<p style="text-align: justify; "> </p> <p style="text-align: justify; ">দুয়োটা চকুৰে একেবাৰে নেদেখা হোৱাজনকে আমি অন্ধ বোলো । কিন্তু বিভিন্ন কামৰ বাবে অন্ধতাক বিভিন্ন ধৰণেৰে সংজ্ঞা দিয়া হয় । বিশ্ব স্বাস্থ্য সংস্থাৰ মতে চকুৰ দৃষ্টি Snellen Chart অনুসৰি 3/60 তকৈ কম হ’লে অন্ধ বুলি কোৱা হয় । যিহেতু জুখিবলৈ হ’লে চকুৰোগ চিকিৎসালয়লৈ যাব লাগিব । সেয়ে তাতকৈ সহজ কৰি ডব্লিউ এইচ অ’এ ১৯৭৯ চনত অন্ধতাৰ নতুন সংজ্ঞা এনেদৰে দিছে- ‘যিব্যক্তিয়ে তিনি মিটাৰ দূৰত্বৰ পৰা দিনৰ পোহৰত আঙুলিকেইটা আছে ধৰিব নোৱাৰে, তেনে ব্যক্তিকেই অন্ধ বুলি কোৱা হয় । তদুপৰি আমাৰ দৃষ্টি পৰিসীমা যদি ১০° তকৈ কম হয় তেতিয়া চকুৰ দৃষ্টি 3/60 তকৈ ভাল হ’লেও মানুহজন অন্ধ হিচাপে আখ্যা দিয়া হয় । ভাৰতবৰ্ষত National Programme for Control Of Blindness (NPCB) য়ে ভাৰতৰ বাবে অন্ধতাৰ সীমাটোক আৰু অলপ শিথিল কৰিছে । সেই মতে ভাল চকুটোৰ দৃষ্টি 6/60- তকৈ কম বা দৃষ্টিৰ পৰিধি ২০° তকৈ কম তেতিয়া’হলে তেওঁক অন্ধ বুলি কোৱা হ’ব । বিশ্বৰ স্বাস্থ্য সংস্থা মতে, অন্ধতাৰ মূল কাৰণসমূহ হ’ল- কেটেৰেক্ট, গ্লুক’মা, কৰ্ণিয়াৰ অস্বচ্ছতা, ডায়েবেটিক ৰেটিন’পেথি, জন্মগত অন্ধতা, Age related macular degeneration, Onchocerciasis আৰু অন্যান্য । ভাৰতবৰ্ষত অন্ধতাৰ কাৰণসমূহ বিশ্বৰ কাৰণতকৈ অলপমান সুকীয়া । ভাৰতবৰ্ষত অন্ধতাৰ কাৰণ বিচাৰিবলৈ চাৰিটা সমীক্ষা চলোৱা হৈছিল ।</p> <p style="text-align: justify; ">১) Rapid Assessment of Avoidable Blindness (RAAB)</p> <p style="text-align: justify; ">২) National Programme for Control of Blindness (NPCB)</p> <p style="text-align: justify; ">৩) World Health Ogranisation, NPCB (WHO) Survey.</p> <p style="text-align: justify; ">৪) ICMR Survey.</p> <p style="text-align: justify; ">এই সমীক্ষাকেইটাৰ মতে ভাৰতৰ অন্ধতাৰ কাৰণসমূহ হ’ল – কেটেৰেক্ট, প্ৰতিসৰণ দোষ, গ্লুক’মা, ৰোটিনাৰ অসুখ, অস্ত্ৰোপচাৰৰ ফলত হোৱা ক্ৰুটি, কৰ্নিয়াৰ অস্বচ্ছতা আৰু অন্যান্য ।</p> <p style="text-align: justify; "><b><i>লেখক : ডা: নাৰায়ণ বৰদলৈ</i></b></p> <p style="text-align: justify; "><b><i>উৎস:- দৈনিক জনমভূমি</i></b></p>