<p style="text-align: justify; ">বগাচোম হ'ল একপ্ৰকাৰ সততে দেখা দিয়া চৰ্মৰোগ ৷ অসম আৰু উত্তৰপূৰ্বাঞ্চলৰ সেমেকা জলবায়ুৰ পৰিবেশত গীষ্মকালত বগাচোম বহুলোকৰ শৰীৰত দেখা যায় ৷ বগাচোম গ্ৰীষ্মপ্ৰধান দেশৰ ৰোগ হলেও জাতি ধৰ্ম নিৰ্বিচাৰে আন দেশৰ লোকৰো হোৱা দেখা যায় ৷ অলপতে এটি চিকিৎসা বিষয়ৰ প্ৰৱন্ধ পঢ়োতে পালোঁ - বিলাতত প্ৰতি ১০০জনৰ ভিতৰত এজনে বগাচোমত ভোগে ৷ ডাক্তৰী ভাষাত বগাচোমক টেনিয়া ভাৰচিকলাৰ বা পাইটাৰিঅ'চিচ ভাৰচিকলাৰ বোলে ৷</p> <p style="text-align: center; "><img class="image-inline" src="https://static.vikaspedia.in/media_vikaspedia/as/images/health/diseases/SalarRog/14233250_1239553772731909_8271611508924233782_n.jpg" /></p> <h3 style="text-align: justify; ">বগাচোমৰ লক্ষণসমূহ কি ?</h3> <p style="text-align: justify; ">গাত বিশেষকৈ ডিঙি,বুকু, পিঠি,কাষলতিৰ তল,পেট,কৰঙণ আৰু বাহুত পখৰাপখৰি দাগ হোৱা ৷<br /> দাগসমূহৰ ৰঙ ছালৰ স্বাভাবিক ৰঙৰ তুলনাত ডাঠ বা পাতলো হব পাৰে ৷<br /> সাধাৰণতে দাগসমূহ বগা, গুলপীয়া, ৰঙচুৱা, হালধীয়া-মুগা বৰণৰ হব পাৰে ৷<br /> পোনতে দাগবিলাকৰ আকাৰ সৰু সৰু হয়, কিন্তু পিছলৈ দাগবোৰ একত্ৰহৈ বহল দেখা যাব পাৰে ৷<br /> দাগবিলাকৰ স্পষ্ট সীমা দেখা যায় ৷<br /> দাগবিলাক সামান্য ছাল এৰাব খোজাৰ নিচিনা (Scaly)৷<br /> চৰ্মখন সাধাৰণতে শুকান হৈ থাকে ৷<br /> কাচিৎ কাৰোবাৰ সেই অঞ্চলসমূহত খজুৱতি থাকিব পাৰে ৷<br /> গ্ৰীষ্মকালত বগাচোমৰ লক্ষণসমূহ বৃদ্ধি পায় আৰু শীতকালত ৰোগৰ প্ৰাদূৰ্ভাৱ কমি যোৱা পৰিলক্ষিত হয় ৷</p> <p style="text-align: justify; ">সংক্ৰমণশীলতা- এই ৰোগ এজনৰ পৰা আনজনলৈ বিয়পা সোঁচৰা ৰোগ নহয় ৷</p> <h3 style="text-align: justify; ">বগাচোম কাৰ হয় ?</h3> <p style="text-align: justify; ">সাধাৰণতে কম বয়সৰ লোকৰ ( ১৫বছৰৰ পৰা ৩০বয়সৰ) বেচিকৈ হোৱা দেখা যায় ৷<br /> বগাচোমত মহিলাৰ তুলনাত পুৰুষ বেচিকৈ আক্ৰান্ত হয় ৷<br /> সকলো বৰণৰ ছালৰ বৰণৰ লোকৰে বগাচোম হব পাৰে ৷<br /> বেচিকৈ ঘাম ওলোৱা (Hyperhydrosis) মানুহৰ বগাচোম বেচিকৈ হয় ৷<br /> যাৰ ছাল বেচি তেলেতীয়া(oily) তেওঁৰ বগাচোম বেচিকৈ হয় ৷<br /> বেচিকৈ গৰম পৰিবেশত কৰ্মৰত লোকৰ বগাচোম বেচিকৈ হয় ৷<br /> দূৰ্বল শৰীৰৰ লোকৰ অৰ্থাৎ দেহৰ ৰোগ প্ৰতিৰোধ (ইমিউনিটি) কম থাকিলে বগাচোম বেচিকৈ হয় ৷</p> <p style="text-align: justify; ">আনহাতে এই ৰোগ মুঠেই চিৰিয়াচ বা বিপদজনক নহয় ৷ তথাপিও ৰোগীয়ে চিন্তাগ্ৰস্ত হৈ পৰে ৷ মানসিকভাবে কোনোজন হতাশাত বা হীনমন্যতা বোধত ভোগে ৷</p> <h3 style="text-align: justify; ">বগাচোম কিয় হয় ?