্থ আৰু সবল এৰাপাত প্ৰয়োগেৰে এবাহ সুন্দৰ এৰীপলু ৰেচম পালকে তুলিব পাৰে ।</p> <p style="text-align: justify; "><b><i>লেখিকা :- মামণি দাস সেনাপতি, নিলাক্ষী নাথ শইকীয়া</i></b></p> <p style="text-align: justify; "><b><i>উৎস :- অসমীয়া খবৰ</i></b></p> <p style="text-align: justify; "> </p>