<p style="text-align: justify; "> </p> <p style="text-align: justify; ">১) নহৰু বা পিঁয়াজ থেঁতেলাই নাকেৰে শুঙিলে মূৰৰ বিষ কমে। নাইবা পূৰৈ শাকৰ গুটি কপালত ঘঁহিলে মূৰৰ বিষ নোহোৱা হয়।</p> <p style="text-align: justify; ">২) দোৰোণ শাকৰ ৰস ২/৩ টোপাল নাকেৰে উজালে মূৰৰ বিষ নোহোৱা হয়। নাইবা সিজুৰ পাতৰ ৰসত কালজীৰা বটি কপালত লেপ দিলে মূৰৰ বিষ নাইকিয়া হয়।</p> <p style="text-align: justify; ">৩) পচতীয়াৰ পাত মোহাৰি শুঙিলে মূৰৰ বিষ কমে, নিশা শোৱাৰ সময়ত গাৰুৰ তলত পচেতীয়াৰ পাত ৰাখিলে ভাল কাম দিয়ে।</p> <p style="text-align: justify; ">৪) এৰা গছৰ শিপা বটি মূৰত প্ৰলেপ দিলে মূৰৰ বিষ নাইকিয়া হয়। নাইবা ৰক্ত কৰৱীৰ শিপা কাটি কপালত প্ৰলেপ দিলে মূৰৰ বিষ নাশ হয়।</p> <p style="text-align: justify; ">৫) বকুলৰ ফুল, পাত বা ফল বটি নাকেৰে ঘ্ৰাণ ল’লে মূৰৰ বিষ নোহোৱা হয়। নাইবা কেঁচা পাণ এখিলা কপালত লগাই ৰাখিলে অথবা ৰুমালেৰে বান্ধি ৰাখিলে মূৰৰ বিষ নোহোৱা হয়।</p> <p style="text-align: justify; ">৬) ছালকুঁৱৰীৰ পাত বটি মূৰত ভৰণ দিলে নাইবা নেমু টেঙা এটা দুফাল কৰি কপালত ঘঁহিলে মূৰৰ বিষ নাইকিয়া হয়।</p> <p style="text-align: justify; ">৭) ৰক্ত চন্দন পতাত ঘঁহি চন্দন তুলি কপালত লগালে মূৰৰ বিষ কমে। ভূতমূলাৰ আগ মোহাৰি কপালত ঘঁহিলেও আদকপালি মূৰৰ বিষ নোহোৱা হয়।</p> <p style="text-align: justify; ">৮) শতমূলৰ ৰস এৱাঁ গাখীৰ আৰু চেনি মিহলাই খালে আদকপালি মূৰৰ বিষ ভাল হয়।</p> <p style="text-align: justify; ">৯) কেহেৰাজ বা ভৃংগৰাজৰ ৰস ছাগলীৰ গাখীৰ মিহলাই ৰ’দত তপতাই তপত থাকোতেই নাকেৰে উজালে আদকপালি বা সূৰয কপালি মূৰৰ বিষ নাইকিয়া হয়।</p> <p style="text-align: justify; ">১০) নীলা অপৰাজিতাৰ শিপা বা পাতৰ ৰস নাকেৰে উজালে মূৰৰ বিষ ভাল হয়। নাইবা নিচাদলত চূণ মিহলাই শুঙিলেও মূৰ কামোৰণি ভাল হয়।</p> <p style="text-align: justify; ">১১) গাখীৰেৰে ক’লা তিল বটি নাকেৰে উজালে আদকপালি বা সূৰ্য কপালি মূৰৰ বিষ ভাল হয়।</p> <p style="text-align: justify; ">১২) ডালচেনি, য’খাৰ আৰু নাৰিকলৰ ফুল সমানে লৈ মিহিকৈ বটি কপাল বা কুমত লেপন দিলে মূৰৰ বিষ নাইকিয়া হয়।</p> <p style="text-align: justify; ">১৩) সূৰুযক্ৰান্তি ফুলৰ শিপা আৰু চন্দ্ৰমালতী ফুলৰ শিপা বটি মূৰত লেপ দিলে সুৰুয কপালি মূৰৰ বিষ নোহোৱা হয়।</p> <p style="text-align: justify; ">১৪) কৰ্পূৰ আৰু বগা চন্দন পিহি কুমত লগালে মূৰৰ বিষ ভাল হয় নাইবা তেজপাত গছৰ ছাল বটি লেপ দিলে মূৰৰ বিষ নাইকিয়া হয়।</p> <p style="text-align: justify; ">১৫) বৰ মানিমুনিৰ পাত আৰু সামান্য লোণ বটি লেপ দিলে আদকপালি মূৰৰ বিষ নোহোৱা হয়।</p> <p style="text-align: justify; ">১৬) গুটি নোহোৱা কোমল ডিমৰু আৰু দূবৰিবন ঘিউৰে ভাজি খালে মূৰ ঘূৰণি ভাল হয়। তুলসীৰ ৰস চেনি মিহলাই খালে মুৰঘূৰণি ভাল হয়।</p> <p style="text-align: justify; ">১৭) লং পুৰি ধোঁৱা শুঙিলে মূৰ ঘূৰণি ভাল হয়। নাইবা ভোটোৰাৰ ছালৰ ৰস পানী মিহলাই খালে বা ছাল বটি মূৰত ভৰণ ল’লে মূৰঘূৰণি ভাল হয়।</p> <p style="text-align: justify; ">১৮) শুঠ (শুকান আদাৰ গুড়ি) গাখীৰৰ লগত মিহলাই নাকেৰে উজালে বা নস্য ল’লে মূৰঘূৰণি ভাল হয়।</p> <p style="text-align: justify; ">১৯) ধপাতৰ পাতত চূণ লগাই কাণৰ দুয়োফালে চাপ দি ৰাখিলে মূৰৰ বিষ কমে।</p> <p style="text-align: justify; ">২০) শুকান নিমপাত, জাতি জালুক আৰু চাউল সমানে লৈ গুড়ি কৰি যিফালে মূৰৰ বিষ, সেইফালে সূৰ্য উদয়ৰ আগতে নাকেৰে শুঙিলে পুৰণি আদকপালি মূৰৰ বিষ ভাল হয়।</p> <p style="text-align: justify; ">২১) পদিনাৰ পাতৰ ৰসত মৌ মিহলাই কপাল আৰু কুমত লগালে মূৰৰ বিষ নাইকিয়া হয়।</p> <p style="text-align: justify; ">২২) পুঁই শাকৰ পাত বটি কপালত প্ৰলেপ দিলে মূৰৰ বিষ নোহোৱা হয়। চম্পা ফুলৰ পাত বা ফুল সৰিয়হৰ তেলেৰে বটি কপালত প্ৰলেপ দিলে মূৰৰ বিষ নোহোৱা হয়।</p> <p style="text-align: justify; "><b><i>উৎস: দেওবৰীয়া সম্ভাৰ</i></b></p>