</h3> <p style="text-align: justify; ">৯০শতাংশৰো অধিক মানুহৰ শৰীৰৰ ছালত স্বাভাবিকভাবে এবিধ ফাংগাছ বা ভেঁকুৰে বসতি কৰে – যাৰ নাম হ'ল Pityrosporum ovale ৷ আন এটা নাম হ'ল- Malassezia ৷ এই ভেঁকুৰৰ পৰা সাধাৰণতে মানুহৰএকো ক্ষতি নহয় ৷ কিন্তু আচম্বিতে একোজন ব্যক্তিৰ দেহত এইবিধ ভেঁকুৰৰ সংখ্যা বৃদ্ধি পাবলৈ ধৰে ৷ এইদৰে ভেঁকুৰৰ সংখ্যা বঢ়াৰ ফলত ছালত পৰিবৰ্তন ঘটি চকলা চকল দাগ উৎপন্ন হব ধৰে ৷ কিয় ভেঁকুৰৰএই অস্বাভাবিক আচৰণ আৰম্ভ হয় কোৱা টান ৷ বহু ক্ষেত্ৰত কৰ্মস্থলীৰ পৰিবেশ,শাৰীৰিক দূৰ্বলতা,ছাল তেলতেলীয়া হোৱা আৰু আভ্যন্তৰীন হৰমোনৰ প্ৰভাৱ আদিৰ ফলত এনে হব পাৰে বুলি ভবাৰ থল থাকে ৷</p> <h3 style="text-align: justify; ">বগাচোমৰ চিনাক্তকৰণ :</h3> <p style="text-align: justify; ">এই ৰোগ তেনেই সহজে চিনাক্ত কৰিব পৰা যায় ৷ আলট্ৰাভায়োলেট-ৰেৰ ৰশ্মি পৰিলে বগাচোমৰ দাগবিলাক হালধীয়া-সেউজ বৰণৰহৈ জিলিকি উঠে ৷ সন্দেহ হোৱা ছালৰ অংশ আঁচুৰি(skin scraping) মাইক্ৰস্কোপত চালে ভেঁকুৰ দেখা যাব ৷</p> <p style="text-align: center; "><img class="image-inline" src="https://static.vikaspedia.in/media_vikaspedia/as/images/health/diseases/SalarRog/14192665_1239553796065240_4474213615945544085_n.jpg" /></p> <p style="text-align: justify; ">ভিটিলিগো (Vitiligo) বা ছালৰ বগা পৰা ৰোগৰ পৰা কেনেকৈ পৃথক কৰিব ?</p> <p style="text-align: justify; ">ভিটিলিগোৰ শ্বেতদাগ সাধাৰণতে মুখমণ্ডল,চকু,আঙুলি, মণিবন্ধন,কৰঙণ আদিত বেচিকৈ হোৱা দেখা যায় ৷<br /> ভিটিলিগোৰ শ্বেতদাগ সাধাৰণতে শৰীৰ দুয়ো দিশে সমানে (Bilaterally symmetrical ) হয় ৷<br /> ভিটিলিগোৰ শ্বেতদাগৰ ছালৰ অংশ সদায় মিহি হৈ থাকে ৷</p> <h3 style="text-align: justify; ">বগাচোমৰ চিকিৎসা :</h3> <p style="text-align: justify; ">সাধাৰণতে ইয়াৰ চিকিৎসা বৰ ফলপ্ৰসু হোৱা দেখা যায় ৷<br /> বজাৰত চেম্পু, লোচন,মলম, ক্ৰিম,চাবন