স্বাস্থ্য

স্বাস্থ্য কিটিপ

বাচন-বৰ্তনত লগা দাগ কিদৰে উঠাব

আমাৰ দৈনিক ব্যৱহৃত বাচন-বৰ্তন আদিত ক’ব নোৱাৰাকৈ বিভিন্ন ধৰনৰ দাগ লাগে । পিছে কিহৰ দাগ কিদৰে উঠাব পাৰি সেইবিষয়ে জনা থাকিলে বস্তুবিধ পুনৰ ব্যৱহাৰৰ উপযোগী হৈ পৰে । সুন্দৰ, চিকমিকীয়া হয় । তেন্তে আহক, বাচন-বৰ্তনত লগা কিদৰে উঠাব পাৰি জানি লওঁ –
১) পিতলৰ  বাচন পৰিষ্কাৰ কৰিবলৈ নেমুৰ ৰসেই উত্তম উপাদান । ইয়াৰোপৰি সম পৰিমাণৰ ভিনেগাৰ আৰু পানী একেলগে মিহলাই পিতলৰ বস্তুবোৰ তাত কেইঘণ্টামান ডুবাই ৰাখক । তাৰ পিছত এডাল ব্ৰাছেৰে জোৰেৰে ঘঁহি ধুই পেলাওক । পৰিষ্কাৰ কোমল কাপোৰেৰে পিছত মচিব । চিকচিকীয়া হৈ পৰিব ।
২) তামৰ বাচন পৰিষ্কাৰ কৰিবলৈ চৌকাৰ ছাই ব্যৱহাৰ কৰক । ছাইৰ অভাৱত ফটা গাখীৰেৰেও এনে বাচন ধুব পাৰে ।
৩) এলুমিনিয়ামৰ বাচনবোৰ লেতেৰা হ’লে এটুকুৰা ফটা কাপোৰ নেমুটেঙাৰ ৰসত জুবুৰিয়াই লৈ ভালদৰে ঘঁহিব ।
৪) কঁহ ধৰা কাঁহ-পিতলৰ বাচন তেঁতেলী আৰু নিমখ দি মাজিলে উজ্জ্বল চকচকীয়া হৈ পৰিব ।
৫) ষ্টীলৰ বাচন আৰু কাঁহৰ বাচন চাউল ধোৱা পানীত লৈ কোমল জাবৰেৰে ঘঁহিলেই চাফা হয় ।
৬) প্লাষ্টিকৰ বাচন বা আচবাব –পত্ৰবোৰ কেৰাচিন তেলেৰে ঘঁহি ধুই দিয়ক । দেখিব, চিকচিকীয়া হৈ পৰিছে ।
৭) থাৰ্ম’ফ্লাক্স বা পানীৰ বটলৰ ভিতৰ ভাগ চাফা কৰিবলৈ অলপ গৰম পানী ভৰাই কিছু সময় থৈ দিয়ক । তাৰ পিছত কাগজ টুকুৰা-টুকুৰকৈ ফালি তাত ভৰাই পোন্ধৰ মিনিটমানৰ পিছত জোকাৰি উলিয়াই পেলাব । ভিতৰখন চাফা হৈ পৰিব ।
৮) ননষ্টিক পেন চাফা কৰিবলৈ এটুকুৰা নেমু কাটি লওক । এই নেমুৰে ঘঁহি দিলে সহজতে চাফা হয় ।
৯) দৈনিক ব্যৱহৃত কেৰাহীৰ ভিতৰত ডাঠ ক’লা চামনি পৰিলে দুটুকুৰামান নাৰিকলৰ বাকলি কেৰাহীত পুৰি দিবচোন । কেৰাহীৰ ভিতৰৰ ক’লা চামনি দূৰ হৈ যাব ।
১০) যিকোনো বাচনত ৰঙচুৱা বৰণ ধৰিলে পুনৰ উজ্জ্বলতা ঘূৰাই আনিবলৈ চাহ খোৱাৰ পিছত ৰৈ যোৱা চাহপাতখিনি পেলাই নিদি ডিটাৰজেণ্টৰ লগত মিহলাই ঘঁহিব ।
১১) কেটলি, চচপেন আদিৰ তলিখন যদি ক’লা পৰি গৈছে, গৰমপানীত ৱাচিং চ’ডা মিহলাই লৈ চাফা কৰিব ।
১২) যিকোনো বস্তু ৰন্ধাৰ পিছত গৰমে গৰমে পাত্ৰটো ধুই পেলাব । তেলৰ দাগ গুচাবলৈ সহজ হ’ব ।
লেখিকা :- ৰীণা দেৱী
উৎস :- নন্দিনী

/health/9b89cd9ac9be9b89cd9a59cd9af-9959aa/9ac9be99a9a8-9ac9f09cd9a49a89a4-9b29979be-9a69be997-9959bf9a69f09c7-9899a09be9ac