আৰু খোৱা টেবলেট পোৱা যায় ৷<br /> কেনাজল শ্বেম্পু আৰু মলম বৰ উপকাৰী দেখা যায় ৷ দৈনিক ১০বা ১৫মিনিট সময় এবাৰকৈ এসপ্তাহ লগালেই ৰোগ আৰোগ্যৰ ফাললৈ আহে ৷<br /> চেলেনিয়াম চাল্ফাইড শ্বেম্পু একেদৰে প্ৰয়োগ কৰিব পাৰি ৷<br /> চিকিৎসকে সততে প্ৰয়োগ কৰা এন্টিফাংগেল টেবলেট কিছুমান হ'ল- ফ্লুকনাজল, ইট্ৰকনাজল,টাৰফিনড্ৰিন, গ্ৰাইচিয়'ফালভিন, মাইকোনাজল আদি ৷</p> <h3 style="text-align: justify; ">বগাচোমৰ ৰোগীসকলে লবলগীয়া সতৰ্কতা-</h3> <p style="text-align: justify; ">চিকিৎসালৈ আৰোগ্য হোৱাৰ পিছত পুনৰাই নহবলৈ সাবধানে থকাতো বাঞ্চনীয় ৷ <br /> গমাৰ্ত হৈ নাথাকিব - ভিজা কাপোৰ পিন্ধি নাথাকিব ৷ চিন্থেটিক কাপোৰ পৰিহাৰ কৰি কপাহী কাপোৰ ব্যৱহাৰ কৰক ৷ <br /> সদায় যথেষ্ট পৰিমাণৰ পানী খাব - শৰীৰৰ বিষাক্ত দ্ৰব্য নিষ্কাষণত পানী অতি উপযোগী ৷ শৰীৰত ভিটামিন আৰুএন্টিঅক্সিডেন্টৰ অভাৱ নহবলৈ সেউজীয়া শাক-পাচলি আৰু ৰঙীন ফলমূল নিয়মীয়াকৈ গ্ৰহণ কৰক ৷ স্বাস্থ্যৰ সুৰক্ষাৰ বাবে ৰোগ প্ৰতিৰোধ কৰা আপোনাৰ ইমিউন প্ৰণালী সবল থকাটো জৰুৰী কথা ৷</p> <h3 style="text-align: justify; ">বগাচোমৰ গৃহ চিকিৎসা :</h3> <p style="text-align: justify; ">কেইটিমান সহজ ফলপ্ৰসু ঘৰুৱা চিকিৎসা হ'ল-</p> <p style="text-align: justify; ">১-মহানিমৰ পাত - এমুঠি নিমপাত দুকাপ পানীত উতলাই চেচা কৰি বগাচোম হোৱা অংশত নিতৌ ১০মিনিট সময় এসপ্তাহলৈ লগাওক ৷ ইয়াৰ পৰিবৰ্তে কেঁচা নিমপাত মিক্সি বা খুন্দনাত মিহিকৈ পিচিলৈয়ো একেদৰে লগাব পাৰে ৷</p> <p style="text-align: justify; ">২-এৰোভেৰা- এলোভেৰাৰ পাত মিক্সি বা খুন্দনাত মিহিকৈ পিচিলৈয়ো একেদৰে লগাব পাৰে ৷ এলোভেৰাত থকা চেলিচাইলিক এচিড, চালফাৰ, চিনামিক এচিড,ফেনল,য়ুৰিয়া আৰু নাইট্ৰজেনে ভেঁকুৰ বৃদ্ধি হবলৈ নিদিয়ে ৷ এৰোভেৰাত থকা ১৪কেডিএ (14kDa ) নামৰ প্ৰটিনে এন্টিফাংগেলৰ দৰে ক্ৰিয়া কৰে ৷</p> <p style="text-align: justify; ">৩-বেকিং চোডা- বগাচোমত ছালৰ অৱস্থা বেচ এচিডিক হৈ পৰে ৷ চোডা খালে পেটৰ এচিডিটি কমাৰ ওপৰিও বগাচোম হ্ৰাস হব ধৰে ৷ খোৱাৰ পৰিবৰ্তে ব্ৰাছেৰে খচি খচি ছাল মাজিলৈ বেকিং পাউদাৰ গাত ৫৷১০মিনিট ঘঁহি গা ধুব লাগে ৷ এসপ্তাহমানত ফল দেখা যাব ৷</p> <p style="text-align: justify; "><i><b>উৎস:ডা০ ভূপেন শইকীয়া</b></i></p>